ການຕັດສິນລົງໂທດພັນລະຍາຂອງທ່ານທັກສິນເປັນສັນຍານເຕືອນເຖິງຜູ້ເປັນສາມີ
-----------------------------------------------------------------------------------------------------------------
ຕາມຂ່າວCRI: ວັນທີ31 ກໍລະກົດນີ້,ສານອາຍາໄທໄດ້ຕັດສິນລົງໂທດນາງພົດຈະມານ ຊິນນະວັດ ພັນລະຍາຂອງທ່ານທັກສິນ ຊິນນະວັດ ອະດີດນາຍົກລັດຖະມົນຕີໄທວ່າມີຄວາມຜິດ, ດ້ວຍການຕັດອິດສະຫຼະພາບ3ປີ. ການຕັດສິນດັ່ງກ່າວແມ່ນການກ່າວຟ້ອງລາຍທຳອິດທີ່ແນໃສ່ທ່ານທັກສິນແລະສະມາຊິກຄອບຄົວຂອງທ່ານ.
ໜັງສືຕັດສິນຂອງສານອາຍາໄທຂຽນວ່າ, ປີ 1997, ນາງພົດຈະມານໄດ້ມອບຫຸ້ນສ່ວນຂອງບໍລິສັດ ຊີວະນັດໃຫ້ທ່ານ ບັນນະພົດ ດາມາພົງ ທີ່ເປັນອ້າຍຕ່າງມານດາເປັນຂອງຂວັນ, ສະນັ້ນໄດ້ຫຼີກລ່ຽງການເສຍອາກອນ546ລ້ານບາດ(ຫຼືປະມານ 16 ລ້ານ 3 ແສນໂດລາ). ນາງພົດຈະມານໃນຖານະເປັນສາທາລະນະຊົນຄວນຖືກລົງໂທດ, ສະນັ້ນຈິ່ງຕັດສິນລົງໂທດຕັດອິດສະຫຼະພາບ 3 ປີ. ທ່ານບັນນະພົດແລະນາງການຈະນາພາ ຫົງເຫີນ ເລຂາສ່ວນຕົວຂອງນາງພົດຈະມານ, ກໍໄດ້ຖືກຕັດສິນລົງໂທດຕັດອິດສະຫຼະພາບ 3 ປີແລະ 2 ປີ.
ພາຍຫຼັງສານປະກາດການຕັດສິນແລ້ວ, ຈຳເລີຍທັງ 3 ຄົນຕ່າງໄດ້ຈ່າຍເງິນປະກັນຕົວ 5 ລ້ານບາດແລ້ວໄດ້ຮັບການປ່ອຍຕົວ. ຄະຕີນີ້ສາມາດຍື່ນອຸທອນໄດ້ພາຍໃນ 30 ວັນ. ເຖິງແມ່ນວ່ານາງພົດຈະມານອາດຈະມີໂອກາດຕິດຄຸກນ້ອຍທີ່ສຸດກໍຕາມ, ຂະບວນການຕັດສິນຄະຕີອີກອາດຈະແກ່ຍາວເປັນເວລາຫຼາຍປີ, ແຕ່ວ່າຄະດີຂອງນາງພົດຈະມານຫຼີກລ່ຽງອາກອນແລະຖືກຕັດສິນວ່າມີຄວາມຜິດ, ກໍໄດ້ສົ່ງສັນຍານຄື, ຄະດີທ່ານທັກສິນສໍ້ລາດບັງຫຼວງຈະກ້າວໄປສູ່ທິດທີ່ບໍ່ມີຜົນດີຕໍ່ທ່ານເອງເຊັ່ນກັນ.
ເຖິງວ່າພາຍຫຼັງເກີດລັດຖະປະຫານກເມື່ອເດືອນກັນຍາປີ 2006, ທ່ານທັກສິນໄດ້ຫ່າງເຫີນຈາກວົງການການເມືອງໄທ, ແຕ່ອິດທິພົນທາງການເມືອງຂອງທ່ານຍັງບໍ່ໄດ້ສູນຫາຍໄປ.
ຍ້ອນວ່າລັດຖະບານຂອງທ່ານສະໝັກ ສຸນທຳລະເວດຢາກດັດແກ້ລັດຖະທຳມະນູນ, ນັບແຕ່ວັນທີ 25 ພຶດສະພາມານີ້, ພັນທະມິດປະຊາຊົນເພື່ອປະຊາທິປະໄຕທີ່ປະກອບດ້ວຍກຸ່ມແລະປະຊາຊົນທີ່ຄັດຄ້ານທ່ານທັກສິນໄດ້ໂຮງຊຸມນຸມປະທ້ວງອີກ. ພັນທະມິດປະຊາຊົນເພື່ອປະຊາທິປະໄຕເຫັນວ່າ, ຢູ່ເບື້ອງຫຼັງຂອງລັດຖະບານສະໝັກແມ່ນທ່ານທັກສິນເປັນຜູ້ຄວບຄຸມ, ການດັດແກ້ລັດຖະທຳມະນູນກໍເພື່ອໃຫ້ທ່ານທັກສິນລອດພົ້ນຈາກການຕັດສິນອາຍາ, ສະນັ້ນເຂົາເຈົ້າເຫັນວ່າທ່ານສະໝັກ"ຕົວແທນຂອງທ່ານທັກສິນ"ຕ້ອງລາອອກຈາກຕຳແໜ່ງ. ໃນສະພາຜູ້ແທນລາຊະດອນ, ລັດຖະບານສະໝັກກໍປະເຊີນກັບການຕິຕຽນຢ່າງຮຸນແຮງຈາກພັກຝ່າຍຄ້ານ. ຍ້ອນລັດຖະບານສະໝັກຕົກຢູ່ໃນສະພາບການຫຍຸ້ງຍາກໃນປະຈຸບັນ, ແລະຫາງສຽງໃຫ້ຕັດສິນຄະດີທ່ານທັກສິນສໍ້ລາດບັງຫຼວງຢ່າງທ່ຽງທຳຈາກສັງຄົມນັບມື້ນັບດັງຂຶ້ນ, ການຕັດສິນຄະດີຂອງທ່ານທັກສິນກໍໄດ້ກາຍເປັນເລື່ອງສຳຄັນທີ່ມີຜົນສະທ້ອນຕໍ່ສະພາບການເມືອງຂອງໄທ.
ການຕັດສິນຄະຕີນາງພົດຈະມານຫຼີກລ່ຽງການເສຍອາກອນ, ສຳລັບທ່ານທັກສິນແລະຄອບຄົວຂອງທ່ານກໍຄືສັນຍານເຕືອນ. ສື່ມວນຊົນໄທເຫັນວ່າ, ໃນຂະບວນການຕັດສິນຄະດີກ່ຽວກັບທ່ານທັກສິນ, ທ່ານທັກສິນຕ້ອງຮັບມືຢ່າງລະມັດລະວັງ, ຖ້າບໍ່ດັ່ງນັ້ນອະດີດນາຍົກລັດຖະມົນຕີຜູ້ນີ້ອາດຈະຖືກຕິດຄຸກກໍ່ເປັນໄດ້.
