ຖັກເພື່ອບັນຈຸອະດີດແລະອະນາຄົດຂອງແອັສປາຍດ້ວຍເສັ້ນຫວາຍ
-----------------------------------------------------------------------------------------------------------------
ງານວາງສະແດງໂລກ 2010 ທີ່ຄົນທັງຫຼາຍເອີ້ນວ່າ"ງານໂອລິມປິກດ້ານເສດຖະກິດ"ຈະເລີ່ມໄຂຂຶ້ນຢູ່ນະຄອນຊຽງໄຮ້ຂອງຈີນແຕ່ວັນທີ 1 ພຶດສະພາປີໜ້າເປັນຕົ້ນໄປ.ເມື່ອຮອດເວລານັ້ນ,ປະເທດຕ່າງໆທີ່ເຂົ້າຮ່ວມງານວາງສະແດງຈະມີຫໍວາງສະແດງຂອງປະເທດຕົນຢູ່ໃນເຂດຈັດງານເພື່ອສະແດງສະເໜ່ດ້ານວັດທະນະທຳຂອງຕົວເມືອງປະເທດຕົນທີ່ມີເອກະລັກພິເສດຕໍ່ນັກທ່ອງທ່ຽວ.ໃນຄໍລຳມື້ນີ້,ພວກເຮົາຂໍນຳພາທ່ານໄປສຳຜັດຫໍວາງສະແດງຂອງແອັສປາຍທີ່ພວມກໍ່ສ້າງຢູ່,ນີ້ແມ່ນສິ່ງກໍ່ສ້າງຮູບກະຕ່າທີ່ບັນຈຸອະດີດແລະອະນາຄົດຂອງແອັສປາຍທີ່ຖັກສານດ້ວຍເສັ້ນຫວາຍ.
(ພິທີໄຂສັບປະດາໂຄສະນາຫໍແອັສປາຍ)
ໃນເດືອນມີນາປີນີ້,ຫໍວາງສະແດງຂອງແອັສປາຍໃນງານວາງສະແດງໂລກຊຽງໄຮ້ໄດ້ລົງມືກໍ່ສ້າງຢ່າງເປັນທາງການ.ທ່ານຈາເວຍ ໂຄນດ໌,ຫົວໜ້າຄະນະຮັບຜິດຊອບຫໍວາງສະແດງແອັສປາຍຂອງງານວາງສະແດງໂລກຊຽງໄຮ້,ປະທານກົມງານວາງສະແດງສາກົນແຫ່ງຊາດແອັສປາຍໄດ້ບັນລະຍາຍຈຸດປະສົງຂອງການເຂົ້າຮ່ວມງານວາງສະແດງແລະຫົວຂໍ້ການວາງສະແດງຂອງຫໍແອັສປາຍຕໍ່ນັກຂ່າວ.ທ່ານກ່າວວ່າ:
"ຈຸດປະສົງຂອງງານວາງສະແດງໂລກໄດ້ຫັນຈາກການສະແດງຜົນງານຂອງປະເທດທີ່ເຂົ້າຮ່ວມງານເທົ່ານັ້ນມາເປັນການປຶກສາຫາລືກ່ຽວກັບຫົວຂໍ້ທີ່ມວນມະນຸດສົນໃຈຮ່ວມກັນ.ບົນພື້ນຖານຫົວຂໍ້ງານວາງສະແດງໂລກຊຽງໄຮ້ຄື'ນະຄອນທີ່ດີກວ່າ,ຊີວິດທີ່ດີກວ່າ',ພວກຂ້າພະເຈົ້າເອົາ'ຕົວເມືອງທີ່ສືບທອດກັນມາຂອງພວກເຮົາທຸກເຊັ່ນຄົນ'ເປັນຫົວຂໍ້ຫຼັກ,ນຳໃຊ້ເສັ້ນຫວາຍເຊິ່ງເປັນວັດຖຸທຳມະຊາດແລະອະນຸລັກສິ່ງແວດລ້ອມມາສະແດງຄວາມເຊື່ອມໂຍງເຂົ້າກັນລະຫວ່າງພື້ນເມືອງກັບສະໄໝໃໝ່.ໃນດ້ານຫົວຂໍ້ການວາງສະແດງ,ຫໍແອັສປາຍຈະມີ 3 ພາກສ່ວນຄື:《ຈາກທຳມະຊາດຮອດຕົວເມືອງ》ທີ່ແນະນຳບັນພະບູລຸດແລະຍຸກບູຮານຂອງແອັສປາຍ;《ຈາກຕົວເມືອງທີ່ພໍ່ແມ່ພວກເຮົາຢູ່ຮອດປະຈຸບັນ》ທີ່ແນະນຳອະດີດແລະປະຈຸບັນຂອງຕົວເມືອງທີ່ລຸ້ນພໍ່ແມ່ຂອງພວກເຮົາດຳລົງຊີວິດຢູ່;ແລະ《ຈາກຕົວເມືອງຂອງພວກເຮົາໃນປະຈຸບັນຮອດຕົວເມືອງຂອງລູກຫຼານພວກເຮົາ》ທີ່ແນະນຳຊີວິດການເປັນຢູ່ຂອງພວກເຮົາໃນຕົວເມືອງຈາກປະຈຸບັນຮອດອະນາຄົດ."
