ປີ 2008 ເສດຖະກິດຈີນເຕີບໂຕ 9%
-----------------------------------------------------------------------------------------------------------------
ຕາມຂ່າວCRI: ວັນທີ 22 ມັງກອນນີ້, ທ່ານມາຈ້ຽນຖາງ ຫົວໜ້າກົມສະຖິຕິແຫ່ງຊາດຈີນກ່າວວ່າ, ອີງຕາມການຄາດຄະເນຫຼ້າສຸດຂອງອົງການກອງທຶນສາກົນຫຼືIMF, ປີ 2008 ເສດຖະກິດໂລກສະເລ່ຍແລ້ວເຕີບໂຕ 3,7%. ເສດຖະກິດຈີນໄດ້ເຕີບໂຕ 9% ໃນສະພາບການທີ່ມີຄວາມຫຍຸ້ງຍາກ, ໃນປະຈຸບັນໄດ້ປະກອບສ່ວນຫຼາຍກວ່າ 20% ຕໍ່ການເຕີບໂຕຂອງເສດຖະກິດໂລກ.
ທ່ານມາຈ້ຽນຖາງກ່າວວ່າ, ປີ 2008 ຈີນໄດ້ບັນລຸການຜະລິດທັນຍາຫານເພີ່ມຂຶ້ນ 5 ປີລຽນຕິດ. ລາຍໄດ້ຂອງປະຊາຊົນຕົວເມືອງເພີ່ມຂຶ້ນ 8,4% ແລະລາຍໄດ້ຂອງຊາວກະສິກອນເພີ່ມຂຶ້ນ 8%. ຮອດທ້າຍປີ 2008, ຄັງສຳຮອງເງິນຕາຕ່າງປະເທດຂອງຈີນມີ 1950 ຕື້ໂດລາ, ເພີ່ມຂຶ້ນຫຼາຍກວ່າປີ 2007 27,3%.
ທ່ານມາຈ້ຽນຖາງກ່າວວ່າ, ຍ້ອນໄດ້ຮັບຜົນສະທ້ອນຈາກວິກິດການການເງິນສາກົນ, ການເພີ່ມຂຶ້ນຂອງອຸດສາຫະກຳຈີນຊ້າລົງ, ຜົນກຳໄລຂອງວິສາຫະກິດກໍຫຼຸດລົງ. ທ່ານກ່າວວ່າ, ຄຽງຄູ່ກັບນະໂຍບາຍດັດສົມມະຫາພາກຂອງລັດຖະບານຈີນເລີ່ມປະຕິບັດເທື່ອລະກ້າວ, ເສດຖະກິດຈີນຈະກ້າວອອກຈາກຄວາມຫຍຸ້ງຍາກໃນປະຈຸບັນໄດ້ຢ່າງແນ່ນອນ.
