ງານແຂ່ງຂັນທາງໂທລະພາບຂອງນັກສະແດງງິ້ວປັກກິ່ງໄວໜຸ່ມເຮັດໃຫ້ຈີນເກີດກະແສນິຍົມງິ້ວປັກກິ່ງ

(GMT+08:00) 2009-01-22 09:49:33 cri
-----------------------------------------------------------------------------------------------------------------

ຫວ່າງກ່ອນນີ້ບໍ່ດົນ,ງານແຂ່ງຂັນທາງໂທລະພາບຂອງນັກສະແດງງິ້ວປັກກິ່ງໄວໜຸ່ມທົ່ວປະເທດຈີນຄັ້ງທີ6ທີ່ຈັດຂຶ້ນຢູ່ປັກກິ່ງໄດ້ອັດລົງ.ການແຂ່ງຂັນຮອບສຸດທ້າຍທີ່ໃຊ້ເວລາ11ວັນໄດ້ດຶງດູດແຟນງິ້ວປັກກິ່ງແລະຜູ້ຊົມທົ່ວໄປຂອງຈີນຈົນນັບບໍ່ຖ້ວນ,ອັນໄດ້ເຮັດໃຫ້ຈີນເກີດກະແສນິຍົມເບິ່ງງິ້ວປັກກິ່ງແລະມີຄຳເຫັນຕໍ່ງິ້ວປັກກິ່ງ.

ງານແຂ່ງຂັນນັກສະແດງງິ້ວປັກກິ່ງໄວໜຸ່ມທົ່ວປະເທດຈີນເລີ່ມແຕ່ເດືອນເມສາ2008,ມີນັກ ສະແດງໄວໜຸ່ມ500ກວ່າຄົນນັບແຕ່ອາຍຸ16ປີຫາ35ປີ ຈາກທ້ອງຖິ່ນຕ່າງໆຂອງຈີນສະໝັກ ເຂົ້າຮ່ວມ.ໃນທີ່ສຸດ,ຜູ້ເຂົ້າແຂ່ງຂັນ80ຄົນໄດ້ເຂົ້າສູ່ຮອບສຸດທ້າຍ,ແລະມີຜູ້ເຂົ້າແຂ່ງຂັນ24ຄົນຊີງໄດ້ລາງວັນຄຳ.ທ່ານອຽນເຕິເວີ່ຍ ຜູ້ກຳກັບງານແຂ່ງຂັນຄັ້ງນີ້ບອກໃຫ້ຮູ້ວ່າ,ຈຸດປະສົງທີ່ຈັດງານແຂ່ງຂັນຂະໜາດໃຫຍ່ຄັ້ງນີ້ແມ່ນເພື່ອຄົ້ນຫາແລະແນະນຳນັກສະແດງງິ້ວປັກກິ່ງຜູ້ໃໝ່,ເລືອກເຟັ້ນຜູ້ດີເລີດ.

ງິ້ວປັກກິ່ງແມ່ນງິ້ວຊະນິດໜຶ່ງທີ່ມີແຫຼ່ງກຳເນີດຢູ່ປັກກິ່ງ,ມີປະຫວັດສາດມາໄດ້200ກວ່າປີແລ້ວ,ແມ່ນສິ່ງປະເສີດຂອງສິລະປະງິ້ວຂອງຈີນ,ໄດ້ນາມມະຍົດວ່າ ເປັນເອກະລັກຂອງຊາດ ຈີນ.ສິລະປະງິ້ວປັກກິ່ງໄດ້ໂຮມການຮ້ອງ ອ່ານ ສະແດງ ກັ່ງຟູ້ແລະຟ້ອນເຊື່ອມເຂົ້າເປັນໜຶ່ງດຽວ,ສະນັ້ນ,ນັກສະແດງຈຶ່ງຕ້ອງຮຽນມານ້ອຍເພື່ອສ້າງພື້ນຖານອັນໜັກແໜ້ນ.ກໍ່ຄືເວົ້າກັນ ວ່າ"ການສະແດງນາທີໜຶ່ງຢູ່ເທິງເວທີ,ຕ້ອງເຝິກຊ້ອມສິບປີຢູ່ລຸ່ມເວທີ",ນັກສະແດງທີ່ເຂົ້າ ຮ່ວມການແຂ່ງຂັນຄັ້ງນີ້ເຖິງວ່າອາຍຸຍັງໜຸ່ມ,ແຕ່ຜູ້ໃດກໍ່ປະສົບການເຝິກຊ້ອມງິ້ວປັກກິ່ງມາ 10ກວ່າປີຫຼືຈົນເຖິງ20ປີແລ້ວ.

