ວັນທີ10ມິຖຸນານີ້, ງານຕະຫຼາດນັດສິນຄ້າຂາເຂົ້າຂາອອກຄຸນມີງ ຈີນຄັ້ງທີ18, ທັງເປັນງານວາງສະແດງສິນຄ້າປະເທດອາຊີໃຕ້ຄັ້ງທີ3ທີ່ຈັດຢູ່ເມືອງຄຸນມີງແຂວງຢຸນນານຈີນໄດ້ອັດລົງແລ້ວ. ຕໍ່ໄປເຊີນຟັງລາຍລະອຽດກ່ຽວກັບເລື່ອງນີ້.
ງານຕະຫຼາດນັດສິນຄ້າແລະງານວາງສະແດງສິນຄ້າປະເທດອາຊີໃຕ້ເທື່ອນີ້ໄດ້ສ້າງຫ້ອງວາງສະແດງ2452ຫ້ອງ, ຫຼາຍກວ່າຄັ້ງແລ້ວນີ້118ຫ້ອງ, ວິສາຫະກິດທີ່ເຂົ້າຮ່ວມການວາງສະແດງມີ2306ແຫ່ງ, ເພີ່ມຂຶ້ນຫຼາຍກວ່າປີກາຍ44%. ໃນນັ້ນມີນັກທຸລະກິດຮົງກົງ, ມາກາວ, ໄຕ້ຫວັນແລະຕ່າງປະເທດເກືອບ2ໝື່ນຄົນ. ນາງກົມມະລີ ດາລາວົງ, ຮອງເລຂາສະພາອຸດສາຫະກຳແລະການຄ້າແຫ່ງຊາດລາວທີ່ຮັບຜິດຊອບການວາງສະແດງຂອງລາວເທື່ອນີ້ບອກໃຫ້ຮູ້ວ່າ,
ຢູ່ຫໍວາງສະແດງຂອງລາວ, ຈາກ15ບໍລິສັດ19ຫ້ອງວາງສະແດງເພີ່ມຂຶ້ນເປັນ18ບໍລິສັດ26ຫ້ອງວາງສະແດງ. ການເພີ່ມຫ້ອງວາງສະແດງແມ່ນເພື່ອເພີ່ມທະວີການແລກປ່ຽນດ້ານການພົວພັນການຄ້າແລະການລົງທຶນຂອງຈີນແລະລາວ, ຄາດວ່າປີໜ້າຈະຫຼາຍກວ່ານີ້ອີກ.
ນາງເວົ້າວ່າ, ສິນຄ້າຂອງລາວທີ່ນຳມາວາງສະແດງມີຈຸດພິເສດພົ້ນເດັ່ນທີ່ສຸດແມ່ນເຄື່ອງເຟີນີເຈີ, ທຸກເທື່ອກໍ່ຂາຍດິບຂາຍດີ, ຂາຍໄດ້ເຖິງ90%. ສິນຄ້າຂອງລາວມີຄຸນນະພາບດີທັງລາຄາຖືກ, ມີຊື່ສຽງທີ່ດີ, ໄດ້ຮັບການຕີລາຄາສູງຈາກລູກຄ້າຈີນ.
