ເຂດປອດພາສີຂອງທ່າກຳປັ່ນຕ້າຢາວວ່ານເມືອງຕ້າລຽນໃຊ້ການບໍລິການພິເສດມາຍົກປະສິດທິພາບວຽກງານ
(GMT+08:00) 2009-11-25 16:40:38 cri
ເຂດປອດພາສີຂອງທ່າກຳປັ່ນຕ້າຢາວວ່ານທີ່ຕັ້ງຢູ່ເມືອງຕ້າລຽນແຂວງລຽວນິງໄດ້ປິດດ່ານພາສີຢ່າງເປັນທາງການໃນເດືອນສິງຫາ2007. ສອງປີມານີ້, ເຂດປອດພາສີໄດ້ນຳໃຊ້ທ່າແຮງທີ່"ເຂດປອດພາສີກັບທ່າກຳປັ່ນເຊື່ອມໂຍງເຂົ້າກັນ", ສົ່ງເສີມບົດບາດທີ່ທ່າກຳປັ່ນ, ການຈໍລະຈອນສິນຄ້າ, ແລະການປຸງແຕ່ງ, ອອກແຮງຍົກປະສິດທິພາບວຽກງານວານຂອງທ່າກຳປັ່ນໃຫ້ສູງຂຶ້ນ, ພ້ອມທັງປະສານສົມທົບກັບທ່າແຮງທີ່ມີຂະໜາດໃຫຍ່ແລະທີ່ຕັ້ງເໝາະສົມ, ໃນວິກິດການການເງິນສາກົນ, ປະລິມານສິນຄ້າເຂົ້າອອກທ່າກຳປັ່ນກໍ່ຍັງເພີ່ມຂຶ້ນ.
ກຸ່ມບໍລິສັດທ່າຕ້າລຽນແມ່ນບໍລິສັດຈໍລະຈອນສິນຄ້າທາງເຮືອຂະໜາດໃຫຍ່ແຫ່ງໜຶ່ງໃນເຂດທ່າປອດພາສີທ່າກຳປັ່ນຕ້າຢາວວ່ານ, ປະຈຸບັນໄດ້ເດີນເຮືອໂດຍກົງກັບທ່າກຳປັ່ນໃຫຍ່ຫຼາຍແຫ່ງຂອງໂລກ, ແລະໄດ້ສົ່ງຕູ້ບັນຈຸສິນຄ້າໄປທະວີບເອີລົບ, ທະວີບອາເມລິກາແລະເຂດທະເລເມດີເຕລາເນໂດຍກົງ. ຕູ້ບັນຈຸສິນຄ້າທີ່ສົ່ງໄປຕ່າງປະເທດ 90%ແລະສິນຄ້າທີ່ສົ່ງອອກຕ່າງປະເທດ 70%ຂອງເຂດຕາເວັນອອກສຽງເໜືອຂອງຈີນລ້ວນແຕ່ແມ່ນສົ່ງຜ່ານທ່າກຳປັ່ນຕ້າລຽນ. ທ່ານຊຸນຫົງ, ຜູ້ຈັດການໃຫຍ່ຂອງບໍລິສັດກ່າວວ່າ,
"ຫຼັງເກີດວິກິດການການເງິນທົ່ວໂລກແລ້ວ, ລູກຄ້ານັບມື້ນັບເອົາໃຈໃສ່ເລື່ອງຕົ້ນທຶນ, ການສົ່ງຜ່ານກ່ຳປັ່ນແມ່ນທາງເລືອກທີ່ດີອັນໜຶ່ງ, ຍ້ອນວ່າໄດ້ເຮັດໃຫ້ຕົ້ນທຶນຫຼຸດຕ່ຳລົງ, ປະຈຸບັນ, ທ່າກຳປັ່ນພາຍໃນປະເທດທີ່ສາມາດຈອດກ່ຳປັ່ນຂະໜາດໃຫຍ່ແມ່ນມີໜ້ອຍທີ່ສຸດ, ທ່າກຳປັ່ນຕ້າລຽນມີທ່າແຮງຫຼາຍໃນດ້ານນີ້. ສະນັ້ນ, ເຖິງວ່າມີຜົນສະທ້ອນຈາກວິກິດການການເງິນທົ່ວໂລກ, ແຕ່ປະລິມານສິນຄ້າທີ່ສົ່ງເຂົ້າອອກທ່າໃນ 6 ເດືອນຕົ້ນປີນີ້ຍັງເພີ່ມຂຶ້ນໄວຫຼາຍ. ປີນີ້ອາດຈະຫຼາຍກວ່າ 270 ລ້ານໂຕນ, ໃນ 6 ເດືອນຕົ້ນປີນີ້ມີ 130 ລ້ານໂຕນແລ້ວ."
