ຜູ້ເສຍຊີວິດແລະບາດເຈັບໃນເຫດການຫຼອນໂຈມຕີດ້ວຍການຍິງປຶນແລະໝາກແຕກຄ້ອນຢູ່ແບນຊິກເພີ່ມຂຶ້ນເປັນ128ຄົນ
(GMT+08:00) 2011-12-14 10:36:06 cri
ຕອນຄ່ຳວັນທີ13ທັນວານີ້, ເຈົ້າໜ້າທີ່ແບນຊິກປະກາດວ່າ, ຜູ້ເສຍຊີວິດໃນເຫດການຫຼອນໂຈມຕີດ້ວຍການຍິງປຶນແລະໝາກແຕກຄ້ອນທີ່ເກີດຂຶ້ນໃນມື້ດຽວກັນຢູ່ນະຄອນວອນລູທິດໄດ້ເພີ່ມຂຶ້ນເປັນ5ຄົນ, ຜູ້ບາດເຈັບມີ123ຄົນ.
ນະຄອນວອນລູທິດແມ່ນເມືອງອຸດສາຫະກຳແຫ່ງໜຶ່ງຢູ່ພາກຕາເວັນອອກຂອງແບນຊິກ. ຕອນທ່ຽງວັນທີ13ທັນວານີ້, ພົນລະເມືອງຜູ້ໜຶ່ງທີ່ຊື່ວ່າໂນດິນ ອຳຣານີອາຍຸ33ປີໄດ້ເອົາປຶນຍາວແລະປຶນຄົກແນວລະກະບອກພ້ອມດ້ວຍໝາກແຕກຄ້ອນ3ໜ່ວຍໄປກໍ່ເຫດນອງເລືອດຢູ່ສະໜາມຫຼວງແຊນລາມເບິກທີ່ຢູ່ໃຈກາງເມືອງ.
ໃນກອງປະຊຸມຂ່າວ, ເຈົ້າໜ້າທີ່ອົງການໄອຍະການນະຄອນວອນລູທິດກ່າວວ່າ, ມີເດັກຊາຍຜູ້ໜຶ່ງອາຍຸ15ປີ, ຊາຍໜຸ່ມຜູ້ໜຶ່ງອາຍຸ17ປີ, ແລະແມ່ຍິງຊະລາຜູ້ໜຶ່ງອາຍຸ75ປີໄດ້ເສຍຊີວິດໃນບ່ອນເກີດເຫດການ. ສ່ວນເດັກນ້ອຍອາຍຸທີ່1ປີ11ເດືອນແລະຊາຍໜຸ່ມຜູ້ໜຶ່ງອາຍຸ20ປີໄດ້ເສຍຊີວິດຫຼັງຈາກຖືກສົ່ງໄປປິ່ນປົວຢູ່ໂຮງໝໍແຕ່ບໍ່ໄດ້ຜົນ.
ຫຼັງຈາກກໍ່ເຫດການນີ້ແລ້ວ, ທ້າວອຳຣານີໄດ້ຂ້າໂຕຕາຍຢູ່ສະຖານທີ່ກໍ່ເຫດ. ປະຈຸບັນ, ຕຳຫຼວດຍັງບໍ່ທັນຮູ້ເຫດຜົນໃນການກໍ່ເຫດຂອງເຂົາ.
ຜູ້ກໍ່ເຫດເຄີຍເປັນກຳມະກອນຊ່າງຈອດ, 3ປີກ່ອນໄດ້ຖືກຈັບຕົວເຂົ້າຕິດຄຸກຍ້ອນປູກກັນຊາແລະສະສົມອາວຸດ.
ຕອນຄ່ຳມື້ດຽວກັນ, ທ່ານເອລິໂອ ດີ ຣູໂປ, ນາຍົກລັດຖະມົນຕີແບນຊິກກ່າວເນັ້ນວ່າ, ນີ້ເປັນຄະດີອາຍາດ່ຽວທີ່ໜ້າຢ້ານ, ບໍ່ມີການພົວພັນເຖິງລັດທິກໍ່ການຮ້າຍ. ທ່ານເຈຊີ ບູເຊັກ, ປະທານລັດຖະສະພາເອີລົບອອກຖະແຫຼງການກ່າວປະນາມການກະທຳຮຸນແຮງທີ່ອັບປະຍົດ.
