ຊີວິດສັງຄົມ——ນັກຂ່າວນ້ອຍໃນງານວາງສະແດງໂລກຊຽງໄຮ
(GMT+08:00) 2010-06-09 17:00:04 cri
ທ່ານຜູ້ຟັງທີ່ເຄົາລົບ, ນາງອີຊີຢ້າວມີອາຍຸ12ປີ, ແມ່ນນັກຮຽນປະຖົມຊັ້ນປ.6 ເທື່ອນີ້ແມ່ນເທື່ອທຳອິດທີ່ນາງມາງານວາງສະແດງໂລກ, ແຕ່ນາງບໍ່ແມ່ນໄປທ່ຽວຊົມງານເໝືອນເດັກນ້ອຍຜູ້ອື່ນ, ແຕ່ແມ່ນໄປເອົາຂ່າວໃນນາມເປັນນັກຂ່າວຂອງໜັງສືພິມເຈົ້າພາບນ້ອຍຂອງຊຽງໄຮ. ພາຍໃຕ້ການນຳພາຂອງຄູສອນ, ນາງອີຊີຢ້າວແລະໝູ່ຫຼາຍຄົນໄດ້ໄປສຳພາດຄົນຕ່າງປະເທດດ້ວຍພາສາອັງກິດກ່ຽວ ກັບຄວາມຮູ້ສຶກຂອງເຂົາເຈົ້າທີ່ທ່ຽວຊົມງານວາງສະແດງໂລກ. ເພາະວ່າເຂົາເຈົ້າຈະພິມໜັງສືພິມສະບັບພິເສດກ່ຽວກັບງານວາງສະແດງໂລກ, ເພື່ອໃຫ້ເດັກນ້ອຍຜູ້ອ່ານຢູ່ແຫ່ງຕ່າງໆສາມາດສຳຜັດສະເໜ່ຂອງງານວາງສະແດງໂລກ. ໃນມື້ນີ້, ພວກເຮົາຈະພາທ່ານໄປສຳພັດກັບນັກຂ່າວນ້ອຍເຫຼົ່ານີ້.
ນາງອີຊີຢ້າວ: "ຊັອກໂກແລັດຂອງແບນຊິກມີຊື່ສຽງຫຼາຍ, ທ່ານເຫັນວ່າເປັນຫຍັງຫຼາຍຄົນຈິ່ງມັກຊັອກໂກແລັດຂອງແບນຊິກ?"
ນັກທ່ອງທ່ຽວຕ່າງປະເທດ: "ເຈົ້າ, ຂ້ອຍເຫັນວ່າຊັອກໂກແລັດດຳຂອງແບນຊິກແມ່ນດີທີ່ສຸດໃນໂລກ."
ນາງອີຊີຢ້າວທີ່ພວມເອົາຂ່າວຢູ່ຫໍວາງສະແດງແບນຊິກເອົາໃຈໃສ່ຫຼາຍນຳພາບພົດຂອງແບນຊິກໃນສາຍຕາຄົນຕ່າງປະເທດ, ແລະການວາງສະແດງຂອງແບນຊິກຈະນຳຫຍັງມາໃຫ້ຈີນ. ນາງອີຊີຢ້າວເວົ້າວ່າ, ນາງໄດ້ເຮັດວຽກຢູ່ໜັງສືພິມເຈົ້າພາບນ້ອຍ3ປີແລ້ວ, ແຕ່ສ່ວນຫຼາຍແມ່ນສຳພາດດ້ວຍພາສາຈີນ. ເພື່ອສໍາພາດງານວາງສະແດງໂລກດ້ວຍພາສາອັງກິດເທື່ອນີ້, ພາຍໃຕ້ການຊ່ວຍເຫຼືອຂອງຄູສອນ, ນາງກັບໝູ່ໄດ້ກຽມຄຳຖາມກ່ອນຈະໄປສຳພາດ, ແລະໄດ້ຝຶກແອບຫຼາຍເທື່ອ. ໃນຖານະເປັນຫົວໜ້າຮັບຜິດຊອບການເອົາຂ່າວຢູ່ເຂດຜູ້ຊີ່, ນາງອີຊີຢ້າວເຫັນວ່າການສຳພາດເທື່ອນີ້ມີຄວາມໝາຍສຳຄັນຫຼາຍ.
ນາງອີຊີຢ້າວເວົ້າວ່າ: "ພວກເຮົາມີໂຮງຮຽນຂ່າວຂອງໜັງສືພິມເຈົ້າພາບນ້ອຍ, ເພື່ອບຳລຸງສ້າງຄວາມສາມາດຂອງພວກເຮົາແລະຈັດວາງພວກເຮົາໄປສຳພາດຜູ້ມີຊື່ສຽງຫຼືກິດຈະກຳໃຫຍ່ຈຳນວນໜຶ່ງ. ໃນງານວາງສະແດງໂລກຄັ້ງນີ້, ພວກເຮົາຈະສຳພາດດ້ວຍ2ພາສາ. ແຕ່ກ່ອນພວກເຮົາມີແຕ່ໃຊ້ພາສາຈີນ, ເທື່ອນີ້ພວກເຮົາຈະໃຊ້ພາສາອັງກິດພ້ອມ. ກ່ອນໄປສຳພາດ, ພວກເຮົາຈະຕັ້ງຫົວຂໍ້ເຫຼົ່ານີ້, ແລ້ວຈິ່ງໄປສຳພາດຄົນຕ່າງປະເທດໂດຍອີງຕາມຫົວຂໍ້, ນີ້ສາມາດສ້າງຄວາມສາມາດຂອງພວກເຮົາໃນການປັບຕົວໃຫ້ເຂົ້າກັບສະພາບແວດລ້ອມແລະເຮັດວຽກດ້ວຍຕົນເອງ."
