ແມ່ຍິງຈີນຕັ້ງໜ້າເຂົ້າຮ່ວມການພັດທະນາເສດຖະກິດສັງຄົມ
-----------------------------------------------------------------------------------------------------------------
ຕາມຂ່າວCRI: ວັນທີ 24 ກັນຍານີ້ໃນງານຖະແຫຼງຂ່າວທີ່ຫ້ອງການຖະແຫຼງຂ່າວຂອງລັດຖະບານຈີນຈັດຂຶ້ນ, ທ່ານນາງຫວາງສິງອີ ຮອງປະທານສະຫະພັນແມ່ຍິງແຫ່ງຊາດຈີນໄດ້ແຈ້ງສະພາບການພັດທະນາຂອງແມ່ຍິງຈີນໃນ 5 ປີຜ່ານມາ.
ໃນການກໍ່ສ້າງເສດຖະກິດສັງຄົມ, ປະຈຸບັນ, ຜູ້ປະກອບອາຊີບຂອງຈີນມີເພດຍິງຫຼາຍກວ່າ 45,4%, ການປະກອບອາຊີບແມ່ຍິງໄດ້ດີຂຶ້ນ, ລະດັບປະກອບອາຊີບກໍຍົກສູງຂຶ້ນຢ່າງບໍ່ຢຸດຢັ້ງ. ໃນການກໍ່ສ້າງການເມືອງປະຊາທິປະໄຕ, ອັດຕາແມ່ຍິງເຂົ້າຮ່ວມການປົກຄອງແລະຫາລືການເມືອງກໍເພີ່ມຂຶ້ນເທື່ອລະກ້າວ. ປະຈຸບັນ, ຜູ້ນຳພັກແລະລັດມີເພດຍິງ 8 ຄົນ. ຜູ້ແທນສະພາປະຊາຊົນແຫ່ງຊາດຈີນມີເພດຍິງກວມ21%ແລະກຳມະການສະພາປຶກສາການເມືອງແຫ່ງຊາດຈີນກວມ17%.
ນາງຫວາງສິງອີກ່າວວ່າ, ໃນ 5 ປີມານີ້, ລັດຖະບານຈີນເອົາໃຈໃສ່ໃນລະດັບສູງຕໍ່ແມ່ຍິງແລະວຽກງານພັດທະນາແມ່ຍິງ, ປະຕິບັດຕາມນະໂຍບາຍພື້ນຖານແຫ່ງຊາດທີ່ຍິງຊາຍສະເໝີພາບ, ໄດ້ຊຸກຍູ້ໃຫ້ວຽກງານແມ່ຍິງຈີນພັດທະນາຢ່າງແຂງແຮງ. ປະຈຸບັນຈີນໄດ້ສ້າງລະບຽບກົດໝາຍປ້ອງກັນສິດຜົນປະໂຫຍດຂອງແມ່ຍິງແລະຊຸກຍູ້ການພັດທະນາຂອງແມ່ຍິງທີ່ເອົາລັດຖະທຳມະນູນເປັນພື້ນຖານ, ເອົາກົດໝາຍຮັບປະກັນສິດຜົນປະໂຫຍດຂອງແມ່ຍິງຫຼັກ, ແລະລວມທັງກົດໝາຍອື່ນໆທີ່ກ່ຽວຂ້ອງ.
