ການສະໜອງເຄື່ອງບໍລິໂພກໃນໄລຍະບຸນກຸດຈີນຢູ່ແຫ່ງຕ່າງໆຂອງຈີນມີຢ່າງພຽງພໍ
(GMT+08:00) 2010-02-11 16:25:30 cri
ປະຈຸບັນ, ແຫ່ງຕ່າງໆຂອງຈີນພວມຫຼິ້ນບຸນກຸດຈີນ, ບຸນປະເພນີຂອງຈີນທີ່ສຳຄັນທີ່ສຸດຢ່າງເບີກບານມ່ວນຊື່ນ, ນັກຂ່າວCRI ໄດ້ໄປຢາມຮ້ານຄ້າໃຫຍ່ແລະຮ້ານຊູເປີມາເກັດຕ່າງໆແລະຮູ້ວ່າ, ປະຈຸບັນ, ການສະໜອງເຄື່ອງບໍລິໂພກໃນໄລຍະບຸນກຸດຈີນຢູ່ແຫ່ງຕ່າງໆຂອງຈີນມີຢ່າງພຽງພໍ, ສິນຄ້າໃນຕະຫຼາດຕ່າງໆກໍ່ຂາຍດີຫຼາຍ. ໃນຄໍລຳແຈ້ງຂ່າວເສດຖະກິດຈີນພາກນີ້, ພວກເຮົາຈະພາທ່ານໄປຢາມຕະຫຼາດສິນຄ້າໄລຍະບຸນກຸດຈີນຢູ່ແຫ່ງຕ່າງໆ.
ຢູ່ຮ້ານຄ້າແລະຮ້ານຊູເປີມາເກັດແຫ່ງຕ່າງໆຢູ່ນະຄອນຫຼວງປັກກິ່ງ, ຜູ້ມາຊື້ສິນຄ້າສະຫຼອງບຸນຫຼາຍກວ່າຍາມທຳມະດາຢ່າງຈະແຈ້ງ, ໃນລໍ້ຊື້ເຄື່ອງກໍ່ເຕັມໄປດ້ວຍສິນຄ້າປະເພດຕ່າງໆ. ທ່ານວາງເຈິ້ນຈ່ຽງ, ຜູ້ອຳນວຍການຝ່າຍປະຊາສຳພັນຂອງຮ້ານຄາລິຟໍເຂດຊືຈິງສ່ານປັກກິ່ງເວົ້າວ່າ, ໃນຍາມທຳມະດາ, ມື້ໜຶ່ງມີລູກຄ້າ7ພັນຫາ8ພັນຄົນ, ແຕ່ວ່າໃນຍາມບຸນກຸດຈີນ, ລູກຄ້າໄດ້ເພີ່ມຂຶ້ນຫຼາຍກວ່າຍາມທຳມະດາເກືອບ40%. ແຕ່ຍ້ອນມີການກະກຽມຢ່າງພຽງພໍ, ສິນຄ້າຈຶ່ງບໍ່ໄດ້ຂາດເຂີນເລີຍ. ລາວເວົ້າວ່າ,
ຫວ່າງມໍ່ໆມານີ້, ກຳລັງຊື້ຂອງຜູ້ບໍລິໂພກມີທ່ວງທ່າສູງຂຶ້ນ, ຈຳນວນລູກຄ້າຫຼາຍກວ່າຍາມທຳມະດາປະມານ30%ຫາ40%. ແຕ່ພວກເຮົາໄດ້ກຽມສິນຄ້າເມື່ອ1ເດືອນກ່ອນ, ແລະໄດ້ເຊົ່າສ້າງສິນຄ້າຢູ່ບ່ອນໃກ້ໆນີ້, ສະນັ້ນພວກເຮົາສາມາດຮັບປະກັນໃຫ້ຜູ້ບໍລິໂພກສາມາດຊື້ສິນຄ້າຕາມໃຈມັກໃນໄລຍະບຸນກຸດຈີນ.
