ເຂດປົກຄອງຕົນເອງເຜົ່າຫຸຍໜິງເຊ້ຍຕັ້ງຢູ່ພາກຕາເວັນຕົກສຽງເໜືອຂອງຈີນ,ແມ່ນ້ຳເຫຼືອງເຊິ່ງເປັນແມ່ນ້ຳໃຫຍ່ອັນດັບສອງຂອງຈີນ,ໄຫຼຜ່ານພາກກາງຂອງເຂດໜິງເຊ້ຍ,ຍາວ390ກິໂລແມັດ.ຊຸມປີຫຼັງມານີ້,ເຂດໜິງເຊ້ຍພວມວາງແຜນແລະສ້າງຕົວເມືອງຫຼາຍແຫ່ງ,ແມ່ນ້ຳເຫຼືອງໄດ້ເຮັດໃຫ້ສິ່ງແວດລ້ອມທຳມະຊາດແລະໃບໜ້າຂອງຕົວເມືອງມີການປ່ຽນແປງຢ່າງຫຼວງຫຼາຍ,ແລະໄດ້ເຮັດໃຫ້ການທ່ອງທ່ຽວແລະເສດຖະກິດຂອງຕົວເມືອງນີ້ມີການພັດທະນາຢ່າງຫຼວງຫຼາຍ.ໃນຄໍລຳແຈ້ງຂ່າວເສດຖະກິດຈີນມື້ນີ້,ພວກເຮົາຈະແນະນຳສະພາບຂອງນະຄອນຫວູຈຸ່ງທີ່ຖືກເອີ້ນວ່າເປັນບ້ານເຜົ່າຫຸຍຂອງຈີນ,ສ້າງສາຍຝັ່ງຄຳແມ່ນ້ຳເຫຼືອງຢູ່ເທິງດິນທາມ.
ສາຍຝັ່ງຄຳແມ່ນ້ຳເຫຼືອງ, ໝາຍຄວາມວ່າໃຫ້ແມ່ນ້ຳເຫຼືອງສ້າງປະສິດທິຜົນແລະຄວາມຮັ່ງມີ.ຊັບພະຍາກອນນ້ຳຢູ່ນະຄອນຫວູຈຸ່ງມີທ່າແຮງພິເສດ.ຢູ່ໃນ5ຕົວເມືອງໃຫຍ່ຂອງເຂດໜິງເຊ້ຍ,ມີແຕ່ແມ່ນ້ຳເຫຼືອງທີ່ໄຫຼຜ່ານນະຄອນຫວູຈຸ່ງເທົ່ານັ້ນ.ແມ່ນ້ຳເຫຼືອງຕອນຜ່ານນະຄອນຫວູຈຸ່ງໄຫຼຊ້າຫຼາຍ,ມີພູມສັນຖານທີ່ຮາບພຽງ,ບຶງໜອງນ້ອຍໃຫຍ່ແລະດິນທາມຫຼວງຫຼາຍປານໝູ່ດາວກະຈາຍຢູ່ທົ່ວໄປ,ມີເງື່ອນໄຂທີ່ສະດວກຫຼາຍຕໍ່ການສ້າງນະຄອນແຫ່ງນ້ຳ.ຫຼັງຈາກອົງການປົກຄອງເຂດໜິງເຊ້ຍສະເໜີໂຄງການ"ສາຍຝັ່ງຄຳແມ່ນ້ຳເຫຼືອງ"ທີ່ເລັ່ງລັດບາດກ້າວເຕີບໂຕຂອງເມືອງແຄມແມ່ນ້ຳເຫຼືອງຂອງເຂດໜິງເຊ້ຍແລ້ວ,ນະຄອນຫວູຈຸ່ງຖືຊັບພະຍາກອນນ້ຳເປັນທ່າແຮງ,ໄດ້ດຳເນີນໂຄງການຢ່າງເປັນລະບົບທີ່ພັດທະນາຕົວເມືອງດ້ວຍນ້ຳ.ທ່ານເຢ້ເຖ້ຍສຽງ,ຮອງຫົວໜ້າພະແນກວຽກງານນ້ຳນະຄອນຫວູຈຸ່ງເວົ້າວ່າ:
"ສະຖານທີ່ຂຸດເອົາດິນແລະດິນທາມທັງໝົດລ້ວນແຕ່ຈະຟື້ນຟູຂຶ້ນ.ມາຮອດປະຈຸບັນ,ນະຄອນຫວູຈຸ່ງໄດ້ສຳເລັດການຟື້ນຟູດິນທາມແລະບຶງໜອງ1040ເຮັກຕາ,ແລະພວມສ້າງເສັ້ນທາງຕິດຕໍ່ທັງໝົດຢູ່.ໃນຂອບເຂດແມ່ນ້ຳຕອນຜ່ານນະຄອນຫວູຈຸ່ງກວ້າງ10ກິໂລແມັດມີດິນທາມ2666ເຮັກຕາປາຍ.ນີ້ແມ່ນທິວທັດທຳມະຊາດທີ່ຈົບງາມແຫ່ງໜຶ່ງ."
