ພາກກາງຂອງຈີນກາຍເປັນເຂດທີ່ນັກທຸລະກິດຕ່າງປະເທດໃຫ້ຄວາມສົນໃຈ
-----------------------------------------------------------------------------------------------------------------
ງານວາງສະແດງການຄ້າລົງທຶນພາກກາງຂອງຈີນຄັ້ງທີສອງໄດ້ຈັດຂຶ້ນຢູ່ນະຄອນເຈິ້ງໂຈ່ວ ແຂວງເຮີນານ ໃນເດືອນແລ້ວນີ້,ໄດ້ດຶງດູດບໍລິສັດ300ກວ່າແຫ່ງໃນ500ບໍລິສັດທີ່ເຂັ້ມແຂງໃນໂລກເຊິ່ງລວມທັງໄມໂຄຼຊັອບເມໂຕຼ ກາເລີຟວກເປັນຕົ້ນມາເຂົ້າຮ່ວມ.ພາກກາງຂອງຈີນໄດ້ກາຍເປັນຈຸດໃໝ່ທີ່ນັກທຸລະກິດຕ່າງປະເທດໃຫ້ຄວາມສົນໃຈ.
ພາກກາງຂອງຈີນລວມມີ6ແຂວງຄືແຂວງຊ່ານຊີ ແຂວງອ່ານຮຸ່ຍແຂວງຈ່ຽງຊີ ແຂວງເຮີນານ ແຂວງຫູເປ ແລະແຂວງຫູນານ,ລວມມີເນື້ອທີ່1ລ້ານ2ໝື່ນ8ພັນກິໂລຕາແມັດ,ມີປະຊາກອນ360ລ້ານຄົນ.ເຂດ ນີ້ມີຊັບພະຍາກອນອຸດົມສົມບູນ,ທັງມີປະຊາກອນຫຼາຍ,ແມ່ນເຂດຊຸມທາງທີ່ເຊື່ອມຕໍ່ພາກຕາເວັນອອກ ພາກຕາເວັນຕົກ ພາກເໜືອແລະ ພາກໃຕ້ຂອງຈີນ,ທັງແມ່ນແຫຼ່ງຜະລິດແລະສົ່ງອອກທັນຍາຫານ,ພະລັງງານແລະ ວັດຖຸດິບທີ່ສຳຄັນຂອງຂອງຈີນ.ໃນຫຼາຍປີມານີ້,ເສດຖະກິດຂອງພາກກາງຈີນໄດ້ພັດທະນາໄວທີ່ສຸດ.
ທ່ານອາລີຟີອານໂທ ໂຊຟິຢານໂທເຈົ້າໜ້າທີ່ພະແນກເສດຖະກິດຂອງສະຖານທູດອິນໂດເນເຊຍປະຈຳຈີນ ທີ່ເຂົ້າຮ່ວມງານວາງສະແດງຄັ້ງນີ້ໄດ້ມາເຂດພາກກາງຂອງຈີນ ເທື່ອທຳອິດ.ທ່ານຮູ້ສຶກຕື່ນເຕັ້ນຫຼາຍເມື່ອໄດ້ເຫັນລະດັບການພັດທະນາຂອງນະຄອນເຈິ້ງໂຈ່ວ.ທ່ານກ່າວວ່າ:"ກ່ອນຈະມາພາກກາງຂອງຈີນ,ພວກຂ້າພະເຈົ້າຄິດວ່າເຂດ ນີ້ພັດທະນາບໍ່ດີປານໃດ,ແຕ່ເມື່ອມາຮອດນະຄອນເຈີ້ງໂຈ່ວແຂວງເຮີນານແລ້ວຈິ່ງຮູ້ວ່າເມືອງນີ້ພັດທະນາໄວເປັນ ພິເສດ."
