ປີຂານຄົນຈີນເອົາເສືອເມືອເຮືອນ
(GMT+08:00) 2010-02-11 16:14:21 cri
ປີນີ້ແມ່ນປີຂານຕາມຈັນທະຄະຕິຈີນ, ຄົນຈີນຖືເສືອເປັນສັດສິລິມຸງຄຸນຕະຫຼອດມາ, ເປັນຕົວແທນແຫ່ງຄວາມກ້າຫານແລະຄວາມຍຸດຕິທຳ. ໃນໂອກາດທີ່ບຸນກຸດຈີນໃກ້ຈະມາເຖິງ, ສິນຄ້າສະຫຼອງບຸນກຸດຈີນຊະນິດຕ່າງໆທີ່ເຮັດເປັນຮູບເສືອກໍ່ເລີ່ມຂາຍດິບຂາຍດີຢູ່ຈີນ. ຜູ້ຂາຍໄດ້ຜະລິດສິນຄ້າທີ່ມີເອກະລັກຂອງເສືອຊະນິດຕ່າງໆເພື່ອປ້ອນຕະຫຼາດ, ຄົນຈີນກໍ່ພາກັນນຳເອົາເສືອສິລິມຸງຄຸນຮູບແບບຕ່າງໆເມືອເຮືອນ.
ເສືອເປັນສັດອັນດັບທີສາມໃນ12ລາສີຂອງຈີນ, ໃນຖານະເປັນລາຊາຂອງສັດນານາພັນທີ່ຄົນຈີນນິຍົມຊົມຊອບ, ເສືອບໍ່ພຽງແຕ່ເປັນສັນຍາລັກຂອງຄວາມສະຫງົບແລະຄວາມເປັນສິລິມຸງຄຸນເທົ່ານັ້ນ, ຍັງສາມາດປົກປ້ອງຊັບສິນ. ປະຊາຊົນທ້ອງຖິ່ນກໍ່ມີຮີດຄອງທີ່ເຮັດເກີບຫົວເສືອ, ໝວກຫົວເສືອແລະເສື້ອຊັ້ນໃນຮູບເສືອໃຫ້ເດັກນ້ອຍ, ເຊິ່ງມີຄວາມໝາຍວ່າ, ປົກປ້ອງເດັກນ້ອຍໃຫ້ເຕີບໃຫຍ່ຢ່າງເຂັ້ມແຂງແລະມີຄວາມສະຫງົບສຸກ.
ໃນຕະຫຼາດກ່ອນບຸນກຸດຈີນ, ເຄື່ອງເອ້ສີແດງທີ່ຄົນຈີນມັກ, ເຊັ່ນ, ສາຍພັນແອວສີແດງ, ເສື້ອຊັ້ນໃນສີແດງ, ຖົງຕີນສີແດງ, ແລະອື່ນໆ, ກໍ່ຂາຍດິບຂາຍດີຄືກັນ. ອີງຕາມຮີດຄອງປະເພນີຂອງຈີນ, ຜູ້ທີ່ເກີດໃນປີຂານ, ຮອດປີຂານອີກຮອບໜຶ່ງແລ້ວ, ກໍ່ຄວນນຸ່ງຖືສີແດງ. ສິ່ງທີ່ຕ່າງກັນກັບປີທີ່ຜ່ານມາ, ປີນີ້ໃນສິນຄ້າເຫຼົ່ານີ້, ໄດ້ມີຮູບເສືອກາຕູນທີ່ໜ້າຮັກ. ຢູ່ບ່ອນຂາຍເສື້ອຊັ້ນໃນຂອງຮ້ານຄ້າຂະໜາດໃຫຍ່ຂອງປັກກິ່ງ, ເສື້ອຊັ້ນໃນສີແດງທີ່ເປັນຮູບເສືອຂາຍໄດ້ດີຫຼາຍ.
