ເສັ້ນທາງວັດທະນະທຳຂອງເມືອງເຮີໂຂວ
-----------------------------------------------------------------------------------------------------------------
ພວກເຮົາຈະພາທ່ານໄປເຮີໂຂວ ເມືອງດ່ານຊາຍແດນຂອງແຂວງຢຸນນານຈີນ,ເພື່ອໄປຊົມກິດຈະກຳວັດທະນະທຳປະຊາຊົນເຂດຊາຍແດນລະຫວ່າງຈີນກັບຫວຽດນາມທີ່ຮ່ວມກັນຈັດຂຶ້ນ.
ເຮີໂຂວແມ່ນເມືອງຊາຍແດນທີ່ຢູ່ພາກໃຕ້ສຸດຂອງແຂວງຢຸນນານຈີນ,ຕິດກັບແຂວງລາວກາຍຂອງຫວຽດນາມໂດຍມີນ້ຳພຽງສາຍໜຶ່ງໄຫຼກັ້ນ,ປະມານ19ໂມງ,ນັກຂ່າວພວກເຮົາໄດ້ໄປຮອດດ່ານຊາຍແດນກໍ່ໄດ້ເຫັນແມ່ຍິງຫວຽດນາມທີ່ນຸ່ງຊຸດອາວຈາຍພື້ນເມືອງຫວຽດນາມຜ່ານດ່ານເຂົ້າມາຈີນ.ຍ້ອນຫຍັງ,ຄ່ຳປານນີ້ແລ້ວ,ໝູ່ເພື່ອນຫວຽດນາມເຫຼົ່ານີ້ຍັງຂ້າມຊາຍແດນມາເມືອງເຮີໂຂວ,ແລະຍັງແຕ່ງໜ້າແຕ່ງຕົວງາມໆປານນີ້.ຍ້ອນຄວາມສົງໃສ ພວກເຮົາກໍ່ເລີຍຕິດຕາມເຂົາເຈົ້າໄປຮອດຖະໜົນປິ່ນເຮີ.
ທີ່ຈິງແລ້ວ,ແມ່ຍິງຫວຽດນາມທີ່ນຸ່ງຊຸດອາວຈາຍ ແມ່ນໄປຖະໜົນ ປິ່ນເຮີ ເພື່ອເຂົ້າຮ່ວມກິດຈະກຳສິລະປະວັດທະນະທຳທີ່ປະຊາຊົນເປັນເຈົ້າການຈັດຂຶ້ນ.ເພງທີ່ທ່ານພວມຟັງຢູ່ນີ້ແມ່ນເພງຫວຽດນາມທີ່ຮ້ອງໂດຍຄະນະສິລະປະ"ສ້ຽວຢີເລີຢວນ"ທີ່ຢູ່ຖະໜົນປິ່ນເຮີ.ກາງເວັນ,ຖະໜົນປິ່ນເຮີແມ່ນສູນການຄ້າຂອງເມືອງເຮີໂຂວ,ຮອດຍາມກາງຄືນແຫ່ງນີ້ໄດ້ກາຍເປັນສູນວັດທະນະທຳຂອງປະຊາຊົນເຂດຊາຍແດນຈີນຫວຽດນາມ.ເຈົ້າຂອງຮ້ານຂາຍເຄື່ອງຫວຽດນາມຫຼາຍໆຄອບຄົວເມື່ອອັດປະຕູຮ້ານ,ກິນເຂົ້າແລງແລ້ວກໍ່ມັກໄປເຂົ້າຮ່ວມກິດຈະກຳສິລະປະວັດທະນະທຳຢູ່ຖະໜົນປິ່ນເຮີ,ແລ້ວກັບຄືນຫວຽດນາມກ່ອນອັດດ່ານ. ນາງເຈິນໄມແກມທີ່ມາເຂົ້າຮ່ວມກິດຈະກຳສິລະປະວັດທະນະທຳຂອງຄະນະສິລະປະ"ສຽວຢີເລີຢວນ"ບອກນັກຂ່າວວ່າ:
"ພວກເຮົາມາເຂົ້າຮ່ວມກິດຈະກຳສິນລະປະ, ມ່ວນຊື່ນຫຼາຍແລະໄດ້ອອກກຳລັງກາຍກັບໝູ່ເພື່ອນຄົນຈີນ. ເຂົ້າຮ່ວມກິດຈະກຳແບບນີ້ກໍເພື່ອເຮັດໃຫ້ຈິດໃຈເບີກ ບານມ່ວນຊື່ນ, ສຸຂະພາບແຂງແຮງ, ອີກອັນໜຶ່ງແມ່ນສາມາດແລກປ່ຽນເຄັດລັບທາງການຮ້ອງເພງແລະຟ້ອນລຳກັບໝູ່ເພື່ອນ."
ແຕ່ລະມື້, ເມື່ອຕາເວັນລັບຂອບຟ້າ, ຖະໜົນປິ່ນເຫີທີ່ມີຄວາມຍາວປະມານ3ກິໂລແມັດກໍເຕັມໄປດ້ວຍແສງສີສຽງແຫ່ງຄວາມຄຶກຄື້ນມ່ວນຊື່ນ. ແຕ່ທ່ານອາດຈະບໍ່ຄິດເລີຍວ່າ, 10ກວ່າປີກ່ອນແຫ່ງນີ້ຍັງເປັນບ່ອນທີ່ເປົ່າຫວ່າງງຽບເຫງົາ.
