 |
|
|
|||
| |
 |
|
||||||
 |
||
|
||
|
||
|
||
|
||
|
ເດືອນພະຈິກປີ 2009, ລັດຖະບານຈີນໄດ້ປະກາດວ່າ, ເມື່ອຮອດປີ 2020, ລວມຍອດຜະລິດຕະພັນພາຍໃນ ຫຼື GDP ຂອງຈີນຈະຫຼຸດການລະບາຍກາກບອນລົງໃຫ້ໄດ້ 40-45% ເມື່ອທຽບກັບປີ 2005, ແລະຈະກຳນົດເປົ້າໝາຍດັ່ງກ່າວເປັນເປົ້າໝາຍທີ່ເປັນແບບບັງຄັບ, ເຊິ່ງຈັດເຂົ້າໃນແຜນການໄລຍະກາງແລະໄລຍະຍາວແຫ່ງການພັດທະນາເສດຖະກິດ-ສັງຄົມແຫ່ງຊາດ. ເພື່ອບັນລຸເປົ້າໝາຍດັ່ງກ່າວ, ຈີນທີ່ກຳລັງຢູ່ໃນໄລຍະເລັ່ງລັດຫັນເປັນອຸດສາຫະກຳ, ໂດຍສະເພາະແມ່ນວິສາຫະກິດຕ່າງໆຂອງຈີນ ກໍຕ້ອງອອກແຮງທຳຄວາມພະຍາຍາມເພື່ອບັນລຸຕາມແຜນການນີ້.
ລັດຖະບານຈີນໄດ້ຈັດຂະແໜງການອຸດສາຫະກຳຢູ່ໃນອັນດັບໜຶ່ງໃນຂົງເຂດທີ່ສຳຄັນເພື່ອພະຍາຍາມປະຢັດພະລັງງານ ແລະ ຫຼຸດການລະບາຍກາກບອນ, ເພາະວ່າອຸດສາຫະກຳໃນຂະນະທີ່ແຕ່ລະປີໄດ້ສ້າງມູນຄ່າຫຼາຍກວ່າ 40% ຂອງ GDP ນັ້ນ, ກໍໄດ້ສິ້ນເປືອງພະລັງງານປະມານ 70%, ບັນຫາມົນລະພິດໜັກໜ່ວງ ຫຼາຍ. ພາຍໃຕ້ຄວາມກົດດັນໃຫຍ່ແຫ່ງການປະຢັດພະລັງງານ ແລະ ຫຼຸດການລະບາຍກາກບອນ, ວິສາຫະກິດອຸດສາຫະກຳຂອງຈີນ ກຳລັງຕັ້ງໜ້າ ແລະ ເພີ່ມການລົງທຶນ, ເພື່ອສຸມກຳລັງແກ້ໄຂບັນຫາການປະຢັດພະລັງງານ ແລະ ຫຼຸດການລະບາຍກາກບອນ.
ທ່ານເຕິ້ງສິລິນ ຜູ້ວຍການໃຫຍ່ກຸ່ມບໍລິສັດຜະລິດເຫຼັກກ້າອູຮ້ານ ກ່າວວ່າ: "ກຸ່ມບໍລິສັດອູຮ້ານແມ່ນໃກ້ກັບແມ່ນ້ຳຢາງຊີກຽງ, ແຕ່ກ່ອນ ຖ້າຜະລິດເຫຼັກກ້າໜຶ່ງໂຕນ ຕ້ອງໃຊ້ນ້ຳ 20 ກວ່າໂຕນ, ແຕ່ປັດຈຸບັນ ໃຊ້ພຽງແຕ່ 3 ໂຕນກວ່າກໍພໍແລ້ວ, ການໝູນວຽນໃຊ້ນ້ຳສູງເຖິງ 98%. ສ່ວນໄຟຟ້າທີ່ໃຊ້ໃນການຜະລິດນັ້ນ, ມີ 47% ແມ່ນທາງບໍລິສັດຜະລິດດ້ວຍອາຍແກັສໝູນວຽນ".
