ປະຊາຊົນອາຟຼິກາຈະພະຍາຍາມຮ່ວມກັບໂລກເພື່ອສ້າງອະນາຄົດທີ່ດີງາມກວ່າເກົ່າ
(GMT+08:00) 2010-06-24 16:40:19 cri
ວັນທີ 3 ມິຖຸນານີ້ແມ່ນວັນກຽດຕິຍົດຂອງຄະນະກຳມະການສະຫະພາບອາຟຼິກາຂອງງານວາງສະແດງໂລກຊຽງໄຮ.ໃຕ້ຫົວຂໍ້ທີ່ວ່າ"ຕົວເມືອງທີ່ດີກວ່າ,ຊີວິດທີ່ດີກວ່າ",ຫໍປະສົມອາຟຼິກາໃນເຂດງານວາງສະແດງໂລກຊຽງໄຮໄດ້ສະແດງໃຫ້ຄົນທັງຫຼາຍເຫັນສະພາບຕົວຈິງຂອງອາຟຼິກາ,ເຮັດໃຫ້ຄົນທັງຫຼາຍຮູ້ຫຼາຍກວ່າເກົ່າກ່ຽວກັບຊີວິດການເປັນຢູ່ຂອງປະຊາຊົນປະເທດອາຟຼິກາ.ເຖິງວ່າຍັງປະເຊີນກັບຄວາມຫຍຸ້ງຍາກແລະສິ່ງທ້າທາຍຫຼາຍປະການ,ແຕ່ປະຊາຊົນອາຟຼິກາບໍ່ໄດ້ຢຸດຕິຕໍ່ການສະແຫວງຫາຊີວິດທີ່ຜາສຸກຕະຫຼອດມາ.ເຂົາເຈົ້າເຊື່ອໝັ້ນວ່າ,ຊີວິດໃນອະນາຄົດຍ່ອມຈະດີງາມກວ່າເກົ່າ.
ຫຼາຍຄົນອາດຈະຮູ້ແຜ່ນດິນໃຫຍ່ອາຟຼິກາບໍ່ຫຼາຍປານໃດ,ແຕ່ເມື່ອຍ່າງເຂົ້າຫໍປະສົມອາຟຼິກາ,ຄົນທັງຫຼາຍກໍ່ຈະໄດ້ເຫັນວ່າ,ຢູ່ທາງຫຼັງຮູບພາບທີ່ມີສີສັນພິເສດຂອງອາຟຼິກາທີ່ແຕ້ມຢູ່ເທິງຝາທາງນອກຂອງຫໍປະສົມ,ປະເທດຕ່າງໆຍັງມີສີສັນພິເສດຂອງໃຜລາວ.ຕົວຢ່າງຄືຫໍໂມລິເຊີດ,ເຖິງວ່າຈັດສິ່ງວາງສະແດງແບບງ່າຍໆ,ແຕ່ພັດມີເອກະລັກຂອງປະເທດເກາະດອນ,ທົ່ວຫໍກໍ່ເໝືອນດັ່ງທະເລສີຟ້າ.ໃນສອງເຂດວາງສະແດງທີ່ຕ່າງມີຫົວຂໍ້ວ່າ"
ເກາະດອນຫຼາກຫຼາຍສີສັນ"ແລະ"ເຮືອນດັ້ງເດີມ",ຄົນທັງຫຼາຍຈະໄດ້ເຫັນຄວາມພະຍາຍາມຂອງໂມລິເຊີດໃນການອະນຸລັກມໍລະດົກປະຫວັດສາດແລະເຮັດໃຫ້ວັດທະນະທຳທີ່ຕ່າງກັນເຊື່ອມໂຍງເຂົ້າກັນ.ນອກນີ້,ໃນຫໍປະສົມອາຟຼິກາຍັງມີຕະຫຼາດອາຟຼິກາ.ຢູ່ນີ້,ຄົນທັງຫຼາຍຈະໄດ້ເຫັນແລະຊື້ສິນຄ້າອາຟຼິກາແທ້ໆ,ຍິ່ງໃກ້ຊິດກັບສະພາບການດຳລົງຊີວິດຂອງປະຊາຊົນອາຟຼິກາ.
