ຜູ້ຊ່ຽວຊານເຫັນວ່າ, ກອງປະຊຸມວຽກງານເສດຖະກິດສູນກາງຈີນຈະຖື "ການຮັກສາການພັດທະນາເສດຖະກິດຢ່າງໝັ້ນທ່ຽງ" ເປັນພື້ນຖານ
(GMT+08:00) 2011-12-13 14:18:32 cri
ກອງປະຊຸມວຽກງານເສດຖະກິດສູນກາງຈີນ ເຊິ່ງເປັນກອງປະຊຸມສຳຄັນກວ່າໝູ່ເພື່ອວາງເປົ້າໝາຍພັດທະນາເສດຖະກິດແລະນະໂຍບາຍເສດຖະກິດມະຫາພາກໃນປີໜ້ານັ້ນ ກຳລັງຈັດຂຶ້ນຢູ່ປັກກິ່ງ. ພາຍໃຕ້ສະຖານະການທີ່ຈັງຫວະເຕີບໂຕຂອງເສດຖະກິດຈີນໄດ້ເລີ່ມຊ້າລົງ, ຄວາມຕ້ອງການຈາກຕ່າງປະເທດຫຼຸດໜ້ອຍລົງ, ນະໂຍບາຍເສດຖະກິດຈີນໃນປີໜ້າໄດ້ຮັບຄວາມເອົາໃຈໃສ່ຫຼາຍ. ທ່ານຢວນກ່າງມິງ, ນັກຄົ້ນຄວ້າຈາກສູນຄົ້ນຄວ້າເສດຖະກິດຈີນແລະໂລກຂອງມະຫາວິທະຍາໄລຊິ່ງຮວາເຫັນວ່າ, ກອງປະຊຸມເທື່ອນີ້ຈະຖືການຮັກສາການພັດທະນາເສດຖະກິດໃຫ້ໝັ້ນທ່ຽງເປັນພື້ນຖານຂອງນະໂຍບາຍມະຫາພາກໃນປີໜ້າ, ພ້ອມກັນນັ້ນ, ຈະສືບຕໍ່ວາງນະໂຍບາຍຊຸກຍູ້ການສັບຊ້ອນອົງປະກອບເສດຖະກິດ, ຊຸກຍູ້ການບໍລິໂພກຂອງປະຊາຊົນ.
ທ່ານຢວນກ່າງມິງກ່າວວ່າ:
"ເມື່ອເບີ່ງຈາກເສດຖະກິດທົ່ວໂລກແລ້ວເຫັນວ່າ, ພວກເຮົາຕ້ອງປັບປຸງຜົນສຳເລັດໃນການຟື້ນຟູການເຕີບໂຕຂອງເສດຖະກິດ, ໃຫ້ຂະບວນການຟື້ນຟູການເຕີບໂຕຂອງເສດຖະກິດສືບຕໍ່ໄປ, ນີ້ກໍ່ໝາຍຄວາມວ່າ, ຈາກນະໂຍບາຍມະຫາພາກທີ່ຖືການສະກັດກັ້ນໄພເງິນເຟີ້ໃນໄລຍະທີ່ຜ່ານມາ, ພວກເຮົາຕ້ອງຫັນມາສະກັດກັ້ນບໍ່ໃຫ້ເສດຖະກິດຊຸດໂຊມລົງ, ເຮັດໃຫ້ເສດຖະກິດເຕີບໂຕຢ່າງໝັ້ນທ່ຽງແລະຍືນຍົງ."
ທ່ານຢວນກ່າງມິງຊີ້ອອກວ່າ, ເຖິງວ່າ, ຂະໜາດເສດຖະກິດຂອງຈີນໃນປະຈຸບັນໄດ້ເປັນອັນດັບທີສອງໃນໂລກ, ແຕ່ອົງປະກອບເສດຖະກິດທີ່ບໍ່ສົມເຫດສົມຜົນໃນໄລຍະຍາວນານມານີ້ໄດ້ຈຳກັດຊ່ອງຫວ່າງການພັດທະນາໃນອະນາຄົດ. ສະນັ້ນ, ການສັບຊ້ອນອົງປະກອບເສດຖະກິດ, ຊຸກຍູ້ການບໍລິໂພກຂອງປະຊາຊົນກໍ່ຈະກາຍເປັນຈຸດສຳຄັນຂອງນະໂຍບາຍເສດຖະກິດໃນປີໜ້າ. ທ່ານກ່າວວ່າ:
"ລັດເຮົາມັກເວົ້າເລື້ອຍໆວ່າ, ພວກເຮົາຕ້ອງສັບຊ້ອນອົງປະກອບເສດຖະກິດເພື່ອຮັບປະກັນໃຫ້ສະມັດຕະພາບເສດຖະກິດຍົກສູງຂຶ້ນ, ໃຫ້ເສດຖະກິດເຕີບໂຕຢ່າງປອດໃສແລະປອດໄພ, ນີ້ກໍ່ໄດ້ສະເໜີອອກໃນກອງປະຊຸມວຽກງານເສດຖະກິດສູນກາງ, ກອງປະຊຸມສະເໜີວ່າ ຍັງຕ້ອງສືບຕໍ່ສະໜັບສະໜູນການແບ່ງປັນສ່ວນລາຍຮັບແລະການບໍລິໂພກ. ຄື: ຍົກສູງລະດັບເລີ່ມເກັບອາກອນລາຍຮັບສ່ວນຕົວ, ຫຼຸດລະດັບເລີ່ມເກັບອາກອນລາຍຮັບວິສາຫະກິດຂະໜາດກາງແລະນ້ອຍ, ແລະສັບຊ້ອນການເກັບອາກອນວິສາຫະກິດບໍລິການ. ນີ້ກໍ່ໝາຍຄວາມວ່າ, ໂອກາດປະກອບອາຊີບແລະລາຍຮັບຂອງປະຊາຊົນໄດ້ເພີ່ມຫຼາຍຂຶ້ນແລ້ວ."
ຜູ້ຊ່ຽວຊານຄາດຄະເນວ່າ, ກອງປະຊຸມວຽກງານເສດຖະກິດສູນກາງຈີນອາດຈະສືບຕໍ່ປະຕິບັດນະໂຍບາຍແລະມາດຕະການສັບຊ້ອນແລະຄວບຄຸມດ້ານມະຫາພາກຕໍ່ອະສັງຫາລິມະຊັບ, ຊຸກຍູ້ຄວາມດຸນດ່ຽງທາງດ້ານການຄ້າກັບຕ່າງປະເທດ. ພ້ອມກັນນັ້ນ, ຄວາມແຮງຂອງນະໂຍບາຍເພື່ອຢຸດຕິການດຳເນີນວຽກງານຂອງຂະແຫນງການຈຳນວນຫນື່ງທີ່ບໍ່ມີປະສິດທິຜົນສູງແລະຊຸກຍູ້ການປະຢັດພະລັງງານແລະຫຼຸດການລະບາຍອາຍພິດເຮືອນແກ້ວກໍ່ບໍ່ຫ່ອນຈະອ່ອນລົງໄດ້.