ຊາວນາຈີນ
(GMT+08:00) 2010-11-15 16:33:06 cri
ເດືອນຕຸລາແລ້ວນີ້, ຢູ່ແຂວງຈ່ຽງຊີ່ທີ່ເປັນແຂວງໃຫຍ່ຜະລິດພືດພັນທັນຍາຫານຢູ່ ພາກໃຕ້ຂອງຈີນ, ໄດ້ມີເຫດການທີ່ເຂົ້າຍັງບໍ່ທັນສຸກເຫຼືອງ, ແຕ່ຫຼາຍຄົນກໍ່ຍາດກັນມາຊື້ເຂົ້າຂຽວແລ້ວ, ນີ້ບໍ່ເຄີຍມີມາກ່ອນ. ຜູ້ທີ່ມາຊື້ນັ້ນມີບໍລິສັດອາຫານຕ່າງປະເທດ, ບໍລິສັດອາຫານແຫ່ງລັດແລະບໍລິສັດອາຫານເອກະຊົນ. ຊາວກະສິກອນທີ່ຊື່ວ່າຢໍຊຸ່ນຢົງທີ່ຢູ່ຕາແສງຕຸ່ງກວນເມືອງຝູ້ໂຈ່ວຂອງແຂວງຈ່ຽງຊີ່ເວົ້າວ່າ:
"ຄົນຢູ່ຕ່າງແຂວງຢ່າງຫຼວງຫຼາຍມາຊື້ອາຫານ, ເຂົາເຈົ້າໃຫ້ລາຄາສູງ, ພະແນກບໍລິຫານສະບຽງອາຫານແຫ່ງຊາດໃຫ້96
ຢວນ, ຜູ້ອື່ນກໍ່ໃຫ້98ຢວນຫຼື99ຢວນ, ຢາກໃຫ້ຂ້ອຍຊ່ວຍຊື້ໃຫ້ເຂົາເຈົ້າ, ເຂົາເຈົ້າເວົ້າວ່າມີເທົ່າໃດກໍ່ເອົາໝົດ."
"ຄົນຢູ່ຕ່າງແຂວງ"ທີ່ທ້າວຢໍຊຸ່ນຢົງເວົ້າມານັ້ນກໍ່ໝາຍເຖິງບໍລິສັດປຸງແຕ່ງອາຫານຕ່າງປະເທດທີ່ບໍ່ຄ່ອນເຫັນໃນເມື່ອກ່ອນ. ເຊັ່ນ, ບໍລິສັດຢີຮາຍເຄີຣີທີ່ເປັນບໍລິສັດອາຫານໃຫຍ່ທີ່ສຸດໃນໂລກທີ່ບໍ່ຕໍ່ລອງລາຄາ. ບໍລິສັດຕ່າງຊາດຂະໜາດໃຫຍ່ແຫ່ງນີ້ໄດ້ສ້າງໂຮງງານສີເຂົ້າທີ່ຜະລິດເຂົ້າສານໄດ້ມື້ລະ600ໂຕນຢູ່ແຂວງຈ່ຽງຊີ່, ໃນອະນາຄົດ, ຈະບັນລຸເປົ້າໝາຍທີ່ຜະລິດເຂົ້າສານໃຫ້ໄດ້ມື້ລະ1200ໂຕນ. ເປົ້າໝາຍການຊື້ຂອງວິສາຫະກິດແຫ່ງນີ້ກໍ່ແມ່ນເຂົ້າເປືອກຈາກຊາວນາ.
ທີ່ຈິງແລ້ວ, ໃນປີ2008, ຫຼັງຈາກໄລຍະຂ້າມຜ່ານຂອງອົງການການຄ້າໂລກຫຼືWTOກ່ຽວກັບບໍລິສັດຕ່າງປະເທດເຂົ້າສູ່ຕະຫຼາດອາຫານຂອງຈີນຜ່ານໄປແລ້ວ, ບໍລິສັດອາຫານຂະໜາດໃຫຍ່ໃນຕ່າງປະເທດກໍ່ເລີ່ມແຂ່ງຂັນກັນເຂົ້າຢູ່ຕະຫຼາດຈີນ. ນອກຈາກບໍລິສັດຢີຮາຍເຄີຣີຂອງສິງກະໂປ, ຍັງມີບໍລິສັດລູອິ ເດຣຢຸດສ໌ແລະອື່ນໆ.
