ກອງປະຊຸມສົນທະນາກ່ຽວກັບວຽກງານປ້ອງກັນແລະຄວາມປອດໄພຈີນກັບອາຊຽນຄັ້ງທີ2ຈັດຂຶ້ນຢູ່ປັກກິ່ງ
(GMT+08:00) 2011-12-12 14:42:13 cri
ຕາມຂ່າວຈາກກະຊວງປ້ອງກັນປະເທດຈີນ: ວັນທີ12ທັນວານີ້, ກອງປະຊຸມສົນທະນາກ່ຽວກັບວຽກງານປ້ອງກັນແລະຄວາມປອດໄພລະຫວ່າງຈີນກັບອາຊຽນຄັ້ງທີ2ໄດ້ຈັດຂຶ້ນຢູ່ນະຄອນຫຼວງປັກກິ່ງ, ຜູ້ຕາງໜ້າຈາກພາກສ່ວນທີ່ກ່ຽວຂ້ອງແລະອົງການຄົ້ນຄວ້າວຽກງານປ້ອງກັນປະເທດລວມ31ຄົນຂອງ10ປະເທດອາຊຽນ, ຈີນ, ແລະກອງເລຂາອາຊຽນໄດ້ເຂົ້າຮ່ວມກອງປະຊຸມຄັ້ງນີ້.
ຫົວຂໍ້ຂອງກອງປະຊຸມຄັ້ງນີ້ແມ່ນ"ຈີນກັບອາຊຽນ, ຄວາມປອດໄພ, ຄວນໄວ້ເນື້ອເຊື່ອໃຈກັນແລະຮ່ວມມືກັນ", ໃນກອງປະຊຸມທີ່ຈະດຳເນີນເປັນເວລາ2ວັນ, ຜູ້ຮ່ວມປະຊຸມຈະຄົ້ນຄວ້າແລະປະກອບຄຳຄິດຄຳເຫັນໂດຍສຸມໃສ່3ຫົວຂໍ້, ຄື: "ການຂະຫຍາຍຕົວໃໝ່ຂອງສະພາບຄວາມປອດໄພດ້ານວຽກງານປ້ອງກັນຄວາມສະຫງົບຢູ່ພາກພື້ນອາຊີປາຊິຟິກພາຍໃຕ້ວິກິດການການເງິນ", "ການຮ່ວມມືລະຫວ່າງຈີນກັບອາຊຽນໃນດ້ານຄວາມປອດໄພພາຍໃນຂອບກົນໄກຄວາມປອດໄພຫຼາຍຝ່າຍໃນພາກພື້ນແລະຄົ້ນຄວ້າການສ້າງສາລະບຽບການສ້າງຄວາມໄວ້ເນື້ອເຊື່ອໃຈດ້ານຄວາມປອດໄພ","ຄົ້ນຄວ້າກ່ຽວກັບຈີນແລະອາຊຽນດຳເນີນການຮ່ວມມືຕົວຈິງໃນຂົງເຂດຄວາມປອດໄພໃນຮູບແບບໃໝ່ຢ່າງມີປະສິດທິຜົນ".
ໃນກອງປະຊຸມຄັ້ງນີ້, ຜູ້ແທນຈີນຈະປະກອບຄຳຄິດຄຳເຫັນກ່ຽວກັບຫົວຂໍ້ຕ່າງໆ, ເຊັ່ນ, "ການປ່ຽນແປງຂອງອິດທິກຳລັງສາກົນໃນດ້ານຕ່າງໆແລະຄວາມປອດໄພຂອງອາຊີປາຊິຟິກ", "ການປ່ຽນແປງໃໝ່ດ້ານນະໂຍບາຍຂອງອາເມລິກາກ່ຽວກັບອາຊີປາຊິຟິກ", "ຄຳເຫັນຂອງຈີນກ່ຽວກັບອາຊຽນດຳເນີນການຮ່ວມມືດ້ານຄວາມປອດໄພ", "ການຮ່ວມມືດ້ານຄວາມປອດໄພລະຫວ່າງຈີນກັບອາຊຽນພາຍໃນຂອບຄວາມປອດໄພຂອງພາກພື້ນ", "ຊຸກຍູ້ການຮ່ວມມືລະຫວ່າງຈີນກັບອາຊຽນໃນຂົງເຂດຄວາມປອດໄພໃນຮູບແບບໃໝ່", ແລະຈະແລກປ່ຽນບົດຮຽນ, ຄຳຄິດຄຳເຫັນນຳຜູ້ຮ່ວມປະຊຸມອື່ນໆຢ່າງເລິກເຊິ່ງ.
