ຕາມຂ່າວ CRI: ວັນທີ 24 ກຸມພານີ້, ກອງປະຊຸມພິເສດຄັ້ງທີ 11 ຂອງສະພາບໍລິຫານງານຂອງໂຄງການສິ່ງແວດລ້ອມສະຫະປະຊາດຫຼື UNDP ແລະເວທີປຶກສາຫາລືສິ່ງແວດລ້ອມລະດັບລັດຖະມົນຕີທົ່ວໂລກໄດ້ຈັດຂຶ້ນຢູ່ເກາະບາຫຼີ. ຜູ້ແທນແລະຜູ້ຊ່ຽວຊານສິ່ງແວດລ້ອມທີ່ມາຈາກ 140 ປະເທດແລະເຂດແຄ້ວນໄດ້ເຂົ້າຮ່ວມເວທີປຶກສາຫາລືເທື່ອນີ້.
ມື້ດຽວກັນ, ໃນເວລາກ່າວຄຳປາໄສໃນພິທີໄຂກອງປະຊຸມ, ທ່ານຊູຊີໂລ ບາມບາງ ຢູໂດໂຢໂນ, ປະທານາທິບໍດີອິນໂດເນເຊຍກ່າວວ່າ, ກອງປະຊຸມເທື່ອນີ້ມີຄວາມໝາຍສຳຄັນຕໍ່ການແກ້ໄຂບັນຫາສິ່ງແວດລ້ອມທີ່ນັບມື້ນັບຊຸດໂຊມລົງໃນປະຈຸບັນ. ທ່ານຫວັງວ່າກອງປະຊຸມເທື່ອນີ້ຈະສາມາດຊຸກຍູ້ໃຫ້ຝ່າຍຕ່າງໆສາມາດຊອກຫາວິທີທີ່ທັງສາມາດພັດທະນາເສດຖະກິດແລະທັງບໍ່ຕ້ອງເສຍຄ່າຕອບແທນດ້ວຍຄວາມສຸກຂອງລູກຫຼານໄດ້.
ທ່ານຊູຊິໂລຍັງຮຽກຮ້ອງໃຫ້ປະເທດຕ່າງໆຮ່ວມກັນທຳຄວາມພະຍາຍາມປົກປ້ອງຊີວະນາໆພັນໃນທົ່ວໂລກ, ຕັ້ງໜ້າພັດທະນາເສດຖະກິດສີຂຽວເພື່ອແກ້ໄຂຄວາມຂັດແຍ່ງລະຫວ່າງການພັດທະນາເສດຖະກິດກັບສິ່ງແວດລ້ອມ.
ຫົວຂໍ້ຂອງກອງປະຊຸມເທື່ອນີ້ແມ່ນ ການອະນຸລັກສິ່ງແວດລ້ອມພາຍໃຕ້ລະບົບຫຼາຍຝ່າຍ. ນີ້ແມ່ນເວທີປຶກສາຫາລືສິ່ງແວດລ້ອມທີ່ມີຂະໜາດໃຫຍ່ທີ່ສຸດທີ່ສະຫະປະຊາຊາດຈັດຂຶ້ນຫຼັງກອງປະຊຸມການປ່ຽນແປງຂອງດິນຟ້າອາກາດໂກແປັນຮາກໃນປີກາຍນີ້.
