ກົດໝາຍວ່າດ້ວຍແຜນການປະຕິຮູບເພື່ອເພີ່ມທະວີການແກ້ໄຂບັນຫາເສດຖະກິດຂອງສະຫະພາບເອີລົບຈະມີຜົນບັງຄັບໃຊ້ໃນໄວໆນີ້
(GMT+08:00) 2011-12-13 16:20:48 cri
ກົດໝາຍວ່າດ້ວຍແຜນການປະຕິຮູບທີ່ມີຈຸດປະສົງເພື່ອເພີ່ມທະວີການແກ້ໄຂບັນຫາເສດຖະກິດຂອງສະຫະພາບເອີລົບຫຼືເຂດໃຊ້ເງິນເອີໂຣຕາມເວລາກຳນົດແລ້ວຈະມີຜົນບັງຄັບໃຊ້ໃນວັນທີ13ທັນວານີ້,ນີ້ເປັນການປະຕິຮູບຄັ້ງສຳຄັນທີ່ສຸດພາຍຫຼັງວິກິດການໜີ້ສິນຂອງສະຫະພາບເອີລົບເກີດຂຶ້ນ.
ຕາມຖະແຫຼງຂ່າວຂອງຄະນະກຳມາທິການສະຫະພາບເອີລົບ,ກົດໝາຍແຜນການປະຕິຮູບສະບັບນີ້ປະກອບດ້ວຍກົດໝາຍ6ສະບັບ,ເນື້ອໃນຕົ້ນຕໍລວມມີທັງການເພີ່ມທະວີຄວາມເຂັ້ມງວດໃນການປະຕິບັດລະບຽບວິໄນທາງດ້ານການເງິນຂອງສະຫະພາບເອີລົບໂດຍສະເພາະແມ່ນເຂດໃຊ້ເງິນເອີໂຣ,ເພີ່ມທະວີການຕິດຕາມກວດກາຕໍ່ເສດຖະກິດແລະການເງິນຂອງປະເທດສະມາຊິກ,ເພີ່ມການປະສານງານທາງດ້ານນະໂຍບາຍເສດຖະກິດລະຫວ່າງປະເທດສະມາຊິກແລະອື່ນໆເພື່ອປັບປຸງລະບົບການຄຸ້ມຄອງເສດຖະກິດຂອງສະຫະພາບເອີລົບແລະເຂດໃຊ້ເງິນເອີໂຣໃຫ້ດີຂຶ້ນ,ເພື່ອຫຼີກເວັ້ນບໍ່ໃຫ້ວິກິດການໜີ້ສິນເກີດຂຶ້ນອີກ.
ໃນດ້ານເພີ່ມຄວາມເຂັ້ມງວດໃນການປະຕິບັດລະບຽບວິໄນທາງດ້ານການເງິນ,ກົດໝາຍ6ສະບັບນັ້ນຍັງໄດ້ມີການດັດແກ້ເນື້ອໃນຈຳນວນຫຼວງຫຼາຍຂອງສົນທິສັນຍາຄວາມໝັ້ນທ່ຽງແລະການເຕີບໂຕຂອງສະຫະພາບເອີລົບ,ຊຶ່ງເລີ່ມລົງມືຈາກ2ດ້ານຄືມີມາດຕະການປ້ອງກັນແລະການລົງໂທດ,ເພື່ອຜູກມັດໃຫ້ປະເທດສະມາຊິກເຄົາລົບປະຕິບັດຕາມລະບຽບວິໃນທາງດ້ານການເງິນ.ກົດໝາຍສະບັບໃໝ່ຍັງໄດ້ດັດແກ້ແນວຄິດຕິດຕາມຄຸ້ມຄອງການເງິນແບບເນັ້ນໜັກໃສ່ຂຸມການເງິນ,ຖືເບົາເລື່ອງໜີ້ສິນ,ໃຊ້ມາດຕະການເຂັ້ມງວດກວ່າເກົ່າເພື່ອຮຽກຮ້ອງໃຫ້ປະເທດສະມາຊິກຄວບຄຸມລະດັບໜີ້ສິນ.