ທ່ານແຊມລີນແມ່ນຄູຝຶກນັກຂ່າວຂອງໜັງສືພິມເຈົ້າພາບນ້ອຍ, 1ປີກ່ອນນີ້, ລາວເດີນທາງຈາກລອນດອນມາຊຽນໄຮ. ທ່ານແຊມເວົ້າວ່າ, 2ເດືອນກ່ອນ, ສໍານັກ ງານໜັງສືພິມກໍ່ໄດ້ກະກຽມວຽກງານໃນການສຳພາດງານວາງສະແດງໂລກໃຫ້ເດັກນ້ອຍ, ບໍ່ວ່າໃນດ້ານພາສາຫຼືຄວາມສາມາດດ້ານການຂຽນຂ່າວ, ທ່ານແຊມກໍ່ໄດ້ອົບຮົມໃຫ້ເດັກນ້ອຍເຫຼົ່ານີ້. ນອກນີ້, ເພື່ອໃຫ້ພົວພັນກັບຫົວຂໍ້ຫຼັກຂອງງານວາງສະແດງໂລກຊຽງໄຮຄື"ຕົວເມືອງທີ່ດີກວ່າ ຊີວິດທີ່ດີກວ່າ", ທ່ານແຊມຍັງຊ່ວຍຂຽນຄຳຖາມແລະສິ່ງທີ່ໜ້າສົນໃຈຕ່າງໆກ່ຽວກັບການພັດທະນາຕົວເມືອງໃຫ້ນັກຂ່າວນ້ອຍ, ເຮັດໃຫ້ເປົ້າໝາຍສຳພາດຂອງເດັກນ້ອຍຍິ່ງຈະແຈ້ງ.
ທ່ານແຊມເວົ້າວ່າ: "ນີ້ແມ່ນພວກເຮົາສຳພາດງານວາງສະແດງໂລກເປັນເທື່ອທຳອິດ, ຈຸດປະສົງຂອງພວກເຮົາແມ່ນພະຍາຍາມສຳພາດດ້ວຍພາສາອັງກິດ. ທຸກຄົນກໍ່ໄດ້ເລືອກຫົວຂໍ້ທີ່ຕົນເອງສົນໃຈ, ເຊັ່ນວ່າ ເດັກນ້ອຍບາງຄົນສົນໃຈນຳບັນຫາການເຊື່ອມພິດ, ເດັກນ້ອຍບາງຄົນສົນໃຈນຳບັນຫາຊັບພະຍາກອນນ້ຳ, ຍັງມີ ເດັກນ້ອຍບາງຄົນສົນໃຈຫໍວາງສະແດງ. ບັນຫາເຫຼົ່ານີ້ລ້ວນແຕ່ແມ່ນພົວພັນກັບຫົວຂໍ້ຫຼັກຂອງງານວາງສະແດງໂລກຊຽງໄຮ, ສະນັ້ນ, ເດັກນ້ອຍຈິ່ງຢາກໄປຊອກຮູ້ວ່າຫຼຸດການເຊື່ອມພິດແນວໃດ, ປັບປຸງຄຸນນະພາບຂອງນ້ຳແນວໃດຈິ່ງຈະເຮັດໃຫ້ຕົວເມືອງງາມກວ່າເກົ່າໄດ້. ສ່ວນຢູ່ຫໍແບນຊິກ, ບັນຫາທີ່ພວກເຮົາສົນໃຈແມ່ນ ຊຽງໄຮແລະແບນຊິກສາມາດແລກປ່ຽນບົດຮຽນຫຍັງນຳກັນກ່ຽວກັບການກໍ່ສ້າງຕົວເມືອງ."
ຫຼາຍຄົນອາດຈະບໍ່ຮູ້ໜັງສືພິມເຈົ້າພາບນ້ອຍ, ແຕ່ໜັງສືພິມສະບັບນີ້ມີຊື່ສຽງດົງດັງໃນກຸ່ມຊາວໜຸ່ມໃນຫຼາຍຕົວເມືອງຂອງຈີນ. ນີ້ແມ່ນໜັງສືພິມທີ່ສຳພາດ, ຮຽບຮຽງແລະພິມຈຳໜ່າຍດ້ວຍເດັກນ້ອຍທີ່ມີອາຍຸຕ່ຳກວ່າ15ປີພາຍໃຕ້ການຊີ້ນຳຂອງຜູ້ໃຫຍ່. ນັບແຕ່ເລີ່ມພິມຈຳໜ່າຍໜັງສືພິມສະບັບນີ້ເປັນ20ກວ່າປີມານີ້, ໄດ້ສ້າງໂອກາດສໍາຜັດກັບວຽກຕົວຈິງໃຫ້ຊາວໜຸ່ມທີ່ຢາກເຮັດວຽກໃນວົງການຂ່າວ, ແລະໄດ້ສ້າງຊັບພະຍາກອນມະນຸດດ້ານຂ່າວສານທີ່ດີເດັ່ນ.
