ສະພາປະຊາຊົນແຫ່ງຊາດຈີນອະນຸມັດສັນຍາວ່າດ້ວຍກົງສູນຈີນແລະຟີລິບປິນ
(GMT+08:00) 2010-02-26 16:41:17 cri
ຕາມຂ່າວCRI:ວັນທີ 26 ກຸມພານີ້,ຄະນະປະຈຳສະພາປະຊາຊົນແຫ່ງຊາດຈີນໄດ້ອະນຸມັດສັນຍາວ່າດ້ວຍກົງສູນຈີນແລະຟີລິບປິນ.
ໃນເດືອນຕຸລາປີກາຍ,ລັດຖະມົນຕີວ່າການກະຊວງການຕ່າງປະເທດຂອງຈີນແລະຟີລິບປິນໄດ້ລົງນາມໃນສັນຍາດັ່ງກ່າວຢູ່ມານີລາ.ເນື້ອໃນຕົ້ນຕໍມີຄື:ນິຍາມຂອງຄຳສັບກ່ຽວກັບກົງສູນ;ການຕັ້ງສະຖານກົງສູນແລະການແຕ່ງຕັ້ງກົງສູນໃຫຍ່;ບົດບາດຂອງກົງສູນ;ຄວາມສະດວກ ສິດທິພິເສດແລະສິດຍົກເວັ້ນສຳລັບສະຖານກົງສູນແລະສະມາຊິກແລະອື່ນໆ.
ລັດຖະບານຈີນເຫັນວ່າ,ການອະນຸມັດແລະມີຜົນບັງຄັບໃຊ້ຂອງສັນຍາດັ່ງກ່າວ,ມີຜົນດີຕໍ່ການເພີ່ມທະວີການຮ່ວມມືລະຫວ່າງຈີນຟີລິບປິນໃນຂົງເຂດກົງສູນ,ແລະຊຸກຍູ້ການພົວພັນຮ່ວມມືຍຸດທະສາດລະຫວ່າງສອງປະເທດໃຫ້ຂະຫຍາຍໄປໜ້າຕື່ມອີກ.
ນັບແຕ່ຈີນຟີລິບປິນສ້າງສາຍພົວພັນທາງການທູດເມື່ອປີ 1975 ເປັນຕົ້ນມາ,ການພົວພັນລະຫວ່າງສອງປະເທດໄດ້ມີການຂະຫຍາຍຕົວຢ່າງເປັນປົກກະຕິ.ໃນຫຼາຍປີມານີ້,ຄຽງຄູ່ກັບການພົວພັນລະຫວ່າງສອງປະເທດຂະຫຍາຍໄປໜ້າຢ່າງບໍ່ຢຸດຢັ້ງ,ການໄປມາຫາສູ່ກັນລະຫວ່າງປະຊາຊົນສອງປະເທດໄດ້ນັບມື້ນັບຫຼາຍຂຶ້ນ.ປະຈຸບັນ,ຈີນເປັນແຫຼ່ງນັກທ່ອງທ່ຽວອັນດັບທີ 5 ຂອງຟີລິບປິນ,ຟີລິບປິນກໍ່ເປັນແຫຼ່ງນັກທ່ອງທ່ຽວອັນດັບທີ 7 ຂອງຈີນ.
