ຈີນຖືການຮັກສາໃຫ້ເສດຖະກິດພັດທະນາຢ່າງໝັ້ນທ່ຽງແລະອ່າວໄວເປັນໜ້າທີ່ອັນດັບໜຶ່ງຂອງວຽກງານເສດຖະກິດປີໜ້າ
-----------------------------------------------------------------------------------------------------------------
ຕາມຂ່າວCRI：ວັນທີ 28 ພະຈິກນີ້, ກອງປະຊຸມກົມການເມືອງສູນກາງພັກກອມມູນິດຈີນທີ່ໄຂຂຶ້ນຢູ່ປັກກິ່ງສະເໜີໃຫ້ຖືການຮັກສາເສດຖະກິດພັດທະນາຢ່າງໝັ້ນທ່ຽງແລະອ່າວໄວເປັນໜ້າທີ່ອັນດັບໜຶ່ງຂອງວຽກງານເສດຖະກິດປີໜ້າ.
ທ່ານຫູຈີນທ່າວ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນໄດ້ເປັນປະທານກອງປະຊຸມ. ກອງປະຊຸມສະເໜີວ່າ, ຕ້ອງຖືການຮັກສາໃຫ້ເສດຖະກິດພັດທະນາຢ່າງໝັ້ນທ່ຽງແລະອ່າວໄວເປັນໜ້າທີ່ອັນດັບໜຶ່ງຂອງວຽກງານເສດຖະກິດປີໜ້າ, ແລະເຮັດໃຫ້ການຮັກສາຄວາມເຕີບໂຕກັບການເປີດກວ້າງຄວາມຕ້ອງການຂອງພາຍໃນ, ປັບປຸງອົງປະກອບເສດຖະກິດໃຫ້ເຊື່ອມໂຍງເຂົ້າກັນດີກວ່າເກົ່າ, ແລະອອກແຮງປັບປຸງຊີວິດການເປັນຢູ່ຂອງປະຊາຊົນ; ຕ້ອງຍຶດໝັ້ນນະໂຍບາຍເສດຖະກິດມະຫາພາກທີ່ຄ່ອງແຄ້ວແລະຮອບຄອບ, ສືບຕໍ່ປະຕິບັດນະໂຍບາຍການເງິນທີ່ຕັ້ງໜ້າແລະນະໂຍບາຍເງິນຕາທີ່ຜ່ອນຍານຢ່າງເໝາະສົມ; ຕ້ອງຕັ້ງໜ້າເປີດກວ້າງການບໍລິໂພກໂດຍສະເພາະແມ່ນການບໍລິໂພກຢູ່ຊົນນະບົດ, ເພີ່ມທະວີການຜະລິດກະສິກຳ, ປະຕິບັດນະໂຍບາຍທີ່ມີຜົນດີຕໍ່ຊາວກະສິກອນໃຫ້ແຂງແຮງກວ່າເກົ່າ, ເລັ່ງລັດເຜີຍແຜ່ວິທະຍາສາດເຕັກນິກກະສິກຳ; ຕ້ອງເລັ່ງລັດພັດທະນາອຸດສາຫະກຳເຕັກນິກສູງແລະປຸງແຕ່ງເຄື່ອງປະກອບ, ສະໜັບສະໜູນການພັດທະນາຂອງວິສາຫະກິດຂະໜາດກາງແລະຂະໜາດນ້ອຍ, ບົ່ມເພາະແລະສ້າງຂະແໜງການບໍລິການໃຫ້ເຕີບໃຫຍ່ຂຶ້ນ; ຕ້ອງເປີດກວ້າງການປະກອບອາຊີບຢ່າງຕັ້ງໜ້າ, ສ້າງເຮືອນຢູ່ທີ່ຄໍ້າປະກັນໃນູຕົວເມືອງແລະຊົນນະບົດ, ສະໜັບສະໜູນການພັດທະນາການສຶກສາຢູ່ຊົນນະບົດ, ເພີ່ມທະວີການບໍລິການການປິ່ນປົວແລະສາທາລະນະສຸກ, ປົກປັກຮັກສາສິດແລະຜົນປະໂຫຍດຂອງປະຊາຊົນຢ່າງແທ້ຈິງ.
