ແຂວງສານຊີ່ອົບຮົມຊາວກະສິກອນແບບໃໝ່
(GMT+08:00) 2010-03-15 17:07:45 cri
ສະບາຍດີທ່ານຜູ້ຟັງທີ່ຮັກແພງ, ຍິນດີຕ້ອນຮັບທ່ານເຂົ້າສູ່ຄໍລຳແຈ້ງຂ່າວເສດຖະກິດຈີນ. ໃນຄໍລຳພາກນີ້, ເຊີນຟັງບົດແຈ້ງຂ່າວທີ່ພາດຫົວເລື່ອງວ່າ, ແຂວງສານຊີ່ຈີນເພີ່ມການອົບຮົມຊາວກະສິກອນແບບໃໝ່.
ບຸນກຸດຈີນຫາກໍ່ຜ່ານໄປ, ທ່ານລິວກົວຊີ່ງຂອງແຂວງສ່ານຕົ່ງ, ພາກຕາເວັນອອກຂອງຈີນກໍ່ຂ້ຽວເດີນທາງຈາກເມືອງໂຊ້ວກວ່າງແຂວງສ່ານຕົ່ງໄປເມືອງອ່ານໄຊ້ແຂວງສານຊີທີ່ໄກ1000ກວ່າກິໂລແມັດ, ໃນຖານະເປັນນັກວິຊາການທີ່ເມືອງໂຊ້ວກວ່າງສົ່ງໄປຊ່ອຍເຫຼືອເຕັກນິກປູກຜັກໃນຫ້ອງຮັກສາອຸນຫະພູມຢູ່ເມືອງອ່ານໄຊ້ແຂວງສານຊີ່, ທ່ານລິວກົວຊີ່ງຕ້ອງໃຊ້ໄລຍະຫຼັງບຸນກຸດຈີນເພື່ອຊ່ອຍຊາວກະສິກອນຂອງເມືອງອ່ານໄຊ້ບົດລະບັດຮັກສາຜັກໃນຫ້ອງຮັກສາອຸນຫະພູມ. ທ່ານລິວກົວຊີ່ງເວົ້າວ່າ,
ໂດຍທົ່ວໄປແລ້ວ, ໄລຍະນີ້ມີຄວາມສຳຄັນຫຼາຍ, ໄດ້ອົບຮົມ3ເທື່ອແລ້ວ. ຕອນເຊົ້າແມ່ນການອົບຮົມດ້ານທິດສະດີ, ຕອນແລງແມ່ນໄປອະທິບາຍຢູ່ກັບບ່ອນ.
ຢູ່ເມືອງອ່ານໄຊ້, ຈາກການກ້າເບ້ຍ, ຕິດຕາມວັດແທກທີ່ດິນ, ໃສ່ຝຸ່ນ, ຮອດເຕັກນິດປູກໝາກແຕງ, ໝາກເຜັດ, ໝາກເຂືອ, ໝາກເຫຼັ່ນແລະອື່ນໆໃນຫ້ອງຮັກສາອຸນຫະພູມ, ທ່ານລິວກົວຊີ່ງກໍ່ໄດ້ອົບຮົມຊາວກະສິກອນຢູ່ແຫ່ງນັ້ນທຸກດ້ານ. ຕາມທຳມະດາແລ້ວ, ຮອດເດືອນມິຖຸນາປີນີ້, ວຽກງານຂອງທ່ານກໍ່ຈະສິ້ນສຸດແລ້ວ, ແຕ່ຫ້ອງການວຽກງານປູກຜັກຂອງເມືອງອ່ານໄຊ້ໄດ້ປຶກສາກັບເມືອງໂຊ້ວກວ່າງ, ໃຫ້ທ່ານລິວກົວຊີ່ງເຮັດວຽກນີ້ຕໍ່ໄປອີກປີໜຶ່ງ.
