ຮ່ວມກັນປຶກສາຫາຫຼືເພື່ອຮັບມືກັບວິກິດການການເງິນ
-----------------------------------------------------------------------------------------------------------------
ນັບແຕ່ກ້າວເຂົ້າສູ່ປີ2009ເປັນຕົ້ນມາ, ວິກິດການການເງິນທົ່ວໂລກທີ່ຮ້າຍແຮງມາເປັນເວລາປີປາຍນັ້ນບໍ່ມີທ່າອ່ຽງດີຂຶ້ນເລີຍ, ທັງຍັງນັບມື້ນັບຮຸນແຮງຂຶ້ນອີກ. ກອງທຶນການເງິນສາກົນຫຼືIMF, ທະນາຄານໂລກແລະອົງການສາກົນຕ່າງໆໄດ້ຫຼຸດການຄາດໝາຍຕໍ່ການເຕີບໂຕຂອງເສດຖະກິດໂລກລົງຕື່ມອີກ. ໃນກອງປະຊຸມປະຈຳປີເວທີປຶກສາຫາລືລະດັບສູງການພັດທະນາຈີນ2009ທີ່ຫາກໍ່ສິ້ນສຸດລົງນັ້ນ, ຈີນຮັກສາການພັດທະນາເສດຖະກິດຢ່າງໝັ້ນທ່ຽງແລະໄວສົມຄວນຫຼືບໍ່, ຈະເສີມຂະຫຍາຍບົດບາດແນວໃດໃນການເຄື່ອນໄຫວທີ່ທົ່ວໂລກຮັບມືກັບວິກິດການການເງິນແລະບັນຫາຕ່າງໆໄດ້ກາຍເປັນຫົວຂໍ້ທີ່ຄົນພາຍໃນແລະຕ່າງປະເທດປຶກສາຫາຫຼືຢ່າງຈິງຈັງ. ໃນລາຍການແຈ້ງຂ່າວເສດຖະກິດຈີນມື້ນີ້, ເຊີນຟັງຂ່າວລະອຽດ.
ໃນບົດລາຍງານສະບັບໜຶ່ງທີ່ເຜີຍແຜ່ໃນຫວ່າງກອ່ນນີ້ບໍ່ດົນ, ທະນາຄານໂລກໄດ້ປ່ຽນການຄາດໝາຍທີ່ເສດຖະກິດທົ່ວໂລກຈະເຕີບໂຕ1%ເປັນເສດຖະກິດທົ່ວໂລກຈະເຕີບໂຕລົບ1,5%. IMFກໍ່ຄາດວ່າເສດຖະກິດໂລກປີນີ້ຈະເຕີຍໂຕລົບ 0,5%ຫາລົບ1,5%. ແຕ່ວ່າ, ລັດຖະບານຈີນຊ້ຳພັດສະເໜີວ່າຈະເຮັດໃຫ້ເສດຖະ ກິດເຕີບໂຕປະມານ8%, ຕ່າງປະເທດສົນໃຈຫຼາຍ. ໃນກອງປະຊຸມປະຈຳປີເວທີປຶກສາຫາລືລະດັບສູງການພັດທະນາຈີນ2009, ທ່ານຫຼີ້ເຄີ້ສຽງ, ຮອງນາຍົກລັດ ຖະມົນຕີຈີນກ່າວວ່າ, ຈີນມີຄວາມສາມາດບັນລຸຄາດໝາຍທີ່ຮັກສາໃຫ້ເສດຖະກິດພັດທະນາຢ່າງໝັ້ນທ່ຽງແລະໄວສົມຄວນ.
