ສັບປະດາແລກປ່ຽນການສຶກສາລະຫວ່າງຈີນປະເທດອາຊຽນຄັ້ງທຳອິດໄຂຂຶ້ນ
-----------------------------------------------------------------------------------------------------------------
ວັນທີ 26 ກໍລະກົດນີ້, ສັບປະດາແລກປ່ຽນການສຶກສາລະຫວ່າງຈີນກັບປະເທດອາຊຽນຄັ້ງທຳອິດໄດ້ໄຂຂຶ້ນຢູ່ນະຄອນກຸ້ຍຢາງທີ່ພາກຕາເວັນຕົກສຽງໃຕ້ຂອງຈີນ. ເຈົ້າໜ້າທີ່ມາຈາກກະຊວງສຶກສາທິການຈີນ ອົງການຢູເນສໂກ ກອງເລຂາອາຊຽນ, ມະຫາວິທະຍາໄລ 33 ແຫ່ງຂອງ 7 ປະເທດອາຊຽນແລະ ມະຫາວິທະຍາໄລ 18 ແຫ່ງຂອງຈີນໄດ້ເຂົ້າຮ່ວມສັບປະດາແລກປ່ຽນການສຶກສາ.
ທ່ານຈ່ຽງຊິນເຊີ້ນ ລັດຖະມົນຕີຊ່ອຍວ່າການກະຊວງສຶກສາທິການຈີນຊີ້ອອກວ່າ, ຈີນກັບປະເທດອາຊຽນເປັນປະເທດໃກ້ຄຽງ. ປະຈຸບັນ, ແຕ່ລະປີມີນັກສຶກສາອາຊຽນ 6 ໝື່ນກວ່າຄົນມາຮຽນຢູ່ຈີນ. ສັບປະດາແລກປ່ຽນການສຶກສາຄັ້ງທຳອິດມີຄວາມໝາຍສຳຄັນທີ່ສຸດຕໍ່ການເພີ່ມທະວີການຮ່ວມມືລະຫວ່າງສອງຝ່າຍ.
ເດືອນມັງກອນປີ 2007, ຈີນກັບອາຊຽນໄດ້ເຊັນ"ສັນຍາການຄ້າບໍລິການ", ໃນນັ້ນກໍລວມທັງການເປີດປະຕູແລະການຮ່ວມມືໃນຂົງເຂດການສຶກສາ, ໄດ້ສ້າງເງື່ອນໄຂທີ່ດີກວ່າເກົ່າໃຫ້ແກ່ການຍົກສູງການຮ່ວມມືການສຶກສາ. ໃນຫຼາຍປີມານີ້, ການແລກປ່ຽນແລະການຮ່ວມມືໃນດ້ານການສຶກສາລະຫວ່າງມະຫາວິທະຍາໄລຈີນກັບປະເທດອາຊີອາຄະເນຈຳນວນໜຶ່ງນັບມື້ນັບຂະຫຍາຍກວ້າງອອກ. ທ່ານນາງຫວງເວອີ້ ອະທິການບໍດີຂອງມະຫາວິທະຍາໄລກວາງຊີບອກນັກຂ່າວວ່າ, ມະຫາວິທະຍາໄລກວາງຊີໄດ້ສ້າງກົນໄກຮັບຮອງຄະແນນຂອງນັກສຶກສາກັບມະຫາວິທະຍາໄລໄຮໂຟງ, ສະໜອງການອົບຮົມໄລຍະສັ້ນໃຫ້ນັກສຶກສາຂອງມະຫາວິທະຍາໄລສົງໄຄຼສາກາພູກິດ, ແລກປ່ຽນນັກສຶກສາກັບມະຫາວິທະຍາໄລຊຸຣາບາຢາຂອງອິນໂດເນເຊຍ, ຍັງໄດ້ພ້ອມກັບມະຫາວິທະຍາໄລສວນຕຸສິດ ຣາຈາຮັດສ້າງສະຖາບັນຂົງຈື້.
ທ່ານຊຸງກຳໂກ ຫົວໜ້າສະຖາບັນສິລະປະກຳມາເລເຊຍທີ່ມາເຂົ້າຮ່ວມສັບປະດາແລກປ່ຽນການສຶກສາເທື່ອນີ້ກ່າວວ່າ, "ໃນເມືອກ່ອນ, ພວກຂ້າພະເຈົ້າເອົາຈຸດໜັກການຮ່ວມມືສາກົນຢູ່ເອີລົບແລະອາເມລິກາ, ແຕ່ປັດຈຸບັນພວກຂ້າພະເຈົ້າເຫັນວ່າຄວນຫັນສາຍຕາມາໃສ່ຈີນແລະປະເທດອາຊຽນອື່ນໆຫຼາຍກວ່າເກົ່າ."
ຕາມຂ່າວແຈ້ງວ່າ, ສັບປະດາເທື່ອນີ້ມີກິດຈະກຳຕ່າງໆຄື"ເວທີປຶກສາຫາລືອະທິການບໍດີຈີນອາຊຽນ""ກອງປະຊຸມຮ່ວມມືການສຶກສາຊັ້ນສູງຈີນອາຊຽນ""ງານວາງສະແດງການສຶກສາຈີນອາຊຽນ""ແລະ"ງານສິລະປະຊາວໜຸ່ມຈີນອາຊຽນ"ເປັນຕົ້ນ, ແລະຈະເປີດ"ແວັບໄຊຂໍ້ມູນຂ່າວສານການສຶກສາຈີນອາຊຽນ" ແລະຈະຜ່ານຮັບຮອງ"ຖະແຫຼງການກຸ້ຍຢາງ"ທີ່ມີຈຸປະສົງຍົກສູງການຮ່ວມມືດ້ານການສຶກສາລະ ຫວ່າງສອງຝ່າຍ.