ມາລີ້ທີ່ເຂົ້າຮ່ວມການແຂ່ງຂັນຄັ້ງນີ້ ອາຍຸ26ປີ.ຮຽນຫຼິ້ນງິ້ວປັກກິ່ງມາແຕ່9ປີ,ແລະຮຽນຈົບຈາກສະຖາບັນງິ້ວຈີນເມື່ອ21ປີ,ແລ້ວໄປຮຽນຢູ່ອາເມລິກາເພື່ອສຳຜັດແລະຊອກຮູ້ສິລະປະ ການສະແດງໂອເປລາຂອງຕາເວັນຕົກ.ສອງປີກ່ອນ,ມາລີ້ໄດ້ກັບຄືນປັກກິ່ງ.ຄວາມຮູ້ສຶກຂອງມາລີ້ແມ່ນ:ຄັນບໍ່ໄປບ່ອນອື່ນກໍ່ບໍ່ຮູ້ວ່າ ບ້ານຕົນເອງນີ້ຂອງດີຫຼາຍປານໃດ.ມາລີ້ເຫັນວ່າ, ງິ້ວປັກກິ່ງຖ້າຢາກສືບທອດກັນໄປກໍ່ຕ້ອງປ່ຽນແປງໄປຕາມຍຸກສະໄໝ.ມາລີ້ກ່າວວ່າ:"ຂ້ອຍໄປຮຽນຢູ່ຕ່າງປະເທດໄລຍະໜຶ່ງ,ຂ້ອຍຮູ້ສຶກວ່າ ແຮ່ງໄກຈາກປະເທດຊາດ ແຮ່ງຮູ້ສຶກວ່າ ສິລະປະດັ້ງເດີມຂອງຈີນຈົ່ງແມ່ນຍິ່ງໃຫຍ່,ແລະຍອດຫົວກະທິທີ່ອັດສະຈັນ.ງິ້ວປັກກິ່ງມີຫຼາຍເລື່ອງແມ່ນງິ້ວປັກກິ່ງຮູບແບບດັ້ງເດີມແທ້ໆ,ງິ້ວເຫຼົ່ານີ້ພວກເຮົາຕ້ອງກຳກັບເລື່ອງດັ້ງເດີມ ເຫຼົ່ານີ້ໃຫ້ດີໆ.ຂ້ອຍຮູ້ສຶກວ່າ,ພວກເຮົາຍັງຕ້ອງແຕ່ງເລື່ອງໃໝ່ຈຳນວນໜຶ່ງ,ຕື່ມປັດໄຈທີ່ທັນສະໄໝ ວິທີແລະຮູບການສະແດງລະຄອນທັນສະໄໝຈຳນວນໜຶ່ງໃສ່ງິ້ວປັກກິ່ງຢ່າງເຕັມທີ່."

ໃນສັງຄົມທັນສະໄໝ,ການສືບທອດແລະພັດທະນາສິລະປະດັ້ງເດີມພວມປະເຊີນກັບການກະທົບຈາກວັດທະນະທຳຫຼາຍເຄົ້າ.ດ້ານໜຶ່ງ,ຊາວໜຸ່ມຜູ້ຮຽນງິ້ວປັກກິ່ງຕ້ອງຮູ້ອົດທົນຄວາມໂດດດ່ຽວທີ່ບໍ່ມີຜູ້ຊົມຫຼາຍ,ນອກນີ້,ການດຶງດູດຜູ້ຊົມໃຫ້ຫຼາຍກວ່າເກົ່າກໍ່ແມ່ນເລື່ອງສຳຄັນເຊັ່ນດຽວກັນ.

