ວຽກງານສາທາລະນະສຸກຂອງຈີນພັດທະນາຢ່າງວ່ອງໄວ
(GMT+08:00) 2010-11-04 11:18:12 cri
ໃນ5ປີທີ່ຜ່ານມາ, ວຽກງານສາທາລະນະສຸກຂອງຈີນໄດ້ພັດທະນາຢ່າງວ່າອງໄວ. ຄຽງຄູ່ກັບການປະຕິຮູບລະບົບການປິ່ນປົວຢ່າງຮອບດ້ານ, ລະດັບການບໍລິການດ້ານການປິ່ນປົວໃນຕົວເມືອງແລະຊົນນະບົດໄດ້ຍົກສູງຂຶ້ນເທື່ອລະກ້າວ, ຄວາມສາມາດດ້ານການປ້ອງກັນແລະປິ່ນປົວກໍ່ໄດ້ເພີ່ມຂຶ້ນຢ່າງບໍ່ຢຸດຢັ້ງ, ລະບົບຮັບປະກັນການປິ່ນປົວໃນຕົວເມືອງແລະຊົນນະບົດໄດ້ຣັບການປັບປຸງໃຫ້ສົມບູນຂຶ້ນຕື່ມອີກ. ຈີນພວມພະຍາຍາມເພື່ອບັນລຸເປົ້າໝາຍໃຫ້ຜູ້ທີ່ເຈັບເປັນໄດ້ຮັບການປິ່ນປົວໝົດທຸກຄົນ. ຕໍ່ໄປເຊີນຟັງລາຍລະອຽດ.
ພໍ່ຕູ້ເຊີງວານເຮີອາຍຸ75ປີອາໄສຢູ່ເມືອງເຮີເຈີແຂວງຊານຕຸງ, ສອງປີກ່ອນພໍໄດ້ເປັນພະຍາດແກ່ນຕາຂຸ້ນ, ເຮັດໃຫ້ຕາເກືອບບໍ່ເຫັນຮຸ່ງ, ຍ້ອນຄອບຄົວທຸກຍາກ, ຜ່ານມາພໍ່ຕູ້ຈຶ່ງບໍ່ມີຄວາມສາມາດໄປຜ່າຕັດຢູ່ໂຮງໝໍ. ຫວ່າງມໍ່ໆມານີ້, ເພິ່ນໄດ້ຣັບການຝ່າຕັດໂດຍບໍ່ຕ້ອງເສຍຄ່າໃນໂຮງໝໍແຫ່ງໜຶ່ງຢູ່ໃຫ້ເຮືອນເພິ່ນ, ການຜ່າຕັດໄດ້ຮັບຜົນສຳເລັດ, ດຽວນີ້ຕາເບື້ອງໜຶ່ງຂອງພໍ່ຕູ້ໄດ້ເຫັນຮຸ່ງຄືນແລ້ວ.
"ລັດຖະບານເອົາໃຈໃສ່ນຳພວກເຮົາຫຼາຍ, ໄປໂຮງໝໍບໍ່ພຽງແຕ່ບໍ່ຕ້ອງເສຍເງິນ. ຍັງຮັບຜິດຊອບປົວໃຫ້ດີປານນີ້ອີກ.ນີ້ແມ່ນເລື່ອງທີ່ດີເລື່ອງໃໝ່, ພໍໃຈທີ່ສຸດ."ພໍ່ຕູ້ເຊີງວານເຮີພຽງແຕ່ແມ່ນຜູ້ໜຶ່ງທີ່ໄດ້ຮັບການປິ່ນປົວຈາກ"ໂຄງການຊ່ວຍເຫຼືອຄົນທຸກຍາກທີ່ມີນັບເປັນລ້ານທີ່ເປັນພະຍາດແກ່ນຕາຂຸ້ນໄດ້ຮັບການປິ່ນປົວໃຫ້ເຫັນຮຸ່ງຄືນ"ຂອງຈີນ, ຊຶ່ງເປັນໂຄງການການບໍລິການສາທາລະນະສຸກທີ່ສໍາຄັນຂອງຈີນ, ນັບແຕ່ເລີ່ມປະຕິບັດໂຄງການນີ້ໃນປີ2009ເປັນຕົ້ນມາ, ລວມມີຜູ້ເປັນພະຍາດແກ່ນຕາຂຸ້ນ2ແສນ1ໝື່ນຄົນໄດ້ຣັບການຜ່າຕັດຢ່າງບໍ່ຕ້ອງເສຍຄ່າ, ແລະເຫັນຮຸ່ງຄືນໃໝ່ແລ້ວ.