ບໍລິສັດອາຫານຕ່າງປະເທດມີຊື່ສຽງຫຼາຍ, ແລະມີຄວາມສະດຸ້ງໄວຕໍ່ສະພາບຂອງຕະຫຼາດ, ການເຂົ້າຮ່ວມຂອງເຂົາເຈົ້າເຮັດໃຫ້ການແຂ່ງ ຂັນໃນຕະຫຼາດຊື້ຂາຍທັນຍາຫານດຸເດືອດກວ່າເກົ່າ. ທ່ານຫວງຝູ້ໂຈ່ວ, ຜູ້ອຳນວຍການຂອງບໍລິສັດຊື້ຂາຍທັນຍາຫານຂອງເຂດລິນຊ່ວນເມືອງຝູ້ໂຈ່ວແຂວງຈ່ຽງຊີ່ຮູ້ສຶກເຖິງຄວາມດຸເດືອດ ຂອງການແຂ່ງຂັນ, ທ່ານເວົ້າວ່າ:
"ວິສາຫະກິດທີ່ແຂ່ງຂັນກັນມີຫຼາຍ, ຕາມຂ້າພະເຈົ້າຮູ້ວ່າ, ມີບໍລິສັດຕ່າງປະເທດມາຊື້ເຂົ້າຢູ່ເຂດພວກເຮົາ, ຍັງມີສາງສຳຮອງຂອງສູນກາງແລະບໍລິສັດປຸງແຕ່ງຂອງເອກະຊົນ, ການແຂ່ງຂັນດຸດເດືອດຫຼາຍ."
ບໍ່ວ່າແມ່ນບໍລິສັດຈີນຫຼືຕ່າງປະເທດ, ທີ່ມາຊື້ເຂົ້າຢ່າງບໍ່ຂາດສາຍເຮັດໃຫ້ຊາວນາດີໃຈຫຼາຍ, ເຂົາເຈົ້າມີຄວາມໝັ້ນໃຈວ່າການຂາຍເຂົ້າປີນີ້ຈະໄດ້ລາຄາສູງ, ຊາວນາຫຼາຍຄົນເວົ້າວ່າ, "ຖ້າວ່າລາຄາຕ່ຳກວ່າ100ຢວນກໍ່ຈະບໍ່ຂາຍ."
ສຳລັບຜູ້ມາຊື້ເຂົ້າທີ່ມາຈາກຫຼາຍພາກສ່ວນທັງພາຍໃນແລະຕ່າງປະເທດ, ຜົນດີໃນໄລຍະສັ້ນແມ່ນລາຄາເຂົ້າສູງຂຶ້ນຈະເຮັດໃຫ້ຊາວນາໄດ້ກຳໄລຫຼາຍ, ໄດ້ກະຕຸ້ນ ຄວາມຫ້າວຫັນໃນການປູກເຂົ້າ. ຫຼາຍປີກ່ອນນີ້, ຍ້ອນການປູກເຂົ້າບໍ່ໄດ້ກຳໄລ, ຊາວນາຈີນຢ່າງຫຼວງຫຼາຍໄດ້ເຂົ້າໄປເຮັດວຽກຢູ່ຕົວເມືອງ. ແຕ່ຄຽງຄູ່ກັບລາຄາຂອງທັນຍາຫານສູງຂຶ້ນ, ບາງຄົນກໍ່ກັບຄືນສູ່ຊົນນະບົດເພື່ອປູກເຂົ້າຕໍ່. ທ່ານຈ່າງຢ້ຽຍລີ້, ນັກວິຊາການດ້ານກະສິກຳຂອງຫ້ອງການກະສິກຳຂອງຕາແສງຜິງຢວນແຂວງຊ່ານຕຸ່ງກ່າວວ່າ:
"ຄວາມຫ້າວຫັນໃນການປູກເຂົ້າຂອງຊາວນາໄດ້ສູງຂຶ້ນ, ບາງຄົນທີ່ໄປເຮັດວຽກຢູ່ບ່ອນອື່ນກໍ່ໄດ້ກັບຄືນບ້ານ, ນີ້ສະແດງໃຫ້ເຫັນວ່າ, ລາຄາສູງຂອງທັນຍາຫານດຶງດູດເຂົາເຈົ້າ."
