ຈຸດເລີ່ມຕົ້ນໃໝ່ຂອງໂຄສົກຍິງອັງກິດຢູ່ຈີນ
(GMT+08:00) 2010-02-24 17:31:24 cri
ຈາກBBCມາCRI, ຈາກອັງກິດມາຈີນ, ນາງຊູຊານ ອົສມານ, ໄດ້ຈາກໂຄສົກທີ່ມີປະສົບການສູງກາຍເປັນຜູ້ໃໝ່ໃນໜ່ວຍງານ. ນາງຊູຊານ ອົສມານ, ເປັນໂຄສົກຍິງອາວຸໂສທີ່ເຄີຍເຮັດວຽກຢູ່BBCຂອງອັງກິດມາຫຼາຍປີ, ປະຈຸບັນ, ໄດ້ກາຍເປັນໂຄສົກຂອງຄໍລຳໃໝ່ Beijing Hourທີ່ເປັນລາຍການຂ່າວສົດຂອງວິທະຍຸສາກົນແຫ່ງປະເທດຈີນ.
ນາງຊູຊານປີນີ້ອາຍຸ50ກວ່າປີແລ້ວ, ນາງມີປະສົບການໃນວຽກງານດ້ານນີ້30ກວ່າປີ. ນາງເຄີຍເປັນຄູສອນພາສາອັງກິດ, ພາຍຫຼັງມາເຂົ້າເຮັດວຽກຢູ່BBC, ກາຍເປັນໂຄສົກລາຍການຂ່າວ. ນາງຍັງເຄີຍເຮັດວຽກຢູ່ອາເມລິກາແລະຍີ່ປຸ່ນ, ບໍ່ພຽງແຕ່ມີປະສົບການຫຼາຍໃນດ້ານວິທະຍຸເທົ່ານັ້ນ, ຍັງມີສາຍຕາສາກົນກວ້າງໄກ. ນາງຊູຊານຮັກວຽກງານຂອງຕົນຫຼາຍ, ແຕ່ຄຽງຄູ່ກັບອາຍຸສູງຂຶ້ນ, ຜູ້ຊົມກໍໃຫ້ຄວາມສົນໃຈໜ້ອຍລົງ, BBCກໍ່ບໍ່ຢາກຕໍ່ສັນຍາກັບເພິ່ນອີກ. ນາງຊູຊານເວົ້າວ່າ,
ຂ້ອຍມີຄວາມກະຕືລືລົ້ນຫຼາຍຕໍ່ລາຍການຂ່າວ, ມັກວຽກງານຂອງຕົນຫຼາຍແຕ່ເມື່ອອາຍຸສູງຂຶ້ນແລ້ວ, ຜູ້ຊົມເລີ່ມສັງເກດຮອຍຫຍູ່ຢູ່ເທິງໃບໜ້າຂອງເຈົ້າ, ແລະຮ່າງກາຍທີ່ຄ່ອຍໆຕຸ້ຍຂຶ້ນ, ນີ້ກໍເຮັດໃຫ້ໂອກາດວຽກງານຂອງເຈົ້າບໍ່ຫຼາຍຄືໄວໜຸ່ມແລ້ວ.
ຢູ່ອັງກິດເມື່ອເຫັນວ່າ, ໂອກາດຂອງຕົນເອງບໍ່ຄອຍດີແລ້ວ, ນາງຊູຊານກໍ່ເຄີຍລັ່ງເລໃຈ, ແຕ່ຄຳແນະນຳຂອງລູກຊາຍເຮັດໃຫ້ນາງໂລ່ງອົກໂລ່ງໃຈ. ນາງເວົ້າວ່າ,
ລູກຊາຍພວມຮຽນຢູ່ມະຫາວິທະຍາໄລ, ລະດູຮ້ອນຂອງປີກາຍ, ລາວຢູ່ຊຽງໄຮ້, ລາວເວົ້ານຳຂ້ອຍວ່າ, ເປັນຫຍັງບໍ່ມາລອງເຮັດວຽກຢູ່ຈິນເບິ່ງ?
ຢູ່ອັງກິດ, ນາງຊູຊານມີບໍລິສັດໃຫ້ຄຳປຶກສາດ້ານສື່ມວນຊົນແຫ່ງໜຶ່ງ, ສະໜອງການບໍລິການດ້ານການອົບຮົມຜູ້ຄົນທັງຫຼາຍ, ສອນເຂົາເຈົ້າເຮັດວຽກໃນຂະແໜງການນີ້ແນວໃດ, ພ້ອມດ້ວຍເຕັກນິກພາສາການເວົ້າ, ເພື່ອຍົກສູງຄວາມສາມາດໃນການເຮັດວຽກຢູ່ວິທະຍຸ. ນາງເວົ້າວ່າ, ຮູ້ສຶກໂຊກດີຫຼາຍທີ່ໄດ້ມາສືບຕໍ່ເຮັດວຽກເກົ່າຂອງຕົນຢູ່ຈີນ.