ເພື່ອບັນລຸເປົ້າໝາຍໃຫ້ໄດ້ຮັບການປິ່ນປົວໝົດທຸກຄົນ, ໃນ5ປີທີ່ຜ່ານມາການໃຊ້ງົບປະມານໃນຂົງເຂດສາທາລະນະສຸກຂອງຈີນເພີ່ມຂຶ້ນຢ່າງຕໍ່ເນື່ອງ. ຕາມສະຖິຕິ, ນັບແຕ່ປີ2006ຫາປີ2009, ການເງິນຂອງສູນກາງໄດ້ໃຊ້ງົບປະມານໃນດ້ານສາທາລະນະສຸກ185ຕື້ກວ່າຢວນ, ລະບົບການປິ່ນປົວໄດ້ຮັບການປັບປຸງຢ່າງຊັດເຈນ. ທ່ານເຊີນຈູ້ລັດຖະມົນຕີວ່າການກະຊວງສາທາລະນະສຸກຈີນກ່າວວ່າ, ປະຈຸບັນນີ້, ສຸຂະພາບໂດຍລວມຂອງປະຊາຊົນໃນຕົວເມືອງແລະຊົນນະບົດແມ່ນຢູ່ໃນລະດັບນຳໜ້າຂອງປະເທດທີ່ພວມພັດທະນາ.
"ລະບົບການບໍລິການໃນການປິ່ນປົວໃນຕົວເມືອງແລະຊົນນະບົດໄດ້ເປັນຮູບເປັນຮ່າງຂຶ້ນໃນຂັ້ນພື້ນຖານ, ຄວາມສາມາດໃນການປ້ອງກັນແລະປິ່ນປົວດີຂຶ້ນກວ່າເກົ່າ, ຈຳນວນປະຊາກອນທີ່ໄດ້ຮັບການຮັບປະກັນດ້ານການປິ່ນປົວເພິ່ມຂຶ້ນເທື່ອລະກ້າວ, ລະດັບການບໍລິການດ້ານສາທາລະນະສຸກຍັງສູງຂຶ້ນຢ່າງວ່ອງໄວ. ປະຈຸບັນນີ້, ສຸຂະພາບຂອງປະຊາຊົນດີຂຶ້ນຢ່າງຊັດເຈນ, ຕົວເລກຄາດໝາຍດ້ານສຸຂະພາບຂອງປະຊາຊົນກໍນຳໜ້າປະເທດທີ່ພວມພັດທະນາ."
ເພື່ອແກ້ໄຂບັນຫາ"ທີ່ວ່າທ່ານໝໍຍາກ, ຄ່າປິ່ນປົວແພງ"ທີ່ປະຊາຊົນສ່ອງແສງເລື້ອຍໆນັ້ນ, ຈີນໄດ້ເລີ່ມປະຕິຮູບລະບົບການປິ່ນປົວຮອບໃໝ່ແຜນການປະຕິຮູບການປິ່ນປົວໃໝ່ທີ່ເລີ່ມປະຕິບັດໃນປີ2009ສະເໜີວ່າ, ຕ້ອງຖືລະບອບການປິ່ນປົວພື້ນຖານເປັນຜົນປະໂຫຍດສ່ວນລວມສະໜອງໃຫ້ປະຊາຊົນທັງໝົດໃນຖານະເປັນໂຄງການທີ່ກ່ຽວພັນເຖິງຊີວິດການເປັນຢູ່ສຳຄັນທີ່ສ້າງປະໂຫຍດໃຫ້ແກ່ສຸຂະພາບຂອງປະຊາກອນ1ຕື້3ຮ້ອຍລ້ານ, ການປະຕິຮູບການປິ່ນປົວໄດ້ສ້າງພື້ນຖານການບໍລິການດ້ານການປິ່ນປົວ, ທ່ານເຊີນຈູ້ລັດຖະມົນຕີວ່າການກະຊວງສາທາລະນະສຸກຈີນກ່າວວ່າ:
""ຖ້າເວົ້າແບບງ່າຍໆ, ການປະຕິຮູບໂຄງປະກອບດ້ານສາທາລະນະສຸກມີ2ເປົ້າໝາຍ, ອັນໜຶ່ງແມ່ນເຮັດໃຫ້ປະຊາຊົນບໍ່ເຈັບບໍ່ເປັນຫຼືເຈັບເປັນໜ້ອຍ, ບໍ່ເປັນໜັກ. ອັນທີ2ແມ່ນຜູ້ເຈັບເປັນໄດ້ໄປຫາທ່ານໝໍ, ໄດ້ຮັບການປິ່ນປົວ. ປົວດີແລະມີຄວາມສາມາດຈ່າຍຄ່າປິ່ນປົວ"
