ຈີນກັບປະເທດຕ່າງໆຂອງເອີລົບແລະອາຊີເພີ່ມທະວີການຮ່ວມມືດ້ານການເງິນ ພະລັງງານແລະອື່ນໆ
(GMT+08:00) 2009-12-08 16:17:44 cri
ໃນຖານະເປັນພາກສ່ວນອັນສຳຄັນຂອງເສດຖະກິດໂລກ, ເຂດເອີລົບແລະອາຊີມີແຜ່ນດິນອັນກວ້າງໃຫຍ່, ມີຊັບພະຍາກອນທຳມະຊາດທີ່ອຸດົມສົບບູນ, ແລະມີຄວາມສາມາດຊ່ວຍຊູຍູ້ໜູນເຊິ່ງກັນແລະໄດ້ເປັນຢ່າງດີ. ຫວ່າງມໍ່ໆນີ້, ເມືອງຊີ່ອ່ານຂອງຈີນໄດ້ຈັດເວທີປຶກສາຫາລືເສດຖະກິດເອີລົບອາຊີຄັ້ງທີ3, ເຈົ້າໜ້າທີ່ລັດ ຖະບານ, ນັກວິຊາການແລະຜູ້ຕາງໜ້າວິສາຫະກິດຂອງປະເທດຕ່າງໆຂອງເອີລົບແລະອາຊີກ່າວວ່າ, ເອີລົບແລະອາຊີຄວນເພີ່ມທະວີການຮ່ວມມືຕື່ມອີກ, ຫັນປ່ຽນ ກຳລັງແຮງບົ່ມຊ້ອນການຮ່ວມມືດ້ານການເງິນ, ພະລັງງານແລະອື່ນໆໃຫ້ເປັນໝາກຜົນຕົວຈິງ, ບັນລຸຕ່າງຝ່າຍຕ່າງມີຜົນປະໂຫຍດ.
ຕັ້ງແຕ່6ເດືອນທ້າຍປີ2008ມານີ້, ວິກິດການການເງິນສາກົນເຮັດໃຫ້ຄວາມຕ້ອງການດ້ານການຄ້າໃນທົ່ວໂລກຊຸດໂຊມລົງຫຼາຍ, ໄດ້ສ້າງຜົນກະທົບອັນໜັກໜ່ວງໃຫ້ແກ່ການພັດທະນາເສດຖະກິດສັງຄົມຂອງເອີລົບແລະອາຊີ. ໃນຫຼາຍປີມານີ້, ຂອບເຂດການແລກປ່ຽນແລະການຮ່ວມມືເສດຖະກິດຂອງເອີລົບແລະອາຊີນັບມື້ນັບກວ້າງຂວາງ, ໃນນັ້ນ, ທີ່ເດັ່ນທີ່ສຸດແມ່ນຈີນຮ່ວມມືເສດຖະກິດການຄ້າກັບ5ປະເທດອາຊີກາງ ຄື ກາຊັກສະຖານ, ອຸສເບກີສະຖານ, ຕາຊີກີສະຖານ, ກຽກກິດສະຖານແລະຕວກເມນີສະຖານ. ປີ1992, ມູນຄ່າການຄ້າລະຫວ່າງຈີນກັບ5ປະເທດດັ່ງກ່າວມີແຕ່527ລ້ານໂດລາເທົ່ານັ້ນ, ເມື່ອຮອດປີ2008ມີຫຼາຍກວ່າ25ຕື້ໂດລາ, ມູນຄ່າການຄ້າຂອງສອງຝ່າຍໄດ້ເຕີບໂຕເກືອບ50ເທົ່າໃນ17ປີນີ້. ໃນ6ເດືອນທຳອິດປີນີ້, ມູນຄ່າການຄ້າລະຫວ່າງຈີນກັບ5ປະເທດອາຊີກາງມີຫຼາຍກວ່າ11ຕື້ໂດລາແລ້ວ.