ທ່ານເຊຣິກເນ ອາລີໂອ ດີອົບ,ເຈົ້າໜ້າທີ່ບໍລິສັດແຫ່ງໜຶ່ງຂອງເຊເນການທີ່ເຮັດວຽກກ່ຽວກັບການອະນຸລັກສິ່ງແວດລ້ອມແລະການສົ່ງອອກບອກວ່າ,ຊີວິດໃນຕົວເມືອງຂອງອາຟິຼກາຄ້າຍຄືກັບປະເທດອື່ນ,ເຂົາເຈົ້າກໍ່ໄດ້ຮັບຜົນກະທົບຈາກວິກິດການການເງິນສາກົນ,ແຕ່ປະຊາຊົນຍັງດຳລົງຊີວິດແບບລຽບງ່າຍ.
"ຄືກັນກັບປະເທດອາຟຼິກາສ່ວນຫຼາຍ,ເຊເນການກໍ່ໄດ້ຮັບຜົນກະທົບຈາກວິກິດການເສດຖະກິດເຊັ່ນກັນ,ເຊິ່ງເຮັດໃຫ້ຄ່າຄອງຊີບຢູ່ນະຄອນຫຼວງດາກາສູງຂຶ້ນ.ແຕ່ເວົ້າລວມແລ້ວ,ພວກເຮົາຍັງດຳລົງຊີວິດແບບລຽບງ່າຍ."
ຫຼາຍຄົນກໍ່ຮູ້ແລ້ວວ່າ,ຍ້ອນໄດ້ຮັບຜົນສະທ້ອນຈາກສາເຫດທາງປະຫວັດສາດແລະສິ່ງແວດລ້ອມພູມສັນຖານ,ການພັດທະນາຂອງອາຟຼິກາໄດ້ພົບຄວາມຫຍຸ້ງຍາກຫຼາຍຢ່າງ,ຕົວຢ່າງຄື,ການຂາດນ້ຳແລະອາຫານເປັນຕົ້ນ.ແຕ່ປະຊາຊົນອາຟຼິກາບໍ່ໄດ້ປະລະທັດສະນະຕໍ່ຕົວເມືອງທີ່ດີງາມ.ໃນເວລາທ່ານນາເດີ ເມຣາ,ຜູ້ຕາງໜ້າສະຫະພາບອາຟຼິກາທີ່ມາເຂົ້າຮ່ວມງານວາງສະແດງໃຫ້ສຳພາດຕໍ່ນັກຂ່າວ,ທ່ານກ່າວວ່າ:
"ທະວີບອາຟຼິກາພວມສະແຫວງຫາໂອກາດການພັດທະນາ,ແນ່ນອນແລ້ວວ່າ,ພວກເຮົາຍັງປະເຊີນກັບສິ່ງທ້າທາຍຫຼາຍຢ່າງ.ແຕ່ສິ່ງສຳຄັນນັ້ນແມ່ນ,ປະເທດອາຟຼິກາຕ້ອງໄດ້ຮັບການພັດທະນາ,ປະຊາຊົນຂອງພວກເຮົາຕ້ອງມີອາຫານທີ່ພຽງພໍ,ເງື່ອນໄຂດຳລົງຊີວິດທີ່ດີກວ່າເກົ່າແລະໄດ້ຮັບການສຶກສາທີ່ດີ."
