ທ່ານຫູຈີນທາວກ່າວວ່າ, ຈີນເຂົ້າຮ່ວມອົງການການຄ້າໂລກໄດ້ນຳເອົາຜົນປະໂຫຍດມາໃຫ້ປະເທດຕ່າງໆໃນໂລກ
(GMT+08:00) 2011-12-12 10:43:35 cri
ວັນທີ 11 ທັນວານີ້, "ກອງປະຊຸມເວທີປຶກສາຫາລືລະດັບສູງກ່ຽວກັບຈີນເຂົ້າຮ່ວມອົງການການຄ້າໂລກຄົບຮອບ 10 ປີ" ໄດ້ຈັດຂຶ້ນຢູ່ປັກກິ່ງ. ໃນກອງປະຊຸມ, ທ່ານຫູຈີນທາວ, ປະທານປະເທດຈີນກ່າວວ່າ, ການກະທຳໄດ້ຢັ້ງຢືນວ່າ, ຈີນເຂົ້າຮ່ວມອົງການການຄ້າໂລກ, ໄດ້ເປີດກວ້າງການໄຂປະຕູສູ່ພາຍນອກ, ໄດ້ນຳເອົາຜົນປະໂຫຍດມາໃຫ້ປະຊາຊົນຈີນ 1 ຕື້ 300 ລ້ານຄົນແລະກໍ່ຈະນຳເອົາຜົນປະໂຫຍດໃຫ້ແກ່ປະຊາຊົນປະເທດຕ່າງໆໃນໂລກເໝືອນກັນ.
ທ່ານຫູຈີນທາວກ່າວວ່າ, ໃນ 10 ປີທີ່ຜ່ານມາ, ຈີນໄດ້ສະໜອງເງິນຊ່ວຍເຫຼືອໃນດ້ານຕ່າງໆໃຫ້ຕ່າງປະເທດຫຼາຍກວ່າ 170 ຕື້ຢວນ, ໄດ້ຍົກເວັ້ນໜີ້ສິນເກືອບ 30 ຕື້ຢວນໃຫ້ແກ່ 50 ປະເທດທຸກຍາກແລະ 30 ປະເທດດ້ອຍພັດທະນາທີ່ເຖິງວັນກຳນົດຕິດໜີ້ສິນ, ໄດ້ອົບຮົມພະນັກງານໃນດ້ານຕ່າງໆ 6 ໝື່ນກວ່າຄົນໃຫ້ 173 ປະເທດທີ່ພວມພັດທະນາແລະ 13 ອົງການຈັດຕັ້ງສາກົນໃນພາກພື້ນ, ໄດ້ເພີ່ມຄວາມສາມາດໃນການພັດທະນາຕົນເອງຂອງປະເທດທີ່ຮັບການເຊື່ອຍເຫຼືອ.
ຜູ້ແທນຝ່າຍຕ່າງໆທີ່ເຂົ້າຮ່ວມກອງປະຊຸມຕ່າງກໍ່ໄດ້ກ່າວຊົມເຊີຍຢ່າງຕັ້ງໜ້າຕໍ່ຜົນສຳເລັດທີ່ຈີນໄດ້ຮັບໃນ 10 ປີແຕ່ເຂົ້າຮ່ວມອົງການການຄ້າໂລກເປັນຕົ້ນມາ.
ທ່ານສຸພະໄຊ ພານິດຊະພັກ, ເລຂາທິການໃຫຍ່ຂອງກອງປະຊຸມການຄ້າແລະການພັດທະນາຂອງສະຫະປະຊາຊາດກ່າວວ່າ, "ຈີນເຂົ້າຮ່ວມອົງການການຄ້າໂລກໄດ້ນຳເອົາການປ່ຽນແປງທີ່ສຳຄັນໃຫ້ແກ່ຈີນ, ກໍ່ຄືພາກພື້ນອື່ນໆໃນໂລກແລະກົນໄກການຄ້າຫຼາຍຝ່າຍ", ປະເທດທີ່ພວມພັດທະນາຕ້ອງການນະໂຍບາຍແລະເງື່ອນໄຂທາງດ້ານເຕັກນິກທີ່ສົມເຫດສົມຜົນເຂົ້າໃນການພັດທະນາ, ຊຶ່ງບັນຫາເຫຼົ່ານີ້, ຈີນມີບົດຮຽນຢ່າງຫຼວງຫຼາຍແລະສາມາດແລກປ່ຽນກັບປະເທດອື່ນໆ.
ທ່ານນາໂອະຢູກິ ຊິໂນຮາຣະ, ຮອງຜູ້ອຳນວຍການໃຫຍ່ອົງການກອງທຶນເງິນຕາສາກົນກ່າວວ່າ, ໃນທົ່ວໂລກ, ມີປະຊາຊົນຈຳນວນຫຼວງຫຼາຍໄດ້ຮັບຜົນປະໂຫຍດຈາກການເຊື່ອມໂຍງເຂົ້າໃນເສດຖະກິດທົ່ວໂລກຂອງຈີນ. ວິສາຫະກິດຕ່າງປະເທດກໍ່ຈະໄດ້ຮັບຜົນປະໂຫຍດໃນການລົງທຶນດຳເນີນການຜະລິດຢູ່ຈີນຫຼາຍກວ່າເກົ່າ.