ຢູ່ຕາມທ້ອງຖິ່ນ, ຍັງມີຊາວກະສິກອນຢ່າງຫຼວງຫຼາຍທີ່ປູກພືດອຸດສາຫະກຳໃນເມື່ອກ່ອນຖືກລາຄາສູງຂອງການປູກເຂົ້າດຶງດູດໃຈ, ປ່ຽນມາປູກພືດທີ່ເປັນອາຫານແທນ ເຊັ່ນເຂົ້າເບຼເປັນຕົ້ນ. ລຸງມາລີ້ ຊາວກະສິກອນຂອງຕາແສງຜິງຢວນກໍ່ແມ່ນໜຶ່ງໃນຊາວກະສິກອນດັ່ງກ່າວ. ລາວເວົ້າວ່າ:
"ປະຊາຊົນມີຄວາມຫ້າວຫັນສູງຫຼາຍ, ການປູກເຂົ້າເບຼດີກວ່າການປູກພືດອື່ນໆ, ແຕ່ກ່ອນ ເຂດເຮົານີ້ແມ່ນເຂດປູກຝ້າຍ."
ລຸງຫວງຊິ້ງຊິ່ນ ຊາວກະສິກອນເມືອງຕິ້ງໂຈ່ວແຂວງເຫີເປີຍເວົ້າວ່າ:
"ຖ້າລາຄາສູງ, ພວກເຮົາຈະປູກແນ່ນອນ, ປູກຫຼາຍກໍ່ໄດ້ກຳໄລຫຼາຍ, ປີກາຍຂ້ອຍໄດ້ປູກເຂົ້າປະມານ0,3ເຮັກຕາ, ປີນີ້ ປູກປະມານ0,6ເຮັກຕາ."
ແຕ່ວ່າການທີ່ບໍລິສັດອາຫານຕ່າງປະເທດຍາດກັນມາຊື້ເຂົ້າ, ຈະເຮັດໃຫ້ບໍລະສັດອາຫານຂະໜາດກາງແລະນ້ອຍຂອງເອກະຊົນຂອງຈີນທີ່ຂາດຄວາມສາມາດດ້ານການແຂ່ງຂັນປະເຊີນກັບສິ່ງທ້າທາຍຫຼືກາຍເປັນວິສາຫະກິດທີ່ຖືກຊື້ຫຸ້ນ. ຕໍ່ເລື່ອງນີ້, ທ່ານຫວງຝູ້ໂຈ່ວ, ຜູ້ອຳນວຍການຂອງບໍລິສັດຊື້ຂາຍທັນຍາຫານແຫ່ງລັດຂອງແຂວງຈ່ຽງຊີ່ກ່າວວ່າ:
"ພວກເຮົາໄດ້ກະກຽມດີແລ້ວ, ເພື່ອຮັບມື, ແຕ່ຍັງເປັນຫ່ວງຢູ່ວ່າຈະບໍ່ສາມາດຍາດຊື້ເຂົ້າໄວ້ໃນສາງເຮົາ."
ຈີນມີພົນລະເມືອງຢ່າງຫຼວງຫຼາຍ, ແມ່ນປະເທດທີ່ມີຄວາມຕ້ອງການສະບຽງອາຫານຫຼາຍ, ເພື່ອຮັບປະກັນຄວາມປອດໄພດ້ານອາຫານ, ການເພີ່ມການຜະລິດທັນຍາຫານຕ້ອງໄປພ້ອມກັບການເພີ່ມທະວີການຄວບຄຸມຂອງລັດຖະບານທີ່ເຂັ້ມແຂງຕໍ່ຕະຫຼາດທັນຍາຫານ. ສະນັ້ນ, ນັກວິຊາການຈີນຢ່າງຫຼວງຫຼາຍເຫັນວ່າ, ທັນຍາຫານຄວນແມ່ນລັດຖະບານເປັນຜູ້ກຳ, ຖານະຜູກຂາດດ້ານສະບຽງອາຫານຂອງລັດຖະບານຕ້ອງຍຶດໝັ້ນໃຫ້ດີ. ສາເຫດແມ່ນ, ຖ້າວ່າບໍລິສັດຈຳນວນໜ້ອຍຄວບຄຸມຕະຫຼາດອາຫານໃຫຍ່ຂອງຈີນແລ້ວ, ເປົ້າໝາຍທີ່ສະແຫວງຫາກຳໄລສູງຈະສ້າງຜົນກະທົບຫຼາຍຕໍ່ການຜະລິດທັນຍາຫານຢ່າງປອດໄພຂອງຈີນ.
