ການແຂ່ງລົດລາລີຈີນອາຊຽນໄດ້ເຮັດໃຫ້ຈີນກັບອາຊຽນຫຍັບມໍ່ກັນກວ່າເກົ່າ
-----------------------------------------------------------------------------------------------------------------
ປີ 2006 ແມ່ນປີຈີນອາຊຽນສ້າງຕັ້ງການພົວພັນເປັນປະເທດຄູ່ເຈລະຈາຄົບຮອບ 15 ປີແລະປີມິດຕະພາບແລະການຮ່ວມມືລະຫວ່າງຈີນກັບອາຊຽນ, ໃນຖານະເປັນຫນຶ່ງໃນຫລາຍໆກິດຈະກຳເພື່ອລະລຶກ, ການແຂ່ງລົດລາລີຈີນອາຊຽນປີ 2006 ຈະຈັດຂຶ້ນໃນເດືອນຕຸລາປີນີ້.
ເດືອນຕຸລາປີນີ້, ຂະບວນລົດຈະອອກຈາກດ່ານມິດຕະພາບຂອງເຂດກວາງຊີ ພາກຕາເວັນຕົກສຽງໃຕ້ຂອງຈີນ,ແລ້ວແລ່ນຜ່ານແຫລມອິນໂດຈີນ,ເມື່ອຮອດສິງກະໂປແລ້ວຈິ່ງກັບຄືນ,ຕະຫລອດທາງຈະຜ່ານ 7 ປະເທດ, ນີ້ ແມ່ນການແຂ່ງລົດລາລີສາກົນຈີນອາຊຽນປີ 2006.
ວັນທີ 13 ກັນຍາ, ກົມໃຫຍ່ກິລາແຫ່ງຊາດຈີນແລະອຳນາດການປົກຄອງປະຊາຊົນເຂດປົກຄອງຕົນເອງເຜົ່າຈ້ວງກວງຊີທີ່ເປັນຜູ່ຈັດການແຂ່ງຂັນເທື່ອນີ້ໄດ້ຈັດງານຖະແຫລງຂ່າວຢູ່ປັກກິ່ງ, ທ່ານເຟີງຈ້ຽນຈົ່ງ ຮອງຫົວຫນ້າກົມໃຫຍ່ກິລາແຫ່ງຊາດຈີນ, ແລະທ່ານນາງລິວຊິນເວີນ ຮອງປະທານເຂດປົກຄອງຕົນເອງເຜົ່າຈ້ວງກວງຊີ ຫົວຫນ້າຄະນະຈັດຕັ້ງການແຂ່ງລົດດັ່ງກ່າວໄດ້ຖະແຫລງຂ່າວດັ່ງກ່າວແລະໄດ້ແນະນຳກ່ຽວກັບການຈັດງານເທື່ອນີ້.ເຈົ້າຫນ້າທີ່ຈາກສະຖານທູດຫວຽດນາມ ລາວ ໄທ ມາເລເຊຍ ສິງກະໂປແລະກຳປູເຈຍປະຈຳຈີນໄດ້ເຂົ້າຮ່ວມງານຖະແຫລງຂ່າວດັ່ງກ່າວ.
ການແຂ່ງລົດເທື່ອນີ້ຈະເລີ່ມແຕ່ນະຄອນນານນິງ ເທດສະບານເຂດກວາງຊີໃນວັນທີ 6 ຕຸລາປີນີ້, ລວມມີລົດ 23 ຄັນ, ໃນນັ້ນ, ມີ 10 ຄັນແມ່ນລົດແຂ່ງຂັນ, 13 ຄັນເປັນລົດອຳນວຍຄວາມສະດວກ;ມີນັກກິລາ ກຳມະການ ນັກຂ່າວ ພໍ່ຄ້າທີ່ໃຫ້ການອຸປະຖຳ ພະນັກງານບໍລິການແລະພະນັກງານສັບໃຊ້ລວມທັງຫມົດປະມານ 100 ຄົນ.ຂະບວນລົດຈະອອກຈາກດ່ານມິດຕະ ພາບຂອງເມືອງຊົງໂຈອອກດ່ານ,ແລ້ວຜ່ານຫວຽດນາມ, ລາວ,ໄທ ,ມາເລເຊຍ,ໄປຣອດປາຍທາງຄືສິງກະໂປແລ້ວຜ່ານມາເລເຊຍ,ໄທ,ກຳປູເຈຍແລະຫວຽດນາມກັບມາຈີນ, ໄລຍະທາງຂອງການແຂ່ງລົດເທື່ອນີ້ມີປະມານ 1 ຫມື່ນ 1 ພັນກິໂລແມັດ.
ເມື່ອຂະບວນລົດແລ່ນຜ່ານປະເທດຫນຶ່ງ, ປະເທດນັ້ນກໍ່ຈະໄດ້ຈັດຕັ້ງ ລົດແລະນັກກິລາເຂົ້າຮ່ວມການແຂ່ງຂັນ. ຜູ່ຈັດຕັ້ງຈະອີງຕາມສະພາບເສັ້ນທາງຂອງປະເທດອາຊຽນທີ່ຂະບວນລົດແລ່ນຜ່ານນັ້ນເລືອກເອົາເສັນທາງແລະຕົວເມືອງທີ່ເຫມາະສົມເພື່ອກຳນົດຄວາມໄວ, ປະລິມານນ້ຳມັນແລະຂ້າມສິ່ງກັດຂວາງຕ່າງໆ.ວັນທີ 26 ຕຸລາປີນີ້, ຂະບວນລົດຈະກັບຄືນຮອດເມືອງນານນິງ,ການແຂ່ງຂັນກໍ່ຖືວ່າສິ້ນສຸດລົງ. ມື້ດຽວກັນ, ຈະຈັດພິທີມອບລາງວັນໃຫ້ນັກກິລາ 7 ປະເທດຄື ຈີນ ຫວຽດນາມ ລາວ ໄທ ມາເລເຊຍ ສິງກະໂປແລະກຳປູເຈຍທີ່ເຂົ້າຮ່ວມການແຂ່ງຂັນ.
ທ່ານເຟິງຈ້ຽນຈົ່ງ ຮອງຫົວຫນ້າກົມໃຫຍ່ກິລາແຫ່ງຊາດຈີນແນະນຳວ່າ:ນີ້ແມ່ນການແຂ່ງລົດສາກົນທີ່ຜ່ານຫລາຍປະເທດກວ່າຫມູ່ທີ່ຈີນເປັນເຈົ້າພາບຈັດຂຶ້ນ,ຈະສົ່ງຜົນສະທ້ອນອັນຕັ້ງຫນ້າຕໍ່ການຊຸກຍູ້ການແຂ່ງລົດຂອງອາຊີກໍ່ຄືຂອງໂລກ,ພ້ອມກັນນັ້ນ, ກໍ່ຈະຍົກຖານະແລະບົດບາດຂອງຈີນໃນການກິລາແຂ່ງລົດສາກົນ.ນອກນີ້, ທ່ານເຟິງຈ້ຽນຈົ່ງແນະນຳວ່າ, ການຈັດການແຂ່ງລົດນີ້, ຍັງມີຈຸດປະສົງພິເສດອັນຫນຶ່ງ,ທ່ານເວົ້າວ່າ:
ການແຂ່ງລົດຣາລີສາກົນຈີນອາຊຽນປີ 2006 ແມ່ນກິດຈະກຳແຂ່ງລົດສາກົນຂະຫນາດໃຫຍ່ທີ່ຈັດຂຶ້ນເພື່ອສະເຫລີມສະຫລອງກອງປະຊຸມສຸດຍອດເພື່ອລະລຶກຈີນອາຊຽນສ້າງການພົວພັນເປັນປະເທດຄູ່ເຈລະຈາຄົບຮອບ 15 ປີ,ງານວາງສະແດງສາກົນຈີນອາຊຽນຄັ້ງທີສາມແລະກອງປະຊຸມສຸດຍອດການຄ້າແລະການລົງທຶນຈີນອາຊຽນຄັ້ງທີສາມ.