ທ່ານຊຸນຫົງກ່າວວ່າ, ຄວາມສາມາດຂົນສົ່ງສິນຄ້າຂອງທ່າກຳປັ່ນຕ້າລຽນຍົກສູງຂຶ້ນ ຕົ້ນຕໍແມ່ນໄດ້ຮັບຜົນປະໂຫຍດຈາກການຄຸ້ມຄອງບໍລິຫານທີ່ດີພິເສດຄື"ເຮັດໃຫ້ເຂດປອດພາສີກັບທ່າກຳປັ່ນເຊື່ອມໂຍງເຂົ້າກັນ". ເມື່ອທຽບໃສ່ເຂດປອດພາສີແບບເກົ່າແລ້ວ, ເຂດປອດພາສີນີ້ບໍ່ພຽງແຕ່ມີຮູບແບບຂອງເຂດປອດພາສີແບບເກົ່າຄືການຄ້າສາກົນ, ສາງສິນຄ້າປອດພາສີ, ແລະການປຸງແຕ່ງຜະລິດຕະພັນສົ່ງອອກທໍ່ນັ້ນ, ສີນຄ້າສົ່ງອອກນຳເຂົ້າໃນເຂດນີ້ແລ້ວກໍ່ໄດ້ນຳໃຊ້ນະໂຍບາຍສົ່ງຄືນອາກອນ, ສິນຄ້ານຳເຂົ້າສົ່ງອອກເຂດທ່ານີ້ແລ້ວຈຶ່ງຖືວ່າໄດ້ອອກດ່ານ, ທີ່ເອີ້ນວ່າ"ດ່ານນອກຢູ່ໃນແດນຈີນ". ທ່ານສູສຽວຈຸນ, ຮອງຫົວໜ້າພະແນກພັດທະນາການຈໍລະຈອນສິນຄ້າຂອງເຂດປອດພາສີຕ້າລຽນກ່າວວ່າ,
"ຈຸດພິເສດໃຫຍ່ກວ່າໝູ່ຂອງເຂດທ່າປອດພາສີກໍ່ແມ່ນການຄຸ້ມຄອງແບບເຂດປອດພາສີກັບທ່າກຳປັ່ນເຊື່ອມໂຍງເຂົ້າກັນ, ມັນມີຜົນດີຕໍ່ການເຮັດໃຫ້ເຂດທ່າປອດພາສີກັບເຂດຈໍລະຈອນສິນຄ້າຫຍັບໃກ້ເຂົ້າ, ແລະເຊື່ອມໂຍງເຂົ້າກັນ, ວຽກງານຕ່າງໆໃນເຂດທ່າກຳປັ່ນແບບເກົ່າໄດ້ປ່ຽນເປັນວຽກປອດພາສີແລ້ວດຳເນີນການຄຸ້ມຄອງ; ຜົນດີທີສອງກໍ່ແມ່ນເຂດທ່າປອດພາສີມີນະໂຍບາຍພິເສດວ່າຖ້າເຂົ້າເຂດແລ້ວກໍ່ສົ່ງຄ່າອາກອນຄືນໃຫ້, ເຂດປອດພາສີໃນເມື່ອກ່ອນແມ່ນອອກຈາກທ່າກຳປັ່ນແລ້ວຈຶ່ງສົ່ງອາກອນຄືນໃຫ້. ຜົນດີທີສາມແມ່ນ ເຂດຈໍລະຈອນສິນຄ້າຕົ້ນຕໍແມ່ນສະໜັບສະໜູນການພັດທະນາຂອງເຂດທ່າກຳປັ່ນ, ເຂດປອດພາສີແມ່ນຊຸກຍູ້ການຄ້າປຸງແຕ່ງຢູ່ອ້ອມຂ້າງ, ແລະການພັດທະນາການຄ້າທີ່ມີລັກສະນະພາກພື້ນ, ເຂດທ່າກຳປັ່ນອາໃສດ່ານພາສີ, ວຽກງານບໍລິການຈະກວ້າງຂວາງກວ່າເກົ່າ."
