ສະຖາບັນຂົງຈື້ຊຸກຍູ້ກະແສນິຍົມການຮຽນພາສາຈີນໃນໂລກ
-----------------------------------------------------------------------------------------------------------------
ຄຽງຄູ່ກັບກະແສນິຍົມການຮຽນພາສາຈີນໄດ້ນັບມື້ນັບເພີ່ມຂຶ້ນ,ປະຈຸບັນ,ຈຳນວນຄົນທີ່ຮຽນພາສາຈີນໂດຍຜ່ານຊ່ອງທາງຕ່າງໆຢູ່ຕ່າງປະເທດມີຫຼາຍກວ່າ 40 ລ້ານຄົນ.ສຳລັບເພື່ອນມິດຕ່າງປະເທດທີ່ນິຍົມຮຽນພາສາຈີນແລະຮູ້ຈັກຈີນ,ນອກຈາກໄປຮຽນຕໍ່ຢູ່ຈີນແລ້ວ,ຍັງມີຊ່ອງທາງທີ່ຍິ່ງສະດວກອັນໜຶ່ງ ຄື ໄປຮຽນຢູ່ສະຖາບັນຂົງຈື້ຂອງມະຫາວິທະຍາໄລຫຼືຄຸ້ມຊຸມຊົນຂອງທ້ອງຖິ່ນ.
ສະຖາບັນຂົງຈື້ແມ່ນເອົາຊື່ຂອງທ່ານຂົງຈື້ ນັກແນວຄຶດທີ່ມີຊື່ສຽງໃນສະໄໝບູຮານຂອງຈີນມາຕັ້ງເປັນຊື່,ແມ່ນອົງການທີ່ເຜີຍແຜ່ພາສາຈີນແລະວັດທະນະທຳຈີນຕໍ່ທົ່ວໂລກ.ມັນຕ່າງກັນກັບວິຊາພາສາຈີນຂອງມະຫາວິທະຍາໄລຕ່າງປະເທດ,ເພາະວ່າສະຖາບັນຂົງຈື້ໄຂປະຕູຕໍ່ທົ່ວສັງຄົມ,ຢູ່ແຫ່ງນີ້,ຄົນທັງຫຼາຍບໍ່ພຽງແຕ່ສາມາດໄດ້ຮັບການອົບຮົມພາສາຈີນໃນລະດັບທີ່ຕ່າງກັນເທົ່ານັ້ນ,ຍັງສາມາດໄດ້ຮັບຂໍ້ມູນຂ່າວສານທີ່ຕິດແທດຕົວຈິງແລະຫຼາຍຢ່າງກ່ຽວກັບຈີນອີກດ້ວຍ.
ນາງລີວຢຽນຕົງ ທີ່ປຶກສາແຫ່ງລັດ ປະທານຄະນະກຳມະການສຳນັກງານໃຫຍ່ສະຖາບັນຂົງຈື້ຂອງຈີນບອກວ່າ,ນັບແຕ່ສະຖາບັນຂົງຈື້ທີ່ຢູ່ຕ່າງປະເທດແຫ່ງທຳອິດໄດ້ສ້າງຕັ້ງຂຶ້ນຢູ່ເຊອູນ ນະຄອນຫຼວງສ.ເກົາຫຼີໃນປີ 2004 ມານີ້,ສະຖາບັນຂົງຈື້ໄດ້ເຜີຍແຜ່ໄປຮອດ 5 ທະວີບທົ່ວໂລກຢ່າງວ່ອງໄວ.ນາງກ່າວວ່າ:
"ປະຈຸບັນ,ຈີນໄດ້ສ້າງຕັ້ງສະຖາບັນຂົງຈື້ 249 ແຫ່ງຢູ່ 78 ປະເທດແລະເຂດແຄວ້ນ.ສະຖາບັນຂົງຈື້ເຫຼົ່ານີ້ໃຊ້ຮູບການສຶກສາທີ່ສອດຄ່ອງກັບສະພາບຕົວຈິງຂອງທ້ອງຖິ່ນແລະຄ່ອງແຄ້ວບໍ່ຕາຍຕົວ,ໄຂປະຕູຕໍ່ໂຮງຮຽນປະຖົມ ມັດທະຍົມແລະມະຫາວິທະຍາໄລພ້ອມດ້ວຍຄຸ້ມຊຸມຊົນແລະວິສາຫະກິດ,ໄດ້ມີນັກຮຽນທີ່ຈົດທະບຽນ 1 ແສນ 3 ໝື່ນຄົນ,ຍັງໄດ້ຈັດກິດຈະກຳແລກປ່ຽນວັດທະນະທຳທີ່ມີຫຼາກຫຼາຍສີສັນ,ມີ 1 ລ້ານ 4 ແສນກວ່າຄົນເຂົ້າຮ່ວມ."
