ກອງທັບຂອງອາຊຽນກັບຈີນ ຍີ່ປຸ່ນແລະສ.ເກົາຫຼີຕັ້ງໜ້າຊອກຫາຊ່ອງທາງໃໝ່ດ້ານການຮ່ວມມືກູ້ໄພສາກົນ
-----------------------------------------------------------------------------------------------------------------
ວັນທີ 10 ມິຖຸນານີ້, ການສຳມະນາກູ້ໄພສາກົນຂອງກອງທັບອາຊຽນກັບຈີນ ຍີ່ປຸ່ນແລະສ.ເກົາຫຼີຫຼືອາຊຊຽນ+3ໄດ້ໄຂຂຶ້ນຢູ່ນະຄອນສືເຈ່ຍຈ່ວງທີ່ພາກເໜືອຂອງຈີນ. ສຳມະນາກອນທີ່ເຂົ້າຮ່ວມການສຳມະນາຈະລົງເລິກການແລກປ່ຽນແລະການຄົ້ນຄວ້າ, ຊອກຫາຊ່ອງທາງໃໝ່ໃນການຮ່ວມມືກູ້ໄພສາກົນ. ຕໍ່ໄປເຊີນຟັງລາຍງານລະອຽດ.
ພາກພື້ນອາຊີອາຄະເນໄດ້ເກີດໄພທຳມະຊາດເລື້ອຍໆໃນປີນີ້ເປັນຕົ້ນມາ, ໃນຕົ້ນປີນີ້, ພາກໃຕ້ຂອງຈີນໄດ້ເກີດໄພພາຍຸຫິມະຂະໜາດໃຫຍ່; ຕົ້ນເດືອນພຶດສະພາແລ້ວນີ້, ລົມພາຍຸແຖບຮ້ອນໄດ້ພັດຖະຫຼົ່ມມຽນມາ, ວັນທີ 12 ພຶດສະພາແລ້ວນີ້, ແຂວງເສສວນຈີນເກີດໄພແຜ່ນດິນໄຫວແຮງ. ໄພທຳມະຊາດເຫຼົ່ານີ້ເຮັດໃຫ້ປະເທດອາຊີອາຄະເນຕ່າງໆເອົາໃຈໃສ່ການຮ່ວມມືສາກົນໃນຂົງເຂດກູ້ໄພຫຼາຍກວ່າເກົ່າ, ສະນັ້ນຈິ່ງເຮັດໃຫ້ການສຳມະນາກູ້ໄພສາກົນຂອງກອງທັບອາຊຽນ+3ທີ່ຈັດຂຶ້ນໃນວັນທີ 10 ມິຖຸນານີ້ມີລັກສະນະເປັນຮູບປະທຳຫຼາຍກວ່າເກົ່າ.
ພົນຕີສຽນລີ້ຫວາ ຫົວໜ້າຫ້ອງການພົວພັນກັບຕ່າງປະເທດຂອງກະຊວງປ້ອງກັນປະເທດຈີນກ່າວໃນກອງປະຊຸມວ່າ, ໄພທຳມະຊາດຮ້າຍແຮງແມ່ນການຂົ່ມຂູ່ທີ່ມວນມະນຸດປະເຊີນກັບຮ່ວມກັນ, ການເພີ່ມທະວີການຮ່ວມມືກູ້ໄພສາກົນ, ຮ່ວມກັນຕ້ານໄພທຳມະຊາດກໍ່ແມ່ນຄວາມຕ້ອງການທີ່ມະນຸດພັດທະນາຢ່າງປອດໄພແລະຢູ່ຮ່ວມກັນຢ່າງກົມກຽວກັນ. ກອງທັບມີທ່າແຮງພິເສດໃນດ້ານການກູ້ໄພ. ທ່ານກ່າວວ່າ:
"ກອງທັບມີຄວາມສະດຸ້ງໄວ, ມີການຈັດຕັ້ງຮອບຄອບ, ມີຄວາມຮູ້ວິຊາການແລະແບບແຜນໝັ້ນໜຽວ, ໃນເວລາເກີດອຸປະຕິເຫດໃຫຍ່ແລະປະສົບໄພທຳມະຊາດຮ້າຍແຮງ, ບໍ່ພຽງແຕ່ກາຍເປັນກຳລັງສຳຄັນທີ່ປະຕິບັດໜ້າທີ່ກູ້ໄພຂອງພາຍໃນປະເທດຕົນ, ຍັງສາມາດປະກອບສ່ວນຢ່າງຕັ້ງໜ້າເຂົ້າໃນການກູ້ໄພຂອງພາກພື້ນ. ກອງທັບຂອງປະເທດຕ່າງໆເພີ່ມຄວາມເຂົ້າໃຈກັນແລະເພີ່ມທະວີການຮ່ວມມືມີຜົນດີຕໍ່ການຍົກສູງຄວາມສາມາດແລະລະດັບຮັບມືກັບໄພທຳມະຊາດຮ່ວມກັນ, ລົງເລິກການແລກປ່ຽນແລະການຮ່ວມມືຕົວຈິງໃນຂົງເຂດຄວາມປອດໄພທີ່ບໍ່ແມ່ນແບບດັ້ງເດີມ."
ພົນເອກມຸສລານ ຫົວໜ້າໂຮງໝໍກອງທັບບົກຂອງກອງທັບມາເລເຊຍທີ່ຮ່ວມການສຳມະນາຕີລາຄາສູງຕໍ່ການປະຕິບັດງານຂອງກອງທັບຈີນໃນການກູ້ໄພ, ພ້ອມກັນນັ້ນກໍ່ຫວັງໃຫ້ປະເທດຕ່າງໆແບ່ງປັນບົດຮຽນກັບມາເລເຊຍ.