ຢາກເຮັດໃຫ້ຊີວິດແບບນີ້ເຊິ່ງເປັນຄວາມປາດຖະໜາຂອງປະຊາຊົນອາຟຼິກາປະກົດເປັນຈີງນັ້ນບໍ່ແມ່ນເລື່ອງງ່າຍ,ໃນຫຼາຍປີມານີ້,ປະຊາຊົນອາຟຼິກາຊອກຫາຊ່ອງທາງການພັດທະນາທີ່ເໝາະສົມຕະຫຼອດມາ.ປະຊາຊົນອາຟຼິກາຫຼາຍໆຄົນເຫັນວ່າ,ການພັດທະນາຂອງຈີນໄດ້ສະໜອງບົດຮຽນອັນລ້ຳຄ່າໃຫ້ແກ່ອາຟຼິກາ.ທ້າວກຼາໂຟດ ອາໂມໂຣ,ນັກສຶກສາກົດດີວົວທີ່ຮຽນຢູ່ຈີນກໍ່ເຫັນວ່າ,ອາຟຼິກາຄວນຮຽນແນວຄຶດພັດທະນານຳຈີນ.
"ຂ້ອຍຫວັງວ່າ,ປະເທດພວກເຮົາສາມາດຮຽນນຳຈີນ,ຮຽນຮູ້ວິທີການວ່າ,ເຮັດແນວໃດເພື່ອໃຫ້ປະເທດພັດທະນາຢ່າງວ່ອງໄວ,ຖືຈີນເປັນແບບຢ່າງ.ຂ້ອຍເຫັນວ່າ,ພວກເຮົາຕ້ອງການທຶນຢ່າງແນ່ນອນ,ແຕ່ພວກເຮົາຍິ່ງຕ້ອງການແນວຄຶດແລະບົດຮຽນຂອງຈີນ."
ຍ້ອນວ່າປະເທດຕ່າງໆຂອງທະວີບອາຟຼິກາມີລະດັບພັດທະນາທີ່ຕ່າງກັນຫຼາຍ,ສະນັ້ນ,ນອກຈາກລັດຖະບານແລະປະຊາຊົນຂອງບັນດາປະເທດອາຟຼິກາເພີ່ມຄວາມພະຍາຍາມຂອງຕົນແລ້ວ,ການຊ່ອຍເຫຼືອຈາກປະຊາຄົມໂລກກໍ່ຂາດບໍ່ໄດ້.
ໂດຍສະເພາະແມ່ນບົດບາດຂອງອົງການຈັດຕັ້ງພາກພື້ນສະຫະພາບອາຟຼິການີ້, ຄວນໄດ້ຮັບການເອົາໃຈໃສ່ຫຼາຍກວ່າເກົ່າ. ຄົນອາຟຼິກາຫຼາຍມີການຄາດຫວັງຫຼາຍຕໍ່ສະຫະພາບອາຟຼິກາໃນດ້ານການປົວແປງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ແລະກ້າວໄປເຖິງການຍົກສູງລະດັບຊີວິດການເປັນຢູ່. ທ່ານເຊຣິກເນ ອາລີໂອ ດີໂອບກ່າວວ່າ:
"ພວກເຮົາມີການຄາດຫວັງສູງຫຼາຍຕໍ່ສະຫະພາບອາຟຼິກາ, ຍ້ອນໃນປັດຈຸບັນນີ້, ພວກເຮົາເອົາໃຈໃສ່ນຳການແລກປ່ຽນດ້ານເສດຖະກິດນັບມື້ນັບຫຼາຍຂຶ້ນ. ສະຫະພາບອາຟຼີກາຍັງມີຫຼາຍສິ່ງຫຼາຍຢ່າງຕ້ອງເຮັດ, ຍ້ອນການລົງເລິກການ ເຊື່ອມໂຍງຂອງພາກພື້ນຍັງບໍ່ຫຫຼາຍ, ພວກເຮົາກໍ່ບໍ່ມີຕະຫຼາດຮ່ວມ, ນີ້ກໍ່ແມ່ນດ້ານທີ່ສະຫະພາບອາຟຼີກາຕ້ອງພະຍາຍາມຫຼາຍກວ່າເກົ່າ, ຫວັງວ່າອົງການຈັດຕັ້ງພາກພື້ນນີ້ຈະສາມາດບັນລຸໄດ້."