ສະຖາບັນຂົງຈື້ໃຊ້ຮູບແບບຈີນກັບຕ່າງປະເທດຮ່ວມມືກັນ,ເຂດແຄວ້ນແລະໂຮງຮຽນຫຼືມະຫາວິທະຍາໄລທີ່ມີການໄປມາຫາສູ່ກັນຢ່າງໃກ້ຊິດກັບຈີນແລະມີຄວາມຕ້ອງການຮຽນພາສາຈີນສູງ,ສາມາດຮ້ອງຂໍນຳສຳນັກງານໃຫຍ່ສະຖາບັນຂົງຈື້ຈີນ,ພາຍຫຼັງໄດ້ຮັບການອະນຸມັດແລ້ວ,ຈີນຈະຮັບຜິດຊອບສົ່ງອາຈານສອນພາສາຈີນ ສະໜອງປື້ມຮຽນພາສາຈີນແລະເອກະສານຕ່າງໆ,ແລະດຳເນີນການຊີ້ນຳທາງການສອນ.ຮູບການຮ່ວມມືແບບນີ້ເຮັດໃຫ້ສະຖາບັນຂົງຈື້ມີສີສັນຂອງຈີນແລະຕ່າງປະເທດພ້ອມກັນ,ຍັງສາມາດຕອບສະໜອງຄວາມຕ້ອງການຂອງການສອນພາສາຈີນຢູ່ຕ່າງປະເທດ.ຕາມສະຖິຕິ,ພຽງແຕ່ປີ 2008 ເທົ່ານັ້ນ,ຈີນກັບຕ່າງປະເທດກໍ່ໄດ້ໃຊ້ງົບປະມານ 100 ລ້ານກວ່າໂດລາເຂົ້າໃນສະຖາບັນຂົງຈື້ຂອງປະເທດຕ່າງໆ.
ສະຖາບັນຂົງຈື້ຢູ່ແຫ່ງຕ່າງໆຂອງໂລກມີຈຸດພິເສດທີ່ຕ່າງກັນໃນການຂະຫຍາຍຕົວ.ຕົວຢ່າງຄື,ສະຖາບັນຂົງຈື້ຢູ່ຕັສເກັນແຫ່ງອຸສເບກີສະຖານຕົ້ນຕໍແມ່ນສອນພາສາຈີນໃຫ້ວົງການອຸດສາຫະກຳການຄ້າແລະການທູດ,ສ່ວນສະຖາບັນຂົງຈື້ການຄ້າຢູ່ລອນດອນໄດ້ຮ່ວມມືຢ່າງແໜ້ນແຟ້ນກັບວົງການການເງິນ ເສດຖະກິດແລະການຄ້າ,ໄດ້ດຶງດູດເຈົ້າໜ້າທີ່ລະດັບສູງຂອງວິສາຫະກິດຂະໜາດໃຫຍ່ຫຼາຍແຫ່ງມາຮຽນພາສາຈີນ.ພ້ອມກັນນັ້ນ,ສະຖາບັນຂົງຈື້ຢູ່ແຫ່ງຕ່າງໆຍັງໄດ້ປັບໃຫ້ຖືກກັບຈຸດພິເສດຂອງທ້ອງຖິ່ນ,ຈັດວາງຫຼັກສູດແລະກິດຈະກຳຕ່າງໆທີ່ສະແດງສີສັນພິເສດຂອງວັດທະນະທຳຈີນ.ຕົວຢ່າງຄື,ສະຖາບັນຂົງຈື້ມະຫາວິທະຍາໄລເຊົາແບັງຢູ່ລອນດອນອັງກິດໄດ້ເປີດຫຼັກສູດສອນແພດສາດພື້ນເມືອງຈີນ,ສະຖາບັນຂົງຈື້ຢູ່ເບີເກັນແຫ່ງນອກແວຍັງສອນກັງຟູ້ຈີນ.
