ທ່ານຜູ້ຟັງ,ການແຂ່ງຂັນເຕະບານໂລກອາຟຼິກາໃຕ້2010ເລີ່ມຕົ້ນຂຶ້ນແລ້ວ,ພາຍຫຼັງລໍຖ້າມາເປັນເວລາ4ປີແຟນບານທົ່ວໂລກກໍ່ໄດ້ເຂົ້າສູ່ບັນຍາກາດຂອງການແຂ່ງຂັນທີ່ຟົດຟື້ນ.ຢູ່ທຸກແຫ່ງຂອງນະຄອນຫຼວງປັກກິ່ງ,ກໍ່ຈະໄດ້ຍິນຜູ້ຄົນສົນທະນາກັນກ່ຽວກັບການແຂ່ງຂັນເຕະບານໂລກອາຟຼິກາໃຕ້,ແລະຈະໄດ້ເຫັນການຈັດກິດຈະກຳໂຄສະນາການແຂ່ງຂັນເຕະບານຕາມຮ້ານຄ້ານ້ອຍໃຫຍ່ຂອງປັກກິ່ງໃນໄລຍະການແຂ່ງຂັນເຕະບານໂລກ.ເຖິງວ່າການແຂ່ງຂັນເຕະບານໂລກໄດ້ຈັດຂຶ້ນຢູ່ອາຟິຼາກາໃຕ້ທີ່ຫ່າງໄກຈາກຈີນຫຼາຍກໍ່ຕາມ,ແຕ່ຄວາມກະຕືລືລົ້ນທີ່ມີຕໍ່ການແຂ່ງຂັນເຕະບານຂອງຄົນຈີນທັງຫຼາຍກໍ່ໄດ້ເລີ່ມຟົດຟື້ນຂຶ້ນໃນລະດູຮ້ອນນີ້.
ການແຂ່ງຂັນເຕະບານຕິດພັນກັບເບຍໂດຍຕະຫຼອດມາ,ເບຍເຢັນຈອກໜຶ່ງ,ການແຂ່ງຂັນເຕະບານລະດັບໂລກທີ່ດີເດັ່ນຄູ່ໜຶ່ງ,ນີ້ແມ່ນເອກະລັກພິເສດໃນລະດູຮ້ອນຂອງປີນີ້.ຢູ່ເຂດສືຈິງຊ່ານຂອງປັກກິ່ງ,ງານເບຍສາກົນຂອງສູນການຄ້າຄົບວົງຈອນນະຄອນຫຼວງປັກກິ່ງຄັ້ງທຳອິດໄດ້ໄຂຂຶ້ນຢູ່ສະໜາມເຈ່ຍນຽນຮວາຂອງສວນສາທາລະນະວິຈິດສິນສາກົນໃນໄລຍະດຽວກັນທີ່ຈັດການແຂ່ງຂັນເຕະບານໂລກອາຟຼິກາໃຕ້.ໃນຖານະທີ່ເປັນຜູ້ຈັດງານ,ທ່ານຢູເຕີຈື້,ຜູ້ຮັບຜິດຊອບຂອງບໍລິສັດໃຫ້ການປຶກສາປະຊາສຳພັນຍຸກໃໝ່ເສິ້ງລານປັກກິ່ງບອກໃຫ້ຮູ້ວ່າ,ໃນໄລຍະວັນທີ11ຫາວັນທີ28ມິຖຸນານີ້,ມີບໍລິສັດຂາຍເຫຼົ້າຈີນແລະຕ່າງປະເທດຮ້ອຍກວ່າແຫ່ງຈະສະໜອງເບຍຢ່າງພຽງພໍໃຫ້ແກ່ຜູ້ເບິ່ງການແຂ່ງຂັນເຕະບານໂລກອາຟຼິກາໃຕ້ເຖິງບ່ອນ.ພ້ອມກັນນັ້ນ,ຍັງຈະຈັດກິດຈະກຳຕ່າງໆໃນງານເບຍສາກົນເທື່ອນີ້.