ເມື່ອເຂົ້າສູ່ຫໍຕ່າງປະເທດ, ເຄື່ອງຫັດຖະກຳ, ເຄື່ອງເຟີນີເຈີທີ່ເຮັດດ້ວຍໄມ້, ເຄື່ອງແກະສະຫຼັກໄມ້ທີ່ມີເອກະລັກອາຊີອາຄະເນແລະອາຊີໃຕ້ໜ້າສົນໃຈຫຼາຍ. ໃນນັ້ນສ່ວນຫຼາຍແມ່ນເຄື່ອງເຟີນີເຈີທີ່ເຮັດດ້ວຍໄມ້ແດງ, ນອກນີ້ຍັງມີໄຫໃຫຍ່ທີ່ເຮັດດ້ວຍໄມ້ດູ່ລາຍທີ່ເປັນຮູບທຳມະຊາດ, ໃນນັ້ນສິ່ງທີ່ໜ້າສົນໃຈທີ່ສຸດກໍ່ແມ່ນຕຽງໄມ້ດູ່ລາຍທີ່ຕິດລາຄາ1ແສນ8ໝື່ນ8ພັນຢວນ. ນອກຈາກເຄື່ອງເຟີນີເຈີໄມ້ເນື້ອແຂງໄດ້ຮັບຄວາມນິຍົມຫຼາຍແລ້ວ, ຍັງມີເຄື່ອງຫັດຖະກຳທີ່ເຮັດດ້ວຍໄໝ, ຝ້າຍແລະເຄື່ອງປະດັບທີ່ເປັນເງິນຄຳແລະອື່ນໆ. ຢູ່ຫໍວາງສະແດງລາວໂດຍສະເພາະແມ່ນສະຖານທີ່ວາງສະແດງເຄື່ອງເຟີນີເຈີມີຄົນຫຼາຍມາໂດຍຕະຫຼອດ.
ອັນນີລາຄາເທົ່າໃດ?
1200.
ຫຼຸດໜ້ອຍໜຶ່ງໄດ້ບໍ່?
ຄັນຊັ້ນກໍ່1000ສາ.
ນາງບົວມາລາທີ່ຂາຍໂຕະນ້ຳຊາເປັນນັກທຸລະກິດລາວ, ນາງໄດ້ຕັ້ງບໍລິສັດມາ20ກວ່າປີແລ້ວ. ປະຈຸບັນ, ລາວພວມຮ່ວມມືກັບນັກທຸລະກິດຜູ້ໜຶ່ງຂອງນະຄອນຕ້າລຽນຂອງຈີນ. ບໍລິສັດຂອງນາງບົວມາລາຢູ່ນະຄອນຫຼວງວຽງຈັນ, ກວມເນື້ອທີ3ເຮັກຕາ, ຈ້າງກຳມະກອນ300ກວ່າຄົນ. ເຖິງວ່າເປັນມື້ທຳອິດທີ່ເປີດຫ້ອງວາງສະແດງກໍ່ຕາມ, ແຕ່ກໍ່ມີລູກຄ້າຫຼາຍໆຄົນມາຊື້ເຄື່ອງເຟີນີເຈີ.
ຂາຍໄດ້4ໝື່ນຫາ5ໝື່ນຢວນແລ້ວ, ແຕ່ປີ2000, ຂ້ອຍກໍ່ໄດ້ມາເຂົ້າຮ່ວມງານຕະຫຼາດນັດສິນຄ້າຄຸນມີງແລ້ວ, ມາທຸກເທື່ອ, ເປັນບໍລິສັດເຄື່ອງເຟີນີເຈີແຫ່ງທຳອິດຂອງລາວທີ່ເຂົ້າສູ່ຕະຫຼາດຂອງຈີນ.
ທີ່ຈິງແລ້ວ, ເວົ້າສຳລັບນາງບົວມາລາ, ງານຕະຫຼາດນັດສິນຄ້າຄຸນມີງບໍ່ແມ່ນເລື່ອງໃໝ່ໆ, ມັນແມ່ນເພື່ອນເກົ່າແລ້ວ.