ທ້າວຄ່າງຈ້ານເພີງ, ຊາວບ້ານຊາຟາງຕາແສງອຽນເຮີວ່ານເມືອງອ່ານໄຊ້ແຂວງສານຊີ່ບອກນັກຂ່າວວ່າ, ປີນີ້, ໜ່ວຍງານກະສິກຳທ້ອງຖິ່ນໄດ້ອົບຮົມເຂົາເຈົ້າສາມເທື່ອແລ້ວ, ແຕ່ລະເທື່ອອົບຮົມສາມສີ່ມື້. ຕອນເຊົ້າຮຽນທິດສະດີ, ຕອນບ່າຍໄປຟັງການອະທິບາຍຂອງນັກວິຊາການຢູ່ຫ້ອງຮັກສາອຸນຫະພູມ, ຊາວກະສິກອນກໍ່ສາມາດແລກປ່ຽນບົດຮຽນເຊິ່ງກັນແລະກັນ. ທ້າວຄ່າງຈ້ານເພີງເວົ້າວ່າ, ການອົບຮົມເຫຼົ່ານີ້ສຳຄັນຫຼາຍສຳລັບລາວ, ບໍ່ພຽງແຕ່ໄດ້ຮູ້ເຕັກນິກທີ່ດີກວ່າເກົ່າ, ມີຄວາມຮູ້ຫຼາຍກວ່າເກົ່າ, ລາຍໄດ້ກໍ່ສູງຂຶ້ນຄືກັນ. ລາວເວົ້າວ່າ,
ໃນເມື່ອກ່ອນ, ພວກເຮົາປູກແນວພັນເກົ່າ, ກໍ່ບໍ່ໄດ້ແລກປ່ຽນບົດຮຽນກັນຈັກເທື່ອ, ຜົນຜະລິດກໍ່ໜ້ອຍກວ່າປະຈຸບັນ, ເສຍເວລາລ້າຫຼາຍ, ແຕ່ບໍ່ໄດ້ກຳໄລ. ກ່ອນການອົບຮົມ, ປີໜຶ່ງມີລາຍໄດ້ພຽງແຕ່ປະມານ9000ຢວນເທົ່ານັ້ນ, ແຕ່ເມື່ອໄດ້ອົບຮົມແລ້ວ, ລະດູດຽວກໍ່ໄດ້ກຳໄລ1ໝື່ນກວ່າຢວນແລ້ວ, ຫຼັງຈາກຮຽນຮູ້ເຕັກນິກແລ້ວ, ຊາວກະສິກອນພວກເຮົາກໍ່ມີລາຍຮັບເພີ່ມຂຶ້ນຫຼາຍ.
ປະຈຸບັນ, ຢູ່ແຂວງສານຊີ່ໄດ້ດຳເນີນການອົບຮົມເຕັກນິກກະສິກຳແບບທົ່ວໄປຢ່າງກວ້າງຂວາງ, ລະບົບການອົບຮົມຊາວກະສິກອນຂັ້ນເມືອງ, ນະຄອນແລະແຂວງກໍ່ໄດ້ສ້າງຕັ້ງຂຶ້ນ. ໃນທົ່ວແຂວງມີ11ນະຄອນ 80ກວ່າເມືອງໄດ້ສ້າງສູນສຶກສາອົບຮົມເຕັກນິກໃຫ້ຊາວກະສິກອນ, ສູນອົບຮົມແຫ່ງຕ່າງໆໄດ້ສ້າງສູນ ອົບຮົມຊາວກະສິກອນ600ກວ່າແຫ່ງຢ່ຂັ້ນູບ້ານແລະຕາແສງ. ເຂົາເຈົ້າໄດ້ໃຊ້ຮູບການອົບຮົມເຕັກນິກກະສິກຳທີ່"ຈັດຊຸດອົບຮົມແບບໂຮມສູນ, ແນະນຳກັບບ່ອນ, ໃຫ້ຄຳປຶກສາດ້ານເຕັກນິກ, ແລະບໍລິການທາງໄກ", ໄດ້ຈັດຊຸດອົບຮົມຢູ່ເດີ່ນບ້ານຂອງຊາວກະສິກອນ, ຄູສອນອະທິບາຍໃຫ້ຊາວກະສິກອນຢູ່ຕາມໄຮ່ນາຫຼືຄອກສັດ, ໂດຍຜ່ານໂທລະສັບສາຍດ່ວນຂອງຫ້ອງອົບຮົມຊາວກະສິກອນທີ່ສ້າງຂຶ້ນໂດຍສູນອົບຮົມຊາວກະສິກອນແຂວງສານຊີ່ແລະໂທລະພາບດາວທຽມກະສິກຳປ່າໄມ້ແຂວງສານຊີ່, ໃຫ້ຄຳປຶກສາດ້ານເຕັກນິກແກ່ຊາວກະສິກອນຂອງແຫ່ງຕ່າງໆທຸກມື້, ພ້ອມທັງຜ່ານໂທລະພາບ, ວິທະຍຸ, ແລະອິນເຕີເນັດ, ໃຫ້ການບໍລິການທາງໄກແກ່ຊາວກະສິກອນ. ທ່ານລິວຢ້າຈຸ່ນ, ພະນັກງານທີ່ຮັບຜິດຊອບການອົບຮົມຊາວກະສິກອນຂອງພະແນກກະສິກຳແຂວງສານຊີ່ກ່າວວ່າ,
ແຕ່ລະປີ, ໄດ້ອົບຮົມຊາວກະສິກອນປະມານ1ລ້ານເທື່ອຄົນ, ໃຫ້ແກ່ການພັດທະນາກະສິກຳທັນສະໄໝ. ໃນທົ່ວແຂວງມີໂຄງການອົບຮົມວິຊາການໃໝ່ໃຫ້ແກ່ຊາວກະສິກອນຢູ່53ເມືອງ, ບ້ານຕົວຢ່າງ2100ບ້ານ, ອົບຮົມຊາວກະສິກອນ8ໝື່ນ4ພັນຄົນທີ່ຖືກະສິກຳເປັນອາຊີບແລະລາຍໄດ້ຫຼັກ. ເຊິ່ງໄດ້ກະຕຸ້ນໃຫ້ຊາວກະສິກອນ1ແສນ8ໝື່ນຄົນຢູ່ໃກ້ຄຽງເຂົ້າຮ່ວມການອົບຮົມເຕັກນິກໂດຍກົງຫຼືທາງອ້ອມ.
ໂຮງຮຽນວິຊາການເຮີ່ງທົ່ງຊີ່ອ່ານແມ່ນສູນອົບຮົມຂອງໂຄງການ"ແສງແດດ"ຂອງແຂວງສານຊີ່, ກໍ່ແມ່ນສູນອົບຮົມຊາວກະສິກອນທີ່ເຂົ້າເຮັດວຽກໃນຕົວເມືອງຂອງເຂດເວີ້ຍຢ່າງນະຄອນຊີ່ອ່ານ. ທ່ານຈ້າວຈີຈຸ່ນ, ຜູ້ອຳນວຍການການໂຮງຮຽນດັ່ງກ່າວບອກນັກຂ່າວວ່າ,
ພວກເຮົາໄດ້ເລຶອກເອົາບ່ອນທີ່ມີຕາແສງຫຼືມີບ້ານບ້ານຢູ່ໃກ້ກັນ, ດຳເນີນການໂຄສະນາໂຄງການອົບຮົມຢ່າງຫຼວງຫຼາຍ, ແຈ້ງໃຫ້ຊາບວ່າ, ພວກເຮົາຈະຈັດຊຸດອົບຮົມໃນດ້ານໃດດ້ານໜຶ່ງຢູ່ນີ້, ຖ້າມາເຂົ້າຮ່ວມ, ກໍ່ບໍ່ຕ້ອງເສຍເງິນ, ຫຼັງຈາກການອົບຮົມ, ຖ້າມີຜູ້ໃດຢາກປະກອບອາຊີບ, ພວກເຮົາຍັງຈະແນະນຳໃຫ້, ນີ້ກໍ່ບໍ່ເກັບເງິນຄືກັນ, ນີ້ກໍ່ແມ່ນການສົ່ງຄວາມຮູ້ແລະຂ່າວສານໄປສູ່ຂັ້ນຮາກຖານ.
