ໄທຈະຕໍ່ເວລາປະຕິບັດພະລາຊະບັນຍັດຮັກສາຄວາມໝັ້ນຄົງ
(GMT+08:00) 2010-03-22 16:47:45 cri
ຕາມຂ່າວສານຊິນຮວາ,ວັນທີ22ມີນານີ້,ທ່ານສຸເທບ ເທືອກສຸບັນ ຮອງນາຍົກລັດຖະມົນຕີທີ່ຮັບຜິດຊອບວຽກງານຄວາມໝັ້ນຄົງຂອງໄທກ່າວວ່າ,ທ່ານຈະຮ້ອງຂໍກອງປະຊຸມຄະນະລັດຖະບານອະນຸມັດໃຫ້ຕໍ່ເວລາປະຕິບັດພະລາຊະບັນຍັດການຮັກສາຄວາມໝັ້ນຄົງໃນລາຊະອານາຈັກໄປຮອດວັນທີ30ເດືອນນີ້,ແລະສະເໜີໃຫ້ປະຕິບັດຢູ່ພຽງນະຄອນຫຼວງບາງກອກທີ່ມີໜ່ວຍງານລະດັບກະຊວງຫຼາຍແຫ່ງແລະສະໜາມບິນສາກົນສຸວັນນະພູມທີ່ເປັນສະໜາມບິນໃຫຍ່ທີ່ສຸດແລະບໍລິເວນໃກ້ຄຽງຄືຈັງຫວັດນົນທະບູລີແລະຈັງຫວັດສະມຸດປາການ.
ຄະນະລັດຖະບານໄທໄດ້ຕົກລົງໃນຕົ້ນເດືອນນີ້ວ່າ,ປະຕິບັດພະລາຊະບັນຍັດນີ້ຢູ່ນະຄອນຫຼວງບາງກອກພ້ອມດ້ວຍ21ອຳເພີຂອງ7ຈັງຫວັດທີ່ຢູ່ບໍລິເວນໃກ້ຄຽງແຕ່ວັນທີ11ຫາວັນທີ23ເດືອນນີ້,ອະນຸຍາດໃຫ້ທະຫານສາມາດຊ່ວຍຕຳຫຼວດຮັກສາຄວາມສະຫງົບ.
ທ່ານສຸເທບເທືອກສຸບັນຍັງກ່າວວ່າ,ກອງປະຊຸມປະຈຳອາທິດນີ້ຂອງຄະນະລັດຖະບານໄທຈະປ່ຽນໄປຈັດຢູ່ທີ່ກະຊວງສາທາລະນະສຸກທີ່ຢູ່ຈັງຫວັດນົນທະບູລີທາງພາກເໜືອຂອງນະຄອນຫຼວງບາງກອກ,ເພື່ອຫຼີກເວັ້ນບໍ່ປະທະກັນກັບຜູ່ປະທ້ວງ.
ມື້ດຽວກັນ,ຜູ່ນຳກຸ່ມເສື້ອແດງ ກ່າວວ່າ,ວັນທີ23ມີນານີ້,ກຸ່ມເສື້ອແດງຈະໄປກະຊວງສາທາລະນະສຸກ,ສືບຕໍ່ເພີ່ມແຮງກົດດັນຕໍ່ທ່ານອະພິສິດເພື່ອຮຽກຮ້ອງໃຫ້ຍຸບສະພາຜູ່ແທນລາຊະດອນແລ້ວຈັດການເລືອກຕັ້ງຄືນໃໝ່.