ເດືອນຕຸລາປີກາຍນີ້, ນາງຊູຊານໄດ້ເຫັນຂໍ້ມູນຮັບສະໝັກຂອງCRIທີ່ປະກາດທາງເວັບໄຊ້, ແລະໄດ້ຕິດຕໍ່ກັບCRI, ຫຼັງຈາກນັ້ນ, ນາງຊູຊານໄດ້ສົ່ງຊີວະປະຫວັດຫຍໍ້, ຮູບຖ່າຍ, ເທັບທີ່ອັດສຽງຂອງຕົນມາໃຫ້, ແລະເລີ່ມປຶກສາຫາລືກັບCRIຢ່າງເປັນທາງການ.
ທຳອິດນາງຊູຊານຄິດວ່າ, ວົງການສື່ມວນຊົນຈີນກໍ່ມີຄວາມດູໝີ່ນ ຕໍ່ຜູ້ຍິງໃນເກນອາຍຸນີ້. ແຕ່ວ່າຄຳເວົ້ຂອງເຈົ້າໜ້າທີ່ສຳພາດໄດ້ລົບລ້າງຄວາມເປັນຫ່ວງຂອງນາງ. ນາງຊູຊານເວົ້າວ່າ,
ເພິ່ນເວົ້າວ່າ, ຢູ່ຈີນ, ພວກເພິ່ນຊື່ນຊົມຜູ້ມີປະສົບການຫຼາຍ, ທັງໃຫ້ຄວາມສຳຄັນແກ່ຜູ້ທີ່ສາມາດຖ່າຍທອດປະສົບການຂອງຕົນໃຫ້ທົ່ວໜ່ວຍງານ. ສະນັ້ນ, ພວກເພິ່ນເຫັນວ່າ, ອາຍຸບໍ່ແມ່ນບັນຫາ.
ໃນການສຳພາດວຽກເທື່ອນີ້, ເຈົ້າໜ້າທີ່ສຳພາດກັບນາງຊູຊານຍັງໄດ້ແລກປ່ຽນຄວາມເຫັນກ່ຽວກັບຄວາມອາດເປັນໄປໄດ້ທີ່ນາງຊູຊານມາເຮັດວຽກຢູ່CRIພ້ອມດວ້ຍແນວທາງໃນການເຮັດລາຍການ, ວຽກງານຂອງນາງຊູຊານ, ບັນຫາກ່ຽວກັບການຊ່ວຍຊາວໜຸ່ມຢູ່ໃນທີມງານແນວໃດແລະອື່ນໆ, ສອງຝ່າຍກໍ່ພໍໃຈຕໍ່ຜົນຂອງການແລກປ່ຽນ. ຫຼັງຈາກນັ້ນ, ການເຊັນສັນຍາຮ່ວມວຽກງານແລະອື່ນໆກໍ່ດຳເນີນໄປຢ່າງສະດວກ, ນາງຊູຊານກໍ່ໄດ້ເລີ່ມເຮັດວຽກໃໝ່ຢູ່ຈີນໃນທີ່ສຸດ. ສ່ວນCRIກໍ່ໄດ້ມອບລາຍການພິເສດໃໝ່ໆໃຫ້ນາງ, ຄືbeijing hour.
ນາງເວົ້າວ່າ: "ຂ້ອຍມີຄວາມກະຕືລືລົ້ນຫຼາຍຕໍ່ລາຍການໃນປະຈຸບັນນີ້, ເຖິງວ່າຂ້ອຍບໍ່ຢາກຕື່ນນອນໃນຕອນເຊົ້າໆ. ແຕ່ລະມື້ປະມານ2ໂມງເຄິ່ງ, ຂ້ອຍຕ້ອງຕື່ນນອນ, ເພື່ອກຽມເຮັດວຽກໃນຕອນ4ໂມງ. ໄດ້ມາຈັດລາຍການນີ້, ຂ້ອຍຮູ້ສຶກ ພູມໃຈຫຼາຍ, ເພາະວ່ານີ້ແມ່ນCRIເຊື່ອໝັ້ນຂ້ອຍ, ສະນັ້ນ ຂ້ອຍບໍ່ສົນໃຈວ່າຈະໄດ້ທ່ຽວຫຼິ້ນຢູ່ປັກກິ່ງຢ່າງມ່ວນຊື່ນຫຼືບໍ່, ອັນທີ່ຂ້ອຍສົນໃຈກວ່ານັ້ນແມ່ນ ລາຍການນີ້ຈະຈັດໄດ້ດີຫຼືບໍ່, ເພື່ອໃຫ້ມີຜູ້ຟັງຫຼາຍກວ່າເກົ່າມັກລາຍການນີ້."