ລຸງໝ້າຊິ້ງຖາງອາຍຸ73ປີເວົ້າວ່າ: "ແຕ່ກີ້, ເມືອງເຫີໂຂວແມ່ນເມືອງນ້ອຍໆ, ບໍ່ມີສະຖານທີ່ບັນເທິງຈັກແຫ່ງເລີຍ, ມີແຕ່ຫຼິ້ນໄພ້ແລະຫຼິ້ນໄພ້ນົກກະຈອກເທົ່ານັ້ນ. ພາຍຫຼັງເຫີໂຂວຂອງພວກເຮົາກາຍເປັນທ່າກຳປັ່ນລະດັບໜຶ່ງຂອງລັດແລ້ວ, ເສດຖະກິດຈຶ່ງໄດ້ຮັບການພັດທະນາ, ນັກທ່ອງທ່ຽວທີ່ມາຈາກແຫ່ງຕ່າງໆກໍນັບມື້ນັບຫຼາຍຂຶ້ນ. ສາມາດເວົ້າໄດ້ວ່າ, ຖ້າບໍ່ມີເງື່ອນໄຂທີ່ພັດທະນາເສດຖະກິດແລະພື້ນຖານວັດຖຸທີ່ສົມບູນໃນມື້ນີ້, ຄົນທັງ ຫຼາຍກໍຕ້ອງດີ້ນຮົນເພື່ອຊີວິດການເປັນຢູ່, ໃສ່ໃຈໃນຄອບຄົວຂອງຕົນແລະຈະບໍ່ມີເວລາຫວ່າງມາຮ່ວມກິດຈະກຳຢູ່ແຫ່ງນີ້ດອກ."
"ກ້າວຕໍ່ໄປ,ຂ້ອຍກຽມໄປສະແດງຢູ່ສະຖານີໂທລະພາບສູນກາງຈີນຄືCCTV,ລາຍການ"ເສັ້ນທາງສູ່ດາວ"ແມ່ນລາຍການທີ່ພວກເຮົາຢາກເຂົ້າຮ່ວມທີ່ສຸດ.ພວກເຮົາຢາກເຮັດໃຫ້ຄວາມຝັນກາຍເປັນຈິງ,ກຳລັງພະຍາຍາມຢູ່."
ລາຍການ"ເສັ້ນທາງສູ່ດາວ"ຂອງໂທລະພາບສູນກາງຈີນແມ່ນເວທີສະແດງສຳລັບຄົນທົ່ວໄປ,ຕົ້ນຕໍແມ່ນລາຍການທີ່ມວນຊົນປະດິດແຕ່ງແລະສະແດງເອງ.ຍ້ອນເຂົ້າເຖິງມວນຊົນໄດ້ດີ,ຈຶ່ງມີຄົນຈຳນວນຫຼວງຫຼາຍເຂົ້າຮ່ວມ,ແລະໄດ້ສ້າງດາວທີ່ໄດ້ຮັບຄວາມນິຍົມຊົມຊອບຈາກສັງຄົມໄດ້ຫຼາຍຄົນແລ້ວ.ພວກເຮົາຂໍອວຍພອນໃຫ້ນາງໂຮແລະຄະນະສະແດງຂອງນາງຈົ່ງໄດ້ມີໂອກາດຂຶ້ນສູ່ເວທີສະແດງຂອງລາຍການ"ເສັ້ນທາງສູ່ດາວ"ຂອງໂທລະ ພາບສູນກາງຈີນໂດຍໄວ.ທີ່ຈິງແລ້ວ,ຖະໜົນປິ່ນເຮີເມືອງເຮີໂຂວທີ່ເຕັມໄປດ້ວຍຄວາມເບີກບານມ່ວນຊື່ນຈາກການຟ້ອນສຽງຮ້ອງສຽງລຳກໍ່ແມ່ນ"ເສັ້ນທາງສູ່ດາວ"ໃນຊີວິດຕົວຈິງ.ໃກ້ຈະຮອດ23ໂມງແລ້ວ,ເພື່ອກັບຄືນຫວຽດນາມທັນໃຫ້ເວລາກ່ອນອັດດ່ານຊາຍແດນຈີນຫວຽດນາມ,ກຸ່ມແມ່ຍິງທີ່ນຸ່ງຊຸດພື້ນເມືອງຂອງຫວຽດນາມເລີ່ມຟ້າວໄປທ່າເຮີໂຂວ.ນາງດາງຊຸຍງາທີ່ຫາກໍ່ສຳເລັດການສະແດງສິລະປະເວົ້າສູ່ນັກຂ່າວດ້ວຍຄວາມຕື່ນເຕັ້ນວ່າ: "ພວກເຮົາດີໃຈຫຼາຍທີ່ສາມາດເຂົ້າຮ່ວມການສະແດງສິລະປະແບບນີ້,ຮູ້ສຶກມ່ວນໃຈຫຼາຍ,ໃນຍາມທຳມະດາກໍ່ບໍ່ຄ່ອຍຮູ້ສຶກອິດເມື່ອຍ.ຍິງຊາຍນ້ອຍໃຫຍ່ມາເຕົ້າໂຮມກັນຢູ່ແຫ່ງນີ້ເພື່ອລົມກັນ ຮ້ອງເພງແລະຟ້ອນນຳກັນ,ເປັນບັນຍາກາດທີ່ມ່ວນແທ້ໆ."
