ຈາກການສ້າງສາມາເປັນເວລາ 10 ປີ, ວັນທີ 1 ມັງກອນ 2010, ເຂດການຄ້າເສລີຈີນອາຊຽນໄດ້ສ້າງສຳເລັດຕາມເວລາກຳນົດ. ຫວ່າງມໍ່ໆນີ້, ໃນເວລາເຂົ້າຮ່ວມເວທີປຶກສາຫາລືເຂດການຄ້າເສລີຈີນອາຊຽນ, ທ່ານສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ, ຜູ້ປະຈຳການລັດຖະບານລາວໄດ້ໃຫ້ສຳພາດຕໍ່ນັກຂ່າວວິທະຍຸພວກເຮົາວ່າ, ການສ້າງເຂດການຄ້າເສລີຈີນອາຊຽນມີບົດບາດອັນສຳຄັນໃນການຊຸກຍູ້ການຮ່ວມມືເສດຖະກິດການຄ້າແລະການລົງທຶນລະຫວ່າງຈີນກັບປະເທດອາຊຽນຕ່າງໆເຊິ່ງລວມທັງປະເທດລາວ. ໃນຖານະເປັນປະເທດສະມາຊິກອາຊຽນໃໝ່, ເພື່ອຮອງຮັບເຂດການຄ້າເສລີຈີນອາຊຽນ, ລາວໄດ້ຕັ້ງໜ້າເຂົ້າຮ່ວມການສ້າງເຂດການຄ້າເສລີຕ່າງໆມາໂດຍຕະຫຼອດ, ໄດ້ທຳການກະກຽມໃນດ້ານການອອກກົດໝາຍແລະຂໍ້ກຳນົດກົດລະບຽບຈົນຮອດການສ້າງພື້ນຖານໂຄງລ່າງ.
ເພື່ອສະເຫຼີມສະຫຼອງເຂດການຄ້າເສລີຈີນອາຊຽນໄດ້ສ້າງສຳເລັດຢ່າງຮອບດ້ານຕາມເວລາກຳນົດ, ວັນທີ 7 ຫາວັນທີ 8 ມັງກອນນີ້, ເວທີປຶກສາຫາລືເຂດການຄ້າເສລີຈີນອາຊຽນໄດ້ຈັດຂຶ້ນຢູ່ນະຄອນນານນິງ, ເທດສະບານເຂດປົກຄອງຕົນເອງເຜົ່າຈວ້າງກວາງຊີ. ທ່ານສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ, ຜູ້ປະຈຳການລັດຖະບານລາວໄດ້ເຂົ້າຮ່ວມເວທີປຶກສາຫາລືເທື່ອນີ້, ໃນເວລາກ່າວເຖິງຄາດໝາຍຂອງການຮ່ວມມືລະຫວ່າງຈີນກັບລາວພາຍຫຼັງເຂດການຄ້າເສລີຈີນອາຊຽນສ້າງສຳເລັດແລ້ວ, ທ່ານກ່າວວ່າ:
ຈຸດສຸມຂອງການຮ່ວມມືລາວຈີນແບບສອງຝ່າຍໃນຂອບຂອງເຂດການຄ້າເສລີຈີນອາຊຽນນີ້, ພວກເຮົາຄິດວ່າ, ອັນທີໜຶ່ງແມ່ນທາງດ້ານກະສິກຳ, ຄວນສຸມໃສ່ສົ່ງເສີມ, ແລ້ວການເຊື່ອມຕໍ່ຕາໜ່າງໄຟຟ້າລະຫວ່າງກັນ, ແລ້ວການຂຸດຄົ້ນບໍ່ແຮ່, ພ້ອມໆກັບການຮ່ວມມືທາງດ້ານເສດຖະກິດການຄ້ານີ້, ກໍ່ແຫ່ງຕ້ອງສົ່ງເສີມການທ່ອງທ່ຽວລະຫວ່າງກັນອີກ.
ສະເພາະໃນດ້ານການສົ່ງເສີມການຮ່ວມມືໃນຂະແໜງການທ່ອງທ່ຽວລະຫວ່າງຈີນກັບລາວ, ທ່ານສົມສະຫວາດ ເລັ່ງສະຫວັດກ່າວວ່າ:
ຂ້າພະເຈົ້າຮູ້ວ່າ, ປະຈຸບັນນີ້, ປະເທດຈີນນັບມື້ນັບມີຄົນທ່ອງທ່ຽວອອກນອກປະເທດຫຼາຍ, ແຕ່ວ່າໄປປະເທດລາວນີ້ຍັງບໍ່ທັນຫຼາຍເທື່ອ, ແຕ່ວ່າຫາກໄດ້ມີທ່າອ່ຽງເພີ່ມຂຶ້ນທຸກປີ, ຄວາມຫຍຸ້ງຍາກບໍ່ແມ່ນຍ້ອນຝ່າຍລາວ, ແມ່ນຍ້ອນສອງຝ່າຍບໍ່ທັນຕົກລົງກັນເທື່ອກ່ຽວກັບຈະຍົກເວັ້ນວິຊາຫຼືບໍ່ຍົກເວັ້ນວິຊາ. ຂ້າພະເຈົ້າໄດ້ຮັບຂ່າວວ່າ, ແຂວງໄຫຫຼໍ້າ, ຂະເຈົ້າດຽວນີ້, ຕົກລົງວ່າ, ປະເທດໂຢລົບຈຳນວນໜຶ່ງມາໄຫຫຼໍ້າ, ຂະເຈົ້າກໍ່ຍົກເວັ້ນວິຊາ, ສະນັ້ນ, ລາວກໍ່ຍິນດີຊິເຈລະຈາກັບຈີນເພື່ອປຶກສາຍົກເວັ້ນວິຊາລະຫວ່າງກັນ, ສະນັ້ນ, ກໍ່ຫວັງວ່າ, ສອງຝ່າຍຈະໄດ້ເຈລະຈາກັນໃນໄລຍະໄວໆນີ້ແລ້ວ, ເຮັດໃຫ້ການໄປມາຫາສູ່ກັນມີຄວາມສະດວກ.
ໃນດ້ານການດຶງດູດນັກທຸລະກິດຕ່າງປະເທດໄປລົງທຶນຢູ່ລາວ, ທ່ານສົມສະຫວາດ ເລັ່ງສະຫວັດເຜີຍໃຫ້ຮູ້ວ່າ, ລາວຈະອອກກົດໝາຍວ່າດ້ວຍ ການສົ່ງເສີມການລົງທຶນຂອງຕ່າງປະເທດສະບັບໃໝ່, ແລະຈະພິຈາລະນານະໂຍບາຍພາສີອາກອນໃໝ່, ເພື່ອສ້າງສະພາບແວດລ້ອມສະດວກກວ່າເກົ່າໃຫ້ແກ່ນັກທຸລະກິດຕ່າງປະເທດໄປລົງທຶນຢູ່ລາວ, ທ່ານກ່າວວ່າ:
ການສົ່ງເສີມການລົງທຶນຂອງຕ່າງປະເທດພວກເຮົາແມ່ນວາງລວມໝົດສຳລັບທຸກປະເທດທີ່ມີຄວາມມຸ້ງຫວັງໄປລົງທຶນຢູ່ລາວ, ດຽວນີ້, ສະພາແຫ່ງຊາດກຳລັງພິຈາລະນາເພື່ອອະນຸມັດກົດໝາຍວ່າດ້ວຍການສົ່ງເສີມການລົງທຶນຂອງຕ່າງປະເທດສະບັບໃໝ່, ນອກຈາກນັ້ນ, ກະຊວງການເງິນກໍ່ໄດ້ສຶກສານະໂຍບາຍດ້ານພາສີອາກອນ. ຂ້າພະເຈົ້າເຊື່ອວ່າ, ກົດໝາຍສົ່ງເສີມການລົງທຶນຂອງຕ່າງປະເທດເມື່ອສະພາໄດ້ຮັບຮອງເອົາແລ້ວ, ຕ່າງປະເທດຄົງຈະມີຄວາມພໍໃຈຫຼາຍຂຶ້ນ. ປະຈຸບັນນີ້, ນັກລົງທຶນຕ່າງປະເທດເຂົ້າມາຕິດຕາມຮູ້ວ່າ, ເປັນທີ່ດຶງດູດຈິດໃຈຂະເຈົ້າ, ຂະເຈົ້າກໍຂໍອະນຸມັດມາລົງທຶນຢູ່ລາວຫຼາຍຂຶ້ນແລ້ວ, ໃນນັ້ນກໍ່ລວມທັງນັກທຸລະກິດຈີນຫຼວງຫຼາຍ.