ຊ່ອງງິ້ວຂອງ CCTV ໄດ້ຖ່າຍທອດສົດການແຂ່ງຂັນຮອບສຸດທ້າຍເທື່ອນີ້, ແລະເຮັດໃຫ້ວົງການຕ່າງໆໃນສັງຄົມສົນໃຈຢ່າງກວ້າງຂວາງ. ຜູ້ຊົມຫຼາຍ ຄົນພາກັນວິຈານການສະແດງຂອງນັກສະແດງງິ້ວປັກກິ່ງ ແລະມີຄຳເຫັນຕໍ່ການແຂ່ງຂັນ ໂດຍຜ່ານເວັບໄຊ,ໂທລະສັບ ແລະວິທີອື່ນໆ, ໃນນັ້ນ ມີຜູ້ມັກສິລະປະງິ້ວປັກກິ່ງຫຼາຍປີ, ແລ້ວຍັງມີຊາວໜຸ່ມທີ່ບໍ່ເຄີຍຊົມງິ້ວປັກກີ່ງ ຈັກເທື່ອ, ແຕ່ເຂົາເຈົ້າລ້ວນແຕ່ບອກວ່າມັກງິ້ວປັກກິ່ງຫຼາຍ. ທ່ານຢຽນເຕີເວີຍ ຜູ້ກຳ ກັບການສະແດງກ່າວວ່າ:" ສັງຄົມໃຫ້ຄວາມສົນໃຈຕໍ່ການແຂ່ງຂັນຫຼາຍກວ່າປີທີ່ຜ່ານມາ,ຜ່ານການຖ່າຍທອດສົດທາງເວັບໄຊ, ຜູ້ຊົມມີໂອກາດຊົມລາຍການ ແລະມັກການແຂ່ງຂັນດັ່ງກ່າວຫຼາຍ.ຜູ້ຊົມຕ່າງປະເທດ ແລະນັກສຶກສາຫຼາຍຄົນໄດ້ຊົມການແຂ່ງຂັນໂດຍຜ່ານການຖ່າຍທ່ອດສົດທາງເວັບໄຊນີ້,ສະນັ້ນອັດຕາການຊົມລາຍການ ກໍ່ສູງກວ່າປີທີ່ຜ່ານມາ.ຜ່ານການແຂ່ງຂັນເທື່ອນີ້,ພວກເຮົາໄດ້ຮູ້ວ່າ ຄົນທີ່ສົນໃຈຕໍ່ນັກສະແດງຊາວໜຸ່ມ ແລະສິລະປະງິ້ວປັກກິ່ງນັບມື້ນັບຫຼາຍຂຶ້ນ,ສະນັ້ນຈຶ່ງສາມາດເວົ້າໄດ້ວ່າ ສິລະປະງິ້ວປັກກິ່ງພວມມີຊີວິດຊີວາຄືນໃໝ່ໃນໝູ່ປະຊາຊົນທົ່ວໄປ "

ການສະແດງທີ່ດີເດັ່ນຂອງນັກສະແດງໜຸ່ມ ກໍ່ເຮັດໃຫ້ຜູ້ຊົມຕື່ນຕາຕື່ນໃຈ.ຜູ້ຊົມແຂວງຊ່ານຕຸ່ງຜູ້ໜຶ່ງຂຽນຂໍ້ຄວາມຢູ່ເວັບໄຊວ່າ: "ອາທິດນີ້ ຂ້ອຍໄດ້ຊົມການແຂ່ງຂັນງິ້ວປັກກິ່ງຊາວໜຸ່ມຈີນຕະຫຼອດ,ຈິ່ງຮູ້ວ່າມີຊາວໜຸ່ມຫຼາຍຄົນເກັ່ງຫຼາຍ, ເຂົາເຈົ້າຍອມເປັນນັກສະແດງງິ້ວປັກກິ່ງ ທີ່ຖືວ່າເປັນອາຊີບໄດ້ເງິນບໍ່ຫຼາຍ, ແລະກໍ່ຍ້ອນມີເຂົາເຈົ້າ,ການຟື້ນຟູຄວາມຈະເລີນຮຸ່ງເຮືອງຂອງ ງິ້ວປັກກິ່ງຈິ່ງມີຄວາມຫວັງຄືນມາ"

