ທ່ານອານນັນກ່າວປາຖະກະຖາຢູ່ຈາກາຕາ
(GMT+08:00) 2010-03-05 16:23:27 cri
ຕາມຂ່າວCRI, ວັນທີ4ມີນານີ້, ໃນເວລາທ່ານໂກຟີ ອານນັນ ອະດີດເລຂາທິການໃຫຍ່ສະຫະປະຊາຊາດກ່າວຄຳປາໄສຕໍ່ບຸກຄົນຊັ້ນນຳຂອງອິນໂດເນເຊຍ, ທ່ານຮຽກຮ້ອງໃຫ້ອິນໂດເນເຊຍຈົ່ງຕາງໜ້າປະເທດພວມພັດທະນາ, ເສີມຂະຫຍາຍບົດບາດໃນກຸ່ມ20ປະເທດ ຫຼື G20, ນຳພາໂລກປະເຊີນໜ້າກັບສິ່ງທ້າທາຍຕ່າງໆໃນປະຈຸບັນ.
ຕາມຂ່າວແຈ້ງວ່າ, ຕອນບ່າຍວັນທີ4ມີນານີ້, ຢູ່ທຳນຽບປະທານາທິບໍດີທີ່ຈາກາຕາ, ທ່ານອານນັນໄດ້ເຂົ້າຢ້ຽມຄຳນັບທ່ານຊູຊີໂລ ບຳບັງ ຢຸດໂຮໂຢໂນ ປະທານາທິບໍດີອິນໂດເນເຊຍ, ແລະໄດ້ກ່າວປາຖະກະຖາຫົວຂໍ້ສະເພາະໃນງານສຳມະນາຄູສອນຂອງປະທານາທິບໍດີ. ທ່ານຊູຊີໂລ, ທ່ານເດນີ ບຸດດີໂອໂນ ຮອງປະທານາທິບໍດີແລະລັດຖະມົນຕີຫຼາຍທ່ານຂອງອິນໂດເນເຊຍໄດ້ເຂົ້າຮ່ວມຟັງປາຖະກະຖາ. ທ່ານອານນັນກ່າວວ່າ, ຜູ້ນຳຂອງກຸ່ມ8ປະເທດ ຫຼື G8 ບໍ່ໄດ້ໃຫ້ຄຳຕອບຕໍ່ບັນຫາສາກົນ, ຖານະບົດບາດຂອງກຸ່ມ8ປະເທດພວມຕົກຕ່ຳລົງ, ແຕ່ກຸ່ມ20ປະເທດພວມມີບົດບາດສູງຂຶ້ນ. ສະນັ້ນ, ມີແຕ່ທົ່ວໂລກສາມັກຄີກັນຈິ່ງແມ່ນວິທີແກ້ໄຂບັນຫາທົ່ວໂລກ, ແລະຫວັງວ່າອິນໂດເນເຊຍຈະສາມາດຕາງໜ້າປະເທດພວມພັດທະນາທີ່ບໍ່ສາມາດເຂົ້າເປັນສະມາຊິກກຸ່ມ20ປະເທດ.
ທ່ານອານນັນຍັງໄດ້ໄປຢ້ຽມຢາມສຳນັກງານຂອງເລຂາອາຊຽນທີ່ຕັ້ງຢູ່ຈາກາຕາແລະພົບປະກັບທ່ານສຸຣິນ ພິດຊຸວັນ, ສອງຝ່າຍໄດ້ແລກປ່ຽນຄວາມເຫັນກ່ຽວກັບຫຼາຍບັນຫາສາກົນ. ທ່ານກ່າວວ່າ, ອົງການຈັດຕັ້ງພາກພື້ນຕ້ອງມີປະຕິກິລິຍາໄວຕອບທີ່ສຸດຕໍ່ບັນຫາພາຍໃນ, ເພາະວ່າບັນຫາພາຍໃນຈະກາຍເປັນບັນຫາສາກົນໃນທີ່ສຸດ, ສ່ວນວິທີແກ້ໄຂທີ່ດີທີ່ສຸດແມ່ນຮ່ວມມືກັນເພື່ອແກ້ໄຂບັນຫາ.