ໃນດ້ານນີ້, ສະຫະພາບອາຟຼິກາພວມພະຍາຍາມຢູ່. ທ່ານນາເດີ ເມຣາກ່າວວ່າ, ເຖິງແມ່ນວ່າສະຫະພາບອາຟຼິກາຍັງໜຸ່ມນ້ອຍ, ແຕ່ໄດ້ປະກອບສ່ວນຫຼາຍຕໍ່ການພັດທະນາຂອງປະເທດສະມາຊິກ53ແຫ່ງ, ໂດຍສະເພາະແມ່ນໃນການຫຼີກເວັ້ນ ການປະທະກັນຂອງພາກພື້ນ, ການຮັບປະກັນການສະໜອງອາຫານແລະດ້ານອື່ນໆ, ກໍ່ໄດ້ຮັບໝາກຜົນຢ່າງພົ້ນເດັ່ນ. ທ່ານກ່າວວ່າ, ສະຫະພາບອາຟຼິກາໄດ້ວາງຍຸດທະສາດການພັດທະນາໄລຍະຍາວ, ບວກກັບການຊ່ວຍເຫຼືອຂອງປະຊາຄົມໂລກ, ຈະສາມາດຜ່ານຜ່າຄວາມຫຍຸ້ງຍາກຢ່າງແນ່ນອນ, ສ້າງຊີວິດການເປັນຢູ່ທີ່ດີກວ່າເກົ່າ. ທ່ານນາເດີ ເມຣາຫົວໜ້າຄະນະຮັບຜິດຊອບການວາງສະແດງຂອງສະຫະພາບອາຟຼິກາກ່າວວ່າ:
"ປັດຈຸບັນນີ້, ພວກເຮົາມີແຜນຍຸດທະສາດຢ່າງເຂັ້ມແຂງແຜນໜຶ່ງ, ບວກກັບພວກເຮົາມີສາຍພົວພັນທີ່ດີກັບຫຼາຍປະເທດເຊິ່ງລວມທັງປະເທດຈີນ, ສະນັ້ນ, ຂ້ອຍຄິດວ່າພວກເຮົາສາມາດຮັບມືກັບສິ່ງທ້າທາຍນີ້ໄດ້."
ໃນຄວາມເປັນຈິງ, ງານວາງສະແດງໂລກຊຽງໄຮທີ່ເຕົ້າໂຮມຄວາມຄິດການພັດທະນາຂອງຕົວເມືອງໃນອະນາຄົດຂອງປະເທດຕ່າງໆ, ໄດ້ສ້າງແທ່ນທີ່ດີໃຫ້ປະເທດອາຟຼິກາເພື່ອສະແດງເງື່ອນໄຂຕົນເອງ, ຮໍ່າຮຽນບົດຮຽງການພັດທະນາຂອງຕົວເມືອງປະເທດອື່ນໆ. ກ່ຽວກັບເລື່ອງນີ້, ນາງເອລີຊາເບດ ທັນກູກຳມະການກະຊວງ ການຄ້າອຸດສາຫະກຳຂອງຄະນະກຳມະການສະຫະພາບອາຟຼີກາກ່າວວ່າ: ຫວັງວ່າປະເທດອາຟຼິກາຈະສາມາດຊອກພົບຊ່ອງທາງການພັດທະນາຂອງຕົວເມືອງໃໝ່ໃນງານວາງສະແດງໂລກຊຽງໄຮ.
"ພວກເຮົາຄອງຄອຍຢ່າງຮີບຮ້ອນວ່າ, ໂດຍຜ່ານການເຂົ້າຮ່ວມງານວາງສະແດງໂລກ, ຄະນະກຳມະການສະຫະພາບອາຟຼິກາແລະປະເທດສະມາຊິກສະຫະພາບອາຟຼິກາສາມາດຊອກພົບຊ່ອງທາງໃໝ່ເສັ້ນໜື່ງເພື່ອໃຫ້ຕົວເມືອງອາຟຼິກາບັນລຸສັນຕິພາບແລະຄວາມປອດໄພມີຊີວິດການເປັນຢູ່ທີ່ດີກວ່າເກົ່າ"