ຄືກັນກັບວິສາຫະກິດຜະລິດເຫຼັກກ້າ, ວິສາຫະກິດຫຼອມໂລຫະມີສີ, ກໍແມ່ນອຸດສາຫະກຳທີ່ສິ້ນເປືອງພະລັງງານຫຼາຍ, ປັດຈຸບັນ, ວິສາຫະກິດຫຼອມໂລຫະມີສີ ກໍກຳລັງພະຍາຍາມປັບປຸງໂຄງປະກອບຜະລິດຕະພັນ ນຳໃຊ້ແຮ່ທາດໂດຍສັງລວມ ເກັບຄືນແລະໝູນວຽນນຳໃຊ້ເຄື່ອງເສດເຫຼືອທີ່ກຳເນີດຈາກການຜະລິດ ແລະຮູບແບບອື່ນໆ ເພື່ອຫຼຸດຜ່ອນການສິ້ນເປືອງພະລັງງານ ແລະ ການລະບາຍກາກບອນໃຫ້ໜ້ອຍລົງ.
ວິສາຫະກິດອຸດສາຫະກຳເກົ່າແກ່ທີ່ສິ້ນເປືອງພະລັງງານຫຼາຍ ແລະ ລະບາຍກາກບອນຫຼາຍ ຕ້ອງໃຊ້ຮູບແບບຕ່າງໆ ເພື່ອປະຢັດພະລັງງານ ແລະ ຫຼຸດການລະບາຍກາກບອນ, ເພື່ອບັນລຸຄາດໝາຍທີ່ລັດຖະບານຈີນກຳນົດໄວ້. ສ່ວນວິສາຫະກິດທີ່ໃຊ້ພະລັງງານໃໝ່ດ້ວຍເຕັກນິກສູງ ແລະ ໃໝ່ນັ້ນ ກໍມີໂອກາດຫຼາຍຍ້ອນລັດຖະບານຈີນອອກແຮງຊຸກຍູ້ການປະຢັດພະລັງງານ ແລະ ຫຼຸດການລະບາຍກາກບອນ.
ປັດຈຸບັນ, ໄຟຟ້າທີ່ໄດ້ຈາກພະລັງງານຄວາມຮ້ອນໄດ້ກວມ 75% ຂອງການຜະລິດໄຟຟ້າໃນທົ່ວປະເທດ. ລັດຖະບານຈີນໄດ້ກຳນົດວ່າ, ຈະຕັ້ງໜ້າພັດທະນາພະລັງງານໃໝ່ ແລະ ພະລັງງານໝູນວຽນ, ສະນັ້ນ ບໍ່ຕ້ອງສົງໄສເລີຍວ່າ, ນີ້ຈະເປັນຊ່ອງທາງໃນການພັດທະນາພະລັງງານທີ່ສະອາດ ເຊັ່ນ ໄຟຟ້າແຮງລົມ ໄຟຟ້ານ້ຳຕົກ ແລະອື່ນໆ. ນາງລິສຽວລິນ ປະທານຄະນະກຳມະການກຸ່ມບໍລິສັດການລົງທຶນພະລັງງານໄຟຟ້າ ປະທານບໍລິສັດພະລັງງານໄຟຟ້າສາກົນຈີນຈຳກັດ ກ່າວວ່າ, ບໍລິສັດຂອງເພິ່ນ ໄດ້ພັດທະນາໂຄງການພະລັງງານໄຟຟ້າທີ່ສະອາດຫຼາຍໂຄງການ ຢູ່ແຫ່ງຕ່າງໆຂອງຈີນ, ແລະລົງມືສ້າງເຂດສາທິດຊີວິດກາກບອນຕ່ຳ ຢູ່ແຂວງໄຫຫຼຳ. ນາງລິສຽວລິນ ເວົ້າວ່າ: "ມາຮອດປັດຈຸບັນ, ພວກເຮົາໄດ້ພັດທະນາໄຟຟ້າແຮງລົມ ໄຟຟ້າພະລັງງານ ຄວາມຮ້ອນຈາກການເຜົາຂີ້ເຫຍື້ອ ໄຟຟ້າແສງຕາເວັນ ແລະ ໄຟຟ້າພະລັງງານຊີວະພາບ ໃນ 20 ກວ່າແຂວງ ເຂດປົກຄອງຕົນເອງ ແລະ ນະຄອນ ໃນທົ່ວປະເທດ. ຈັກຜະລິດໄຟຟ້າແຮງລົມຂອງພວກເຮົາ ທີ່ກຳລັງເຮັດວຽກຢູ່ນັ້ນ ມີ 10 ລ້ານເມກາວັດ, ນອກນີ້, ພວກເຮົາຍັງມີໂຮງໄຟຟ້າຄວາມຮ້ອນຈາກການເຜົາຂີ້ເຫຍື້ອ ທີ່ໃຫຍ່ທີ່ສຸດໃນທົ່ວປະເທດ. ຫວ່າງບໍ່ດົນມານີ້, ພວກເຮົາໄດ້ເຊັນສັນຍາເພື່ອສ້າງສວນວິທະຍາສາດທີ່ກາກບອນຕ່ຳແລະໃຊ້ພະລັງງານຊີວະພາບ ຢູ່ແຂວງໄຫຫຼຳ, ຈະນຳເຂົ້າຜົນສຳເລັດຂອງການຄົ້ນຄວ້າພັດທະນາພະລັງງານແສງຕາເວັນທີ່ກ້າວໜ້າ ແລະ ຜະລິດຕະພັນໄຟຟ້າແຮງລົມອ່ອນທີ່ພັດທະນາໃໝ່ ຂອງໂລກ ມາໃຊ້ຢູ່ໃນສວນວິທະຍາສາດດັ່ງກ່າວ."