ການແຂ່ງຂັນງິ້ວປັກກິ່ງຊາວໜຸ່ມເລີ່ມຈັດຂຶ້ນໃນປີ1987, ຈາກນັ້ນມາ ກໍ່ຈັດຂຶ້ນໃນທຸກໆ4ປີ, ແລະກໍ່ເກີດມີນັກສະແດງເກັ່ງຈຳນວນໜຶ່ງໃນການແຂ່ງຂັນທຸກຄັ້ງ.ປະຈຸບັນ,ນັກສະແດງງິ້ວປັກກິ່ງທີ່ມີຊື່ສຽງກວ່າໝູ່ແມ່ນທ້າວຢີຂຸຍຈື້,ທ້າວເຫມິງກວາງລູ້,ນາງຫຼີເຊິ້ງຊູ້ ແລະຜູ້ອື່ນໆ,ຜູ້ຊົມຮູ້ຈັກເຂົາເຈົ້າຈາກການແຂ່ງຂັນ,ສະນັ້ນ ວົງການງິ້ວປັກກິ່ງ ແລະວົງການອື່ນໆໃນສັງຄົມກໍ່ໄດ້ຝາກຄວາມຫວັງຕໍ່ຜູ້ທີ່ຊະນະການແຂ່ງຂັນງິ້ວປັກກິ່ງຊາວໜຸ່ມຄັ້ງນີ້ເຊັ່ນດຽວກັນ.

ແມ່ເຖົ້າຫຼິວຊິ້ວຢົງ, ອາຍຸເກືອບ80ປີ, ແມ່ນສິລະປິນທີ່ມີຊື່ສຽງທາງການສະແດງງິ້ວປັກກິ່ງ, ເພີ່ນໄດ້ເປັນກຳມະການຂອງການແຂ່ງຂັນງິ້ວປັກກິ່ງຊາວໜຸ່ມ6ເທື່ອແລ້ວ, ເພີ່ນເຫັນວ່າການແຂ່ງຂັນດັ່ງກ່າວ ໄດ້ສ້າງໂອກາດການສະແດງອອກ ໃຫ້ນັກສະແດງງິ້ວປັກກິ່ງຊາວໜຸ່ມທັງຫຼາຍ, ແຕ່ນັກສະແດງຊາວໜຸ່ມຍັງຕ້ອງພະຍາຍາມຢ່າງບໍ່ຢຸດຢັ້ງເພື່ອສືບທອດແລະເສີມຂະຫຍາຍສິລະປະງິ້ວປັກກິ່ງຕື່ມອີກ, ເພີ່ນເວົ້າວ່າ:"ຂ້າພະເຈົ້າເປັນກຳມະການຂອງການແຂ່ງຂັນທຸກຄັ້ງ,ການແຂ່ງຂັນງິ້ວປັກກິ່ງຊາວໜຸ່ມໄດ້ບຳລຸງສ້າງນັກສະແດງຊາວໜຸ່ມຫຼາຍຄົນ, ເຂົາເຈົ້າກາຍເປັນນັກສະແດງສຳຄັນ ຢູ່ເທິງເວທີງິ້ວປັກກິ່ງ. ແຕ່ການກາຍເປັນນັກສະແດງງິ້ວປັກກິ່ງທີ່ມີຊື່ສຽງຍາກຫຼາຍ,ຊາວໜຸ່ມຕ້ອງມີຈິດໃຈທີ່ຖືຄວາມຫຍຸ້ງຍາກເປັນຄວາມມ່ວນຊື່ນ,ຍຶດໝັ້ນແລະພະຍາຍາມຢ່າງບໍ່ລົດລະ, ເພື່ອສົ່ງເສີມສິລະປະງິ້ວປັກກິ່ງພວກເຮົາ. "

ສື່ມວນຊົນເຫັນວ່າ: ການແຂ່ງຂັນງິ້ວປັກກິ່ງຊາວໜຸ່ມໄດ້ບຳລຸງສ້າງນັກສະແດງງິ້ວປັກກິ່ງລຸ້ນໃໝ່,ທັງດຶງດູດຜູ້ຊົມໃໝ່, ທັງສ້າງຜົນສະທ້ອນອັນຍາວໄກຕໍ່ການສົ່ງເສີມສິລະປະງິ້ວປັກກິ່ງໃຫ້ທົ່ວເຖິງ.

ຂ່າວ-ບົດທີ່ກ່ຽວຂ້ອງ

ຄຳເຫັນ