ນະຄອນຫວູຈຸ່ງຖືບຶງໜອງແລະດິນທາມຢູ່ສອງຝັ່ງແມ່ນ້ຳເຫືຼອງເປັນພື້ນຖານ,ເລີ່ມຂຸດຄອງນ້ຳທີ່ລະບາຍນ້ຳຖ້ວມຍາວ28ກິໂລແມັດ.ຟື້ນຟູຊັບພະຍາກອນດິນທາມຢ່າງຫຼວງຫຼາຍ.ຍ້ອນມີໂຄງການສ້າງຄັນຄູລຽບຝັ່ງໄດ້ມາດຕະຖານຂອງແມ່ນ້ຳເຫືຼອງ,ນະຄອນຫວູຈຸ່ງໄດ້ສ້າງແລວຊົມທິວທັດຢູ່ຕາມສອງຝັ່ງຂອງນ້ຳສາຍຕ່າງໆແລະຄັນຄູລຽບຝັ່ງນ້ຳ,ເຮັດໃຫ້ທິວທັດບຶງໜອງແມ່ນ້ຳງາມກວ່າເກົ່າ.ທ່ານໝ້າຊ້ຽວເຟິ່ງເວົ້າວ່າ:
"ສ້າງສາຍຝັ່ງຄຳແມ່ນ້ຳເຫືຼອງ,ສ້າງນະຄອນຫວູຈຸ່ງທີ່ມີທິວທັດນ້ຳທີ່ສວຍງາມ,ໄດ້ເຮັດໃຫ້ນະຄອນຫວູຈຸ່ງມີການປ່ຽນແປງຢ່າງຫຼວງຫຼາຍ.ກ່ອນອື່ນແມ່ນສະພາບໃບໜ້າຂອງນະຄອນຫວູຈຸ່ງມີການປ່ຽນແປງແບບໜ້າມືເປັນຫຼັງມື,ນີ້ແມ່ນເລື່ອງທີ່ເຮັດໃຫ້ຄົນຄຶດເຖິງຍາກ. ໃນລະດູຮ້ອນ,ລະດູບານໃໝ່ແລະລະດູໃບໄມ້ຫຼົ່ນ,ນະຄອນຫວູຈຸ່ງກໍ່ມີສະພາບຄືກັນກັບພາກໃຕ້ຂອງຈີນ,ນີ້ແມ່ນຄວາມຮູ້ສຶກທີ່ແທ້ຈິງຂອງຂ້າພະເຈົ້າ."
ຊັບພະຍາກອນນ້ຳທີ່ອຸດົມສົມບູນເຮັດໃຫ້ນະຄອນຫວູຈຸ່ງມີການປ່ຽນແປງໃໝ່ຄູ່ມື້ຄູ່ເດືອນ,ກໍ່ເຮັດໃຫ້ທິວທັດອັນສວຍງາມຄືພາກໃຕ້ຂອງຈີນປະກົດຕົວອອກມາ.ການປ່ຽນແປງຂອງທິວທັດເຫຼົ່ານີ້ໄດ້ຊຸກຍູ້ການພັດທະນາຂອງຂະແໜງການທ່ອງທ່ຽວໂດຍກົງ.ການພັດທະນາຂອງຂະແໜງການທ່ອງທ່ຽວເຮັດໃຫ້ສາຍຝັ່ງຄຳແມ່ນ້ຳເຫຼືອງນັບມື້ນັບຈະເລີນຂຶ້ນ,ພຽງແຕ່ລາຍຮັບການທ່ອງທ່ຽວຂອງນະຄອນຫວູຈຸ່ງໃນ6ເດືອນຕົ້ນປີ2009ກໍ່ໄດ້ຫຼາຍກວ່າ3ຮ້ອຍລ້ານຢວນແລ້ວ.