ນັບມາຮອດປະຈຸບັນ,ມີມະຫາວິທະຍາໄລຂອງຈີນຮ້ອຍກວ່າແຫ່ງໄດ້ເຂົ້າຮ່ວມໂຄງການຮ່ວມມືຈັດຕັ້ງສະຖາບັນຂົງຈື້.ຕົວຢ່າງຄື,ມະຫາວິທະຍາໄລປະຊາຊົນຈີນເຊິ່ງເປັນມະຫາວິທະຍາໄລທີ່ມີຊື່ສຽງຂອງຈີນກໍ່ໄດ້ຮ່ວມມືກັບຕ່າງປະເທດສ້າງຕັ້ງສະຖາບັນຂົງຈື້ 8 ແຫ່ງ.ທ່ານເຊີນຢູລູ້ ຮອງອະທິການບໍດີຂອງມະຫາວິທະຍາໄລດັ່ງກ່າວກ່າວວ່າ:
"ໜ້າທີ່ຕົ້ນຕໍແມ່ນສົ່ງອາຈານສອນພາສາຈີນ ອາຈານສອນວັດທະນະທຳຈີນແລະການລົງທຶນຕໍ່ຈີນອອກໄປຕ່າງປະເທດ.ພ້ອມກັນນັ້ນ,ພວກຂ້າພະເຈົ້າຍັງເອົາໃຈໃສ່ອົບຮົມຄູສອນພາສາຈີນທ້ອງຖິ່ນຢູ່ປະເທດຕ່າງໆ,ແລະຮ່ວມມືກັບທ້ອງຖິ່ນພັດທະນາປື້ມແບບຮຽນໃໝ່.ຢູ່ມະຫາວິທະຍາໄລດູບຼີນແຫ່ງອຽກລັງ,ພວກຂ້າພະເຈົ້າໄດ້ຈັດງານສະແດງງິ້ວຈີນ.ໃຫ້ເພື່ອນມິດຕ່າງປະເທດຮູ້ຈັກວັດທະນະທຳດັ້ງເດີມຂອງຈີນ."
ສະຖາບັນຂົງຈື້ທີ່ແຈກຢາຍຢູ່ແຫ່ງຕ່າງໆໄດ້ເສີມຂະຫຍາຍບົດບາດໃຈກາງໃນການແນະນຳຈີນຢູ່ເຂດຕ່າງໆ.ມະຫາວິທະຍາໄລແມນເຊັສເຕີແຫ່ງອັງກິດກໍ່ໄດ້ຈັດຕັ້ງງານວາງສະແດງ"ສັບປະດາຈີນ"ກ່ອນໄຂງານກິລາໂອລິມປິກປັກກິ່ງ.ທ່ານອາລິສແຕຣ ອູຟ ຮອງອະທິການບໍດີຂອງມະຫາວິທະຍາໄລດັ່ງກ່າວກ່າວວ່າ,ສະຖາບັນຂົງຈື້ບໍ່ພຽງແຕ່ແມ່ນອົງການສອນພາສາຈີນເທົ່ານັ້ນ,ແຕ່ໄດ້ກາຍເປັນ"ປ່ອງຢ້ຽມ"ທີ່ສຳຄັນສຳລັບຄົນທົ່ວໄປເພື່ອຮູ້ຈັກປະເທດຈີນ,ທ່ານກ່າວວ່າ:
"ສະຖາບັນຂົງຈື້ທີ່ຕັ້ງຢູ່ມະຫາວິທະຍາໄລພວກເຮົາຊ່ວຍຄົນນອກມະຫາວິທະຍາໄລຮູ້ຈັກຈີນ,ພວກຂ້າພະເຈົ້າໄດ້ຈັດກິດຈະກຳຕ່າງໆ,ອົບຮົມຄູສອນພາສາຈີນໃນໂຮງຮຽນມັດທະຍົມ,ໃຫ້ຄວາມຊ່ວຍເຫຼືອດ້ານພາສາແລະວັດທະນະທຳແກ່ນັກທຸລະກິດທີ່ຈະໄປຢ້ຽມຢາມຈີນ.ເວົ້າລວມແລ້ວ,ສະຖາບັນຂົງຈື້ໄດ້ຍົກສູງລະດັບຄວາມຮູ້ຈັກແລະເຂົ້າໃຈຈີນຂອງປະຊາຊົນໃນສັງຄົມ,ບໍ່ພຽງແຕ່ໄດ້ສ້າງຜົນປະໂຫຍດໃຫ້ນັກສຶກສາຂອງມະຫາວິທະຍາໄລພວກເຮົາເທົ່ານັ້ນ,ຍິ່ງເຮັດໃຫ້ສາມັນຊົນຢູ່ແມນເຊັສເຕີແລະພາກຕາເວັນຕົກສຽງເໜືອຂອງອັງກິດໄດ້ຮັບຄວາມຊ່ວຍເຫຼືອຢ່າງຫຼວງຫຼາຍ."