ທ່ານເຊີເກ ເຕເຣເຊັນໂກ, ອະດີດນາຍົກລັດຖະມົນຕີກາຊັກສະຖານທີ່ເຂົ້າຮ່ວມເວທີປຶກສາຫາລືເສດຖະກິດເອີລົບອາຊີຄັ້ງທີ3ກ່າວວ່າ, ຣັດເຊຍ, ເບລາຣຸດຊີແລະກາຊັກສະຖານມີເປົ້າໝາຍຈະຮ່ວມເປັນກຸ່ມປອດພາສີໃນປີ2010, ນີ້ຈະສ້າງໂອກາດໃຫ້ວິສາຫະກິດຈີນເພື່ອໄປລົງທຶນສ້າງໂຮງງານຢູ່ກາຊັກສະຖານດ້ານ ພະລັງງານ, ກະສິກຳ, ຢາປົວພະຍາດແລະເຕັກນິກອື່ນໆ, ແລະສົ່ງອອກໄປຕ່າງ ປະເທດ, ມີຜົນດີຕໍ່ການບັນລຸຕ່າງຝ່າຍຕ່າງມີຜົນປະໂຫຍດດ້ານເສດຖະກິດຈີນ ກັບກາຊັກສະຖານ.ທ່ານກ່າວວ່າ:
"ຂ້າພະເຈົ້າຮູ້ສຶກວ່າ, ການຮ່ວມມືລະຫວ່າງພາກພື້ນພວມກາຍເປັນກຳລັງແຮງ ຂອງພວກເຮົາທີ່ເພີ່ມທະວີການພັດທະນາເສດຖະກິດ, ກາຍເປັນວິທີອັນສໍາຄັນທີ່ ເພີ່ມທະວີການຮ່ວມມືສອງຝ່າຍແລະຕ່າງຝ່າຍຕ່າງມີຜົນປະໂຫຍດ."ຜູ້ຮ່ວມປະຊຸມກ່າວວ່າ, ພາຍໃຕ້ສະພາບການທີ່ສະພາບການເງີນຂອງໂລກປ່ຽນແປງຢ່າງຫຼວງຫຼາຍໃນປະຈຸບັນ, ປະເທດຕ່າງໆຂອງເອີລົບກັບອາຊີຄວນລົງເລິກການຮ່ວມມືດ້ານການເງິນຕື່ມອີກ, ພະຍາຍາມຍົກສູງລະດັບການພັດທະນາການເງິນແລະກຳລັງແຂ່ງຂັນໃນສາກົນຂອງເຂດເອີລົບແລະອາຊີ, ເພີ່ມພະລັງແຮງໃໝ່ເຂົ້າໃນການຟື້ນຟູແລະພັດທະນາເສດຖະກິດແບບຍືນຍົງ.
ໃນຖານະເປັນສ່ວນປະກອບອັນສຳຄັນຂອງລະບົບການຮັບປະກັນການເງິນດ້ານການຮ່ວມມືເສດຖະກິດທີ່ຈີນມີຕໍ່ຕ່າງປະເທດ, ທະນາຄານຂາເຂົ້າຂາອອກຂອງຈີນດຳເນີນການຮ່ວມມືວຽກງານສາກົນໃນເຂດເອີລົບອາຊີຢ່າງກວ້າງຂວາງແລະເລິກເຊິ່ງ, ກ່ຽວພັນເຖິງພະລັງງານ, ໄຟຟ້າ, ຄົມມະນາຄົມແລະຂົງເຂດອື່ນໆ. ການຮ່ວມມືເຫຼົ່ານີ້ໄດ້ເປີດກວ້າງຊ່ອງທາງການລົງທຶນແລະການລະດົມທຶນຂອງການເງິນໃນພາກພື້ນນີ້ຢ່າງບັງເກີດຜົນ, ໄດ້ເສີມຂະຫຍາຍບົດບາດອັນຕັ້ງໜ້າໃຫ້ແກ່ ການຊຸກຍູ້ການພັດທະນາເສດຖະກິດ, ເພີ່ມການປະກອບອາຊີບແລະປັບປຸງຊີວິດການເປັນຢູ່ຂອງປະຊາຊົນຂອງທ້ອງຖິ່ນ. ທ່ານຫຼິວລຽນເກີ, ຮອງຜູ້ວ່າການທະນາຄານຂາເຂົ້າຂາອອກຂອງຈີນກ່າວວ່າ:
"ໃນນາມເປັນອົງການການເງິນທີ່ມີລັກະນະນະໂຍບາຍທີ່ຊຸກຍູ້ການຮ່ວມມືເສດຖະກິດສາກົນ, ທະນາຄານຂາເຂົ້າຂາອອກຂອງຈີນເອົາໃຈໃສ່ທີ່ສຸດນຳການຮ່ວມມືກັບອາຊີກາງຕະຫຼອດມາ. ມາຮອດທ້າຍເດືອນກັນຍາປີນີ້, ພວກຂ້າພະເຈົ້າໄດ້ເຊັນສັນຍາກູ້ເງິນ40ຕື້ຢວນນຳ5ປະເທດອາຊີກາງ, ໃນນັ້ນສ່ວນຫຼາຍແມ່ນພື້ນຖານໂຄງລ່າງແລະໂຄງການທີ່ມີທ່າແຮງການພັດທະນາຂອງ5ປະເທດອາຊີກາງ, ໄດ້ປະກອບສ່ວນຕາມຄວາມສາມາດຂອງຕົນເຂົ້າໃນການພັດທະນາເສດ ຖະກິດຂອງ5ປະເທດອາຊີກາງ. ໃນຕໍ່ໜ້ານີ້, ທະນາຄານຂາເຂົ້າຂາອອກຂອງຈີນຈະສືບຕໍ່ເສີມຂະຫຍາຍບົດບາດການເງິນທີ່ມີລັກສະນະນະໂຍບາຍ, ສືບຕໍ່ທຳຄວາມພະຍາຍາມຢ່າງບໍ່ລົດລະເພື່ອຊຸກຍູ້ການຮ່ວມມືດ້ານເສດຖະກິດການເງິນກັບອາຊີກາງ.
ເອີລົບອາຊີແມ່ນເຂດທີ່ມີຕະຫຼາດບໍລິໂພກພະລັງງານທີ່ມະຫາສານ, ແລະມີຊັບພະຍາ ກອນອຸດົມສົມບູນ. ປະຈຸບັນ, ການຮ່ວມມືດ້ານພະລັງງານລະຫວ່າງກາຊັກສະຖານ, ຣັດເຊຍ, ມົງໂກລີກັບຈີນພວມພັດທະນາຢ່າງວ່ອງໄວ. ໃນທ້າຍປີນີ້, ທໍ່ສົ່ງອາຍເກັສທຳມະຊາດລະຫວ່າງຈີນກັບອາຊີກາງຈະສ້າງສຳເລັດ, ແລະຈະສົ່ງອາຍເກັສທຳມະຊາດໃຫ້ຈີນປະມານ70ຕື້ແມັດກ້ອນຕໍ່ປີ. ທ່ານລີຈ້ຽນສື, ຮອງຜູ້ອຳນວຍການໃຫຍ່ຂອງບໍລິສັດວຽກງານສາກົນຈຳກັດຂອງກຸ່ມບໍລິສັດນ້ຳມັນເຊື້ອໄຟ ອາຍແກັສທຳມະຊາດ ຈີນກ່າວວ່າ:
"ບໍລິສັດນ້ຳມັນເຊື້ອໄຟອາຍແກັສທຳມະຊາດຈຳກັດຈະລົງເລິກການຮ່ວມມືດ້ານພະລັງງານກັບສາກົນຢ່າງບໍ່ຢຸດຢັ້ງ. ປະຈຸບັນ, ອາຊີກາງແລະຣັດເຊຍແມ່ນໜຶ່ງໃນພາກພື້ນສຳຄັນຂອງຈີນທີ່ພັດທະນາວຽກງານນ້ຳມັນເຊື້ອໄຟແລະອາຍເກັສທຳມະຊາດຢູ່ຕ່າງປະເທດ."
ເດືອນຕຸລາປີນີ້, ຈີນກັບຣັດເຊຍໄດ້ເຊັນສັນຍາ, ຕົກລົງວ່າຈະສ້າງທໍ່ສົ່ງອາຍແກັສທຳມະຊາດໄປຈີນສອງສາຍ, ແລະຈະເລີ່ມສົ່ງອາຍເກັສທຳມະຊາດໃຫ້ຈີນໃນປີ2014ຫາປີ2015ພາຍຫຼັງສອງຝ່າຍຕົກລົງລາຄານໍາກັນແລ້ວ.