ທ່ານຈາເວຍ ໂຄນດ໌ກ່າວວ່າ,ຫໍວາງສະແດງຂອງປະເທດໜຶ່ງແມ່ນຮູບຫຍໍ້ຂອງປະເທດນັ້ນ,ເພື່ອເຮັດໃຫ້ຫໍແອັສປາຍສາມາດແນະນຳພາບລວມຂອງປະເທດແລະຕົວເມືອງຂອງແອັສປາຍໃນຍຸກປະຈຸບັນຕໍ່ຜູ້ຊົມທົ່ວໂລກໂດຍສະເພາະແມ່ນຜູ້ຊົມຂອງຈີນໃຫ້ໄດ້ດີກວ່າເກົ່າ,ເຂົາເຈົ້າໄດ້ຈັດການປະມູນຢ່າງເປີດເຜີຍ,ໃນຈຳນວນ 18 ສຳນັກງານສະຖາປະນິກທີ່ມີຊື່ສຽງໃນທົ່ວປະເທດເຂົ້າຮ່ວມການປະມູນ,ໃນທີ່ສຸດ,ສຳນັກງານສະຖາປະນິກທີ່ນຳໂດຍນາງເບເນເດຕາ ຕັກລີອາບູເອກໍ່ຊະນະການປະມູນ.
ໃນປີ 1980,ນາງເບເນເດຕາ ຕັກລີອາບູເອກໍ່ໄດ້ມາຈີນ,ແລະມັກວັດທະນະທຳຈີນທີ່ອຸດົມສົມບູນທີ່ສຸດ.ປີ 2003,ໃນນາມເປັນຜູ້ຍິງພຽງຜູ້ດຽວໃນຄະນະອອກແບບສະໜາມກິລາໂອລິມປິກປັກກິ່ງ,ນາງໄດ້ເຂົ້າຮ່ວມວຽກງານປະກວດການອອກແບບຂອງສະໜາມກິລາແຫ່ງຊາດຈີນຄື"ຮັງນົກ"ແລະສູນລອຍນ້ຳແຫ່ງຊາດຈີນຫຼື"ກ້ອນນ້ຳສີ່ຫຼ່ຽມ".ໃນການອອກແບບຫໍແອັສປາຍໃນງານວາງສະແດງໂລກຊຽງໄຮ້,ນາງກັບຄະນະອອກແບບຂອງນາງນຳໃຊ້ວັດຖຸຊີວະພາບແລະເຕັກນິກທີ່ກ້າວໜ້າປະສົມປະສານກັນເພື່ອອອກແບບໃຫ້ຫໍແອັສປາຍເປັນຮູບກະຕ່າທີ່ມີລັກສະນະພິເສດເຊິ່ງປະກອບດ້ວຍໂຄງຮ່າງເຫຼັກກ້າທີ່ງົດງາມທຸກເສັ້ນ,ສ່ວນຝາດ້ານນອກຂອງ"ກະຕ່າ"ກໍ່ປົກຫຸ້ມໄປດ້ວຍຫວາຍທີ່ຖັກສານດ້ວຍມື.ສິ່ງກໍ່ສ້າງທັງໝົດລ້ວນແຕ່ໃຊ້ວັດຖຸທີ່ອະນຸລັກສິ່ງແວດລ້ອມແລະໃຊ້ເທື່ອໃໝ່ໄດ້,ພະລັງງານແມ່ນສະໜອງໂດຍແຜ່ນພະລັງງານແສງຕາເວັນທີ່ຕິດຢູ່ເທິງຫຼັງຄາ,ໄດ້ສະແດງໃຫ້ເຫັນທັດສະນະຄະຕິທີ່ຄົນທົ່ວໄປນິຍົມໃນປະຈຸບັນຄື"ທຳມະຊາດ,ອະນຸລັກສິ່ງແວດລ້ອມແລະປະຢັດພະລັງງານ"ຢ່າງເຕັມທີ່.