ໃນຊຸມປີມໍ່ໆມານີ້,ຈຳນວນຄົນທີ່ນິຍົມຮຽນພາສາຈີນຢູ່ປະເທດຕ່າງໆໄດ້ເພີ່ມຂຶ້ນຢ່າງບໍ່ຢຸດຢັ້ງ.ຕົວຢ່າງຄືອາເມລິກາ,ນັກຮຽນມັດທະຍົມທີ່ຮຽນພາສາຈີນໄດ້ເພີ່ມຈາກ 2 ໝື່ນຄົນເມື່ອ 3 ປີກ່ອນຂຶ້ນຮອດ 1 ແສນ 3 ໝື່ນຄົນ,ສ່ວນຢູ່ອັງກິດແລະຝະຣັ່ງ,ຕ່າງກໍ່ມີໂຮງຮຽນມັດທະຍົມແລະປະຖົມ 300 ກວ່າແຫ່ງໄດ້ຈັດຕັ້ງສອນພາສາຈີນ.ເພື່ອຕອບສະໜອງຄວາມຕ້ອງການ,ນັບມາຮອດປະຈຸບັນ,ສຳນັກງານໃຫຍ່ສະຖາບັນຂົງຈື້ຂອງຈີນໄດ້ສົ່ງອາຈານສອນພາສາຈີນແລະອາສາສະໝັກເກືອບ 4000 ຄົນອອກໄປ 150 ກວ່າປະເທດແລະເຂດແຄວ້ນໃນໂລກ,ແລະໄດ້ອົບຮົມຄູສອນພາສາຈີນ 2 ໝື່ນກວ່າຄົນໃຫ້ 40 ກວ່າປະເທດແລະເຂດແຄວ້ນ.
ທ່ານມາຈ້ຽນເຟີ່ຍ ຮອງຜູ້ອຳນວຍການໃຫຍ່ສຳນັກງານໃຫຍ່ສະຖາບັນຂົງຈື້ບອກວ່າ,ເພື່ອຕອບສະໜອງຄວາມຕ້ອງການຂອງຊາວຕ່າງປະເທດນັບມື້ນັບຫຼາຍທີ່ນິຍົມຮຽນພາສາຈີນ,ສະຖາບັນຂົງຈື້ພວມພະຍາຍາມພັດທະນາປື້ມຮຽນພາສາຈີນດ້ວຍພາສາທີ່ໃຊ້ຫຼາຍ 40 ກວ່າຊະນິດ.ທ່ານກ່າວວ່າ:
"ພວກຂ້າພະເຈົ້າຈະອີງຕາມຮີດຄອງປະເພນີຂອງປະເທດຕ່າງໆ ພາສາຊະນິດຕ່າງໆແລະວັດທະນະທຳຕ່າງໆ,ພັດທະນາປື້ມຮຽນທີ່ມີສີສັນພິເສດ,ປື້ມຮຽນພາສາຈີນແລະເອກະສານເຄື່ອງມືທີ່ກ່ຽວຂ້ອງຈະຄ່ອຍເຜີຍແຜ່ເຂົ້າໃນພາສາທຸກຊະນິດເປັນກ້າວໆ."
