ພັກກອມມູນິດຈີນອວຍພອນພັກປະຊາຊົນປະຕິວັດລາວສ້າງຕັ້ງຂຶ້ນຄົບຮອບ 55 ປີ
(GMT+08:00) 2010-03-22 16:19:25 cri
ຕາມຂ່າວ CRI: ວັນທີ 22 ມີນານີ້, ຄະນະກຳມະການສູນກາງພັກກອມມູນິດຈີນສົ່ງໂທລະເລກໄປຍັງຄະນະບໍລິຫານງານສູນກາງພັກປະຊາຊົນປະຕິວັດລາວ, ອວຍພອນພັກປະຊາຊົນປະຕິວັດລາວສ້າງຕັ້ງຂຶ້ນຄົບຮອບ 55 ປີ.
ໂທລະເລກຂຽນວ່າ, ໃນ 55 ປີທີ່ຜ່ານມາ, ພັກປະຊາຊົນປະຕິວັດລາວໄດ້ນຳພາປະຊາຊົນລາວ, ສຳເລັດພາລະກິດປົດປ່ອຍຊາດແລະທ້ອນໂຮມປະເທດເປັນເອກະພາບກັນຢ່າງມີໄຊ, ແລະໄດ້ຮັບຜົນສຳເລັດອັນເດັ່ນຊັດໃນການສ້າງສາສັງຄົມນິຍົມແລະພາລະກິດການປ່ຽນແປງໃໝ່. ພວກຂ້າພະເຈົ້າຮູ້ສຶກປິຕິຊົມຊື່ນຢ່າງຈິງໃຈຕໍ່ຜົນສຳເລັດຂອງພາລະກິດປ່ຽນແປງໃໝ່ຂອງລາວ. ເຊື່ອວ່າ, ພາຍໃຕ້ການນຳພາອັນເຂັ້ມແຂງຂອງພັກປະຊາຊົນປະຕິວັດລາວທີ່ມີສະຫາຍຈູມມະລີ ໄຊຍະສອນເປັນເລຂາທິການໃຫຍ່, ຈະສ້າງລາວເປັນປະເທດອຸດສາຫະກຳແລະທັນສະໄໝຢ່າງແນ່ນອນ.
ໂທລະເລກຂຽນວ່າ, ພັກແລະລັດຖະບານຈີນຖືມິດຕະພາບທີ່ມີມູນເຊື້ອລະຫວ່າງຈີນລາວເປັນຊັບສິນອັນລ້ຳຄ່າຂອງສອງພັກ, ສອງລັດແລະປະຊາຊົນສອງຊາດມາໂດຍຕະຫຼອດ, ເອົາໃຈໃສ່ນຳການປັບປຸງແລະພັດທະນາມິດຕະພາບທີ່ມີມູນເຊື້ອລະຫວ່າງຈີນລາວຈາກລະດັບຍຸດທະສາດມາໂດຍຕະຫຼອດ. ຈີນຍິນດີຮ່ວມກັນກັບລາວ, ອອກແຮງສຸດຂີດເພື່ອຈັດຕັ້ງປະຕິບັດຄວາມເຫັນເອກະສັນກັນອັນສຳຄັນທີ່ຜູ້ນຳສູງສຸດຂອງສອງພັກສອງລັດຕົກລົງກັນ, ເປີດກວ້າງຂົງເຂດໃໝ່ແຫ່ງການຮ່ວມມືລະຫວ່າງສອງພັກສອງລັດຢ່າງບໍ່ຢຸດຢັ້ງ, ສືບຕໍ່ສ້າງແລະລົງເລິກເນື້ອໃນແຫ່ງການຮ່ວມມືແບບມິດຕະພາບລະຫວ່າງສອງຝ່າຍ, ເຮັດໃຫ້ມິດຕະພາບລະຫວ່າງຈີນລາວສືບຕໍ່ໄປຕະຫຼອດການ.