ພາຍຫລັງການແຂ່ງລົດສິ້ນສຸດລົງໃນວັນທີ 26 ຕຸລາແລ້ວ, ວັນທີ 30 ຕຸລາປີນີ້, ຢູ່ເມືອງນານນິງ, ກໍ່ຈະຈັດກອງປະຊຸມສຸດຍອດເພື່ອລະລຶກການສ້າງການພົວພັນເປັນປະເທດຄູ່ເຈລະຈາລະຫວ່າງຈີນກັບອາຊຽນຄົບຣອບ 15 ປີ, ງານວາງສະແດງຈີນອາຊຽນຄັ້ງທີສາມ, ກອງປະຊຸມສຸດຍອດການຄ້າແລະການລົງທຶນຈີນອາຊຽນຄັ້ງທີສາມແລະງານມະຫະກຳເພງພື້ນເມືອງສາກົນນານນິງປີ 2006.
ໃນຫລາຍປີມານີ້, ບົນພື້ນຖານການພົວພັນຖານບ້ານໃກ້ເຮືອນຄຽງທີ່ດີຕໍ່ກັນລະຫວ່າງສອງຝ່າຍໄດ້ຂະຫຍາຍຕົວຢ່າງສະດວກ, ການຮ່ວມມືດ້ານດ້າຄ້າລະຫວ່າງຈີນກັບອາຊຽນໄດ້ທີ່ເປັນບ້ານໃກ້ເຮືອນຄຽງທີ່ດີຕໍ່ກັນລະຫວ່າງສອງຝ່າຍໄດ້ຂະຫຍາຍຢ່າງສະດວກ,ເສດຖະກິດການຄ້າລະຫວ່າງຈີນກັບອາຊຽນໄດ້ຮັບຄວາມຄືບຫນ້າ ໃຫມ່.ກວາງຊີເປັນເຂດທຽບເທົ່າແຂວງຂອງຈີນທີ່ມີທັງດິນແລະທະເລຕິດກັບປະເທດຕ່າງໆຂອງອາຊຽນ:ຈາກອາຊີອາຄະເນໄປເມືອງນານນິງ ເທດສະບານເຂດກວາງຊີມີທາງດ່ວນຫລາຍເສັ້ນ ຍາວ 1000 ກວ່າກິໂລແມັດ,ທ່າກຳປັ່ນທີ່ແຄມອ່າວພາກເຫນືອຄື ທ່າໄປຫາຍ ທ່າຊິນໂຈ່ວແລະທ່າຟັງເສິງກາງເປັນຕົ້ນທັງເປັນທາງອອກສູ່ທະເລຂອງພາກຕາເວັນຕົກຂອງຈີນ,ທັງແມ່ນທ່າກຳປັ່ນທີ່ໃກ້ກັບອາຊີອາຄະເນກວ່າຫມູ່, ຈາກແຫ່ງນີ້,ສິນຄ້າຂອງບັນດາປະເທດອາຊຽນຈະເຂົ້າສູ່ 9 ເຂດແຂວງຢູ່ປາກແມ່ນ້ຳຈູຈ່ຽງ.ງານວາງສະແດງຈີນອາຊຽນຈັດຂຶ້ນຢູ່ເມືອງນານນິງ, ໄດ້ເຮັດໃຫ້ຖານະຂອງເຂດກວາງຊີທີ່ເປັນຈຸດໃຈກາງແລະທາງຜ່ານຂອງການຈໍລະຈອນສິນຄ້າຂອງເຂດການຄ້າເສລີຈີນອາຊຽນນັບມື້ນັບພົ້ນເດັ່ນຂຶ້ນ.