ທ່ານຢາງ ຊາວເມືອງປັກກິ່ງຍູ້ລໍ້ຊື້ເຄື່ອງທີ່ເຕັມດ້ວຍສິນຄ້າ, ແລະເວົ້າວ່າ, ບຸນກຸດຈີນແມ່ນເວລາທີ່ຄອບຄົວຂອງລາວເຕົ້າໂຮມກັນ, ມີຫຼາຍຄົນ, ກະກຽມເຄື່ອງໃຊ້ຂອງກິນໃຫ້ຫຼາຍ. ແຕ່ບໍ່ວ່າອາຫານ, ເຄື່ອງຢູ່ຂອງກິນ, ແລະເຄື່ອງເອ້ເຮືອນ, ເມື່ອເລາະຫຼິ້ນໃນຮ້ານຄ້າແລ້ວກໍ່ຊື້ໄດ້ໝົດ. ລາວເວົ້າວ່າ,
ພວກເຮົາກຳລັງຊື້ເຄື່ອງເພື່ອຫຼິ້ນບຸນ, ໄດ້ຊື້ເຄື່ອງເອ້ປະດັບເຮືອນຈຳນວນໜຶ່ງ, ເຊັ່ນ, ຕົວໜັງສື"ຟູ", ດອກໄມ້, ຊື້ເກືອບຄົບໝົດແລ້ວ, ຍັງຈະຊື້ໝາກໄມ້ແລະຊີ້ນໜ້ອຍໜຶ່ງ, ຈະຮ່ວມກັບລູກຫຼານຫຼິ້ນບຸນຢ່າງເບີກບານມ່ວນຊື່ນ.
ເມື່ອເຂົ້າສູ່ປີໃໝ່ແລ້ວ, ຫິມະທີ່ຕົກໜັກທີ່ສຸດໃນ60ປີມານີ້ໄດ້ກະທົບເຖິງເຂດອາເລີໄທ້ພາກເໜືອຂອງເຂດປົກຄອງຕົນເອງອຸຍເກີຊີ່ນຈ່ຽງຈີນ, ມີຜົນກະທົບອັນໜັກໜ່ວງຕໍ່ຊີວິດການເປັນຢູ່ຂອງປະຊາຊົນ. ຄຽງຄູ່ກັບບຸນກຸດຈີນວຽນມາເຖິງ, ປະຊາຊົນເຂດອາເລີໄທ້ຍັງມີຄວາມກະຕືລືລົ້ນຄືເກົ່າ, ຮ້ານຄ້າຂະໜາດໃຫຍ່ແລະຮ້ານຊູເປີມາເກັດໄດ້ຕ້ອນຮັບລູກຄ້າຢ່າງຫຼວງຫຼາຍ.
ຍ້ອນວ່າປີນີ້ເຂດອາເລີໄທ້ໄດ້ປະສົບຜົນກະທົບຈາກຫິມະຕົກໜັກ, ເພື່ອຮັບປະກັນການປ້ອນຕະຫຼາດໃນໄລຍະບຸນກຸດຈີນ, ເຂດຊີ່ນຈ່ຽງໄດ້ຈັດສັນຜັກແລະອາຫານ400ກວ່າຊະນິດເກືອບ800ໂຕນ, ນອກນີ້, ຮ້ານຄ້າແລະຮ້ານຊູເປີມາເກັດຕ່າງໆຂອງເຂດອາເລີໄທ້ກໍ່ໄດ້ກຽມສິນຄ້າໄວ້ລ່ວງໜ້າ, ຮັກສາລາຄາສິນຄ້າໃຫ້ປົກກະຕິ, ເພື່ອຕອບສະໜອງກັບຄວາມຕ້ອງການຂອງປະຊາຊົນເຜົ່າຕ່າງໆ. ທ່ານຈ່ຽວຈົ່ງຊຸ້ນ, ຜູ້ຮັບຜິດຊອບຮ້ານຊູເປີມາເກັດຮາວອີເຈ່ຍຂອງເມືອງອາເລີໄທ້ເວົ້າວ່າ,
ພວກເຮົາໄດ້ກຽມສິນຄ້າຢ່າງພຽງພໍ, ລາຄາກໍ່ເທົ່າກັບປີທີ່ຜ່ານມາ, ສາມາດຕອບສະໜອງຄວາມຕ້ອງການຂອງປະຊາຊົນ, ປະຈຸບັນພໍດີແມ່ນໄລຍະທີ່ມີລູກຄ້າຫຼາຍ.