ເມືອງໃນນ້ຳ,ນ້ຳໃນເມືອງ.ນຳໃຊ້ດິນທາມແລະບຶງໜອງຕາມຝັ່ງແມ່ນ້ຳເຫຼືອງ,ສ້າງເຮືອນພັກ,ບ້ານແມ່ນ້ຳເຫຼືອງ,ສວນປະເພນີແມ່ນ້ຳເຫຼືອງ ພື້ນຖານໂຄງລ່າງການທ່ອງທ່ຽວຮ້ານຄ້າທີ່ມີສີສັນພິເສດຕ່າງໆ,ທັງໝົດເຫຼົ່ານີ້ລ້ວນແຕ່ກາຍເປັນຈຸດເຕີບໂຕຂອງເສດຖະກິດສີຂຽວຂອງນະຄອນຫວູຈຸ່ງ.ການສຳຫຼວດແລະໃຊ້ໂຄງການກໍ່ສ້າງພື້ນຖານໂຄງລ່າງ,ໄດ້ພັດທະນາຂະແໜງການທ່ອງທ່ຽວຂອງນະຄອນຫວູຈຸ່ງ,ເພີ່ມໂອກາດການເຮັດທຸລະກິດທີ່ດີໃນອະນາຄົດ.ຊາວເມືອງນັບມື້ນັບຫຼາຍເລີ່ມສົນໃຈນຳການທ່ອງທ່ຽວພັກຜ່ອນ.ນາງຈ້າວຊາວເມືອງຫວູຈຸ່ງເວົ້າວ່າ:
"ດຽວນີ້ນະຄອນຫວູຈຸ່ງນັບມື້ນັບງາມກວ່າເກົ່າແລ້ວ.ນັກທ່ອງທ່ຽວທີ່ມາທ່ຽວຢູ່ແຫ່ງນີ້ກໍ່ຫຼາຍຂຶ້ນແລ້ວ.ແຕ່ກ່ອນພວກເຮົາກໍ່ຫຼິ້ນຢູ່ໃນເມືອງ,ດຽວນີ້ມີສະພາບແວດລ້ອມທີ່ດີແນວນີ້,ພວກເຮົາກໍ່ຈະບໍ່ມັກຫຼິ້ນຢູ່ໃນເມືອງປານໃດແລ້ວ,ມັກມາຫຼິ້ນຢູ່ນີ້ເລື້ອຍໆ."
ໃນຖານະທີ່ເປັນນະຄອນເຜົ່າຫຸຍທີ່ມີປະຫວັດສາດອັນຍາວນານ,ນະຄອນຫວູຈຸ່ງບໍ່ພຽງແຕ່ໄດ້ສ້າງທິວທັດຢູ່ຕາມແຄມແມ່ນ້ຳແລະບຶງໜອງເທົ່ານັ້ນ.ການສ້າງພື້ນຖານໂຄງຮ່າງສຳຄັນແມ່ນສ້າງໂຄງລ່າງຂອງຕົວເມືອງໃນອະນາຄົດ.ໃຊ້ນ້ຳມາຊຸກຍູ້ການສ້າງກຸ່ມອາຄານແລະທິວທັດວັດທະນະທຳຂອງເມືອງທີ່ມີສີສັນພິເສດຂອງເຜົ່າຫຸຍ.ນະຄອນຫວູຈຸ່ງໄດ້ດຳເນີນໂຄງການສ້າງເມືອງ14ໂຄງການຢູ່ຕາມຝັ່ງແມ່ນ້ຳເຫືຼອງ,ຄື,ສ້າງຫໍພິພິທະພັນຮີດຄອງປະເພນີຊົນເຜົ່າ,ຫໍສິລະປະວັດທະນະທຳແລະສູນສິລະປະວັດທະນະທຳອິດສະລາມ,ອາຄານແລະໂຄງລ່າງຂອງຕົວເມືອງທີ່ມີສັນຍາລັກຈຳນວນໜຶ່ງແລະອື່ນໆ.
