ອາເມລິກາຮຽກຮ້ອງໃຫ້ອີຣານສົ່ງຊາກຍົນແບບບໍ່ມີຄົນຂັບທີ່ຖືກຍິງຕົກຢູ່ອີຣານຄືນ ອີຣານກ່າວວ່າຈະລອກແບບຜະລິດຍົນແບບບໍ່ມີຄົນຂັບຂອງອາເມລິກາ
(GMT+08:00) 2011-12-13 10:53:39 cri
ຫຼັງຈາກອີຣານປະກາດວ່າໄດ້ຍິງຍົນສອດແນມແບບບໍ່ມີຄົນຂັບຂອງອາເມລິກາທີ່ພວມປະຕິບັດໜ້າທີ່ໃນການສອດແນມຢູ່ນ່ານຟ້າພາກຕາເວັນອອກຂອງອີຣານຕົກໃນວັນທີ4ທັນວານີ້, ຕໍ່ມາໃນວັນທີ12ທັນວານີ້, ທ່ານບາຣັກ ໂອບາມາ, ປະທານາທິບໍດີອາເມລິກາກ່າວວາ, ອາເມລິກາໄດ້ຮຽກຮ້ອງໃຫ້ອີຣານສົ່ງຊາກຍົນດັ່ງກ່າວຄືນໃຫ້ແກ່ອາເມລິກາ.
ນີ້ແມ່ນອາເມລິກາຢືນຢັນຢ່າງເປີດເຜີຍເປັນຄັ້ງທຳອິດວ່າ, ຍົນສອດແນມແບບບໍ່ມີຄົນຂັບທີ່ຫາຍສາບສູນນັ້ນຢູ່ອີຣານ. ມື້ດຽວກັນ, ໃນກອງປະຊຸມຂ່າວທີ່ຈັດຂຶ້ນຫຼັງຈາກການພົບປະເຈລະຈາກັບທ່ານນູຣີ ອັນ ມາລີຄີ, ນາຍົກລັດຖະມົນຕີອີຣັກທີ່ໄປຢ້ຽມຢາມອາເມລິກາ, ທ່ານໂອບາມາກ່າວວ່າ, ອາເມລິກາພວມລໍຖ້າຄຳຕອບຂອງອີຣານຢູ່.
ຫວ່າງກ່ອນນີ້ບໍ່ດົນ, ອາເມລິກາກ່າວຕະຫຼອດມາວ່າ, ຍົນແບບບໍ່ມີຄົນຂັບລຳນີ້ແມ່ນກົມຂ່າວລັບສູນກາງອາເມລິກາເປັນຜູ້ນຳໃຊ້ແລະຕົກຍ້ອນເຄື່ອງຈັກຂັດຂ້ອງ.
ສື່ມວນຊົນອີຣານລາຍງານວ່າ, ທ່ານຊາອິດ ຈາລີລີ, ຫົວໜ້າຜູ້ຕາງໜ້າອີຣານໃນການເຈລະຈາກ່ຽວກັບບັນຫານິວເຄຼຍ, ເລຂາຄະນະກຳມະການຮັກສາຄວາມ ໝັ້ນຄົງແຫ່ງຊາດສູງສຸດຂອງອີຣານໄດ້ເດີນທາງໄປພົບປະກັບເຈົ້າໜ້າທີ່ຣັດເຊຍຢູ່ນະຄອນຫຼວງມົສກູແຫ່ງຣັດເຊຍ, ເພື່ອປຶກສາຫາລືກ່ຽວກັບບັນຫາຂອງຍົນສອດແນມແບບບໍ່ມີຄົນຂັບຂອງອາເມລິກາ.
ນອກນີ້, ວັນທີ12ທັນວານີ້, ທ່ານຮູຊາອິນ ອິບຼາຮີມ, ຮອງປະທານກຳມາທິການຄວາມໝັ້ນຄົງແຫ່ງຊາດແລະການພົວພັນກັບຕ່າງປະເທດຂອງລັດຖະສະພາອີຣານກ່າວວ່າ, ອີຣານຈະລອກແບບຜະລິດຍົນສອດແນນແບບບໍ່ມີຄົນຂັບRQ-170ລຳນີ້ຂອງອາເມລິກາໃນເວລາມໍ່ໆນີ້.
