ພະນັກງານຊາວໜຸ່ມລາວ 40 ຄົນຮ່ວມຊຸດອົບຮົມວຽກງານຢູ່ກວາງຊີຈີນ
(GMT+08:00) 2010-03-12 17:11:30 cri
ຕາມຂ່າວ CRI: ວັນທີ 11 ມີນານີ້, ສະຖາບັນແລກປ່ຽນຊາວໜຸ່ມສາກົນຂອງເຂດກວາງຊີຈີນໄຂຊຸດອົບຮົມສຳລັບພະນັກງານຊາວໜຸ່ມສາກົນລະດັບສູງຊຸດທີ 18, ພະນັກງານຊາວໜຸ່ມລາວ 40 ຄົນກໍ່ໄດ້ເຂົ້າຊຸດອົບຮົມດັ່ງກ່າວ.
ພະນັກງານຊາວໜຸ່ມລາວ 40 ຄົນຊຸດນີ້ຕົ້ນຕໍແມ່ນພະນັກງານຂອງສູນກາງຊາວໜຸ່ມປະຊາຊົນປະຕິວັດລາວແລະພະນັກງານຊາວໜຸ່ມຂອງກະຊວງຕ່າງໆລັດຖະບານລາວ. ໃນໄລຍະ 2 ເດືອນ, ເຂົາເຈົ້າຈະຮຽນຄວາມຮູ້ໃນດ້ານຕ່າງໆຂອງຈີນ, ເຊັ່ນ: ການເມືອງ, ເສດຖະກິດ, ວັດທະນະທຳ, ວິທະຍາສາດເຕັກນິກແລະວຽກງານຊາວໜຸ່ມເປັນຕົ້ນ, ລົງເລິກສຳຫຼວດສະພາບການພັດທະນາຂອງຊົນນະບົດ, ວິສາຫະກິດ, ໂຮງຮຽນແລະຄຸ້ມຊຸມຊົນຂອງຈີນ, ດຳເນີນການແລກປ່ຽນແລະປຶກສາຫາລືກັບຊາວໜຸ່ມແຫ່ງຕ່າງໆຂອງຈີນ.
ນັບແຕ່ຈັດຊຸດອົບຮົມພະນັກງານຊາວໜຸ່ມສາກົນລະດັບສູງເຂດກວາງຊີໃນປີ 2002 ເປັນຕົ້ນມາ, 10 ປະເທດອາຊຽນໄດ້ສົ່ງພະນັກງານຊາວໜຸ່ມມາເຂົ້າຮ່ວມການອົບຮົມ. ໃນນັ້ນ, ມີຊາວໜຸ່ມລາວໄປອົບຮົມຢູ່ສະຖາບັນແລກປ່ຽນຊາວໜຸ່ມສາກົນເຂດກວາງຊີ 160 ຄົນແລ້ວ.