"ແຕ່ລະມື້,ພວກເຮົາມີກິດຈະກຳຕອບຄຳຖາມຊິງລາງວັນ,ມອບເຄື່ອງທີ່ລະລຶກຂອງການແຂ່ງຂັນເຕະບານໂລກອາຟຼິກາໃຕ້,ແລ້ວຍັງຈະຈັດການແຂ່ງຂັນດື່ມເບຍທຸກມື້ນຳອີກ."
ນອກນີ້,ທ່ານຢູເຕີຈື້ຍັງເວົ້າວ່າ,ເພື່ອເຮັດໃຫ້ຜູ້ຊົມສາມາດຊົມການແຂ່ງຂັນເຕະບານໂລກໄດ້ຢ່າງສະດວກສະບາຍ.ຢູ່ສະໜາມດັ່ງກ່າວ,ຍັງໄດ້ຕິດຕັ້ງຈໍໂທລະພາບໃຫຍ່ລຸ້ນໃໝ່3ຜືນ,ລວມທັງຈໍໂທລະພາບຕົ້ນຕໍທີ່ມີຂະໜາດ54ຕາແມັດຜືນໜຶ່ງ,ແລະຈໍໂທລະພາບທີ່ມີຂະໜາດ35ຕາແມັດ2ຜືນຢູ່ແຈຂອງສະໜາມ,ທັງໝົດເຫຼົ່ານີ້ຈະສາມາດເຮັດໃຫ້ຜູ້ຊົມສາມາດເບິ່ງການແຂ່ງຂັນເຕະບານຢ່າງມ່ວນຊື່ນ.ນອກນີ້,ເພື່ອສະໜອງຄວາມຕ້ອງການຂອງຜູ້ຊົມ,ເວລາເປີດບໍລິການແຕ່ລະມື້ແມ່ນຈະດຳເນີນໄປຈົນຈົບການແຂ່ງຂັນຄູ່ທີ2.
"ເວລາເປີດບໍລິການຈະຮອດ24ໂມງ,ຊ້າສຸດແມ່ນຮອດເວລາທີ່ຜູ້ຊົມເບິ່ງການແຂ່ງຂັນເຕະບານຄູ່ທີ2ຈົບ.ການແຂ່ງຂັນເຕະບານຄູ່ທີ2ອາດຈະແກ່ຍາວເວລາຮອດຫຼັງທ່ຽງຄືນ,ຫຼັງຈາກການແຂ່ງຂັນເຕະບານສິ້ນສຸດແລ້ວຈຶ່ງຈະເກັບມ້ຽນແລະອະນາໄມສະຖານທີ່."
ຢູ່ປັກກິ່ງທີ່ຄ່ອຍໆເຂົ້າສູ່ລະດູຮ້ອນ,ຜູ້ຄົນສາມາດທັງເບິ່ງການຖ່າຍທອດການແຂ່ງຂັນເຕະບານໂລກທັງດື່ມເບຍເຢັນຢູ່ສະໜາມໃນຄ່ຳຄືນ,ນີ້ເປັນໂອກາດທີ່ຫາໄດ້ຍາກ.ສະນັ້ນ,ບໍລິສັດນ້ອຍແລະໃຫຍ່ຢູ່ປັກກິ່ງລ້ວນແຕ່ເອົາໃຈໃສ່ເພື່ອນຳໃຊ້ໂອກາດການຄ້າໃນເວລາມີການແຂ່ງຂັນເຕະບານໂລກ.ຢູ່ເຂດການຄ້າສາກົນລານເຊີ້ກາງວ່ານຂອງເຂດເສົາຢາງປັກກິ່ງ,ງານເບຍຄັ້ງທີ2ຢູ່ປັກກິ່ງກໍ່ໄດ້ໄຂຂຶ້ນໃນວັນທີ9ມິຖຸນານີ້ຢູ່ໃນໄລຍະທີ່ຈັດການແຂ່ງຂັນເຕະບານໂລກເຊັ່ນດຽວກັນ. ນາງກ່າວ,ພະນັກງານການຕະຫຼາດຂອງລານເຊີ້ກາງວ່ານເວົ້າວ່າ:
"ຢູ່ສະຖານທີ່ຈັດງານເບຍຂອງພວກເຮົາ,ຜູ້ຄົນສາມາດເບິ່ງການແຂ່ງຂັນເຕະບານ,ພ້ອມກັນນັ້ນກໍ່ມີກິດຈະກຳທີ່ເຮັດໃຫ້ຜູ້ຊົມໄດ້ມີສ່ວນຮ່ວມຈຳນວນໜຶ່ງ,ຕົວຢ່າງເຊັ່ນ,ການແຂ່ງຂັນດື່ມເບຍ,ການສະແດງຂອງວົງດົນຕີ,ແລະຍັງມີການຈົກສະຫຼາກຈຳນວນໜຶ່ງ.ປີນີ້ມີເບຍລະດັບສາກົນຮ້ອຍກວ່າຍີ່ຫໍ້,ແລະອາຫານແຊບໆລະດັບສາກົນຈຳນວນໜຶ່ງ."