ລາວແມ່ນສະມາຊິກໃໝ່ຂອງອາຊຽນ, ຮອດປີ 2015, ສິນຄ້າ 90% ຂອງລາວທີ່ສົ່ງເຂົ້າຈີນຈຶ່ງຈະຍົກເວັ້ນພາສີ, ກ່ອນໜ້ານີ້, ເພື່ອນຳໃຊ້ເຂດການຄ້າເສລີຈີນອາຊຽນສົ່ງເສີມການຄ້າລະຫວ່າງຈີນກັບລາວ, ທ່ານສົມສະຫວາດ ເລັ່ງສະຫວັດເຫັນວ່າ, ບັນຫາທີ່ຕ້ອງແກ້ໄຂດ່ວນກວ່າໝູ່ກໍ່ແມ່ນ ການເຊັນສັນຍາໃໝ່ກ່ຽວກັບມາດຕະການໃນການກວດກາຄຸນນະພາບຜ່ານດ່ານຕໍ່ສິນຄ້າລາວທີ່ສົ່ງເຂົ້າຈີນ, ທ່ານກ່າວວ່າ:
ບັນຫາແມ່ນວ່າ, ການສ້າງເຂດການຄ້າເສລີ, ປະຈຸບັນນີ້, ບໍ່ທັນໄດ້ນຳຜົນປະໂຫຍດມາໃຫ້ປະເທດລາວຫຼາຍເທົ່າໃດເທື່ອ, ເພາະວ່າປະເທດລາວຍັງບໍ່ທັນເປັນສະມາຊິກອົງການການຄ້າໂລກເທື່ອ, ການຈະສົ່ງສິນຄ້າຫຼາຍອັນມາຈີນນີ້, ຈຳເປັນຕ້ອງມີການກຽມຫຼາຍອັນເພື່ອໃຫ້ເປັນຕາມກົດຂໍ້ບັງຄັບຂອງອົງການການຄ້າໂລກ. ສະນັ້ນ, ຈີນກັບລາວຍັງຈະຕ້ອງໄດ້ສືບຕໍ່ເຈລະຈາກັນເຊັນສັນຍາກັນ, ໃນນັ້ນ, ລວມທັງສັນຍາກ່ຽວກັບການກວດກາພືດແລະສັດ. ຂ້າພະເຈົ້າຄິດວ່າອັນນີ້ແມ່ນຈຸດສຸມທີ່ຕ້ອງແກ້ໄຂດ່ວນ.
ເພື່ອຕັ້ງໜ້າຮອງຮັບເຂດການຄ້າເສລີຈີນອາຊຽນ, ລາວໄດ້ກຽມປັບຕົວໃນດ້ານຕ່າງໆ, ທ່ານສົມສະຫວາດ ເລັ່ງສະຫວັດກ່າວວ່າ:
ຂ້າພະເຈົ້າຄິດວ່າການສ້າງເຂດການຄ້າເສລີຈີນອາຊຽນແມ່ນມີຄວາມໝາຍສຳຄັນທີ່ສຸດຕໍ່ທາງຈີນແລະອາຊຽນໃນການສົ່ງເສີມການຮ່ວມມືທາງດ້ານເສດຖະກິດການຄ້າແລະການລົງທຶນລະຫວ່າງກັນ, ສຳລັບປະເທດລາວ, ເພື່ອຮອງຮັບການສ້າງຕັ້ງເຂດການຄ້າເສລີນີ້, ລັດຖະບານລາວກໍ່ໄດ້ມີການກະກຽມໃນຫຼາຍໆດ້ານ. ທາງດ້ານນິຕິກຳ, ພວກເຮົາກໍ່ໄດ້ມີການດັດແປງກົດໝາຍຕ່າງໆເພື່ອໃຫ້ສອດໂຄ່ງກັບເຂດການຄ້າເສລີ. ຢູ່ເຂດຊາຍແດນ, ພວກເຮົາກໍ່ໄດ້ປຶກສາຫາລືກັບຝ່າຍຈີນ, ໃນຂອບສອງຝ່າຍ, ກໍ່ຄືໃນຂອບຂອງ GMS, ເພື່ອອຳນວຍຄວາມສະດວກໃນການຂົນສົ່ງ, ການໄປມາຫາສູ່ກັນ. ກ່ຽວກັບເສັ້ນທາງເຊື່ອມຕໍ່ກັນນີ້, ພວກເຮົາກໍ່ໄດ້ສຳເລັດການສ້າງເສັ້ນທາງເລກ 3 ບົນເສັ້ນທາງດ່ວນຄຸນມິງ-ບາງກອກ, ບໍລິສັດຂອງຈີນແລະໄທໄດ້ຮ່ວມກັນປະມູນສ້າງຂົ້ວຂ້າມນ້ຳຂອງລະຫວ່າງຫ້ວຍຊາຍກັບຊຽງຂອງ, ສຳເລັດໃນວັນທີ 8 ມັງກອນນີ້.