ນາງເບເນເດຕາ ຕັກລີອາບູເອບອກນັກຂ່າວວ່າ:
"ການອອກແບບສິ່ງກໍ່ສ້າງແມ່ນການປະດິດສ້າງລວມໝູ່ທີ່ໃຊ້ເວລາດົນນານ.ໃນການອອກແບບ,ພວກເຮົາຕ້ອງຜ່ານຜ່າຄວາມຫຍຸ້ງຍາກຕ່າງໆຢ່າງບໍ່ຢຸດຢັ້ງ.ຕອນທຳອິດພວກເຮົາຕົກລົງນຳໃຊ້ເສັ້ນຫວາຍເປັນອຸປະກອນເພື່ອເຮັດຝາດ້ານນອກ.ໃນການຮ່ວມມື,ແນວຄຶດໃໝ່ຈະເກີດຂຶ້ນຢ່າງບໍ່ຢຸດຢັ້ງ.ແນວຄຶດຫຼ້າສຸດອັນໜຶ່ງກໍ່ແມ່ນໃຊ້ຮູບການຂຽນງາມມາ'ຂຽນ'ກາບກອນຈີນບົດໜຶ່ງໃສ່ຝາດ້ານນອກ.ໄດ້ມີເພື່ອນມິດຈີນຈຳນວນໜຶ່ງມີຄຳສະເໜີທີ່ດີ,ພວກເຮົາກໍ່ຍິນດີຕ້ອນຮັບທ່ານມາປະກອບຄວາມຄິດຄວາມເຫັນເພື່ອເຮັດໃຫ້ການອອກແບບດີກວ່າເກົ່າ."
ເມື່ອຮອດເວລາຫໍແອັສປາຍສ້າງສຳເລັດຢູ່ໃນເຂດຈັດງານວາງສະແດງໂລກຊຽງໄຮ້ໃນເດືອນມີນາປີໜ້າ,ຄົນທັງຫຼາຍຈະໄດ້ເຫັນວ່າ,ຫໍແອັສປາຍຈະແມ່ນສິ່ງກໍ່ສ້າງທີ່ຖັກສານດ້ວຍເສັ້ນຫວາຍທີ່ໃຫຍ່ທີ່ສຸດໃນໂລກ,ເບິ່ງຮູບທາງນອກຈະຄືກັບຟອງນ້ຳກະທົບກັນທີ່ມີຊີວິດຊີວາ,ກໍຄືກັນກັບຕົວເມືອງທີ່ມີການປ່ຽນແປງຕະຫຼອດເວລາ.ສ່ວນເສັ້ນຫວາຍທີ່ໃຊ້ມາປົກຫຸ້ມຝາດ້ານນອກ,ໄດ້ສະແດງແນວຄິດທີ່ຜູກພັນກັບທຳມະຊາດແລະອະນຸລັກສິ່ງແວດລ້ອມ,ພ້ອມກັນນັ້ນ,ຍັງໄດ້ເຮັດໃຫ້ວັດທະນະທຳຕາເວັນອອກກັບວັດທະນະທຳຕາເວັນຕົກເຊື່ອມໂຍງເຂົ້າກັນ.ເພາະວ່າ,ບໍ່ວ່າຢູ່ແອັສປາຍຫຼືຢູ່ຈີນ,ການຖັກສານຫວາຍທີ່ເປັນສີໄມ້ລາຍມືພື້ນເມືອງທີ່ເກົ່າແກ່ລ້ວນແຕ່ໄດ້ມີປະຫວັດອັນຍາວນານມາແລ້ວ.