ນອກນີ້, ໃນໄລຍະບຸນກຸດຈີນປີນີ້, ປະຊາຊົນຢູ່ເຂດຊີ່ນຈ່ຽງນິຍົມເອົາຜັກທີ່ບັນຈຸໃນແກັດນັ້ນໄປຕ້ອນໝູ່. ຜັກປອດສານພິດເຄມີເຫຼົ່ານີ້ແມ່ນສັ່ງຈອງແລະເດັດໃນມື້ດຽວກັນ, ເພື່ອຮັບປະກັນຄວາມສົດ.
ນັບແຕ່ກ້າວເຂົ້າປີນີ້ມາ, ເຂດປົກຄອງຕົນເອງມົງໂກໃນ ພາກເໜືອຂອງຈີນກໍ່ໄດ້ປະສົບໄພລົມພາຍຸແລະຫິມະຕົກໜັກ, ຫິມະຕົກໜັກເຮັດໃຫ້ຕົ້ນທຶນການຂົນສົ່ງຜັກຂອງເຂດມົງໂກໃນສູງຂຶ້ນ, ລາຄາຜັກກໍ່ສູງຂຶ້ນນຳ, ແຕ່ລາຄາໄຂ່ໄກ່, ສັດປີກແລະຊີ້ນພັດຮັກສາເປັນປົກກະຕິ, ຈຳນວນສິນຄ້າມີຢ່າງພຽງພໍ, ສາມາດຕອບສະໜອງຄວາມຕ້ອງການໃນຍາມວັນບຸນ.
ຮ້ານລຽນຊ່ຽງໂລແມ່ນຮ້ານຄ້າເກົ່າທີ່ມີຊື່ສຽງທີ່ສຸດແຫ່ງໜຶ່ງຂອງເມືອງກວາງໂຈ່ວ, ຂາຍຂະໜົມກວາງຕຸ້ງຊະນິດຕ່າງໆ. ບຸນກຸດຈີນໃກ້ຈະວຽນມາເຖິງ, ຮ້ານລຽນຊ່ຽງໂລທີ່ຂາຍດິບຂາຍດີໃນມື້ທຳມະດານັ້ນກໍ່ຍິ່ງຟົດຟື້ນ. ປັດຈຸບັນ, ອາຫານສຳລັບບຸນປີໃໝ່ທີ່ມີ"ລົດຊາດກວາງຕຸ້ງ" ເຊັ່ນ, ເຂົ້າໜົມເຂ້ງປີໃໝ່ເປັນຕົ້ນໄດ້ກຽມພ້ອມແລ້ວ. ແຕ່ຍ້ອນວ່າລາຄາສິນຄ້າປີນີ້ໄດ້ສູງຂຶ້ນໜ້ອຍໜຶ່ງ, ຮ້ານລຽນຊ່ຽງໂລກໍ່ໄດ້ປັບປຸງລາຄາເຄື່ອງສຳລັບບຸນປີໃໝ່ໜ້ອຍໜຶ່ງ. ທ່ານລຽງເຈີ້ຈຸ່ນ ຜູ່ອຳນວຍການທີ່ຮັບຜິດຊອບວຽກງານປະຈຳວັນຂອງຮ້ານລຽນຊ່ຽງໂລກ່າວວ່າ,
"ເພື່ອເຮັດວຽກສະໜອງເຄື່ອງສຳລັບບຸນປີໃໝ່ຂອງປີນີ້ໃຫ້ດີ,ເພື່ອຕອບສະໜອງຄວາມຕ້ອງການຂອງລູກຄ້າທັງຫຼາຍ. ນັບແຕ່ກ້າວເຂົ້າປີນີ້ມາ,ພວກເຮົາກໍ່ໄດ້ເພິ່ມຂະໜົມຫຼາຍຊະນິດ, ບໍ່ຄືກັນກັບແຕ່ກ່ອນ ຍິ່ງສອດຄ່ອງກັບຄວາມຕ້ອງການຂອງຜູ່ບໍລິໂພກ. ເພາະວ່າລາຄາສິນຄ້າແພງຂຶ້ນ,ສະນັ້ນ,ລາຄາເຄື່ອງສຳລັບບຸນປີໃໝ່ກໍ່ແພງຂຶ້ນໜ້ອຍໜຶ່ງ,ແຕ່ບໍ່ໄດ້ສົ່ງຜົນສະທ້ອນຫຼາຍປານໃດ."