ເມື່ອເຂດປອດພາສີທ່າກ່ຳປັ່ນຕ້າຢາວວ່ານເປີດໃຊ້ແລ້ວ, ທ່າແຮງດ້ານນະໂຍບາຍຂອງເຂດນີ້ໄດ້ເຮັດໃຫ້ວິສາຫະກິດການຄ້າປຸງແຕ່ງຢູ່ເຂດອ້ອມແອ້ມສົນໃຈຫຼາຍ, ໂດຍສະເພາະແມ່ນວິສາຫະກິດຜະລິດເອເລັກໂຕຼນິກຂະໜາດໃຫຍ່. ດ້ວຍທ່າແຮງນະໂຍບາຍໃນດ້ານການຝາກສິນຄ້າແບບປອດພາສີ, ການກວດກາວັດແທກສ້ອມແປງແລະການຜ່ານດ່ານໃນເວລາດຽວກັນຂອງເຂດປອດພາສີ, ຊີບາ, ການົງແລະວິສາຫະກິດອື່ນໆໄດ້ຕັ້ງແຫຼ່ງສົ່ງວັດຖຸດິບແລະສິນຄ້າໂດຍແບ່ງເປັນງວດ, ດຳເນີນການບໍລິການຄຸ້ມຄອງສາງແລະການຂົນສົ່ງສິນຄ້າຢ່າງທັນການ, ໄດ້ເຮັດໃຫ້ໂຮງງານບໍ່ມີສິນຄ້າຄ້າງສາງ.
ໃນປີມໍ່ໆມານີ້, ເຂດປອດພາສີດັ່ງກ່າວທັງໝົດໄດ້ດຶງດູດທຶນຈາກຕ່າງປະເທດເກືອບ 100 ລ້ານໂດລາ, ທຶນພາຍໃນປະເທດຫຼາຍກວ່າ 120 ລ້ານຢວນ. ປະຈຸບັນ, ໃນເຂດດັ່ງກ່າວທີ່ມີເນື້ອທີ່ເກືອບ 7 ກິໂລຕາແມັດມີວິສາຫະກິດ 85 ແຫ່ງ, ໃນນັ້ນ, 70% ແມ່ນວິສາຫະກິດຂົນສົ່ງສິນຄ້າ.
ບໍລິສັດຂົນສົ່ງສິນຄ້າເກັບແຊ່ເຢັນອີ້ຕູ່ຈີຟ່າຕ້າລຽນແມ່ນວິສາຫະກິດຈໍລະຈອນສິນຄ້າແຫ່ງໜຶ່ງທີ່ໄດ້ສ້າງຕັ້ງຂຶ້ນໃນເວລາດຽວກັນກັບເຂດປອດພາສີທ່າກ່ຳປັ່ນຕາຢາວວ່ານ. ນາງຢິວຈຸ່ນ, ປະທານາບໍລິສັດເວົ້າວ່າ, ໃນເວລາ 2 ປີປາຍ, ບໍລິສັດຂອງນາງໄດ້ບັນລຸການພັດທະນາແບບກ້າວກະໂດດ. ເຖິງວ່າມີຄວາມກົດດັນດ້ານການຄ້າຂາເຂົ້າຂາອອກຈາກວິກິດການການເງິນ, ບໍລິສັດຍັງໄດ້ຮັບຄວາມຄືບໜ້າຢ່າງໃຫຍ່ໃນການຂົນສົ່ງສິນຄ້າໂດຍນຳໃຊ້ນະໂຍບາຍພິເສດຕ່າງໆຂອງເຂດປອດພາສີ. ນາງກ່າວວ່າ:
"ໃນ 3 ປີມານີ້, ວຽງງານຂອງບໍລິສັດໄດ້ມີການພັດທະນາຢ່າງວ່ອງໄວ, ແຕ່ລະປີ, ເຕີບໂຕດ້ວຍຈັງຫວະເກືອບ 30%. ນະໂຍບາຍຂອງເຂດປອດພາສີນັບມື້ນັບໄດ້ຮັບການຍອມຮັບຈາກສາກົນ, ສະນັ້ນ, ເຖິງວ່າໄດ້ປະສົບວິກິດການເສດຖະກິດ, ປະລິມານການຄ້າຂາເຂົ້າຂອງສັດນ້ຳແລະພືດນ້ຳບໍ່ຫຼາຍປານໃດ, ແຕ່ວຽກງານອື່ນໆໄດ້ພັດທະນາຢ່າງວ່ອງໄວ, ປີນີ້, ວຽກງານຂົນສົ່ງສິນຄ້າຕໍ່ພາຍໃນແລະສາກົນຂອງພວກເຮົາໄດ້ເພີ່ມຂຶ້ນ 30% ເມື່ອທຽບໃສ່ປີກາຍນີ້."