ລາຍການbeijing hourແມ່ນລາຍການຂ່າວສົດ, ເລີ່ມແຕ່ວັນທີ25ມັງກອນແລ້ວນີ້, ແຕ່ລະມື້ຈະອອກອາກາດແຕ່7ໂມງຫາ8ໂມງຕາມເວລາປັກກິ່ງ, ລາຍການນີ້ຈະມີເນື້ອໃນຕ່າງໆ, ເຊັ່ນ ຂ່າວສຳຄັນປະຈຳວັນ, ການວິຈານຂ່າວ, ຂ່າວເສດຖະກິດການຄ້າ, ຂ່າວກິລາ, ຂ່າວຈາກໜັງສືພິມແລະອື່ນໆ, ແລະຈະເຊີນຊ່ຽວຊານມາວິຈານຂ່າວພາຍໃນປະເທດແລະຕ່າງປະເທດ.
ນາງເວົ້າວ່າ: "ລາຍການbeijing hourແມ່ນລາຍການຂ່າວສົດ, ອອກອາກາດຕໍ່ທົ່ວໂລກ, ບໍ່ວ່າ ຢູ່ຈີນ, ອາເມລິກາ, ອົສຕຼາລີແລະປະເທດອື່ນໆກໍ່ຮັບຟັງໄດ້ໃນເວລາດຽວກັນ. ຂ້ອຍຫວັງວ່າຕໍ່ໜ້ານີ້ຈະໄດ້ເຊີນຊຽວຊານມາວິຈານເຫດການທີ່ເກີດຂຶ້ນໃໝ່ໆ, ສົມມຸດວ່າງານວາງສະແດງໂລກຊຽງໄຮໃກ້ຈະວຽນມາເຖິງແລ້ວ, ຂ້ອຍຫວັງວ່າຈະມີສຽງກ່ຽວກັບເລື້ອງນີ້ມາຈາກຊຽງໄຮ."
ນາງຊູຊານເວົ້າວ່າ, ການເຮັດວຽກຢູ່ຈີນແມ່ນໂອກາດທີ່ດີຕໍ່ລາວ, ລາວຈະໄດ້ເບິ່ງການພັດທະນາແລະການປ່ຽນແປງຂອງຕະຫຼາດນີ້ທີ່ນັບມື້ນັບພັດທະນາດີຂຶ້ນ, ແລະຄົນຈີນນຳໃຫ້ທັນບາດກ້າວຂອງຍຸກສະໄໝແນວໃດ. ນາງຈະລອງເບິ່ງໂລກ, ພາບພົດຂອງຈີນແລະທິດກ້າວໜ້າຈາກສາຍຕາຂອງຄົນຈີນ.
ນາງເວົ້າວ່າ: "ສຳລັບວີຖີຊີວິດຂອງຄົນຈີນແລະວັດທະນະທຳຈີນ, ພະນັກງານຄົນຈີນແນ່ນອນຮູ້ຫຼາຍກວ່າຂ້ອຍ, ນີ້ຈະສາມາດຊ່ອຍຂ້ອຍເຂົ້າໃຈຄວາມເຫັນຕໍ່ໂລກຂອງຄົນຈີນໃຫ້ດີກວ່າເກົ່າ, ແລະຈະເຮັດໃຫ້ຂ້ອຍດຳເນີນລາຍການໃຫ້ດີກວ່າເກົ່າ. ຂ້ອຍຮູ້ສຶກວ່ານີ້ແມ່ນສິ່ງທີ່ຕື່ນເຕັ້ນທີ່ສຸດໃນການເຮັດວຽກຂອງຂ້ອຍ."
ປີ2010ຫາກໍ່ເລີ່ມຕົ້ນ, ນາງຊູຊານກໍ່ໄດ້ຕັ້ງເປົ້າໝາຍໃນປີນີ້ໃຫ້ຕົນເອງ.
ນາງເວົ້າວ່າ: "ຄວາມຫວັງໃນປີໃໝ່ຂອງຂ້ອຍກ່ອນອື່ນແມ່ນຮຽນພາສາຈີນໃຫ້ດີ, ແລ້ວກາຍເປັນພະນັກງານທີ່ດີເດັ່ນຂອງທີມງານ, ດຳເນີນລາຍການbeijing hourໃຫ້ເປັນລາຍການຂ່າວວິທະຍຸທີ່ດີ, ເພື່ອຍົກສູງສື່ສຽງຂອງCRI."