ທ່ານນາງລິວເວີນຊິນ ຮອງປທານເຂດປົກຄອງຕົນເອງເຜົ່າຈ້ວງກວາງຊີ ຫົວຫນ້າຄະນະຈັດການແຂ່ງລົດເທື່ອນີ້ກ່າວວ່າ:
ໃນເວທີປາໃສການຮ່ວມມືເສດຖະກິດອ້ອມອ່າວພາກເຫນືອທີ່ຈັດຂຶ້ນໃນຫວ່າງບໍ່ດົນນີ້,ກວາງຊີໄດ້ສະເຫນີຍຸດທະສາດແບບ M ວາງໂຄງຄວາມຄິດທີ່ສ້າງການຮ່ວມມືດ້ານເສດຖະກິດຢູ່ພາກພື້ນຈີນອາຊຽນແລະສະຖານະພາບໃຫມ່ຂອງອ່າວພາກເຫນືອ,ອັນໄດ້ສ້າງສະພາບການໃຫມ່ໃຫ້ກວາງຊີເຂົ້າຮ໋ວມການກໍ່ສ້າງເຂດການຄ້າເສລີຈີນອາຊຽນ,ໄດ້ເພີ່ມເນື້ອໃນໃຫມ່ໃຫ້ງານວາງສະແດງຈີນອາຊຽນ.ການແຂ່ງລົດນີ້ກໍ່ແມ່ນກິດຈະກຳອັນຫນຶ່ງໃນຫົວຂໍ້ຕ່າງໆຄື ເສດຖະກິດການຄ້າ ວັດທະນະທຳແລະກິລາທີ່ຈັດຂຶ້ນໂດຍຫມູນອ້ອມການພົວພັນດ້ານຍຸດທະສາດແລະຮ່ວມມືກັນລະຫວ່າງຈີນກັບອາຊຽນ.
ການແຂ່ງລົດເທື່ອນີ້ຖືການທ່ອງທ່ຽວຢ່າງກົມກຽວກັນເປັນຫົວຂໍ້ຫລັກ,ຖືການບັນລຸຄວາມປອງດອງກັນ ການປະດິດສ້າງນຳກັນແລະຊົມໃຊ້ນຳກັນລະຫວ່າງຈີນກັບບັນດາປະເທດອາຊຽນເປັນຈຸດປະສົງ,ສວຍໂອກາດຈັດຕັ້ງ ການແຂ່ງລົດສາກົນຂ້າມຊາດເພື່ອເສີມຂະຫຍາຍທ່າແຮງພິເສດຂອງກິລາຢ່າງເຕັມສ່ວນ, ເຮັດໃຫ້ຊ່ອງຫວ່າງລະຫວ່າງຈີນກັບອາຊຽນຫຍັບມໍ່ເຂົ້າ,ເປີດກວ້າງແລະລົງເລິກການຮ່ວມມືລະຫວ່າງສອງຝ່າຍໃນດ້ານກິດລາ ວັດທະ ນະທຳ ການແລກປ່ຽນໃນລະດັບທ້ອງຖິ່ນແລະການໄປມາຫາສູ່ກັນດ້ານເສດ ຖະກິດ, ເພີ່ມຄວາມຮັກແພງກັນລະຫວ່າງປະຊາຊົນບັນດາປະເທດ.ພ້ອມກັນນັ້ນ, ຍັງຈະນຳໃຊ້ທ່າແຮງຂອງສື່ມວນຊົນ, ເຮັດໃຫ້ປະຊາຊົນຈີນກັບບັນດາປະເທດອາຊຽນເຂົ້າໃຈເຊິ່ງກັນແລະກັນໃຫ້ດີຂຶ້ນຕື່ມອີກ.
ທ່ານເຟິງຈ້ຽນຈົ່ງ ຮອງຫົວຫນ້າກົມໃຫຍ່ກິລາແຫ່ງຊາດຈີນເວົ້າວ່າ:
ພວກຂ້າພະເຈົ້າຫວັງຜ່ານການແຂ່ງລົດຣາລີສາກົນຈີນອາຊຽນ, ສ້າງທາງໃຫມທີ່ໃຫ້ເສດຖະກິດການຄ້າ ວັດທະນະທຳແລະກິລາຂອງຈີນແລະອາຊຽນຕິດຈອດກັນ,ເຮັດໃຫ້ປະເທດທີ່ກ່ຽວຂ້ອງຈະໄດ້ເຫັນຄວາມອາດເປັນໄປໄດ້ໃນການສ້າງເສດຖະກິດທາງຜ່ານແຕ່ນານນິງຫາສິງກະໂປເປັນຮູບປະທຳຂຶ້ນມາ, ແລ້ວເສີມຂະຫຍາຍບົດບາດອັນຕັ້ງຫນ້າໃນການກໍ່ສ້າງເຂດການຄ້າເສລີຈີນອາຊຽນ.