ນາງລິນທີ່ຫາກໍ່ເລີ່ມເຮັດວຽກໃນປີນີ້ໄດ້ຊື້ເສື້ອຊັ້ນໃນລາສີຊຸດໜຶ່ງໃຫ້ຕົນເອງເພື່ອຕ້ອນຮັບປີຂານ. ນາງເວົ້າວ່າ,
ຂ້ອຍເກີດໃນປີຂານ, ປີນີ້ກໍ່ແມ່ນປີຂານເທື່ອທຳອິດຫຼັງຈາກຂ້ອຍເລີ່ມເຮັດວຽກ, ສະນັ້ນຈຶ່ງໄດ້ຊື້ເສື້ອຊັ້ນໃນລາຍເສືອສີແດງໃຫ້ຕົນເອງ, ຫວັງວ່າປີນີ້ວວຽກງານແລະຄວາມຮັກຈະປະສົບຜົນສຳເລັດດີ.
ບໍ່ພຽງແຕ່ແມ່ນເສື້ອຊັ້ນໃນສີແດງໃນຮ້ານຄ້າຂາຍໄດ້ດີເທົ່ານັ້ນ, ໃນບ່ອນຂາຍເສື້ອຊັ້ນໃນຂອງຕະຫຼາດຈຳນວນໜຶ່ງ, ຜະລິດຕະພັນທີ່ເປັນສີແດງແລະມີຮູບເສືອນັ້ນກໍ່ຂາຍໄດ້ດີຫຼາຍ.
ໃນຮີດຄອງປະເພນີຂອງຈີນ, ຄົນຈີນມັກຖືວ່າປີເກີດເປັນປີທີ່ບໍ່ເປັນສິລິມຸງຄຸນສຳລັບຜູ້ເກີດໃນປີນັ້ນ. ສະນັ້ນ, ຜູ້ເກີດໃນປີນັ້ນຈະນຸ່ງຖືສີແດງເພື່ອຫຼີກລ່ຽງເລື່ອງບໍ່ດີ. ແຕ່ວ່າ, ທັດສະນະຂອງຄົນໄດ້ປ່ຽນແປງຫຼາຍແລ້ວ, ຄົນນັບມື້ນັບຫຼາຍກວ່າເກົ່າມັກນຸ່ງເສື້ອສີແດງໃນຍາວບຸນກຸດຈີນ, ເພື່ອສະແຫວງຫາຄວາມສິລິມຸງຄຸນ, ຫວັງວ່າໃນປີໃໝ່, ຈະມີຊີວິດການເປັນຢູ່ທີ່ເບີກບານມ່ວນຊື່ນກວ່າເກົ່າ.
ຍ້ອນວ່າປີຂານວຽນມາເຖິງ, ຕຸກກະຕາເສືອຜ້າທີ່ເປັນເຄື່ອງຫັດຖະກຳພື້ນເມືອງຂອງຈີນກໍ່ເລີ່ມຂາຍດິບຂາຍດີ. ຢູ່ເມືອງຊາງຈື້ແຂວງສ່ານຊີ່, ເມືອງເວີຍຟ່າງແຂວງສ່ານຕົ່ງທີ່ມີມູນເຊື້ອເຮັດຕຸກກະຕາເສືອຜ້າ, ຊ່າງຫັດຖະກຳພື້ນເມືອງຈະເຮັດເສືອຜ້າ100ກວ່າໂຕທຸກມື້. ເສືອຜ້າເຫຼົ່ານີ້ແມ່ນຫຍິບດ້ວຍມືໝົດ, ມີຫຼາຍສິບຊະນິດ, ໜ້າຮັກຫຼາຍ. ເສືອຜ້າເຫຼົ່ານີ້, ໂຕໃຫຍ່ໜັກຫຼາຍກິໂລ, ໂຕນ້ອຍໜັກເທົ່າໄຂ່ໄກ່, ໃຊ້ມາເປັນໝອນຫຼືເຄື່ອງເອ້, ມີທ່າທາງຕ່າງໆ, ແລະມີຊີວິດຊີວາທີ່ສຸດ.
