ການາດາຖອນຕົວອອກຈາກອະນຸສັນຍາກຽວໂຕດຶງດູດຄຳຕຳນິຈາກທົ່ວໂລກ
(GMT+08:00) 2011-12-14 11:16:01 cri
ວັນທີ12ທັນວານີ້,ລັດຖະບານການາດາປະກາດຖອນຕົວອອກຈາກອະນຸສັນຍາກຽວໂຕຢ່າງເປັນທາງການແລ້ວ,ໄດ້ດຶງດູດຄຳຕຳນິຕິຕຽນຈາກພາຍໃນປະເທດແລະຕ່າງປະເທດໃນທັນທີ.
ວັນທີ13ທັນວານີ້,ໃນກອງປະຊຸມຂ່າວຕາມປົກກະຕິ,ທ່ານລິວເວີ້ຍມິນ,ໂຄສົກກະຊວງການຕ່າງປະເທດຈີນກ່າວວ່າ,ກອງປະຊຸມເດີບານຫາກໍ່ໄດ້ຮັບຄວາມຄືບໜ້າທີ່ສຳຄັນກ່ຽວກັບການປະຕິບັດຄຳໝັ້ນສັນຍາໃນອະນຸສັນຍາກຽວໂຕໄລຍະທີ2,ການາດາເລືອກເວລານີ້ຖອນຕົວອອກຈາກອະນຸສັນຍາກຽວໂຕ,ແມ່ນຝ່າຝືນກັບຄວາມພະຍາຍາມຂອງປະຊາຄົມໂລກ,ເປັນໜ້າເສຍດາຍ.ຫວັງວ່າການາດາຈະເບິ່ງເຫັນໜ້າທີ່ຮັບຜິດຊອບແລະພັນທະຂອງຕົນຢ່າງຖືກຕ້ອງ,ສືບຕໍ່ປະຕິບັດຄຳໝັ້ນສັນຍາທີ່ຫຼຸດການລະບາຍອາຍພິດເຮືອນແກ້ວ,ເຂົ້າຮ່ວມຂະບວນການຮັບມືກັບການປ່ຽນແປງຂອງດິນຟ້າອາກາດຂອງປະຊາຄົມໂລກດ້ວຍທ່າທີອັນຕັ້ງໜ້າແລະມີແນວທາງທີ່ສ້າງສັນ.
ວັນທີ13ທັນວານີ້,ທ່ານເບີນາດ ວາເລຣໍ,ໂຄສົກກະຊວງການຕ່າງປະເທດຝະຣັ່ງຊີ້ອອກວ່າ,ການຖອນຕົວອອກຈາກອະນຸສັນຍາກຽວໂຕຂອງການາດາແມ່ນຂ່າວຮ້າຍຕໍ່ທົ່ວຂະບວນການສະກັດກັ້ນການປ່ຽນແປງຂອງດິນຟ້າອາກາດ.ໃນຂະນະດຽວກັນ,ຝະຣັ່ງຈະບໍ່ຢຸດເຊົາການປະຕິບັດມະຕິທີ່ຫາກໍ່ຜ່ານການຮັບຮອງໃນກອງປະຊຸມເດີບານ,ເພາະວ່າມະຕິເຫຼົ່ານີ້ແມ່ນເປັນລະບົບດຽວກັນກັບອະນຸສັນຍາກຽວໂຕ.
ວັນທີ13ທັນວານີ້,ໃນເວລາໃຫ້ສຳພາດຕໍ່ນັກຂ່າວ,ທ່ານໂກຊິ ໂຮໂຊໂນະ,ລັດຖະມົນຕີວ່າ ການກະຊວງສິ່ງແວດລ້ອມຍີ່ປຸ່ນກ່າວວ່າ,ການາດາເຮັດແນວນີ້ເປັນໜ້າເສຍດາຍທີ່ສຸດ,ປະເທດຕ່າງໆສືບຕໍ່ທຳຄວາມພະຍາຍາມເພື່ອຮັບມືກັບການປ່ຽນແປງຂອງດິນຟ້າອາກາດແມ່ນເລື່ອງສຳຄັນຍິ່ງ,ແລະຫວັງວ່າການາດາຈະໃຊ້ທ່າທີອັນຕັ້ງໜ້າ.
ສະມາຊິກສະພາຈຳນວນໜຶ່ງຂອງພັກຝ່າຍຄ້ານການາດາໄດ້ກ່າວຕຳນິລັດຖະບານຊຶ່ງນຳພາໂດຍພັກອະນຸລັກນິຍົມທີ່ໄດ້ຕັດສິນໃຈຖອນຕົວອອກຈາກອະນຸສັນຍາກຽວໂຕ,ນີ້ຈະມີຜົນກະທົບທາງລົບຕໍ່ຄວາມພະຍາຍາມຂອງທົ່ວໂລກເພື່ອຮັບມືກັບການປ່ຽນແປງຂອງດິນຟ້າອາກາດ,ຈະເປັນການທຳລາຍພາບພົດທາງສາກົນຂອງການາດາ.
