WFP ຕັ້ງສາງອາຫານຮັບມືສຸກເສີນຢູ່ມະເລເຊຍ
(GMT+08:00) 2010-02-26 16:48:45 cri
ຕາມຂ່າວສານຊີນຮວາ:ວັນທີ 25 ກຸມພານີ້,ຢູ່ກົວລາລຳເປີ,ໂຄງການອາຫານໂລກສະຫະປະຊາຊາດຫຼື WFP ໄດ້ເຊັນສັນຍາກັບລັດຖະບານມະເລເຊຍ,ຈະຕັ້ງສາງອາຫານຮັບມືສຸກເສີນທາງມະນຸດສະທຳຂອງສະຫະປະຊາຊາດຢູ່ມະເລເຊຍ,ເພື່ອໃຫ້ການຊ່ວຍເຫຼືອສຸກເສີນດ້ານມະນຸດສະທຳຢ່າງທັນການໃນເວລາເກີດໄພທຳມະຊາດຢູ່ພາກພື້ນອາຊີປາຊີຟິກ.
ມື້ດຽວກັນ,ກະຊວງການຕ່າງປະເທດມະເລເຊຍຖະແຫຼງວ່າ,ມະເລເຊຍເຫັນດີໃຫ້ສະຫະປະຊາຊາດຕັ້ງສາງອາຫານຮັບມືສຸກເສີນດ້ານມະນຸດສະທຳຢູ່ມະເລເຊຍ,ນີ້ເປັນການຢັ້ງຢືນທີ່ສະແດງໃຫ້ເຫັນວ່າ,ມະເລເຊຍຍິນດີພະຍາຍາມປະຕິບັດຕາມພັນທະຊ່ວຍເຫຼືອດ້ານມະນຸດສະທຳ,ພ້ອມກັນນັ້ນ,ກໍ່ສະແດງໃຫ້ເຫັນວ່າ,ມະເລເຊຍຍິນດີເສີມຂະຫຍາຍບົດບາດອັນຕັ້ງໜ້າໃນດ້ານການຊ່ວຍເຫຼືອດ້ານມະນຸດສະທຳໃນພາກພື້ນ.
ມື້ດຽວກັນ,ຢູ່ກົວລາລຳເປີ,WFP ກໍ່ຖະແຫຼງວ່າ,ນີ້ແມ່ນສາງອາຫານຮັບມືສຸກເສີນດ້ານມະນຸດສະທຳແຫ່ງທີ 5 ໃນໂລກຂອງ WFP ຫຼັງຈາກອີຕາລີ,ສະຫະລັດອາຣັບເອມີເຣດ,ປານາມາແລະການາ.