ຢູ່ປັກກິ່ງມີເຂດທີ່ມີຊື່ສຽງທີ່ເປັນຮ້ານອາຫານ,ເຖົ້າແກ່ຂອງຮ້ານອາຫານກໍ່ກະກຽມເພື່ອຕ້ອນຮັບແຂກໃນໄລຍະການແຂ່ງຂັນເຕະບານໂລກອາຟຼີກາໃຕ້.ທົ່ງຫຍ້າຂຽວ--ຮ້ານອາຫານທີ່ຢູ່ມໍ່ໆສະໜາມກິລາກໍາມະກອນ,ໄດ້ຕັ້ງເຄື່ອງສາຍພາບຂະໜາດນ້ອຍຢູ່ບ່ອນຫວ່າງນອກຮ້ານອາຫານ,ແລະຢູ່ທາງນອກຂອງຮ້ານ ອາຫານໄດ້ວາງໂຕະເປັນແຖວທີ່ເຕັມໄປດ້ວຍຂອງແກ້ມ.ນາງເຫລີຍອີຜີງ,ຜູ້ຮັບຜິດຊອບຮ້ານອາຫານເວົ້າວ່າ,ໃນໄລຍະການແຂ່ງຂັນເຕະບານໂລກຄັ້ງກ່ອນ,ລູກຄ້າບໍ່ພໍໃຈຕໍ່ການເບິ່ງການແຂ່ງຂັນດ້ວຍໂທລະພາບໃນຫ້ອງ.ສະນັ້ນ,ປີນີ້,ພວກເຮົາໄດ້ຕັ້ງເຄື່ອງສາຍພາບຢູ່ນອກ,ເພື່ອຕອບສະໜອງຄວາມຕ້ອງການຂອງລູກຄ້າທີ່ເບິ່ງການແຂ່ງຂັນເຕະບານໂລກ.ນອກນີ້,ເພື່ອຮັບປະກັນການສະໜອງເບຍເຢັນໃນໄລຍະເຕະບານໂລກ,ຮ້ານອາຫານໄດ້ຊື້ຕູ້ແຊ່ເຢັນຕື່ມອີກຫລາຍໜ່ວຍ.