"ການສົ່ງຕໍ່ສາກົນ" ທີ່ນາງຢິວຈຸ່ນເວົ້າເຖິງນັ້ນໝາຍເຖິງຂະບວນການຂົນສົ່ງຕູ້ບັນຈຸສິນຄ້າທີ່ຂົນຈາກຕ່າງປະເທດ, ແລ້ວຂົນສົ່ງຜ່ານດ່ານຊາຍແດນທີ່ມີພາສີພາຍໃນປະເທດ, ແລ້ວຂ່ຽນຖ່າຍໄປຫາກ່ຳປັ່ນການເດີນເຮືອສາກົນ, ເພື່ອສືບຕໍ່ສົ່ງໄປປະເທດທີ 3. ດຳເນີນການຂົນສົ່ງຕູ້ບັນຈຸສິນຄ້າໃນສາກົນ, ແມ່ນສິ່ງສະແດງອັນສຳຄັນໃຫ້ເຫັນເຖິງບົດບາດໃນສາກົນຂອງທ່າກ່ຳປັ່ນ. ທ່າກ່ຳປັ່ນສິງກະໂປແມ່ນທ່າກ່ຳປັ່ນຕູ້ບັນຈຸສິນຄ້າໃຫຍ່ກວ່າໝູ່ໃນໂລກ, ໃນປະລິມານຂົນສົ່ງສິນຄ້າຂອງທ່າສິງກະໂປມີເກືອບ 80% ແມ່ນວຽກງານຂົນສົ່ງສິນຄ້າຕໍ່ສາກົນ, ທ່າສິງກະໂປກໍ່ກາຍເປັນທ່າຂົນສົ່ງຂ່ຽນຖ່າຍສິນຄ້າຕໍ່ທີ່ມີຊື່ສຽງໃນໂລກ.
ທ່ານລູລິນ, ຫົວໜ້າຄະນະກຳມະການຄຸ້ມຄອງເຂດປອດພາສີຂອງນະຄອນຕ້າລຽນບອກວ່າ, ບົນພື້ນຖານປະລິມານຈໍລະຈອນສິນຄ້າໄດ້ເພີ່ມຂຶ້ນຫຼາຍສົມຄວນ, ເຂດປອດພາສີຕ້າຢາວວ່ານກໍ່ມີສະພາບໄດ້ດີຂຶ້ນໃນດ້ານຕ່າງໆ, ເຊັ່ນ: ລະດັບບໍລິການຜ່ານດ່ານແລະການເຮັດໃຫ້ການບັນຊີກໍ່ສະດວກຂຶ້ນເປັນຕົ້ນ. ມາດຕະການເຫຼົ່ານີ້ປະສານກັບນະໂຍບາຍປອດພາສີ, ໄດ້ດຶງດູດການຂົນສົ່ງສິນຄ້າຕໍ່ສາກົນຈາກຫຼາຍປະເທດແລະເຂດແຄ້ວນ.
"ວິສາຫະກິດຕ່າງປະເທດໃຫຍ່ຫຼາຍແຫ່ງກໍ່ສົນໃຈຫຼາຍຕໍ່ນະໂຍບາຍປອດພາສີຂອງຈີນ, ເຂົາເຈົ້າຫວັງຢາກສ້າງຄວາມສະດວກໃຫ້ແກ່ການຄ້າຂາອອກດ້ວຍນະໂຍບາຍປອດພາສີ. ຕົວຢ່າງຄື ບໍລິສັດຫາປາຢູ່ມະຫາສະໝຸດຂອງຣັດເຊຍເຮັດການປຸງແຕ່ງງ່າຍໆແລະການຄ້າຜະລິດຕະພັນທະເລຜ່ານດ່ານຢູ່ນະຄອນຕ້າລຽນ, ເຂົາເຈົ້າເຮັດດີຫຼາຍຢູ່ເຂດປອດພາສີ, ການຂົນສົ່ງຕໍ່ສາກົນຂອງວິສາຫະກິດຫຼາຍແຫ່ງຂອງຍີ່ປຸ່ນກໍ່ດຳເນີນຢູ່ນະຄອນຕ້າລຽນ."