ໂຄງການແສງແດດແມ່ນໂຄງການອົບຮົມແຮງງານຊົນນະບົດຂອງແຂວງສານຊີ່ທີ່ເລີ່ມຈັດຕັ້ງປະຕິບັດແຕ່ປີ2004. ມາຮອດປະຈຸບັນ, ຜູ້ໄດ້ຮັບການອົບຮົມສ່ວນຫຼາຍໄດ້ປະກອບອາຊີບໃນດ້ານຕ່າງໆ.ຜ່ານຈາກການອົບຮົມ, ຊາວກະສິກອນມີຄວາມຊຳນານໃນອາຊີບດີຂຶ້ນ, ມີລາຍໄດ້ຫຼືເງິນເດືອນຫຼາຍຂຶ້ນ.
ໃນຕົ້ນປີນີ້, ລັດຖະບານຈີນໄດ້ປະກາດເອກະສານເລກ1ຂອງປີ2010, ເອົາໃຈໃສ່ນຳບັນຫາ"ກະສິກຳ, ຊົນນະບົດແລະກະສິກອນ"7ປີລຽນຕິດ. ໃນເອກະສານໄດ້ກຳນົດວ່າ, ຕ້ອງຍົກສູງຄວາມສາມາດປະດິດສ້າງວິທະຍາສາດເຕັກນິກດ້ານກະສິກຳແລະເຜີຍແຜ່ໃຫ້ທົ່ວເຖິງກັນ, ເພີ່ມທະວີການສະໜັບສະໜູນດ້ານວິທະຍາສາດເຕັກນິກຕໍ່ການຜະລິດຊອງຊົນນະບົດ. ພ້ອມທັງສະເໜີອອກມາວ່າ, ເພີ່ມທະວີການຊີ້ນຳແລະການບໍລິການຕໍ່ຊາວກະສິກອນທີ່ໄປເຮັດວຽກໃນເມືອງ, ຍົກສູງຄວາມສາມາດປະກອບອາຊີບຂອງເຂົາເຈົ້າ, ຊຸກຍູ້ແຮງງານຊົນນະບົດຍົກຍ້າຍຢ່າງໝັ້ນທ່ຽງແລະມີລະບຽບຮຽບຮ້ອຍ. ປະຈຸບັນ, ຊາວກະສິກອນໜຸ່ມທີ່ໄປເຮັດວຽກໃນເມືອງຫຼັງຈາກໄດ້ຜ່ານການອົບຮົມແລ້ວ, ຈາກການເຄື່ອນຍ້າຍແບບບໍ່ເປັນລະບຽບໃນເມື່ອກ່ອນຫັນມາເປັນການເຄື່ອນທີ່ຢ່າງລະບຽບ, ຈາກການບໍ່ມີສີມືດີປານໃດກາຍມາເປັນຜູ້ມີສີມືເກັ່ງໃນດ້ານໃດດ້ານໜຶ່ງ, ຈາກຜູ້ທີ່ສ້າງຄວາມບໍ່ສະຫງົບໃນຕົວເມືອງຫັນມາເປັນຜູ້ເຂົ້າຮ່ວມການກໍ່ສ້າງແລະພັດທະນາຕົວເມືອງໃນປະຈຸບັນ. ສິ່ງທີ່ສຳຄັນກວ່ານີ້ແມ່ນ, ຫຼາຍໆຄົນທີ່ເຮັດວຽກໃນເມືອງມາຫຼາຍປີແລ້ວ, ເລີ່ມກັບຄືນສູ່ບ້ານເກີດແລະດຳເນີນທຸລະກິດ, ນຳເອົາເຕັກນິກ, ການຄຸ້ມຄອງທີ່ກ້າວໜ້າ, ແລະທຶນຮອນຈາກຕົວເມືອງໄປສູ່ຊົນນະບົດ, ເຊິ່ງໄດ້ຊຸກຍູ້ຂະບວນການເຊື່ອມໂຍງເຂົ້າກັນດ້ານເສດຖະກິດແລະສັງຄົມຂອງຕົວເມືອງແລະຊົນນະບົດຢ່າງແຂງແຮງ.