"ກອງທັບຈີນເຮັດໄດ້ດີຫຼາຍໃນການກູ້ໄພ, ພວກຂ້າພະເຈົ້າສາມາດຮ່ຳຮຽນບົດຮຽນເຫຼົ່ານີ້ໂດຍຜ່ານການສຳມະນາເທື່ອນີ້. ພ້ອມກັນນັ້ນ, ມາເລເຊຍກໍໄດ້ນຳເອົາບົດຮຽນທີ່ເຂົ້າຮ່ວມການກູ້ໄພສາກົນ, ມາແບ່ງປັນກັບປະເທດຕ່າງໆ."
ພາຍຫລັງເກີດແຜ່ນດິນໄຫວເວີ້ນຊ່ວນເສສວນຈີນແລ້ວ, ປະຊາຄົມໂລກທະຍອຍກັນໃຫ້ການຊ່ວຍເຫລືອແກ່ຈີນ.ປະເທດຕ່າງໆເຊັ່ນ ຍີ່ປຸ່ນ ສ.ເກົາຫລີ ສິງກະໂປແລະອິນໂດເນເຊຍເປັນຕົ້ນຍັງໄດ້ສົ່ງຫນ່ວຍກູ້ໄພແລະຫນ່ວຍແພດໄປຊ່ວຍເຂດປະສົບໄພ.ທ່ານລິວຊ້ຽງຢາງ ຮອງຫົວຫນ້າຫນ່ອຍກູ້ໄພສາກົນຈີນບອກພວກເຮົາວ່າ:
ເວົ້າສຳລັບເຂົາເຈົ້າທີ່ມາໃຫ້ການຊ່ວຍເຫລືອ, ພວກເຮົາແມ່ນດີໃຈທີ່ສຸດ.ໃນນາມເປັນເພື່ອນໃນຂະແຫນງການດຽວກັນ, ສາມາດເຮັດວຽກຢູ່ບ່ອນດຽວກັນ, ພວກເຮົາໄດ້ຮູ້ສຶກເຖິງຄວາມຫມາຍອັນເລິກເຊິ່ງທີ່ວ່າມະນຸດສະທຳບໍ່ມີຊາຍແດນ.
ທີ່ຈິງແລ້ວ, ເມື່ອສາມປີກ່ອນ,10 ປະເທດອາຊຽນກໍ່ໄດ້ເຊັນສັນຍາຄຸ້ມຄອງແລະຮັບມືສຸກເສີນຕໍ່ໄພພິບັດຂອງອາຊຽນ,ອັນໄດ້ສະຫນອງຂອບກົດຫມາຍໃຫ້ແກ່ປະເທດອາຊຽນປ້ອງກັນ ຄວບຄຸມແລະຫລຸດໄພທຳມະຊາດ.ສ່ວນຈີນກັບອາຊຽນກໍ່ໄດ້ແລກປ່ຽນກັນກ່ຽວກັບການເພີ່ມຄວາມສາມາດຄຸ້ມຄອງໄພພິບັດໃຕ້ຂອບອາຊຽນ +3.ນອກນີ້, ສາມປະເທດຄືຈີນ ຍີ່ປຸ່ນແລະສ.ເກົາຫລີກໍ່ພວມຮ່ວມມືກັນກ່ຽວກັບການຄຸ້ມຄອງໄພພິບັດ.ແຕ່ເວົ້າໂດຍລວມແລ້ວ, ກົນໄກຮ່ວມມືກູ້ໄພລະຫວ່າງຊາດຍັງຕ້ອງປັບປຸງໃຫ້ຄົບຖ້ວນຕື່ມອີກ.
ພົນຕີຊຽນລີ້ຫວາ ຫົວຫນ້າຫ້ອງການພົວພັນກັບຕ່າງປະເທດຂອງກະຊວງປ້ອງກັນປະເທດຈີນກ່າວວ່າມງານສຳມະນາເທື່ອນີ້ຈະຊຸກຍູ້ກອງປະກອບອາວຸດລະຫວ່າງອາຊຽນກັບຈີນ ຍີ່ປຸ່ນແລະສ.ເກົາຫລີຮ່ວມມືກັນຢ່າງຕິດແທດຕົວຈິງໃນຂົງເຂດກູ້ໄພ.
ຂ້າພະເຈົ້າຄິດວ່າຄຽງຄູ່ກັບຫົວຂໍ້ການສຳມະນາທີ່ພວກຂ້າພະເຈົ້າໄດ້ລົງເລິກແລ້ວຍັງຈະມີການຮ່ວມມືທີ່ເປັນຮູບປະ
ທຳຈຳນວນຫນຶ່ງເຊິ່ງລວມທັງບັນຫາຄ້ຳປະກັນດ້ານກົດຫມາຍ ບັນຫາສ້າງກົນໄກກ່ຽວກັບກຳລັງປະກອບອາວຸດຂອງປະເທດຕ່າງໆດຳເນີນການກູ້ໄພໃນພາກພື້ນ,ທັງຫມົດເຫລົ່ານີ້ຈະຊອກຫາວິທີໃຫມ່ໄດ້ໃນການຮ່ວມມື.
ຂ່າວແຈ້ງວ່າ, ການສຳມະນາໃນປີນີ້ຈະຕິດແທດຕົວຈິງກວ່າເກົ່າ, ນອກຈາກຈະຫາລືບັນຫາຕ່າງໆ ແລ້ວ, ສຳມະນາກອນຍັງຈະໄປທັດສະນະສຶກສາການຝຶກຊ້ອມຢູ່ກາງແຈ້ງຂອງສະຖາບັນແພດສາດເບຊູນຂອງກອງ ທັບປົດປ່ອຍປະຊາຊົນຈີນ.