ພື້ນຖານແຫ່ງການພັດທະນາເສດຖະກິດຂອງຈີນແລະທ່າອຽງທີ່ພັດທະນາໄປໃນທິດທາງທີ່ຖືກຕ້ອງແມ່ນບໍ່ໄດ້ປ່ຽນແປງ. ຈີນພວມຢູ່ໃນໄລຍະທີ່ການຫັນເປັນອຸດສາຫະກຳແລະຫັນເປັນຕົວເມືອງພັດທະນາຢ່າງວ່ອງໄວ, ຕະຫຼາດພາຍໃນປະເທດມີໂອກາດພັດທະນາທີ່ດີ, ແລະມີຊ່ອງທາງພັດທະນາເສດຖະກິດຢ່າງກວ້າງຂວາງ. ພື້ນຖານເຕັກນິກນັບມື້ນັບເຂັ້ມແຂງຂຶ້ນ, ຊັບພະຍາກອນແຮງງານມີຢ່າງຫຼວງຫຼາຍ, ແລະມີທຶນຮອນພຽງພໍ. ເມື່ອປະເຊີນກັບການທ້າທາຍ, ລັດຖະບານຈີນໄດ້ປັບປຸງນະໂຍບາຍເສດຖະກິດມະຫາພາກຢ່າງທັນການ, ແລະໃຊ້ມາດຕະການຕ່າງໆ, ພວມເສີມຂະຫຍາຍບົດບາດທີ່ມີປະສິດທິຜົນ.
ນັບແຕ່ຫົກເດືອນທ້າຍປີກາຍນີ້ເປັນຕົ້ນມາ, ລັດຖະບານຈີນໄດ້ໃຊ້ມາດຕະການຕ່າງໆເພື່ອຮັບມືກັບວິກິດການ, ເຊັ່ນ ເພີ່ມການລົງທຶນຂອງລັດແລະກະຕຸ້ນກຳລັງຊື້ຂອງປະຊາຊົນຢ່າງຂະໜາດໃຫຍ່; ປະຕິບັດແຜນການປັບປຸງແລະຟື້ນຟູຜະລິດຕະກຳ, ປັບປຸງໂຄງປະກອບຜະລິດຕະກຳແລະປະຖິ້ມກຳລັງການຜະລິດທີ່ຫຼ້າຫຼັງ; ເພີ່ມທະວີກຳລັງແຮງທາງວິທະຍາສາດເຕັກນິກແລະຊຸກຍູ້ວິທະຍາສາດເຕັກນິກຫັນເປັນຜະລິດຕະກຳ; ຊຸກຍູ້ການປະກອບອາຊີບແລະປັບປຸງລະບຽບການປະກັນສັງຄົມເປັນຕົ້ນ. ກ່ຽວກັບເລື່ອງນີ້, ທ່ານເກີລິນ ປະທານກຸ່ມບໍລິສັດຮຸ້ຍເຟີ່ງເຫັນວ່າ,
ຈີນໄດ້ເສີມຂະຫຍາຍບົດບາດນັບມື້ນັບສຳຄັນໃນເສດຖະກິດໂລກ. ຈີນແມ່ນກຸ່ມເສດຖະກິດໃຫຍ່ທີ3ໃນໂລກ, ກໍ່ອາດຈະແມ່ນກຸ່ມເສດຖະກິດກຸ່ມດຽວທີ່ເສດຖະກິດອາດຈະເຕີບໂຕ8%ໃນປີ2009. ພວກຂ້າພະເຈົ້າຮູ້ສຶກດີໃຈທີ່ໄດ້ເຫັນວ່າ, ໃນເວລາທີ່ທົ່ວໂລກສູນເສຍຄວາມໝັ້ນໃຈແລະຄວາມໄວ້ໃຈ, ມາດຕະການກະຕຸ້ນເສດຖະກິດຂອງລັດຖະບານຈີນຍັງມີປະສິດທິຜົນຢ່າງຕັ້ງໜ້າ.
ທ່ານແຈມສ໌ ອາເດນສ໌ ຮອງປະທານທະນາຄານໂລກຜູ້ຮັບຜິດຊອບວຽກງານພາກພື້ນອາຊີຕາເວັນອອກ ແລະ ປາຊິຟິກເຫັນວ່າ, ໃນຂະບວນການຮັບມືກັບວິກິດການການເງິນ, ມາດຕະການທີ່ເດັດຂາດ ແລະ ແຂງແຮງແມ່ນສຳຄັນທີ່ສຸດ,ຈີນໄດ້ເຮັດແນວນີ້ແລ້ວ.