ທ່ານໂນເບີດ ຄຼາວເຊັນເຈົ້າ ເມືອງສະເວລິນ ເຢຍລະມັນເຖິງວ່າມາເມືອງເຈິ້ງໂຈ່ວຫຼາຍເທື່ອແລ້ວ,ແຕ່ການປ່ຽນແປງຢ່າງວ່ອງໄວຂອງແຫ່ງນີ້ກໍຍັງເຮັດໃຫ້ທ່ານປະທັບໃຈທີ່ສຸດ."ຂ້າພະເຈົ້າມາເຈິ້ງໂຈ່ວເທື່ອທີ3ແລ້ວ,ພາກກາງພັດທະນາໄວຫຼາຍ,ຂ້າພະເຈົ້າຕື່ນເຕັ້ນຫຼາຍ."ທ່ານໂນເບີດ ຄຼາວເຊັນມາຈີນເທື່ອນີ້ສຳຄັນແມ່ນເພື່ອຊຸກຍູ້ໂຄງການຮ່ວມມືລະຫວ່າງເດີ່ນຍົນເມືອງສະເວລິນເຢຍລະມັນກັບເດີ່ນຍົນເຈີ້ງໂຈ່ວ.ນາງຈ່າງໄພ້ຢ້ຽນ ນາຍພາສາຂອງທ່ານບອກວ່າ,ທ່ານຄຼາວເຊັນຍ້ອງສະພາບແວດລ້ອມການລົງທຶນຂອງພາກກາງຈີນທີ່ສຸດ.ນາງກ່າວວ່າ:
"ຫາກໍ່ລົງຍົນມາ,ທ່ານຄຼາວເຊັນກໍເວົ້າວ່າ,ນະຄອນຊຽງໄຮ້ພັດທະນາໄວຫຼາຍ,ມີຂະໜາດໃຫຍ່ ສົມຄວນແລ້ວ.ລະດັບອຸດສາຫະກຳກໍສູງຫຼາຍ. ຕົວເມືອງຢູ່ພາກກາງຂອງຈີນແບບນີ້ບໍ່ໃຫຍ່ຫຼາຍແຕ່ກໍບໍ່ນ້ອຍ,ຮູ້ສຶກວ່າສະບາຍດີ,ແລະກໍຍັງບໍ່ໄດ້ພັດທະນາໝົດເທື່ອ,ສະນັ້ນຈິ່ງຍັງມີໂອກາດເຮັດໂຄງການໃຫຍ່ໄດ້."
ເມື່ອທຽບກັບເຂດ ອື່ນແລ້ວ, ບາງຂົງເຂດຢູ່ພາກກາງຂອງຈີນມີທ່າແຮງແທ້,ຕົ້ນທຶນແຮງງານຢູ່ແຫ່ງນີ້ມີແຕ່ປະມານ60%ຂອງພາກຕາເວັນອອກທໍ່ນັ້ນ,ຍັງມີແຮງງານຫຼວງຫຼາຍທີ່ມີຄຸນນະພາບດີ,ທີ່ດິນໃຊ້ສຳລັບອຸດສາຫະກຳກໍມີ1,4ເທົ່າຂອງພາກຕາເວັນອອກ.ສະນັ້ນ,ນັກລົງທຶນຂອງຕ່າງປະເທດຫຼວງຫຼາຍຈິ່ງຫັນມາສົນໃຈນຳແຫ່ງນີ້.
ບໍລິສັດເມໂຕຼຂອງເຢຍລະມັນແມ່ນບໍລິສັດຂາຍຍ່ອຍໜຶ່ງທີ່ໃຫຍ່ກວ່າໝູ່ໃນໂລກ,ທ່ານຫວງຈົ່ງເຈະ ຜູ່ຈັດການໃຫຍ່ຂອງພະແນກປະຊາສຳພັນບໍລິສັດເມໂຕຼປະຈຳຈີນບອກວ່າ,ເວົ້າສຳລັບກຸ່ມບໍລິສັດຂາຍຍ່ອຍຂອງຕ່າງປະເທດແລ້ວ,ຜະລິດຕະພັນຂອງພາກກາງຈີນລາຄາຖືກແລະຄຸນນະພາບດີ,ຍົກຄວາມສາມາດແຂ່ງຂັນໃນຕະຫຼາດໃຫ້ສູງຂຶ້ນໄດ້.ທ່ານກ່າວວ່າ:
"ເຂດພາກກາງຂອງຈີນ,ໂດຍສະເພາະແມ່ນແຂວງເຮີນານແລະແຂວງຫູນານລ້ວນແຕ່ແມ່ນແຂວງໃຫຍ່ດ້ານກະສິກຳ,ມີຊັບພະຍາກອນຜະລິດຕະພັນກະສິກຳແລະອາຫານດິບແລະສົດ ອຸດົມສົມບູນ.ເທື່ອນີ້,ພວກຂ້າພະເຈົ້າໄດ້ແຕ່ງຕັ້ງໜ່ວຍຈັດຊື້ຂອງຂະໜາດໃຫຍ່,ກໍແມ່ນຢາກມີການຮ່ວມມືກັບພໍ່ຄ້າຂາຍສົ່ງແລະຊາວກະສິກອນໂດຍກົງໃນດ້ານໝາກໄມ້ແລະຜັກ,ຮ່ວມກັນພັດທະນາການປຸງແຕ່ງອາຫານ."
ໃນໄລຍະຈັດງານວາງສະແດງ, ມູນຄ່າຂໍ້ຜູກພັນທີ່ເຊັນກັນກັບບໍລິສັດຕ່າງປະເທດໃນງານສັງສັນຈັດຊື້ສິນຄ້ານັ້ນມີເຖິງ850ລ້ານຢວນ.ໃນງານສັງສັນ,ນັກທຸລະກິດຈີນແລະຕ່າງປະເທດໄດ້ປະກາດໂຄງການດຶງດູດເອົານັກທຸລະກິດມາລົງທຶນຫຼາຍກວ່າ1ໝື່ນໂຄງການເຊິ່ງກ່ຽວພັນເຖິງການຜະລິດອຸປະກອນ,ອຸດສາຫະກຳເຄມີຖ່ານຫີນ,ອຸດສາຫະກຳອາລູມີນຽມ,ເຄື່ອງອາໄຫຼ່ລົດຍົນ,ພະລັງງານ,ວັດຖຸດິບ,ການປຸງແຕ່ງຜະລິດຕະພັນກະສິກຳແລະການລ້ຽງສັດ,ການທ່ອງທ່ຽວເປັນຕົ້ນ.