ໃນຫຼາຍປີມໍ່ໆມານີ້, ການຊື້ເຄື່ອງທາງອິນເຕີເນັດທີ່ນັບມື້ນັບຈະເລີນຂຶ້ນກໍ່ໄດ້ເຮັດໃຫ້ຄວາມຊິນເຄີຍໃນການບໍລິໂພກຂອງຈີນເກີດມີການປ່ຽນແປງ, ການຊື້ຢູ່ເຄື່ອງທາງອິນເຕີເນັດກໍ່ກາຍເປັນຊ່ອງທາງທີ່ຫຼາຍໆຄົນເລືອກຊື້ເຄື່ອງສຳລັບບຸນປີໃໝ່. ນາງຮວງເຈຍແມ່ນພະນັກງານພະແນກຈຳສິນຄ້າຂອງເວັບໄຊທາວປາວ ເຊິ່ງເປັນເວັບໄຊຂາຍເຄື່ອງທາງອິນເຕີເນັດທີ່ໃຫຍ່ກວ່າໝູ່ຂອງຈີນ,ນາງກ່າວວ່າ,ໃນເດືອນມັງກອນປີນີ້, ປະລິມານການຊື້ຂາຍເຄື່ອງສຳລັບບຸນປີໃໝ່ຢູ່ເວັບໄຊທາວປາວ 1 ຕື້ຢວນ, ສິ່ງທີ່ຄົນທັງຫຼາຍຊື້ນັ້ນຕົ້ນຕໍແມ່ນອາຫານການກິນ, ເຄື່ອງໄຟຟ້າຂະໜາດນ້ອຍ, ຂອງຂວັນ ແລະ ເຄື່ອງປະດັບປະດາປີໃໝ່ເປັນຕົ້ນ. ນາງບອກໃຫ້ຮູ້ວ່າ, "ພວກເຮົາເກັບກຳສະຖິຕິແລ້ວ,ໃນເດືອນມັງກອນ,ຍອດປະລິມານຕົກລົງຊື້ຂາຍປະເພດອາຫານການກິນກໍ່ມີປະມານ 700 ລ້ານຢວນ,ໃນນັ້ນມີຮ້ານອາຫານແຫ່ງໜຶ່ງທີ່ມີຊື່ວ່າ"ອູຟ່າງຈ່າຍ",ແມ່ນຮ້ານຂາຍເຂົ້າຕົ້ມຂອງເວັບໄຊທາວປາວ, ປະລິມານຕົກລົງຊື້ຂາຍມື້ດຽວຂອງຮ້ານນີ້ກໍ່ມີ 2 ແສນຢວນ,ລ້ວນແຕ່ແມ່ນຂາຍຍ່ອຍ, ຢູ່ເວັບໄຊຂອງຮ້ານນີ້ລູກຄ້າຈະເຫັນຫໍ່ຂອງຂວັນຊະນິດຕ່າງໆ,ຕາມຂ້ອຍຮູ້ວ່າ, ມີລູກຄ້າຄົນໜຶ່ງໄດ້ຊື້ຫໍ່ຂອງຂວັນແບບຕ່າງໆຕັ້ງວ່າ 1000 ກວ່າຢວນ,ເພື່ອມອບໃຫ້ພໍ່ແມ່ ແລະ ຍາດພີ່ນ້ອງ, ບໍ່ພຽງແຕ່ສາມາດປະຢັດເງິນອາງເປົ໋າເທົ່ານັ້ນ,ຍັງສາມາດສະແດງຈິດໃຈຄວາມເຄົາລົບນັບຖືຂອງຕົນ."