ນາງເບເນເດຕາ ຕັກລີອາບູເອເວົ້າດ້ວຍຄວາມຕື້ນຕັນໃຈວ່າ,ໃຊ້ເສັ້ນຫວາຍມາປົກຫຸ້ມຝາດ້ານນອກ,ສາມາດຫຸ້ມຫໍ່ສິ່ງກໍ່ສ້າງທັງໝົດ,ຍັງສາມາດຮັບປະກັນໃຫ້ແສງທຳມະຊາດສ່ອງເຂົ້າໄປດ້ານໃນໄດ້ໂດຍກົງ.ຖ້າເອົາເສັ້ນຫວາຍທີ່ນຳໃຊ້ນັ້ນມາປູໃສ່ພື້ນພຽງ,ກໍ່ຈະກວ້າງປະມານ 12.000 ຕາແມັດ,ແລະລ້ວນແຕ່ຖັກສານດ້ວຍມື,ມັນຄືວ່າ,ຫໍແອັສປາຍແມ່ນຖັກສານດ້ວຍມືທັງໝົດຈັ່ງຊັ້ນລະ!
ທ່ານຈາເວຍ ໂຄນດ໌,ປະທານກົມງານວາງສະແດງສາກົນແຫ່ງຊາດແອັສປາຍເຊື່ອວ່າ,ພາຍຫຼັງງານວາງສະແດງໂລກຊຽງໄຮ້ໄຂຂຶ້ນແລ້ວ,ຜູ້ຊົມທີ່ມາຈາກທຸກສາລະທິດຂອງໂລກຈະໄດ້ສຳຜັດແລະຮູ້ຈັກແອັສປາຍທີ່ແທ້ຈິງຢູ່ຫໍແອັສປາຍ.ທ່ານກາລົສ ບຼາສໂກ,ເອກອັກຄະລັດຖະທູດແອັສປາຍປະຈຳຈີນກ່າວວ່າ,ທ່ານຫວັງຢ່າງຍິ່ງວ່າ,ຫໍແອັສປາຍທີ່ອອກແບບດ້ວຍຄວາມພະຍາຍາມສຸດຂີດຫຼັງນີ້ຈະໄດ້ຮັບໄຊຊະນະໃນການຄັດເລືອກຂອງຜູ້ຊ່ຽວຊານທີ່ເຂົ້າຮ່ວມ,ແລະກາຍເປັນ"ສັນຍາລັກມິດຕະພາບຖາວອນລະຫວ່າງປະຊາຊົນຈີນແອັສປາຍ",ຕັ້ງຢູ່ໃນເຂດຈັດງານວາງສະແດງໂລກຊຽງໄຮ້ຈົນເທົ້າໃດໆ.
ກ່ຽວກັບເລື່ອງນີ້,ທ່ານຈູຢົງເລີຍ,ຮອງຫົວໜ້າພະແນກງານວາງສະແດງໂລກຊຽງໄຮ້ໄດ້ຕາງໜ້າປະເທດເຈົ້າພາບ,ສະແດງຄວາມຂອບອົກຂອບໃຈນຳແອັສປາຍທີ່ສະໜັບສະໜູນແລະຕັ້ງໜ້າເຂົ້າຮ່ວມງານວາງສະແດງໂລກຊຽງໄຮ້.ທ່ານກ່າວວ່າ:
"ຫໍແອັສປາຍໄດ້ນຳໃຊ້ເສັ້ນຫວາຍເຊິ່ງເປັນອຸປະກອນກໍ່ສ້າງທີ່ສາມາດເຮັດໃຫ້ປະຊາຊົນສອງຊາດມັກຄືກັນ.ໃນຂະນະທີ່ສະແດງຄວາມປາຖະໜາອັນດີງາມ,ໂຄສະນາພາບພົດຂອງຕົວເມືອງແອັສປາຍໃນຍຸກປະຈຸບັນ.ພວກຂ້າພະເຈົ້າຂໍອວຍພອນຢ່າງສຸດອົກສຸດໃຈໃຫ້ຫໍແອັສປາຍຈົ່ງກາຍເປັນສູນວາງສະແດງວັດທະນະທຳຖາວອນໃນຈິດໃຈຂອງຜູ້ຊົມທຸກຄົນ."