ເຖິງວ່ານັກທຸລະກິດເຄື່ອງເຟີນີເຈີຂອງລາວມີຄູ່ແຂ່ງຫຼາຍສົມຄວນກໍ່ຕາມ, ແຕ່ລາວບໍ່ນ້ອຍໜ້າຜູ້ໃດເລີຍ. ເຄື່ອງເຟີນີເຈີ, ເຄື່ອງຫັດຖະກຳຕ່າງໆລ້ວນແຕ່ໄດ້ຜະລິດຢ່າງປານີດງົດງາມ, ໃນນັ້ນກໍ່ມີຊ່າງສີມືຂອງບໍລິສັດຈີນ. ທ່ານຢີ້ງທີ່ມາຈາກເມືອງຈູຈີ້ແຂວງເຈີ້ຈ່ຽງຂອງຈີນເປັນຜູ້ອຳນວຍການໃຫຍ່ຂອງບໍລິສັດເຄື່ອງເຟີນີເຈີມູ້ຈື່ຢຸ້ນຄຸນມີງ, ທັງເປັນນັກແກະສະຫຼັກ, ລາວເຄີຍໃຊ້ເວລາສອງປີແກະສະຫຼັກໄຫໄມ້"ອໍລະຫັນ18ອົງ"ທີ່ວາງສະແດງໃນງານຄັ້ງນີ້. ລາວເວົ້າວ່າ, ນີ້ແມ່ນເທື່ອທຳອິດທີ່ມາເຂົ້າຮ່ວມງານຕະຫຼາດນັດຄຸນມີງ, ສົນໃຈຫຼາຍຕໍ່ຜະລິດຕະພັນໄມ້ຂອງລາວ, ສະນັ້ນຈຶ່ງມາເຂົ້າຮ່ວມ, ຢາກຜ່ານງານຄັ້ງນີ້ພົວພັນກັບນັກທຸລະກິດຈີນແລະລາວທີ່ສົນໃຈນຳສີມືຂອງລາວ.
ເອົາຈັ່ງຊີ້, ເຈົ້າໄປສຳຫຼວດກ່ອນໄດ້ບໍ່?
ຂີ່ລົດໄປໄດ້ບໍ່?
ໄດ້, ເຮັດວີຊາແລ້ວກໍ່ໄປໄດ້.
ຮອດພຸ້ນແລ້ວຈະໂທຫາເນາະ.
ເຈົ້າ.
ທ່ານອູທີ່ພວມຖາມເຈົ້າຂອງຮ້ານເຟີນີເຈີກໍ່ເປັນນັກທຸລະກິດ, ແຕ່ກ່ອນເຄີຍຮ່ວມມືກັບວິສາຫະກິດເມືອງແຄມທະເລ. ເທື່ອນີ້ມາເຂົ້າຮ່ວມງານຕະຫຼາດນັດຄຸນມີງແມ່ນເພື່ອຊອກຄູ່ຮ່ວມມືຜູ້ໃໝ່, ແລະຢາກໄປຊອກຮູ້ສະພາບການລົງທຶນໃນຂະແໜງການເຄື່ອງເຟີນີເຈີຢູ່ປະເທດລາວ. ລາວເວົ້າວ່າ, ການຄ້າຈີນລາວພັດທະນາໄດ້ດີຕະຫຼອດມາ, ປະຈຸບັນ, ລັດຖະບານຈີນສົ່ງເສີມໃຫ້ວິສາຫະກິດຈີນໄປສ້າງທຸລະກິດຢູ່ອາຊີອາຄະເນແລະອາຊີໃຕ້, ສະນັ້ນລາວຢາກຜ່ານງານຕະຫຼາດນັດ, ຊອກຫາຄູ່ຮ່ວມມືທີ່ດີ, ໄປສຳຫຼວດຢູ່ອາຊີອາຄະເນໂດຍສະເພາະແມ່ນປະເທດລາວ, ເຮັດໃຫ້ບໍລິສັດຂອງຕົນກ້າວສູ່ອາຊີອາຄະເນ.