"ມາຮອດປັດຈຸບັນ, ມາດຕະການຮັບມືດ້ານການເງິນຂອງຈີນ ທັງໄວທັງມີແຮງ,ພ້ອມກັນນັ້ນວິທີກໍ່ເໝາະສົມ. ລັດຖະບານຈີນໄດ້ກຳນົດ ແລະ ປະກາດໃຊ້ແຜນການກະຕຸ້ນເສດຖະກິດຂະໜາດໃຫຍ່ຢ່າງວ່ອງໄວ. ຍ້ອນວ່າໄດ້ປະຕິບັດນະໂຍບາຍສຸຂຸມຮອບຄອບໃນອະດີດ, ໃນເວລາປະສົບວິກິດການການເງິນ,ຈີນຈິ່ງມີຊ່ອງທາງການເງິນ ເພື່ອປະຕິບັດແຜນການກະຕຸ້ນເສດຖະກິດຂະໜາດໃຫຍ່. ນອກນີ້,ໃນແຜນການກະຕຸ້ນເສດຖະກິດຂອງລັດຖະບານ ມີງົບປະມານຫຼາຍຢ່າງແມ່ນໃຊ້ເພື່ອກະຕຸ້ນການບໍລິໂພກ ແລະ ຍົກລະດັບຊີວິດການເປັນຢູ່ໃຫ້ສູງຂຶ້ນ, ເຊິ່ງລວມທັງປັບປຸງລະບົບຂົນສົ່ງສາທາລະນະໃຫ້ສົມບູນຂຶ້ນ, ບຳບັດນ້ຳເປື້ອນ, ແລະ ໂຄງການຮັກສາສິ່ງແວດລ້ອມອື່ນໆ, ທິດທາງນີ້ແມ່ນຖືກຕ້ອງສົມຄວນ."
ເວົ້າສຳລັບຈີນທີ່ມີຈຸດພິເສດເສດຖະກິດແບບເປີດປະຕູອັນເດັ່ນຊັດນັ້ນ,ຂະແໜງການສົ່ງອອກໄດ້ຮັບຜົກກະທົບຈາກວິກິດການການເງິນຫຼາຍທີ່ສຸດ. ພາຍໃຕ້ສະພາບທີ່ຄວາມຕ້ອງການຂອງພາບນອກຫຼຸດລົງຫຼາຍ,ວິສາຫະກິດສົ່ງອອກທັງຫຼາຍໄດ້ພົບຄວາມຫຍຸ້ງຍາກ,ເກີດສະພາບທີ່ຫຼຸດເງິນເດືອນ ແລະ ພະນັກງານໃຫ້ໜ້ອຍລົງ,ຈົນກະທັ້ງອັດໂຮງງານ. ພ້ອມກັນນັ້ນ, ບາງປະເທດໄດ້ປະກດໃຊ້ມາດຕະການປົກປ້ອງການຄ້າ,ຈຳກັດຈົນຮອດຫ້າມບໍ່ໃຫ້ນຳເຂົ້າຜະລິດຕະພັນຂອງຈີນ,ນີ້ເຮັດໃຫ້ວິສາຫະກິດສົ່ງອອກຂອງຈີນປະເຊີນຄວາມກົດດັນນັບມື້ນັບຫຼາຍຂຶ້ນ. ຕົວເລກສະແດງໃຫ້ເຫັນວ່າ, ມູນຄ່າສົ່ງອອກຂອງຈີນໄດ້ຫຼຸດລົງ4ເດືອນລຽນຕິດແລ້ວ,ສະພາບການໜັກໜ່ວງທີ່ສຸດ.
