ສະຫະພັນປະຊາທິປະໄຕແຫ່ງຊາດມຽນມາທີ່ນຳໂດຍນາງອອງຊານຊູຈີໄດ້ຈົດທະບຽນເປັນພັກການເມືອງທີ່ຖືກຕ້ອງຕາມກົດໝາຍຂອງມຽນມາ
(GMT+08:00) 2011-12-14 10:41:49 cri
ວັນທີ13ທັນວານີ້, ໜັງສືພິມນິວໄລດ໌ຂອງມຽນມາສື່ມວນຊົນທາງການຂອງມຽນມາແຈ້ງຂ່າວວ່າ, ຄະນະກຳມະການເລືອກຕັ້ງມຽນມາໄດ້ອະນຸມັດໃຫ້ສະຫະພັນປະຊາທິປະໄຕແຫ່ງຊາດມຽນມາທີ່ນຳໂດຍນາງອອງຊານຊູຈີໃຫ້ຈົດທະບຽນເປັນພັກການເມືອງທີ່ຖືກຕ້ອງຕາມກົດໝາຍຢ່າງເປັນທາງການ.
ວັນທີ4ພະຈິກປີນີ້, ທ່ານເທັນເຊັນ, ປະທານາທິບໍດີມຽນມາໄດ້ປະກາດໃຊ້"ກົດໝາຍວ່າດ້ວຍການຈົດທະບຽນຂອງພັກການເມືອງ"ສະບັບດັດແກ້ທີ່ຮັບຮອງໂດຍລັດຖະສະພາ, ຍົກເລີກຂໍ້ຈຳກັດຫຼາຍຢ່າງໃນການຈົດທະບຽນຂອງພັກການເມືອງແລະເບື້ອງຫຼັງຂອງຜູ້ສະໝັກຮັບເລືອກຕັ້ງ. ວັນທີ25ພະຈິກຜ່ານມານີ້, ສະຫະພັນປະຊາທິປະໄຕແຫ່ງຊາດມຽນມາໄດ້ຍື່ນຄຳຮ້ອງຂໍຈົດທະບຽນສ້າງຕັ້ງພັກການເມືອງຄືນໃໝ່ຕໍ່ຄະນະກຳມະການເລືອກຕັ້ງສະຫະພາບມຽນມາ.
ຫວ່າງກ່ອນນີ້, ເຈົ້າໜ້າທີ່ລະດັບສູງຂອງສະຫະພັນປະຊາທິປະໄຕແຫ່ງຊາດມຽນມາເຄີຍກ່າວຄວາມເຫັນຢ່າງເປີດເຜີຍມາຫຼາຍເທື່ອແລ້ວວ່າ, ຫຼັງຈາກຂຶ້ນທະບຽນຄືນໃໝ່ແລ້ວ, ສະມາຊິກສະຫະພັນປະຊາທິປະໄຕເຊິ່ງລວມທັງນາງອອງຊານຊູຈີຈະພິຈາລະນາເຂົ້າຮ່ວມການເລືອກຕັ້ງເພີ່ມເຕີມຂອງລັດຖະສະພາ.