ນອກນີ້, ລົດຍົນທີ່ໃຊ້ພະລັງງານໃໝ່ທີ່ກຳລັງປະກົດຂຶ້ນໃນທົ່ວໂລກ ກໍກາຍເປັນວຽກງານສຳຄັນທີ່ລັດຖະບານຈີນຕ້ອງຊຸກຍູ້ພັດທະນາ ໃນປີນີ້. ຢູ່ຈີນຢ່າງໜ້ອຍມີວິສາຫະກິດຜະລິດລົດຍົນ 30 ແຫ່ງ ກຳລັງຄົ້ນຄວ້າພັດທະນາລົດຍົນທີ່ໃຊ້ພະລັງງານໃໝ່, ລົດຍົນເຫຼົ່ານີ້ ມີລົດເກ໋ງ ລົດໂດຍສານ ລົດປັດກວາດຖະໜົນ ແລະອື່ນໆ.
ເຖິງແມ່ນວ່າ ວິສາຫະກິດຈີນກຳລັງຕັ້ງໜ້າເຂົ້າຮ່ວມເສດຖະກິດກາກບອນຕ່ຳກໍ່ຕາມ, ແຕ່ຈີນກໍໄດ້ປະເຊີນໜ້າກັບຄວາມຫຍຸ້ງຍາກຫຼາຍສົມຄວນໃນການປະຢັດພະລັງງານ ແລະ ຫຼຸດການລະບາຍ, ຄື ດ້ານໜຶ່ງ, ການຫັນເປັນອຸດສາຫະ ກຳ ແລະ ການຫັນເປັນຕົວເມືອງ ຂອງຈີນຍັງຢູ່ໃນລະດັບຕ່ຳ, ແລະຍັງຢູ່ໃນໄລຍະເລັ່ງຄວາມໄວຂອງການພັດທະນາ, ຢູ່ຈີນຍັງມີຫຼາຍກວ່າ 100 ລ້ານຄົນດຳລັງຊີວິດຢູ່ໃຕ້ເສັ້ນທຸກຍາກ, ລັດຖະບານມີພາລະໜັກໜ່ວງສົມຄວນໃນການພັດທະນາເສດຖະກິດ, ເພື່ອຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ. ອີກດ້ານໜຶ່ງ, ຈີນຍັງປະສົບຫຼາຍບັນຫາ ໃນການພັດທະນາເສດຖະກິດກາກບອນຕ່ຳ, ເຊັ່ນ ກົດໝາຍ ຂໍ້ກຳນົດກົດລະບຽບຍັງບໍ່ຄົບຖ້ວນ, ຄວາມສາມາດຂອງການປະດິດສ້າງເຕັກນິກບໍ່ສູງ, ບາງຂະແໜງການພະລັງງານໃໝ່ສົນໃຈແຕ່ການຂະຫຍາຍຕົວ ແຕ່ບໍ່ສົນລະບົບລະບຽບ ແລະອື່ນໆ.