ເດືອນເມສາປີກາຍນີ້,ຈີນເລີ່ມປະຕິບັດຍຸດທະສາດສ້າງພາກກາງຈະເລີນຂຶ້ນຢ່າງເປັນທາງການ.ມາຮອດປະຈຸບັນ,ພາກກາງເຕີບໂຕຂຶ້ນ, ພາກຕາເວັນຕົກອພັດທະນາຢ່າງຂະໜາດໃຫຍ່, ພາກຕາເວັນອອກສຽງເໜືອຈະເລີນຮຸ່ງເຮືອງຄືນໃໝ່, ພາກຕາເວັນອອກຂ້ຽວເລັ່ງພັດທະນາໄດ້ປະກອບເປັນຍຸດທະສາດພັດທະນາເສດຖະກິດເຂດແຄວ້ນຂອງຈີນອັນຄົບຖ້ວນ.ທ່ານສິງສຽງ ຜູ່ອຳນວຍການຝ່າຍຂາຍຂອງບໍລິສັດການບິນກາລູດາອິນໂດເນເຊຍ ເຫັນວ່າ,ລັດຖະບານຈີນປະຕິບັດຍຸດທະສາດແຫ່ງຊາດແມ່ນໂອກາດດີທີ່ສຸດສຳລັບການພັດທະນາເຂດພາກກາງຂອງຈີນ.ທ່ານກ່າວວ່າ:
"ຍ້ອນວ່າປັດຈຸບັນ,ພວກຂ້າພະເຈົ້າແມ່ນໄດ້ບຸກເບີກຕະຫຼາດຢູ່ປັກກິ່ງ,ຊຽງໄຮ້ແລະກວາງໂຈ່ວ ,ໃຜໆກໍຮູ້ແລ້ວວ່າ,ເສດຖະກິດພາກຕາເວັນອອກຂອງຈີນໄດ້ພັດທະນາແລ້ວ,ສະນັ້ນ, ຍຸດທະສາດແຫ່ງຊາດຈິ່ງໄດ້ຄ່ອຍໆຫັນໄປສູ່ພາກກາງແລະພາກຕາເວັນຕົກ.ໃນຖານະທີ່ເປັນບໍລິສັດການບິນຕ່າງປະເທດ,ພວກຂ້າພະເຈົ້າກໍ ຢາກຊອກ ແຫຼ່ງຜູ່ໂດຍສານຫຼາຍກວ່າເກົ່າຢູ່ພາກກາງແລະພາກຕາເວັນຕົກຂອງຈີນ,ທັງເຫັນໄປໃນແງ່ດີຕໍ່ຕະຫຼາດການຂົນສົ່ງທາງຍົນຢູ່ແຫ່ງນີ້."
ນອກຈາກສະແດງຄວາມສົນໃຈຫຼາຍນຳເຂດພາກກາງຂອງຈີນແລ້ວ,ທ່ານສິງສຽງກໍໄດ້ໃຫ້ຂໍ້ສະເໜີທີ່ຈິງໃຈ.ທ່ານກ່າວວ່າ,ເມື່ອທຽບກັບເຂດແຄມທະເລພາກຕາເວັນອອກ,ເຂດພາກກາງຍັງຢາກອ່ອນແດ່ໃນດ້ານເງື່ອນໄຂ ບໍລິການ ການຄຸ້ມຄອງແລະອື່ນໆ.
ໃນງານວາງສະແດງການຄ້າແລະການລົງທຶນພາກກາງຂອງຈີນ,ທ່ານໂປຊີໄລ ລັດຖະມົນຕີວ່າການກະຊວງການຄ້າຈີນກ່າວວ່າ,ທີ່ຕັ້ງພູມສາດອັນພິເສດ,ເງື່ອນໄຂຄົມມະນາຄົມທີ່ສະດວກ,ສະພາບແວດລ້ອມການລົງທຶນທີ່ດີງາມແລະຊັບພະຍາກອນທຳມະຊາດທີ່ອຸດົມສົມບູນເຮັດໃຫ້ພາກກາງຂອງຈີນມີກຳລັງແຮງບົ່ມຊ້ອນທາງຕະຫຼາດອັນໃຫຍ່ຫຼວງ.ພາຍໃນຫຼາຍສິບປີຂ້າງໜ້າ,ນັກທຸລະກິດຕ່າງປະເທດຈະພົບໂອກາດທີ່ບໍ່ເຄີຍມີມາກ່ອນຢູ່ພາກກາງຂອງຈີນ.