ຢູ່ທາງຫລັງຮ້ານອາຫານມີຕູ້ແຊ່ເຢັນໃຫຍ່2ເຄື່ອງ,ສາມາດສະໜອງເບຍໃນທຸກເວລາ,ຢູ່ທາງໜ້າຮ້ານອາຫານຍັງມີຕູ້ແຊ່ເຢັນໃຫຍ່ອີກ4ເຄື່ອງ,ກະກຽມເພື່ອຕ້ອນຮັບການແຂ່ງຂັນເຕະບານໂລກ.ເມື່ອຮອດການແຂ່ງຂັນເຕະບານໂລກ,ຊຸດເຕະບານກໍ່ໄດ້ຂາຍດິບຂາຍດີ,ກ່ອນການແຂ່ງຂັນເຕະບານໂລກອາຟີຼກາໃຕ້,ບໍ່ວ່າຝ່າຍສະໜັບສະໜູນທາງການຂອງການແຂ່ງຂັນເຕະບານໂລກຫລືວ່າຝ່າຍສະໜັບສະໜູນຂອງທີມເຕະບານເຊັ່ນໄນກີ້,ພູມາແລະອື່ນໆ,ກໍ່ໄດ້ຈໍາໜ່າຍເສື້ອເຕະບານ,ບານເຕະ,ເກີບ,ທຸງຊາດຂອງປະເທດທີ່ເຂົ້າຮ່ວມການແຂ່ງຂັນ,ຈອກ,ຕຸກກະຕາດາລາເຕະບານແລະອື່ນໆ,ລາຄາຈາກບໍ່ຮອດສິບຈົນຮອດຢວນຫາພັນຢວນ.ຢູ່ຮ້ານຂາຍເຄື່ອງກິລາຂອງປັກກິ່ງຮ້ານໜຶ່ງ,ຜູ້ບໍລິການເວົ້າວ່າ,ການແຂ່ງຂັນເຕະບານໂລກມາຮອດແລ້ວ,ຫລາຍຄົນຈະເຕົ້າໂຮມກັນເບິ່ງການແຂ່ງຂັນ,ດື່ມເບຍ,ເຂົາເຈົ້າຈະກຽມເຄື່ອງເຊຍບານ,ເສື້ອເຕະບານເຫລົ່ານີ້ແມ່ນເຄື່ອງທີ່ແຟນບານເຕະຕ້ອງມີ,ຄົນທີ່ມາຊື້ກໍ່ຫລາຍ.
ຄຽງຄູ່ກັນກັບການແຂ່ງຂັນເຕະບານໂລກໄຂຂຶ້ນຢ່າງຟົດຟື້ນ,ຕະຫລາດຈຳໜ່າຍໂທລະພາບກໍ່ໄດ້ຂາຍດີຈາກເຕະບານໂລກທີ່ສີ່ປີມີເທື່ອໜຶ່ງ.ຢູ່ຕະຫລາດໂທລະພາບປັກກິ່ງ,ນັກຂ່າວໃຫ້ຮູ້ວ່າ,ໃນເກືອບ1ເດືອນມານີ້,ຍອດຈໍາໜ່າຍໂທລະພາບສີໄດ້ເພີ່ມຂຶ້ນຢ່າງຈະແຈ້ງ,ໃນນັ້ນ,ຍອດຈໍາໜ່າຍໂທລະພາບສີຈໍໃຫຍ່ໄດ້ເພີ່ມຂຶ້ນ50%.ໂທລະພາບເຄື່ອນທີ່ທີ່ສາມາດເບິ່ງການແຂ່ງຂັນໃນທຸກເວລາທຸກບ່ອນກໍ່ໄດ້ເພີ່ມຂຶ້ນຢ່າງຫລວງຫລາຍ,ມີຫລາຍຄົນກໍ່ຢາກເອົາມັນໄປນໍາເພື່ອທັງຍ່າງທັງເບິ່ງການແຂ່ງຂັນໄປພ້ອມຫລືທັງຂີ່ລົດທັງເບິ່ງການແຂ່ງຂັນໄປພ້ອມ.ໃນລະດູຮ້ອນ2010,ກໍ່ແມ່ນລະດູຮ້ອນຂອງການແຂ່ງຂັນເຕະບານໂລກອາຟຼີກາໃຕ້.ຮ້ານຂາຍເຄື່ອງປັກກິ່ງກໍ່ໄດ້ກຽມພ້ອມເພື່ອສະຫລອງການແຂ່ງຂັນເຕະບານໂລກໃນລະດູຮ້ອນນີ້.