ລັດຖະບານໄທກຽມເຈລະຈາກັບກຸ່ມເສື້ອແດງ
(GMT+08:00) 2010-03-17 18:49:29 cri
ຕາມຂ່າວ cri: ຕອນບ່າຍວັນທີ 17 ມີນານີ້, ຢູ່ບາງກອກ, ທ່ານສຸເທບ ເທືອກສຸບັນ, ຮອງນາຍົກລັດຖະມົນຕີໄທທີ່ຮັບຜິດຊອບວຽກງານຄວາມໝັ້ນຄົງກ່າວວ່າ, ປະຕູແຫ່ງການເຈລະຈາລະຫວ່າງລັດຖະບານໄທກັບທ່ານທັກສິນ ຊິນນະວັດແມ່ນເປີດຢູ່ອະດີດນາຍົກລັດຖະມົນຕີ, ລັດຖະບານໄທກຳລັງພະຍາຍາມຊອກຫາຊ່ອງທາງເຈລະຈາກັບກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດໄທຫລືກຸ່ມເສື້ອແດງທີ່ສະໜັບສະໜູນທ່ານທັກສິນ.
ມື້ດຽວກັນ, ທ່ານສຸເທບ ເທືອກສຸບັນຈັດກອງປະຊຸມກັບເຈົ້າໜ້າທີ່ກອງບັນຊາການຄວາມໝັ້ນຄົງແຫ່ງຊາດໄທຢູ່ຄ້າຍທະຫານຮາບທີ 11 ຂອງທະຫານບົກທີ່ບາງກອກ, ປະເມິນສະຖານະການໃນປະຈຸບັນ. ທ່ານກ່າວວ່າ, ລັດຖະບານໄທກຽມເຈລະຈາກັບທ່ານທັກສິນໃນທຸກເວລາ, ເຖິງວ່ານີ້ແມ່ນເລື່ອງທີ່ຍາວນານແລະເຕັມໄປດ້ວຍຄວາມຫຍຸ້ງຍາກ.
ທ່ານສຸເທບຍັງກ່າວວ່າ, ພາກສ່ວນທີ່ກ່ຽວຂ້ອງຂອງລັດຖະບານກຳລັງກຽມເຈລະຈາກັບຜູ້ປະທ້ວງຂອງກຸ່ມເສື້ອແດງ, ການເຈລະຈາຕ້ອງດຳເນີນຢູ່ໃນຂອບເຂດທີ່ກົດໝາຍອະນຸຍາດ, ລັດຖະບານຈະທຳຄວາມພະຍາຍາມສຸດຂີດເພື່ອຜ່ອນສັ້ນຜ່ອນຍາວ, ເພື່ອຫຼີກເວັ້ນບໍ່ໃຫ້ສອງຝ່າຍເກີດການປະທະກັນດ້ວຍກຳລັງຮຸນແຮງ. ພ້ອມກັນນັ້ນ, ທ່ານກໍ່ຮຽກຮ້ອງໃຫ້ຜູ້ປະທ້ວງຈົ່ງໃຈເຢັນແລະອົດກັ້ນເພື່ອຄວາມໝັ້ນຄົງຂອງປະເທດແລະປະຊາຊົນ.