ແຂວງຢຸນນານຈີນມີຊາຍແດນຕິດກັບລາວ, ຫວຽດນາມແລະມຽນມາ, ມີເສັ້ນຊາຍແດນ4061ກິໂລແມັດ, ເປັນຊາຍແດນທີ່ມີເງື່ອນໄຂເປີດປະຕູທີ່ດີ, ລະດັບເປີດປະຕູກວ້າງຂວາງທີ່ສຸດ, ແລະເງື່ອນໄຂດ້ານພູມສັນຖານດີທີ່ສຸດ. ນີ້ໝາຍຄວາມວ່າ, ແຂວງຢຸນນານມີທ່າແຮງດ້ານພູມສັນຖານທີ່ກ້າວສູ່ອາຊີອາຄະເນແລະອາຊີໃຕ້. ຕາມສະຖິຕິ, ໃນ4ເດືອນທຳອິດປີນີ້, ການຄ້າຈີນລາວໂດຍສະເພາະແມ່ນມູນຄ່າການຄ້າລະຫວ່າງລາວກັບແຂວງຢຸນນານຈີນໄດ້ເພີ່ມຂຶ້ນ66%. ສ່ວນງານຕະຫຼາດນັດສິນຄ້າຄຸນມີງໄດ້ສ້າງໂອກາດຢ່າງຫຼວງຫຼາຍໃຫ້ແກ່ການຊຸກຍູ້ການຮ່ວມມືຈີນກັບອາຊຽນ, ໂດຍສະເພາະຈີນກັບລາວ.
ກົງສູນໃຫຍ່ລາວປະຈຳຄຸນໝິງ(ຊ້າຍ)
ທ່ານພອນທະວີ ບຸດດາລາ, ກົງສູນໃຫຍ່ຂອງລາວປະຈຳຄຸນມີງກ່າວວ່າ,
ເຮົາເຫັນວ່າ,ລາວກັບຈີນມີທ່າແຮງບົ່ມຊ້ອນໃນການຮ່ວມມືກັນຫຼາຍ,ເຊັ່ນການຮ່ວມມືທາງດ້ານກະສິກຳ,ການທ່ອງທ່ຽວ,ການກໍ່ສ້າງພື້ນຖານໂຄງຮ່າງ, ທາງດ້ານການສຶກສາແລະອື່ນໆ.ງານວາງສະແດງຕະຫຼາດນັດຄຸນໝິງຈະມີບົດບາດສຳຄັນຫຼາຍ,ນີ້ກໍ່ແມ່ນວິທີການໜຶ່ງທີ່ວ່າຢຸນນານຢາກເປີດກວ້າງການຮ່ວມມືກັບພາຍນອກກັບປະເທດອື່ນໃຫ້ຫຼາຍກວ່າເກົ່າ,ເພື່ອສ້າງຕະຫຼາດໃໝ່,ເພື່ອມີການແລກປ່ຽນເສດຖະກິດການຄ້າ,ການລົງທຶນແລະການທ່ອງທ່ຽວກັນໃຫ້ຫຼາຍຂຶ້ນກວ່າເກົ່າ. ການຮ່ວມມືລະຫວ່າງລາວກັບຈີນໂດຍສະເພາະລາວກັບຢຸນນານຈະນັບມື້ນັບເຕີບໃຫຍ່ຂະຫຍາຍຕົວ ແລະນັບມື້ນັບໄດ້ຮັບໝາກຜົນຫຼວງຫຼາຍໃນການຮ່ວມມືກັນດັ່ງກ່າວ,ປະຈຸບັນແລະໃນຕໍ່ໜ້າກໍ່ຈະໄດ້ຮັບໝາກຜົນອັນດີ.ພ້ອມດຽວກັນນັ້ນ,ກໍ່ຮຽກຮ້ອງທັງນັກທຸລະກິດລາວທັງນັກທຸລະກິດຈີນໃຫ້ມີການໄປມາຫາສູ່ກັນໃຫ້ຫຼາຍກວ່າເກົ່າ,ໂດຍສະເພາະແມ່ນຢາກໃຫ້ບັນດາວິສາຫະກິດຫຼືບໍລິສັດທີ່ມີທ່າແຮງຂອງຈີນໄປຮ່ວມມືເຮັດທຸລະກິດກັບລາວ,ບໍລິສັດແລະວິສາຫະກິດທີ່ມີທ່າແຮງແລະຄວາມສາມາດຕົວຈິງໃນການເຮັດວຽກໄປຮ່ວມມືກັບລາວ,ພ້ອມກັນພັດທະນາເພື່ອຕ່າງຝ່າຍຕ່າງໄດ້ຮັບຜົນປະໂຫຍດ.