ເພື່ອບັນລຸເປົ້າໝາຍດັ່ງກ່າວ, ຈີນວາງແຜນພາຍໃນ3ປີໃຊ້ງົບປະມານ850ຕື້ຢວນ. ໂດຍຖືເປັນເນື້ອໃນສຳຄັນໜຶ່ງໃນການປະຕິຮູບການປິ່ນປົວ, ຈີນຈະສ້າງລະບົບຮັບປະກັນດ້ານການປິ່ນປົວຂັ້ນພື້ນຖານສຳລັບປະຊາຊົນໃນຕົວເມືອງແລະຊົນນະບົດ, ນີ້ກໍ່ແມ່ນລະບົບຮັບປະກັນສຸຂະພາບຂັ້ນພື້ນຖານທີ່ໃຫຍ່ທີ່ສຸດໃນໂລກ.ປະຈຸບັນນີ້, ພະນັກງານ, ກຳມະກອນແລະປະຊາຊົນໃນຕົວເມືອງແລະຊົນນະບົດຂອງຈີນທີ່ໄດ້ເຂົ້າຮ່ວມການປະກັນຂັ້ນພື້ນຖານມີຫຼາຍກວ່າ4ຮ້ອຍລ້ານຄົນ, ບວກກັບປະຊາກອນທີ່ເຂົ້າຮ່ວມການປິ່ນປົວແບບມີສ່ວນຮ່ວມໃນຊົນນະບົດ. 8ຮ້ອຍ35ລ້ານຄົນ, ປະຊາຊົນທີ່ໄດ້ຮັບການປະກັນດ້ານການປິ່ນປົວຂັ້ນພື້ນຖານໃນຕົວເມືອງແລະຊົນນະບົດມີ1ຕື້2ຮ້ອຍລ້ານຄົນ, ລະບົບການຮັບປະກັນການປິ່ນປົວຂັ້ນພື້ນຖານໄດ້ກວມ90%ຂອງຈຳນວນປະຊາກອນ.
ນອກນີ້, ຈີນຍັງຊຸກຍູ້ໃຫ້ການບໍລິການສາທາລະນະສຸກຂັ້ນພື້ນຖານໃຫ້ມີຄວາມດຸນດ່ຽງກັນ, ຫຼຸດຄວາມຜິດໂຕນກັນດ້ານການບໍລິການສາທາລະນະສຸກລະຫວ່າງປະຊາຊົນໃນຊົນນະບົດແລະຕົວເມືອງໃຫ້ໜ້ອຍລົງ, ປ້ອງກັນແລະຄວບຄຸມພະຍາດ, ຮັກສາສຸຂະພາບໃຫ້ແມ່ແລະເດັກ, ໃຫ້ການສຶກສາກ່ຽວກັບສຸຂະພາບການບໍລິການສາທາລະນະສຸກຂັ້ນພື້ນຖານອື່ນໆແກ່ປະຊາຊົນໃນຕົວເມືອງແລະຊົນນະບົດຢ່າງເປັນເອກະພາບກັນເທື່ອລະກ້າວ.
ເພື່ອຫຼຸດຄ່າປິ່ນປົວໃຫ້ໜ້ອຍລົງ, ໃນປີ2009, ລັດໄດ້ເລີ່ມປະຕິບັດລະບອບຢາປົວພະຍາດພື້ນຖານຢ່າງເປັນທາງການ, ຢາປົວພະຍາດ307ປະເພດຈະຂາຍໃນລາຄາຕ່ຳສຸດ. ທ່ານນາງຮູລີນລີນຜູ້ຊ່ວຍຫົວນ້າສູນຄົ້ນຄ້ວາສາທາລະນະສຸກແລະການພັດທະນາຂອງສະຖາບັນຄຸ້ມຄອງສາທາລະນະສຸກມະຫາງິທະຍາໄລຊິງຮວາເຫັນວ່າ: ມາດຕະການການປະຕິຮູບການປິ່ນປົວເຫຼົ່ານີ້ຈະເຮັດໃຫ້ປະຊາຊົນເຈົ້າເຖິງການປິ່ນປົວຢ່າງໝັ້ນທຽມກັນ, ເຮັດໃຫ້ປະຊາຊົນທົ່ວໄປໄດ້ຮັບຜົນປະໂຫຍດ.
