ໃນ 4 ປີຂ້າງໜ້ານີ້ຊາວເນັດຈີນມີຫວັງຈະຫຼາຍກວ່າ 500 ລ້ານຄົນ
-----------------------------------------------------------------------------------------------------------------
ຕາມຂ່າວສານຊິນຮວາ: ວັນທີ 7 ພະຈິກນີ້ໃນເວທີປຶກສາຫາລືອິນເຕີເນັດຈີນອາເມລິກາຄັ້ງທີ 2 ທີ່ຈັດຂຶ້ນຢູ່ຊຽງໄຮ້, ທ່ານຊ້າຍມິງຈ້າວ ຮອງຫົວໜ້າຫ້ອງການຖະແຫຼງຂ່າວຂອງລັດຖະບານຈີນຊີ້ອອກວ່າ, ປະຈຸບັນ, ຄົນຈີນທີ່ເປັນຊາວເນັດໃໝ່ມີ 2 ແສນ 4 ໝື່ນຄົນຕໍ່ມື້, ໃນ 4 ປີຕໍ່ໄປຊາວເນັດຈີນຈະບັນລຸ 500 ລ້ານຄົນ.
ຕົວເລກຂອງສະມາຄົມອິນເຕີເນັດຈີນສະແດງໃຫ້ເຫັນວ່າ, ນັບມາຮອດທ້າຍເດືອນມິຖຸນາປີນີ້, ຊາວເນັດຈີນໄດ້ມີ 253 ລ້ານຄົນແລ້ວ, ເພີ່ມຂຶ້ນຫຼາຍກວ່າໄລຍະດຽວກັນປີກາຍນີ້ 56,2%. ຈີນໄດ້ກາຍເປັນປະເທດທີ່ມີຜູ້ໃຊ້ອິນເຕີເນັດຫຼາຍກວ່າໝູ່ໃນໂລກ.
ຕົວເລກທີ່ກ່ຽວຂ້ອງຍັງສະແດງໃຫ້ເຫັນວ່າ, ໃນທ້າຍປີ 2007, ອົງການປົກຄອງຂັ້ນຕ່າງໆຂອງຈີນ 86% ມີແວັບໄຊແລ້ວ. ທ່ານຫູສີ້ເຫີງ ປະທານສະມາຄົມອິນເຕີເນັດຈີນກ່າວວ່າ, ຄາດວ່າຮອດປີ 2010, ຈີນຈະສ້າງແວັບໄຊບໍລິຫານເອເລັກຕຼົງເອກະພາບທີ່ປົກຫຸ້ມທົ່ວປະເທດຈີນໂດຍພື້ນຖານ, ແວັບໄຊອົງການປົກຄອງຈະກາຍເປັນຊ່ອງທາງສຳຄັນທີ່ລັດຖະບານເປີດເຜີຍຂໍ້ມູນຂ່າວສານ, ໃນບັນຫາປະຊາຊົນເອົາໃຈໃສ່ທີ່ສຸດເຊັ່ນ: ການສຶກສາ ສາທາລະນະສຸກການປິ່ນປົວພະຍາດ ການປະກອບອາຊີບ ການຮັບປະກັນສັງຄົມແລະເຮືອນຢູ່ເປັນຕົ້ນ, ສະໜອງການບໍລິການສາທາລະນະພື້ນຖານທີ່ທັງໄວທັງສະດວກ.
