ກອງປະຊຸມຄົບຄະນະຄັ້ງທີ9ຂອງຄະນະກຳມະການມິດຕະພາບ ສັນຕິພາບແລະການພັດທະນາຈີນ-ຣັດເຊຍຈັດຂຶ້ນຢູ່ນະຄອນຫຼວງປັກກິ່ງ
(GMT+08:00) 2011-12-13 17:19:51 cri
ວັນທີ13ທັນວານີ້, ກອງປະຊຸມຄົບຄະນະຄັ້ງທີ9ຂອງຄະນະກຳມະການມິດຕະພາບ ສັນຕິພາບແລະການພັດທະນາຈີນ-ຣັດເຊຍໄດ້ຈັດຂຶ້ນຢູ່ນະຄອນຫຼວງປັກກິ່ງຂອງຈີນ. ຫົວຂໍ້ຕົ້ນຕໍຂອງກອງປະຊຸມຄັ້ງນີ້ແມ່ນ: ເຜີຍແຜ່ທັດສະນະຄະຕິທີ່ມີໄມຕີຈິດມິດຕະພາບແບບຍຸກສະໄໝຈີນ-ຣັດເຊຍ, ເພີ່ມທະວີພື້ນຖານມະຕິຊົນຂອງການພົວພັນລະຫວ່າງສອງປະເທດ. ທ່ານຫູຈິນທ່າວ,ປະທານປະເທດຈີນແລະທ່ານດີມີຕຼີ ເມັດເວເດັຟ,ປະທານາທິບໍດີຣັດເຊຍໄດ້ສົ່ງຄຳຊົມເຊີຍໄປຍັງກອງປະຊຸມ.
ທ່ານຫູຈິນທ່າວກ່າວໃນຄຳຊົມເຊີຍວ່າ,ຈີນກັບຣັດເຊຍໄດ້ຕົກລົງຈະຮ່ວມກັນສຸມກຳລັງເຂົ້າໃນການຂະຫຍາຍການພົວພັນຄູ່ປະສານງານຍຸດທະສາດຮອບດ້ານທີ່ສະເໝີພາບກັນ,ມີຄວາມໄວ້ເນື້ອເຊື່ອໃຈກັນ,ສະໜັບສະໜູນກັນ,ພ້ອມກັນຈະເລີນຮຸ່ງເຮືອງ,ທຸກເຊັ່ນຄົນດ້ວຍຄວາມມີໄມຕີຈິດມິດຕະພາບ.ຫວັງວ່າຄະນະກຳມະການມິດຕະພາບ ສັນຕິພາບແລະການພັດທະນາຈີນ-ຣັດເຊຍອີງຕາມເປົ້າໝາຍແລະທິດທາງໃໝ່ໃນການຂະຫຍາຍການພົວພັນລະຫວ່າງສອງປະເທດ,ສືບຕໍ່ຍຶດໝັ້ນຈິດໃຈໃນ "ສົນທິສັນຍາຈີນ-ຣັດເຊຍວ່າດ້ວຍໄມຕີຈິດມິດຕະພາບຖານບ້ານໃກ້ເຮືອນຄຽງແລະການຮ່ວມມື",ປະດິດສ້າງແນວຄິດວຽກງານ,ເປີດກວ້າງຂົງເຂດການຮ່ວມມື,ດຶງດູດວົງການຕ່າງໆໃນສັງຄົມຂອງສອງປະເທດ,ໂດຍສະເພາະແມ່ນຊຸກຍູ້ໃຫ້ຊາວໜຸ່ມເຂົ້າຮ່ວມວຽກງານໄມຕີຈິດມິດຕະພາບຈີນ-ຣັດເຊຍ,ພະຍາຍາມສ້າງສະພາບການໃໝ່ໃນການໄປມາຫາສູ່ກັນລະຫວ່າງປະຊາຊົນສອງຊາດ.
ທ່ານດີມີຕຼີ ເມັດເວເດັຟກ່າວວ່າ,ເຊື່ອວ່າກອງປະຊຸມຄັ້ງນີ້ຈະປັບປຸງພື້ນຖານສັງຄົມດ້ານການພົວພັນລະຫວ່າງຣັດເຊຍ-ຈີນ,ສ້າງອະນາຄົດໃໝ່ໃນການພັດທະນາວັດທະນະທຳແລະການຮ່ວມມືທີ່ມີການກະທຳຕົວຈິງລະຫວ່າງສອງປະເທດ.