ການຖືການຮັບປະກັນສິດແລະຜົນປະໂຫຍດດ້ານສຸຂະພາບພື້ນຖານຂອງຄົນສ່ວນຫຼາຍເປັນເປົ້າໝາຍໜຶ່ງຂອງການປະຕິຮູບ, ບໍ່ວ່າເວົ້າທາງດ້ານການສ້າງຕັ້ງລະບອບຮັບປະກັນການປິ່ນປົວພື້ນຖານ, ຫຼືການ້າງຕັ້ງລະບອບຢາປົວພະຍາດພື້ນຖານ, ຫຼືການສ້າງຕັ້ງລະບົບບໍລິການສາທາລະນະສຸກຂອງທ້ອງຖິ່ນ, ລ້ວນແຕ່ເພື່ອບັນລຸສິດຮັກສາສຸຂະພາບຂັ້ນພື້ນຖານຂອງປະຊາຊົນ. ປະຊາຊົນສາມັນແມ່ນຜູ້ໄດ້ຜົນປະໂຫຍດຫຼາຍທີ່ສຸດ, ໂດຍສະເພາະແມ່ນຜູ້ທີ່ມີລາຍໄດ້ຕ່ຳ.
ໃນ5ປີທີ່ຜ່ານມາ, ຄວາມສາມາດຮັບມືກັບເຫດການຕ່າງໆດ້ານສາທາລະນ ະ ສຸກທີ່ເກີດຂຶ້ນຢ່າງຕໍ່ເນື່ອງ, ໄດ້ຮັບຄວາມຍ້ອງຍໍຈາກທົ່ວໂລກໂດຍທົ່ວໄປ. ປະຈຸບັນນີ້, ຈີນໄດ້ຕັ້ງລະບົບລາຍງານໂດຍກົງທາງອິນເຕີແນັດກ່ຽວກັບເຫດການສາ ທາລະນະສຸກທີ່ເກີດຂຶ້ນກະທັນຫັນແລະພະຍາດຕິດແປດ38ຊະນິດ, ອັດຕາລາຍງານພະຍາດຕິດແປດຢ່າງກະທັນຫັນໃນທົ່ວປະເທດຫຼາຍກວ່າ90%, ຢູ່ໃນລະດັບນຳໜ້າຂອງໂລກ. ໃນປີ2009, ທົ່ວໂລກໄດ້ເກີດພະຍາດໄຂ້ຫວັດໃຫຍ່ສາຍພັນໃໝ່AH1N1, ຈີນໄດ້ນຳໜ້າຄົ້ນຄ້ວາແລະຜະລິດວັກແຊ້ງໄຂ້ວັດໃຫຍ່ສາຍພັນໃໝ່AH1N1, ມີຜູ້ທີ່ໄດ້ສັກວັກແຊ້ງຫຼາຍກວ່າ1ຮ້ອຍລ້ານຄົນ, ອັນໄດ້ຫຼຸດຜ່ອນການແຜ່ລະບາດຂອງພະຍາດແລະຜົນກະທົບຕໍ່ຊີວິດສັງຄົມໃນລະດັບສູງສຸດ, ຜູ້ເຈັບນັກແລະຜູ້ເສຍຊີວິດຍ້ອນໄຂ້ຫວັດໃຫຍ່ດັ່ງກ່າວກໍ່ຫຼຸດລົງ. ນອກນີ້, ເພື່ອບັນລຸເປົ້າໝາຍທີ່ຈະລົບລ້າງພະຍາດໝາກແດງໃນປີ2012, ໃນເດືອນກັນຍາປີນີ້ຈີນຍັງໄດ້ສັກວັກແຊງໃຫ້ເດັກນ້ອຍໃນຕົວເມືອງແລະຊົນນະບົດ1ຮ້ອຍລ້ານກວ່າຄົນໂດຍບໍ່ເກັບຄ່າ.
ເມື່ອເຈັບເປັນກໍ່ໄດ້ຮັບການປິ່ນປົວແມ່ນຄວາມຝັນຂອງຄົນຈີນໃນຫຼາຍຮ້ອຍຫຼາຍພັນປີຜ່ານມາ. ຄຽງຄູ່ກັບການລົງເລິກຂອງການປະຕິຮູບລະບົບການປິ່ນປົວຂອງຈີນ, ສະພາບການບໍລິການດ້ານການປິ່ນປົວໄດ້ຮັບການປັບປຸງຢ່າງຕໍ່ເນື່ອງ, ປະຊາຊົນມີຄວາມເຊື່ອໝັ້ນວ່າ, ຄວາມຝັນນີ້ຈະກາຍເປັນຄວາມຈິງໃນອະນາຄົດອັນໃຫ້ນີ້.
