ວັນທີ8 ກັນຍານີ້, ພົນແລະທະຫານເກືອບ200ຄົນຂອງກອງທັບປືນໃຫຍ່ທີສອງຈີນແລະລົດ30ກວ່າຄັນໄດ້ເດີນທາງໄປເຂດປະສົບໄພແຜ່ນດິນໄຫວຂອງເມືອງອີລຽງແຂວງຢຸນນານ, ເພື່ອປະຕິບັດໜ້າທີ່ຂົນສົ່ງເຄື່ອງຊ່ອຍເຫຼືອ. ກອງຂົນສົ່ງນີ້ຕົ້ນຕໍຮັບຜິດຊອບຂົນສົ່ງເຄື່ອງໃຊ້ປະຈຳວັນເຊັ່ນ:ຕູບຜ້າເຕັ້ນກູ້ໄພ, ຜ້າຫົ່ມ, ອາຫານເປັນຕົ້ນ, ສາມາດຂົນສົ່ງເຄື່ອງຊ່ອຍເຫຼືອ400ກວ່າໂຕນເທື່ອໜຶ່ງ.
ແຜ່ນດິນໄຫວທີ່ວັດແຮງສັ່ນສະເທືອນໄດ້5,7ລິກເທີທີ່ເກີດຂຶ້ນໃນວັນທີ7 ກັນຍານີ້ໄດ້ເຮັດໃຫ້80ຄົນເສຍຊີວິດແລະມີ7ແສນ4ໝື່ນຄົນໄດ້ຮັບຜົນກະທົບ. ລັດຖະບານແລະກອງທັບຈີນພວມເຮັດວຽກກູ້ໄພຢ່າງສຸດຄວາມສາມາດ. ໃນເວລາ20ໂມງຕອນຄ່ຳວັນທີ8 ກັນຍານີ້, ຂະບວນລົດງກູ້ໄພນີ້ໄດ້ບັນທຸກເຄື່ອງຊ່ອຍເຫຼືອຢູ່ເມືອງອ່ານນິງຂອງແຂວງຢຸນນານ, ແລ້ວຂ້ຽວເດີນໄປເມືອງອີລຽງທີ່ຫ່າງຈາກເມືອງອ່ານນິງ600ກິໂລແມັດ, ສົ່ງເຄື່ອງໃຊ້ປະຈຳວັນຊະນິດຕ່າງໆໄປໃຫ້ປະຊາຊົນໃນເຂດປະສົບໄພ. ຕາມຂ່າວແຈ້ງວ່າ, ຂະບວນລົດໄດ້ບັນທຸກຜ້າຫົ່ມ2000ຜືນ, ຕູບຜ້າເຕັ້ນ2500ຜືນແລະເຄື່ອງຊ່ອຍເຫຼືອສຸກເສີນອື່ນໆໃນເຂດປະສົບໄພ. ເພື່ອເຮັດໃຫ້ຂະບວນລົດໄປຮອດເຂດປະສົບໄພຕາມເວລາກຳນົດແລະມີຄວາມປອດໄພດີ, ສະນັ້ນຈຶ່ງໄດ້ຈັດໃຫ້ລົດຄັນໜຶ່ງມີຫຼາຍຄົນ. ພັດປ່ຽນກັນຂັບລົດ.
ຍ້ອນວ່າຈຸດສູນກາງແຜ່ນດິນໄຫວເທື່ອນີ້ຕັ້ງຢູ່ຮ່ອມພູທີຄັບແຄບ, ສັນຍານໂທລະສັບຖືກຕັດຂາດ, ເສັ້ນທາງໄດ້ຖືກທຳລາຍຢ່າງໜັກໜ່ວງ, ແລະເຂດນີ້ແມ່ນເຂດທີ່ທຸກຍາກທີ່ສຸດ, ພື້ນຖານໂຄງລ່າງຫຼ້າຫຼັງສົມຄວນ, ໄດ້ກະທົບເຖິງຄວາມໄວທີ່ຄິດໄລ່ຂໍ້ມູນຜູ້ເສຍຊີວິດແລະບາດເຈັບແລະຄວາມເສຍຫາຍດ້ານຊັບສິນ. ປັດຈຸບັນ, ຈີນຍັງພວມກວດກາສະພາບໄພພິບັດຕື່ມອີກ.