ວັນທີ 14 ມີນານີ້, ທ່ານອະທິສິດ ເວດຊາຊີວະ ນາຍົກລັດຖະມົນຕີໄທກ່າວວ່າ,ການປະທ້ວງທີ່ຕ້ານລັດຖະບານຂອງກຸ່ມແນມໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດ ຫຼື ກຸ່ມເສື້ອແດງ ຄວນດຳເນີນໄປໂດຍສັນຕິ ແລະ ປາສະຈາກກຳລັງຮຸນແຮງ.
ໃນເວລາກ່າວຄຳປາໄສທາງໂທລະພາບປະຈຳສັບປະດາ ທີ່ຈັດຂຶ້ນໃນຕອນເຊົ້າມື້ດຽວກັນ, ທ່ານອະພິສິດກ່າວວ່າ, ລັດຖະບານຕົກລົງ"ປະຕິບັດກົດໝາຍວ່າດ້ວຍຄວາມໝັ້ນຄົງພາຍໃນປະເທດ"ຢູ່ນະຄອນຫຼວງບາງກອກ ແລະ 7 ຈັງຫວັດອ້ອມຂ້າງ, ຈຸດປະສົງແມ່ນປ້ອງກັນກິດຈະກຳດ້ວຍກຳລັງຮຸນແຮງ ພ້ອມທັງເຫດການທີ່ຄາດຄະເນບໍ່ໄດ້.
ທ່ານຂອບໃຈຜູ້ສະໜັບສະໜູນກຸ່ມເສື້ອແດງທີ່ມາຈາກພາກເໜືອ ແລະ ພາກອີສານຂອງໄທທີ່ສາມາດປະສານສົມທົບກັບອົງການຄວາມໝັ້ນຄົງ, ກວດກາອາວຸດຢູ່ສະຖານທີ່ທີ່ກຳນົດໄວ້. ທ່ານກ່າວຢ້ຳວ່າ, ລັດຖະບານໄທຈະບໍ່ກັ້ນກາງບໍ່ໃຫ້ກຸ່ມເສື້ອແດງຈັດການປະທ້ວງທີ່ຕ້ານລັດຖະບານຂະໜາດໃຫຍ່, ແຕ່ທ່ານຮຽກຮ້ອງຢ່າງແຮງກ້າໃຫ້ຜູ້ປະທ້ວງຈັດການໂຮມຊຸມນຸມໂດຍສັນຕິ.