ໂດຍຕາມຜັງເມືອງລວມຂອງເຂດໜິງເຊ້ຍກ່ຽວກັບການສ້າງກຸ່ມຕົວເມືອງຕາມແມ່ນ້ຳເຫຼືອງ,ແລະທ່າແຮງພູມສັນຖານທີ່ອວາຍໜ້າສູ່ແມ່ນ້ຳເຫຼືອງ,ນະຄອນຫວູຈຸ່ງໄດ້ດຳເນີນໂຄງການຍ້າຍເທດສະບານເມືອງສູ່ພາກຕາເວັນຕົກ,ມີເນື້ອທີ່ກວ້າງ20ກິໂລຕາແມັດ,ພື້ນຖານໂຄງລ່າງຂອງເມືອງຈຳນວນຫຼວງຫຼາຍໄດ້ຮັບການປັບປຸງໃຫ້ສົມບູນຂຶ້ນ,ເນື້ອທີ່ທັງໝົດຂອງນະຄອນຫວູຈຸ່ງແລະອັດຕາຫັນເປັນຕົວເມືອງລ້ວນແຕ່ໄດ້ຮັບການຍົກສູງຢ່າງຫຼວງຫຼາຍ.
ເມືອງຢຽນສືຂຶ້ນກັບນະຄອນຫວູຈຸ່ງ,ຕັ້ງຢູ່ພາກຕາເວັນຕົກຂອງເຂດໜິງເຊ້ຍ,ຢູ່ໃນເມືອງຢຽນສືບໍ່ມີທິວທັດແມ່ນ້ຳ.ເພື່ອປ່ຽນສະພາບການແບບນີ້,ໂຄງການໃຊ້ພະລັງງານແມ່ນ້ຳທີ່ມີການເກັບນ້ຳ,ລະບາຍນ້ຳແລະທິວທັດທຳມະຊາດໄດ້ສ້າງສຳເລັດໃນປີກາຍນີ້.ຜ່ານການຂຸດອ່າງເກັບນ້ຳ,ລະບາຍນ້ຳຖ້ວມ,ໂຄງການທີ່ມີຊື່ວ່າ"ໂຄງການໃຊ້ຊັບພະຍາກອນນ້ຳຮ່ວາໝ້າສື"ນີ້,ມີເນື້ອທີ່ໜ້ານ້ຳກວ້າງ160ກວ່າເຮັກຕາ,ແລະປູກຕົ້ນໄມ້ປູກທົ່ງ240ກວ່າເຮັກຕາ.ທ່ານລິວເພິງຢຸນ,ເລຂາພັກເມືອງຢຽນສືເວົ້າວ່າ:
"ຫຼັງຈາກສ້າງໂຄງການຮ່ວາໝ້າສືສຳເລັດແລ້ວ,ເນື້ອທີ່ຂອງເທດສະບານເມືອງຢຽນສືໄດ້ຈາກ12,3ກິໂລຕາແມັດ,ເພີ່ມຂຶ້ນເປັນ37ກິໂລຕາແມັດ,ເຮັດໃຫ້ເປັນເມືອງໃນປ່າ,ປ່າໃນເມືອງ;ເມືອງໃນນ້ຳ,ນ້ຳໃນເມືອງ.ສະພາບແບບນີ້ຈະມີບົດບາດສຳຄັນຕໍ່ການຊຸກຍູ້ການພັດທະນາຂອງເສດຖະກິດສັງຄົມຂອງເມືອງຢຽນສື,ມີຄວາມໝາຍທີ່ເປັນປະຫວັດສາດ."
ຕົວເມືອງເຂດໜິງເຊ້ຍສວຍງາມແລະມີຊີວິດຊີວາຍ້ອນມີນ້ຳ. ປະຊາຊົນເຂດໜິງເຊ້ຍມີຄວາມຮັກແພງແລະທະນຸຖະໜົມພິເສດຕໍ່ແມ່ນ້ຳເຫຼືອງ.ເຊື່ອວ່າຢູ່ເຂດໜິງເຊ້ຍເຜົ່າຫຸຍຈີນແຫ່ງນີ້,ຈະມີຕົວເມືອງນັບມື້ນັບຫຼາຍສວຍງາມແລະຈະເລີນກວ່າເກົ່າຍ້ອນມີນ້ຳ.