ໃນກອງປະຊຸມປະຈຳປີ2009ຂອງເວທີປຶກສາຫາລືລະດັບສູງກ່ຽວກັບການພັດທະນາຂອງຈີນ, ທ່ານເສິນເຕີມິງ ລັດຖະມົນຕີວ່າການກະຊວງການຄ້າຈີນກ່າວວ່າ, ເພື່ອຮັບມືກັບວິກິດການການເງິນ, ຈີນຈະຕັ້ງໜ້າເປີດກວ້າງຄວາມຕ້ອງການພາຍໃນ, ຊຸກຍູ້ໂຄງປະກອບການບໍລິໂພກໃນຊົນນະບົດໃຫ້ສູງຂຶ້ນ, ພ້ອມກັນນັ້ນ, ກໍ່ພະຍາຍາມຊຸກຍູ້ໃຫ້ການຄ້າກັບຕ່າງປະເທດເຕີບໂຕຢ່າງໜັກແໜ້ນ. ທ່ານກ່າວວ່າ, ຈີນຈະອີງຕາມທຳນຽມຂອງສາກົນ, ເພີ່ມທະວີການສະໜັບສະໜູນດ້ານນະໂຍບາຍຕໍ່ການຄ້າຂາເຂົ້າຂາອອກ, ຊຸກຍູ້ການຄ້າປຸງແຕ່ງໃຫ້ເພີ່ມຂຶ້ນຢ່າງໜັກແໜ້ນ, ພະຍາຍາມເປີດກວ້າງການນຳເຂົ້າສິນຄ້າ, ເນັ້ນໃສ່ການນຳເຂົ້າເຕັກນິກອຸປະກອນທີ່ທັນສະໄໝ, ເພີ່ມທະວີການນຳເຂົ້າເຄື່ອງອາໄຫຼ່ທີ່ເປັນຂໍກະແຈ, ຊັບພະຍາກອນສຳຄັນແລະວັດຖຸດິບທີ່ສຳຄັນ. ນອກນີ້, ຍັງຈະສືບຕໍ່ໃຊ້ທຶນຕ່າງປະເທດຢ່າງຕັ້ງໜ້າແລະສົ່ງເສີມໃຫ້ນັກທຸລະກິດຈີນໄປລົງທຶນຢູ່ຕ່າງປະເທດ.
ທ່ານ Joseph Stiglitzຜູ້ໄດ້ຮັບລາງວັນໂນແບນສາຂາເສດຖະສາດ, ສາສະດາຈານມະຫາວິທະຍາໄລໂກລົມບີຂອງອາເມລິກາເຫັນວ່າ, ປະເທດຕ່າງໆຄວນຖອດຖອນບົດຮຽນຂອງຈີນ.
ໃນຂະບວນການທີ່ໃຫ້ເສດຖະກິດທົ່ວໂລກຟື້ນຟູຄືນ, ຈີນສາມາດເສີມຂະຫຍາຍບົດບາດສຳຄັນ, ເພາະວ່າຈີນສາມາດເຮັດໃຫ້ເສດຖະກິດຂອງຕົນຮັກສາການເຕີບໂຕ. ອີກອັນໜຶ່ງ, ຈີນກໍ່ສາມາດປະກອບສ່ວນເພື່ອເຮັດໃຫ້ເສດຖະກິດທົ່ວໂລກຟື້ນຟູຄືນ. ຈີນສາມາດຊ່ວຍເຫຼືອປະເທດພວມພັດທະນາອື່ນໆ, ນີ້ແມ່ນສົມກັບຄວາມສາມາດຕົວຈິງຂອງຈີນເອງ.
ບຸກຄົນສຳຄັນຂອງຈີນແລະຕ່າງປະເທດທີ່ຮ່ວມປະຊຸມຕ່າງກໍ່ເຫັນວ່າ, ຖ້າວ່າມາດຕະການທຸກອັນທີ່ຮັບມືກັບວິກິດການການເງິນຂອງຈີນໄດ້ຜັນຂະຫຍາຍເປັນຢ່າງດີ, ຄາດວ່າຈະກາຍເປັນປະເທດທຳອິດທີ່ເດີນອອກຈາກເງົາມືດແຫ່ງວິກິດການການເງິນ.
ທ່ານຜູ້ຟັງທີ່ໂຄລົບທີ່ຟັງມານັ້ນແມ່ນບົດແຈ້ງຂ່າວເສດຖະກິດຈີນທີ່ພາດຫົວເລື່ອງວ່າ: ປຶກສາຫາລືເພື່ອຮັບມືກັບວິກິດການການເງິນ. ລາຍການແຈ້ງຂ່າວເສດຖະກິດຈີນຂອງພວກເຮົາພາກນີ້ຂໍຈົບລົງພຽງເທົ່ານີ້, ຂອບໃຈທ່ານທີ່ຮັບຟັງ, ສະບາຍດີ.