ທ້າວຖານຖຽນ ນັກຂ່າວນ້ອຍທີ່ມີອາຍຸ10ປີເວົ້າວ່າ, ເຖິງວ່າເຮັດວຽກຢູ່ສຳນັກ ງານໜັງສືພິມບໍ່ດົນປານໃດກໍ່ຕາມ, ແຕ່ລາວໄດ້ມີໂອກາດລົມກັບຄົນອື່ນໃນເວລາສຳພາດ, ຄວາມອາຍຂອງລາວກໍ່ຫຼຸດລົງຫຼາຍ. ລາວຫວັງວ່າຈະໄດ້ຮຽນຮູ້ຫຼາຍກວ່າເກົ່າທີ່ຄູສອນບໍ່ທັນສອນໃຫ້ໃນການສຳພາດຢູ່ໃນງານວາງສະແດງໂລກ.
ທ້າວຖານຖຽນເວົ້າວ່າ: "ຂ້ອຍໄດ້ມີຄວາມຮັບຮູ້ຫຼາຍກວ່າເກົ່າກ່ຽວກັບງານວາງສະແດງໂລກຢູ່ທີ່ນີ້, ແລະສາມາດໄປສຳພາດຜູ້ອື່ນ. ຄຳຖາມທີ່ຂ້ອຍຖາມນັ້ນແມ່ນບັນຫາກ່ຽວກັບຫໍວາງສະແດງຍີ່ປຸ່ນ, ຂ້ອຍໄດ້ໄປຖາມນັກທ່ອງທ່ຽວວ່າການທ່ຽວຊົມຫໍວາງສະແດງຍີ່ປຸ່ນໄດ້ຄວາມຮູ້ຫຍັງບໍ່. ຂ້ອຍມັກເຮັດວຽກຕົວຈິງ, ເພາະວ່າສາມາດເຝິກຝົນຕົນເອງ, ແລະໄດ້ຮັບຄວາມຮູ້ຫຼາຍກວ່າເກົ່າ."
ນັກຂ່າວນ້ອຍພາກັນຫຸ້ມໄປສໍາພາດທ່ານໂຊຣານ ເນັດໂຄວິກ ນັກທ່ອງທ່ຽວແຊກບີ, ທ່ານເວົ້າວ່າ, ດີໃຈຫຼາຍທີ່ໄດ້ໃຫ້ສຳພາດດ້ວຍພາສາອັງກິດຕໍ່ນັກຂ່າວນ້ອຍຢູ່ຫໍຂອງງານວາງສະແດງໂລກ. ທ່ານເຫັນວ່າ, ນີ້ບໍ່ພຽງແຕ່ແມ່ນການສຶກສາແລະ ບຳລຸງສ້າງຄວາມສາມາດຂອງເດັກນ້ອຍເທົ່ານັ້ນ, ຍັງມີຜົນດີຕໍ່ການພັດທະນາອະນາຄົດຂອງປະເທດຊາດ.
ທ່ານໂຊຣານ ເນັດໂຄວິກເວົ້າວ່າ: "ມ່ວນຫຼາຍ, ຂ້ອຍເຫັນວ່າວິທີນີ້ມີຜົນດີຕໍ່ຊາວໜຸ່ມແລະມີຜົນດີຕໍ່ການພັດທະນາປະເທດຊາດ, ເດັກນ້ອຍສໍາພາດຄົນຕ່າງປະເທດດ້ວຍພາສາອັງກິດ, ແລະເຂົ້າໃຈຄວາມຄິດຄວາມເຫັນຂອງຄົນອື່ນ, ນີ້ແມ່ນຄວາມຄິດທີ່ດີ."
ທ່ານຜູ້ຟັງທີ່ເຄົາລົບ, ທີ່ທ່ານຟັງມານັ້ນແມ່ນຄໍລຳກ່ຽວກັບນັກຂ່າວນ້ອຍໃນງານວາງສະແດງໂລກຊຽງໄຮ. ຖ້າທ່ານມາຊົມງານ, ຍ່າງເຂົ້າໄປສວນວາງສະແດງ, ອາດຈະໄດ້ພົບນັກຂ່າວນ້ອຍທີ່ໜ້າຮັກເຫຼົ່ານີ້. ຄໍລຳຊີວິດສັງຄົມເທື່ອນີ້ຂໍຈົບລົງພຽງທໍ່ນີ້, ພົບກັນໃໝ່ໃນອາທິດໜ້າ, ສະບາຍດີ!