ຢູ່ຊືວ່າງເມືອງໂຟສ່ານຂອງແຂວງກວາງຕຸ້ງ, ປະຊາຊົນທ້ອງຖິ່ນມີປະເພນີທີ່ເອົາຂອງຕ້ອນທີ່ເປັນສັດລາສີເຄື່ອງປັ້ນດິນເຜົາໃຫ້ກັນໃນທຸກປີ. ເມື່ອທົດລອງມາຫຼາຍເທື່ອ, ປີນີ້ຊ່າງຫັດຖະກຳທ້ອງຖິ່ນໄດ້ເຮັດເສືອເຄືອບທີ່ມີຂົນເສືອທຽມ, ເສືອເຄືອບແນວນີ້ເບິ່ງແລ້ວມີຂົນຫຍຸຍໆເຕັມໂຕ,ແຕ່ເວລາຈັບບາຍຈະຮູ້ສຶກນຸ້ມນວນ.
ປັດຈຸບັນ, ຊາວໜຸ່ມຈີນຍິ່ງນິຍົມຊື້ເຄື່ອງທາງອິນເຕີເນັດ. ອິນເຕີເນັດທີ່ຂາຍເສືອຜ້າເຊິ່ງເປັນເຄື່ອງສິລະປະຫັດຖະກຳຂອງຈີນຂາຍດິບຂາຍດີຫຼາຍ. ນອກນີ້, ເສື້ອ, ເກີບ, ຖົງມືຮູບເສືອກໍ່ກາຍເປັນຜະລິດຕະພັນທີ່ຂາຍດິບຂາຍດີ. ພໍ່ຄ້າຈຳນວນໜຶ່ງກໍ່ພາກັນເພິ່ມສັນຍາລັກຂອງເສືອໃສ່ສິນຄ້າທີ່ອອກແບບເອງ, ຕົວຢ່າງ, ເບາະທີ່ມີຮູບຕັດເຈ້ຍເສືອ, ຕຸກກະຕາເສືອ, ຈີ້ສາຍຄໍເສືອ, ໝວກເສືອ,ເສື້ອນອນເສືອ, ຖົງມືເສືອແລະອື່ນໆເພື່ອໃຫ້ຄົນທັງຫຼາຍຮູ້ສຶກມີຄວາມສຸກໄປກັບເສືອ.
ເມື່ອຮອດບຸນກຸດຈີນ, ຄົນທັງຫຼາຍຍັງມັກຊື້ເຄື່ອງເງິນເຄື່ອງຄຳທີ່ມີມູນຄ່າສູງຈຳນວນໜຶ່ງເພື່ອມອບໃຫ້ຍາດພີ່ນ້ອງ ຫຼື ເກັບໄວ້ເອງ. ບໍລິສັດຊ້າຍປາຍ ເຊິ່ງເປັນຮ້ານວັດຖຸມີຄ່າໃຫຍ່ກວ່າໝູ່ຂອງປັກກິ່ງກໍ່ໄດ້ສະໜອງຜະລິດຕະພັນອວຍພອນປີໃໝ່ທີ່ເປັນລັກສະນະຂອງ"ເສືອໂຊກດີ", ກຽມ"ເຄື່ອງສຳລັບບຸນປີໃໝ່"ທີ່ອຸດົມສົມບູນໃຫ້ແກ່ລູກຄ້າໃນປີຂານທີ່ຈະມາເຖິງນີ້.
