ເຮືອລາດຕະເວນຮ່ວມຈີນລາວມຽນມາໄທເຂົ້າສູ່ເຂດສາມຫຼ່ຽມຄຳ
(GMT+08:00) 2011-12-12 11:22:08 cri
ວັນທີ11ທັນວານີ້, ເຮືອລາດຕະເວນຮ່ວມຈີນລາວມຽນມາແລະໄທພ້ອມກັບເຮືອສິນຄ້າ10ລຳໄດ້ເຂົ້າສູ່ທາງເດີນເຮືອລະຫວ່າງຊາດຕາມລຳແມ່ນ້ຳຂອງເຂດສາມຫຼ່ຽມຄຳຊຶ່ງເປັນຈຸດເຊື່ອມຕໍ່ລະຫວ່າງລາວ, ມຽນມາ, ແລະໄທແລ້ວ. ໂດຍແນໃສ່ສະພາບການອາຍາດ້ານຢາເສບຕິດອັນຂ້ຽວຂາດຢູ່ເຂດນີ້, ການລາດຕະເວນຮ່ວມແລະປະຕິບັດກົດໝາຍຂອງ4ປະເທດຈະຖືການຕໍ່ຕ້ານແລະປາບປາມຂະບວນການຄ້າຢາເສບຕິດຂ້າມຊາດເປັນໜ້າທີ່ສຳຄັນອັນໜຶ່ງ.
ສະພາບການປ້ອງກັນຄວາມສະຫງົບຢູ່ເຂດສາມຫຼ່ຽມຄຳມີຄວາມສັບສົນຫຼາຍ, ບັນຫາການຄ້າຢາເສບຕິດຍັງມີຢູ່ຢ່າງໜັກໜ່ວງທີ່ສຸດ, ການກະທຳຜິດໃນການຄາຢາເສບຕິດມີຈຸດພິເສດແບບຫັນເປັນສາກົນແລະມີການຈັດຕັ້ງທີ່ເຂັ້ມແຂງກວ່າເກົ່າ. ໃນປີມໍ່ໆມານີ້, ກົນໄກການຮ່ວມມືສອງຝ່າຍແລະຫຼາຍຝ່າຍລະຫວ່າງຈີນກັບລາວ, ມຽນມາແລະໄທໃນການສະກັດກັ້ນແລະປາບປາມຢາເສບຕິດໄດ້ຮັບການປັບປຸງໃຫ້ດີຂຶ້ນເລື້ອຍໆ, ໃນເບື້ອງຕົ້ນໄດ້ສ້າງກົນໄກຮ່ວມມືໃນການສະກັດກັ້ນແລະປາບປາມຢາເສບຕິດທັງໃນລະດັບສູນກາງ, ລະດັບແຂວງແລະລະດັບທ້ອງຖິ່ນຊາຍແດນ, ໄດ້ແກ້ໄຂຄະດີຄ້າຂາຍຢາເສບຕິດຂ້າມຊາດຂະໜາດໃຫຍ່ຫຼາຍເທື່ອ, ເຊິ່ງໄດ້ໂຈມຕີການກະທຳຜິດໃນຂະບວນການຄ້າຢາເສບຕິດຂ້າມຊາດ. ໃນຕໍ່ໜ້ານີ້, ຈີນຈະເພີ່ມທະວີການຮ່ວມມືໃນການສະກັດກັ້ນແລະປາບປາມຢາເສບຕິດກັບປະເທດທີ່ກ່ຽວຂ້ອງຢູ່ຕາມລຳແມ່ນ້ຳຂອງໂດຍສະເພາະແມ່ນເຂດສາມຫຼ່ຽມຄຳ, ຕັ້ງໜ້າດຳເນີນການປະຕິບັດກົດໝາຍຮ່ວມແບບສອງຝ່າຍແລະໃນບໍລິເວນພາກພື້ນ, ພ້ອມກັນຕໍ່ຕ້ານການຜະລິດແລະຄ້າຂາຍຢາເສບຕິດຂ້າມຊາດ, ໃຊ້ມາດຕະການຕົວຈິງເພື່ອທັບມ້າງກຸ່ມແລະເຄືອຂ່າຍຄ້າຢາເສບຕິດໃນພາກພື້ນນີ້.