ສຳລັບລາຄາອາຫານສູງຂຶ້ນ, ຊາວກະສິກອນຈີນກໍ່ບໍ່ແມ່ນມີແຕ່ດີໃຈເທົ່ານັ້ນ, ຍັງມີຄວາມເປັນຫ່ວງອີກ. ຕົ້ນຕໍແມ່ນເປັນຫ່ວງນຳລາຄາຂອງພາຫະນະການຜະ ລິດແລະລາຄາຂອງສິນຄ້າ. ລຸງຫວງຊິ້ງຊິ່ນແລະລຸງມາລີ້ກ່າວວ່າ:
"ປະຈຸບັນກໍ່ຢ້ານລາຄາຂອງພະຫະນະການຜະລິດແລະລາຄາຂອງສິນຄ້າອື່ນໆສູງ ຂຶ້ນ, ຖ້າເປັນຈັ່ງຊັ້ນ, ລາຍໄດ້ຕົວຈິງຂອງຊາວກະສິກອນກໍ່ຈະຫຼຸດໜ້ອຍລົງ."
ສະນັ້ນ, ລາຄາຂອງພາຫະນະກະສິກຳປີນີ້ເປັນແນວໃດ? ທ່ານຫຼີ້ເຈິ້ນຈຸ່ນ, ຮອງຫົວໜ້າຮ້ານຄ້າຂາຍຂອງຕາແສງຜິງຢວນແຂວງຊ່ານຕຸ່ງກ່າວວ່າ:
"ລາຄາຂອງເຄື່ອງມືກະສິກຳໃນປີນີ້, ໂດຍສະເພາະແມ່ນໃນລະດູໄບໄມ້ຫຼົ່ນ, ລາຄາສູງກວ່າປີກາຍໜ້ອຍໜຶ່ງ, ຄືເພີ່ມຂຶ້ນ10%."
ສະນັ້ນ, ນັກວິຊາການສ່ວນຫຼາຍເຫັນວ່າ, ລາຄາຂອງທັນຍາຫານຈະເພີ່ມຂຶ້ນຢ່າງແນ່ນອນ. ກ່ອນນີ້, ທ່ານໝ້າສ້ຽວເຫີ, ຮອງຫົວໜ້າສະຖາບັນມະຫາພາກຂອງຄະນະກຳມະການການພັດທະນາແລະປະຕິຮູບແຫ່ງລັດຈີນກ່າວວ່າ:
"ໃນຫຼາຍປີມານີ້, ລາຄາຂອງພາຫະນະການຜະລິດເພີ່ມຂຶ້ນ, ຄ່າແຮງງານເພີ່ມຂຶ້ນ, ກໍ່ຈະເຮັດໃຫ້ຕົ້ນທຶນຜະລິດທັນຍາຫານເພີ່ມຂຶ້ນ, ຖ້າວ່າບໍ່ຍົກສູງລາຄາຂອງທັນຍາຫານ, ຊາວກະສິກອນກໍ່ຕ້ອງຫຼຸດການຜະລິດໃຫ້ໜ້ອຍລົງ. ການສະໜອງແລະຄວາມຕ້ອງການຂອງຕະຫຼາດຈະເຮັດໃຫ້ລາຄາເພີ່ມຂຶ້ນ."
ເຖິງວ່າລາຄາຂອງທັນຍາຫານຕົ້ນຕໍຂອງຈີນຄືເຂົ້າເບຼ, ສາລີແລະເຂົ້າໄດ້ສ້າງສະຖິຕິສູງສຸດເທື່ອໃໝ່ໃນປະຫວັດສາດ, ແຕ່ຍ້ອນວ່າໃນ30ກວ່າປີທີ່ຜ່ານໄປນັ້ນ, ຕະຫຼາດທັນຍາຫານຂອງຈີນໄດ້ມີການປ່ຽນແປງຫຼາຍເທື່ອແລ້ວ. ຊາວກະສິກອນຈີນບໍ່ຫວັງວ່າລາຄາໃນປະຈຸບັນຈະເພີ່ມຂຶ້ນຫຼາຍ, ແຕ່ຫວັງວ່າລາຄາຈະມິຄວາມໝັ້ນທ່ຽງ. ລຸງຫວງຊິ້ງຊິ່ນ, ຊາວກະສິກອນເມືອງຕິ້ງໂຈ່ວແຂວງເຫີເປີຍເວົ້າວ່າ:
"ພວກເຮົາບໍ່ຢາກໃຫ້ລາຄາເພີ່ມຂຶ້ນ, ແລະກໍ່ບໍ່ຢາກໃຫ້ລາຄາຫຼຸດລົງ, ການຮັກສາລາຄາທີ່ໝັ້ນທ່ຽງແມ່ນສິ່ງທີ່ດີທີ່ສຸດ."