ນາງຢາງນ້າ ພະນັກງານຂອງບໍລິສັດຊ້າຍປາຍກ່າວວ່າ,"ປີນີ້, ບໍລິສັດຊ້າຍປາຍສະໜອງເຄື່ອງຄຳ"ເສືອໂຊກດີ"ເພື່ອອວຍພອນປີຂານ, ໄດ້ຮັບຄວາມນິຍົມຊົມຊອບຈາກລູກຄ້າຫຼາຍ. ເພາະວ່າວັດທະນະທຳອວຍພອນປີໃໝ່ ກັບ ວັດທະນະທຳພື້ນເມືອງຂອງຈີນເຊື່ອມໂຍງເຂົ້າກັນ, ແມ່ນພາກສ່ວນໜຶ່ງອັນສຳຄັນຂອງວັດທະນະທຳກ່ຽວກັບສັດ 12 ລາສີ. ລູກຄ້າມັກຜະລິດຕະພັນອວຍພອນປີໃໝ່ເຫຼົ່ານີ້ຫຼາຍ. ເມື່ອຮອດໄລຍະຂາຍຜະລິດຕະພັນອວຍພອນປີໃໝ່ຈົນໄດ້ລຽນແຖວຊື້,ຈຶ່ງເຫັນໄດ້ວ່າລູກຄ້າຄອງຄອຍຜະລິດຕະພັນອວຍພອນປີໃໝ່ຢ່າງຫຼວງຫຼາຍ."
ການເພິ່ມເນື້ອໃນກ່ຽວກັບສັດ 12 ລາສີເຂົ້າໃນຜະລິດຕະພັນບໍ່ແມ່ນ"ສິດທິບັດ"ຂອງນັກທຸລະກິດຈີນ. ເພື່ອຕ້ອນຮັບປີຂານຕາມປະເພນີຂອງຈີນ, ບໍລິສັດMercedes Benzກໍ່ໃຫ້ລົດນ້ອຍໆທີ່ມີຊື່ວ່າsmartນັ້ນ"ໃສ່"ເສື້ອລາຍເສືອເປັນພິເສດ, ນາງວາງອ້ຽນ ຜູ່ຈັດການຝ່າຍປະຊາສຳພັນຢູ່ຈີຂອງບໍລິສັດເບັນສ ກ່າວວ່າ, "ວັນທີ 14 ກຸມພາປີນີ້ແມ່ນວັນບຸນກຸດຈີນປີຂານ, ທັງແມ່ນວັນແຫ່ງຄວາມຮັກຂອງຕາວັນຕົກ, ໃນວັນພິເສດທີ່ຄົນຕາເວັນຕົກກັບຄົນຕາເວັນອອກເຊື່ອມໂຍງເຂົ້າກັນແລະເປັນໜ້າສະເຫຼີມສະຫຼອງແທ້ໆ, ພວກເຮົາກໍ່ເກີດມີແນວຄິດທີ່ຢາກປະດັບປະດາລົດນ້ອຍsmartເປັນເສືອນ້ອຍໆໂຕໜຶ່ງ, ຮຽກຮ້ອງໃຫ້ຍາດພີ່ນ້ອງແລະຄູ່ຮັກທັງຫຼາຍເວົ້າດ້ວຍສຽງດັງໆວ່າ"ອ້າຍລາວຮູຢິວ","ລາວຮູ"ໃນພາສາຈີນກໍ່ແມ່ນເສືອ,ສະນັ້ນປະໂຫຍກນີ້ກໍ່ມີຄວາມໝາຍ"I love you",ພວກເຮົາກໍ່ຫວັງຢາກຜ່ານຈາກລົດລາຍເສືອsmartນ້ອຍນີ້ ມາສະແດງວັດທະນະທຳເສືອຂອງຈີນ, ແລະຫວັງໃຫ້ຄົນທັງຫຼາຍໄດ້ຮູ້ສຶກເຖິງຄວາມເອົາໃຈໃສ່ແລະຄວາມຮັກແພງໃນຍາມບຸນກຸດຈີນທີ່ເຕັມໄປດ້ວຍຄວາມຮັກຄາວມອົບອຸ່ນ