ທ່ານຣາໂຈ ເຊີກິ, ເອກອັກຄະລັດຖະທູດຣັດເຊຍປະຈຳຈີນເຫັນວ່າ, ໂດຍສະເພາະແມ່ນພາຍໃຕ້ສະພາບໃນປະຈຸບັນ, ບໍ່ວ່າໃນຮູບແບບສອງຝ່າຍຫຼືໃນຂອບອົງການຈັດຕັ້ງການຮ່ວມມືຊຽງໄຮ້, ການເພີ່ມທະວີການຮ່ວມມືເສດຖະກິດລະຫວ່າງຣັດເຊຍກັບຈີນແມ່ນວີທີທີ່ດີທີ່ຜ່ານຜ່າຄວາມຫຍຸ້ງຍາກຈາກວິກິດການການເງິນຂອງໂລກ.ທ່ານກ່າວວ່າ:"ຈີນແມ່ນໜຶ່ງໃນຄູ່ຮ່ວມມືເສດຖະກິດການຄ້າອັນສຳຄັນຂອງຣັດເຊຍ, ປີນີ້ສອງຝ່າຍໄດ້ບັນລຸສັນຍາທີ່ມີລັກສະນະກ້າວກະໂດດໃນຂົງເຂດນ້ຳມັນເຊື້ອໄຟ ເຊິ່ງໄດ້ສະແດງໃຫ້ເຫັນວ່າຈີນໄດ້ເສີມຂະຫຍາຍບົດບາດຂອງຕົນພາຍໃຕ້ວິກິດການການເງິນ. ນອກນີ້, ການເຈລະຈາກ່ຽວກັບໂຄງການຣັດເຊຍສົ່ງອາຍເກັສທຳມະຊາດໃຫ້ຈີນກໍ່ມີຄວາມຄືບໜ້າຢ່າງໃຫຍ່ຫຼວງ. ພ້ອມກັນນັ້ນ, ໃນຂົງເຂດພະລັງງານນິວເຄຼຍແລະຖ່ານຫີນ, ສອງປະເທດກໍ່ມີໂຄງການຮ່ວມມືຢ່າງຂະໜາດໃຫຍ່ແລ້ວ. ຂ້າພະເຈົ້າເຊື່ອວ່າ, ການເພີ່ມທະວີການຮ່ວມມືເສດຖະກິດລະຫວ່າງຣັດເຊຍກັບຈີນແມ່ນວິທີທີ່ບັງເກີດຜົນທີ່ຮັບມືກັບວິກິດການການເງິນສາກົນ, ນີ້ກໍ່ແມ່ນບົດຮຽນສຳຄັນທີ່ພວກຂ້າພະເຈົ້າຖອດຖອນມາຈາກວິກິດການການເງິນເທື່ອນີ້."
ທ່ານຣາໂຈກ່າວວ່າ, ປີນີ້, ຜູ້ນຳຣັດເຊຍແລະຈີນໄດ້ອະນຸມັດເອກະສານສໍາຄັນຈຳນວນໜຶ່ງ, ເຊັ່ນແຜນການຮ່ວມມືລົງທຶນແລະການຮ່ວມມືຣັດເຊຍຈີນເປັນຕົ້ນ, ການປະຕິບັດເອກະສານເຫຼົ່ານີ້ຢ່າງບັງເກີດຜົນຈະມີຜົນດີຕໍ່ວິສາຫະກິດຂະໜາດໃຫຍ່ຂອງຈີນເຂົ້າສູ່ຂົງເຂດເສດຖະກິດຈຳນວນໜຶ່ງຂອງຣັດເຊຍ, ເຊັ່ນການຜະລິດເຄື່ອງຈັກກະສິກຳແບບຮັກສາສິ່ງແວດລ້ອມ, ຄົມມະນາຄົມ, ພື້ນຖານໂຄງລ່າງໄຟຟ້າແລະອື່ນໆ.