ສະນັ້ນ, ທ່ານໂກ່ໂກຊິ້ງ ສາດສະດາຈານມະຫາວິທະຍາໄລປະຊາຊົນຈີນກ່າວວ່າ, ຄວນຊຸກຍູ້ການພັດທະນາເສດຖະກິດກາກບອນຕ່ຳ ໃນຫຼາຍດ້ານ, ເຊັ່ນ ສ້າງຂໍ້ກຳນົດກົດລະບຽບ ແລະ ກົດໝາຍຕ່າງໆ, ການຄ້າກາກບອນ, ການວາງແຜນພັດທະນາ ແລະ ການປະດິດສ້າງເຕັກນິກ ແລະອື່ນໆ. ທ່ານໂກ່ໂກຊິ້ງ ເວົ້າວ່າ: "ການພັດທະນາເສດຖະກິດກາກບອນຕ່ຳ ຕ້ອງມີນິຕິກຳທີ່ສົມຄູ່ກັນ, ເພື່ອຊີ້ນຳ ແລະ ຈຳກັດການກະທຳຂອງອົງການປົກຄອງທຸກຂັ້ນ ວິສາຫະກິດ ແລະ ປະຊາຊົນ; ຕ້ອງມີຕະຫຼາດຄ້າຂາຍກາກບອນທີ່ເປີດເຜີຍ, ເພື່ອຊຸກຍູ້ສ້າງກົນໄກການຜະລິດແບບສະອາດ, ຊີ້ນຳວິສາຫະກິດໃນການຫຼຸດການລະບາຍກາກບອນ; ຕ້ອງຈັດເອົາເຕັກນິກກາກບອນຕ່ຳອັນກ້າວໜ້າເຂົ້າໃນແຜນການພັດທະນາເຕັກນິກວິທະຍາສາດຂອງລັດແລະເຂດແຄວ້ນ ໂດຍຖືເປັນເນື້ອໃນໃຈກາງ ໃນການຍົກສູງກຳລັງແຂ່ງຂັນດ້ານເຕັກນິກຂອງຊາດ, ຕ້ອງໃຫ້ການສະໜັບສະໜູນດ້ານງົບປະມານ, ໃຫ້ສ້າງທີມປະດິດສ້າງທີ່ພັດທະນາຢ່າງຕໍ່ເນື່ອງ ແລະ ໝັ້ນທ່ຽງ; ໃຊ້ມາດຕະການພິເສດ ແລະ ສົ່ງເສີມ ໃນດ້ານສິນເຊື່ອ ແລະ ອາກອນ, ຊຸກຍູ້ໃຫ້ເສດຖະກິດກາກບອນຕ່ຳພັດທະນາ."
ຂໍ້ສະເໜີດັ່ງກ່າວໄດ້ເຮັດໃຫ້ລັດຖະບານຈີນເອົາໃຈໃສ່ນຳໃນລະດັບສູງແລ້ວ, ທ່ານເຊ້ເຈີ້ນຮົວ ຮອງຫົວໜ້າຄະນະກຳມະການການພັດທະນາ ແລະ ການປະຕິຮູບແຫ່ງລັດຈີນ ກ່າວວ່າ, ປີນີ້, ຈີນຈະຍິ່ງເອົາໃຈໃສ່ນຳການຫຼຸດການລະບາຍຈາກດ້ານໂຄງປະກອບ, ຊຸກຍູ້ການປັບປຸງໂຄງປະກອບອຸດສາຫະກຳ ແລະ ການປ່ຽນແປງຮູບແບບພັດທະນາເສດຖະກິດ ໂດຍຜ່ານຈາກການຫຼຸດການລະບາຍມົນລະພິດ. ທ່ານເຊ້ເຈີ້ນຮົວເວົ້າວ່າ: "ປີນີ້ ຈີນຈະວາງວິທີການເຜີຍແຜ່ການອຸດໜູນດ້ານການເງິນໃຫ້ແກ່ລົດຍົນທີ່ປະຢັດພະລັງງານ, ຈັກໄຟຟ້າ ແລະ ຜະລິດຕະພັນອື່ນໆ, ຕ້ອງວາງນະໂຍບາຍລັກສະນະສົ່ງເສີມ, ປັບປຸງນະໂຍບາຍເສດຖະກິດ, ຊຸກຍູ້ການປະຕິຮູບກ່ຽວກັບລາຄາຜະລິດຕະພັນທີ່ມີລັກສະນະປະຢັດຊັບພະຍາກອນ ແລະ ການເກັບຄ່າໃນດ້ານອະນຸລັກສິ່ງແວດລ້ອມ ໃຫ້ດຳເນີນໄປຢ່າງໝັ້ນທ່ຽງ, ຕັ້ງໜ້າປະຕິບັດນະໂຍບາຍການເງິນ ແລະ ອາກອນຂອງລັດ ໃນການສະໜັບສະໜູນການປະຢັດພະລັງງານ ແລະ ຫຼຸດການລະບາຍກາກບອນ, ໃຫ້ວິສາຫະກິດຕ່າງໆເພີ່ມສະຕິເປັນເຈົ້າການປະຢັດພະລັງງານ ແລະ ຫຼຸດການລະບາຍກາກບອນ.
 |
 |
| © China Radio International.CRI. All Rights Reserved. 16A Shijingshan Road, Beijing, China. 100040 |