ໃນໄລຍະຈັດງານວາງສະແດງສິນຄ້າຈີນອາຊຽນຄັ້ງທີ 5 ຈະຈັດເວທີປາໄສແລະກິດຈະກຳແລກປ່ຽນຕ່າງໆ

(GMT+08:00) 2008-10-08 17:29:07 cri
-----------------------------------------------------------------------------------------------------------------

ຕາມຂ່າວສານຊິ່ນຮວາ: ກອງເລຂາຂອງງານວາງສະແດງສິນຄ້າຈີນອາຊຽນແຈ້ງຂ່າວວ່າ, ໃນໄລຍະຈັດງານວາງສະແດງຈີນອາຊຽນຄັ້ງທີ 5, ເມືອງນານນິງເຂດກວາງຊີຈະຈັດເວທີປາໄສແລະກິດຈະກຳແລກປ່ຽນຕ່າງໆ ເຊັ່ນ: ເວທີປາໄສການຮ່ວມມືແລະພັດທະນາພະລັງໄຟຟ້າຈີນອາຊຽນຄັ້ງທີ 2, ງານສຳມະນາຜູ້ພິພາກສາທ້ອງຖິ່ນຂອງເຂດການຄ້າເສລີຈີນອາຊຽນ, ເວທີປາໄສອຸດສາຫະກຳວັດທະນະທຳຈີນອາຊຽນປີ 2008, ກິດຈະກຳນັກທຸລະກິດຊາວຈີນຕ່າງດ້າວເຕົ້າໂຮມກັນຢູ່ງານວາງສະແດງສິນຄ້າຈີນອາຊຽນປີ 2008 ແລະງານແລກປ່ຽນນັກທຸລະກິດອິນໂດເນເຊຍກັບເຂດກວາງຊີເປັນຕົ້ນ.

ຂ່າວແຈ້ງວ່າ, ງານສຳມະນາຜູ້ພິພາກສາທ້ອງຖິ່ນຂອງເຂດການຄ້າເສລີຈີນອາຊຽນໄດ້ເຊີນຜູ້ພິພາກສາທີ່ມາຈາກຈີນແລະປະເທດອາຊຽນຕ່າງໆ ເຊັ່ນ: ສິງກະໂປ, ໄທ, ມຽນມາ, ຫວຽດນາມ, ລາວ, ກຳປູເຈຍ, ອິນໂດເນເຊຍ, ບຼູໄນເປັນຕົ້ນ, ຈະດຳເນີນການຫາລືຫົວຂໍ້ສະເພາະໃນ 4 ດ້ານ, ເຊັ່ນ: ການຕັດສິນຄະດີແພ່ງ, ຄະດີການຄ້າກັບເຂດການຄ້າເສລີຈີນກັບອາຊຽນ, ການປົກປ້ອງສິດຊັບສິນທາງປັນຍາດ້ານຕຸລາການແລະລະບອບໄກ່ເກ່ຍຢູ່ເຂດການຄ້າເສລີຈີນອາຊຽນ, ການອົບຮົມແລະແລກປ່ຽນຜູ້ພິພາກສາລະຫວ່າງຈີນກັບປະເທດອາຊຽນເປັນຕົ້ນ.

ເວທີປາໄສອຸດສາຫະກຳວັດທະນະທຳລະຫວ່າງຈີນກັບອາຊຽນປີ 2008 ໄດ້ເຊີນຜູ້ແທນເຈົ້າໜ້າທີ່ຂັ້ນກົມຂອງ 10 ປະເທດອາຊຽນແລະຜູ້ແທນຍີ່ປຸ່ນມາເຂົ້າຮ່ວມ, ຈະມີຜູ້ແທນປະມານ 70 ຄົນມາເຂົ້າຮ່ວມ. ເວທີປາໄສໄດ້ຕົກລົງຫົວຂໍ້ຫາລືໃນ 4 ດ້ານ ເຊັ່ນ: "ການຖອດຖອນແລະການຮ່ວມມືໃນດ້ານການພັດທະນາອຸດສາຫະກຳວັດທະນະທຳລະຫວ່າງຈີນກັບບັນດາປະເທດອາຊຽນ", "ສ້າງສະພາບແວດລ້ອມໃໝ່ເພື່ອຊຸກຍູ້ການແລກປ່ຽນແລະການຮ່ວມມືດ້ານອຸດສາຫະກຳວັດທະນະທຳລະຫວ່າງຈີນກັບອາຊຽນ" ເປັນຕົ້ນ, ແລະຈະເຊັນ "ແຜນການແລກປ່ຽນດ້ານອຸດສາຫະກຳວັດທະນະທຳລະຫວ່າງຈີນກັບອາຊຽນ".

ງານວາງສະແດງສິນຄ້າຈີນອາຊຽນຄັ້ງທີ 5 ຈະຈັດຂຶ້ນຢູ່ນານນິງເຂດກວາງຊີຂອງຈີນແຕ່ວັນທີ 22 ຮອດ 25 ຕຸລານີ້.

ຂ່າວ-ບົດທີ່ກ່ຽວຂ້ອງ

ຄຳເຫັນ